1. Yinki kesadisaka bisadi ya Yehova batatamana kusadila yandi atako bakena kukutana na mambu ya mpasi?

 BIBLIA kemonisaka bilumbu yayi beto kena kuzinga na yau lokola bantangu ya mpasi mpe ya mikakatano. (2 Tim. 3:1) Katula bampasi yina konso muntu kena kukutana na yau na yinza yayi, bisadi ya Yehova kena kukanga ntima na kutelemina mpe minioko. Yinki kesadisaka beto beto tatamana kusadila Yehova atako beto kena kukutana na mambu yango ya mpasi? Mosi ya diambu ya ngudi kele samu beto mezaba ti Yehova kele “Nzambi ya moyo.”​—Yer. 10:10; 2 Tim. 1:12.

2. Na yinki mutindu Yehova kele Nzambi ya moyo?

² Yehova kele mpenza Muntu yina kesadisaka beto ntangu beto kena kukutana na bampasi mpe yandi kesosaka maluaku ya kusala yau. (2 Bans. 16:9; Nk. 23:4) Kutadila yandi lokola Nzambi ya moyo lenda sadisa beto beto nunga konso mpasi yina lenda kumina beto. Beto tadila mutindu diambu yango monanaka kedika na Ntinu Davidi.

3. Yinki Davidi zolaka tuba ntangu yandi tubaka ‘Yehova kele na luzingu’?

³ Davidi zabaka Yehova mpe yandi vuandaka tudila Yandi ntima. Ntangu Ntinu Saulo mpe bantu yankaka vuandaka sosa kufua Davidi, Davidi sambilaka Yehova samu na kulomba lusadusu. (Nk. 18:6) Ntangu Nzambi pesaka mvutu na kisambu na yandi mpe yandi vukisaka yandi, Davidi tubaka: ‘Yehova kele na luzingu!’ (Nk. 18:46) Yinki Davidi zolaka tuba na kutubaka bampova yango? Mukanda mosi yina kesasilaka Biblia metuba ti Davidi vuandaka monisa Yehova “lokola Nzambi ya kedika yina kesadisaka ntangu nionso bisadi na yandi.” Ee, Davidi zabaka ti Nzambi na yandi zabaka mambu nionso yina vuandaka kumina yandi, mpe yandi vuandaka pene samu na kusadisa yandi. Yavuandaka kindisa Davidi samu yandi tatamana kusadila mpe kukumisa Yehova.​—Nk. 18:28, 29, 49.

4. Yinki mambote beto kebakaka kana beto kena kutadila Yehova lokola Nzambi ya moyo?

 ⁴ Kundima ti Yehova kele Nzambi ya moyo lenda sadisa beto samu beto sadila yandi na vema. Beto kevuanda na ngolo ya kukanga ntima na bampasi mpe yaketinda beto beto tatamana kusala ngolo na kisalu na yandi. Beto kevuanda diaka na nzengolo ya kubikana penepene ya Yehova.

NZAMBI YA MOYO KEPESA NGE NGOLO

5. Yinki lenda pesa beto kivuvu ntangu beto kena kukutana na mambu ya mpasi? (Bafilipi 4:13)

⁵ Beto kevuanda na dikoki ya kukanga ntima na konso mpasi yavuanda ya nene to ya fioti, kana beto kena kuzimbakana ve ti Yehova kele na luzingu, mpe yandi kevuandaka ntangu nionso vana samu na kusadisa beto. Samu na kutuba kedika, konso diambu ya mpasi yina beto kekutanaka na yau, lenda lutila ve Nzambi na beto. Yandi kele Nkua-ngolo nionso, mpe yandi lenda pesa beto kilendo ya kukanga ntima. (Tanga Bafilipi 4:13.) Yau kesalaka ti beto banga ve ntangu beto kena kukutana na mambu ya mpasi. Mpe ntangu beto kemonaka mutindu Yehova kena kusadisa beto beto kanga ntima na mambu ya mpasi ya fiotifioti, yakendimisaka beto ti yandi kesadisa beto diaka beto kanga ntima na mambu ya mpasi ya nene.

6. Yinki mambu ya mpasi Davidi kutanaka na yau ntangu yandi vuandaka ntuenia yina salaka ti yandi tudila diaka Yehova ntima mingi?

⁶ Beto tubila mambu zole yina salaka ti Davidi tudila diaka Yehova ntima mingi. Ntangu Davidi vuandaka ntuenia yina vuandaka tanina mameme, urse mpe nkosi nataka mosimosi kati na bau dimeme ya tata na yandi. Na mosimosi ya maluaku yango Davidi landaka bibulu yango na kibakala nionso mpe yandi vukisaka dimeme mosimosi. Kasi Davidi kanisaka ve ti yandi salaka yau na ngolo na yandi mosi. Yandi zabaka ti Yehova nde pesaka yandi kilendo ya kusala yau. (1 Sam. 17:34-37) Davidi salaka zimbakana ata fioti ve mambu yango. Kukanisa na mpinda na zulu na yau vuandaka sala yandi tula ntima ti Nzambi ya moyo kepesa yandi ngolo na bilumbu kena kuiza.

7. Na yinki diambu Davidi vuandaka tula makanisi na yandi, mpe samu na yinki yasadisaka yandi yandi nuanisa Goliati?

⁷ Na manima ntangu Davidi vuandaka kaka ntuenia, yandi kuendaka tala kan ya basoda ya Bayisaele. Yandi kutaka basoda kena kubanga samu na Mufilistia mosi ya kuzangama na nkumbu ya Goliati yina kuizaka ‘sokosa kimvuka ya basoda ya Yisaele.’ (1 Sam. 17:10, 11) Basoda vuandaka banga samu bavuandaka tula dikebi na kuzangama ya Goliati mpe na mambu yina yandi tubilaka bau. (1 Sam. 17:24, 25) Kasi Davidi vuandaka tadila diambu yango na mutindu yankaka. Davidi zabaka ti ntangu Goliati vuandaka sokosa basoda ya Yisaele, yandi vuandaka finga nde “Nzambi ya moyo.” (1 Sam. 17:26) Davidi vuandaka kanisa Yehova. Davidi vuandaka tula ntima ti Nzambi yina sadisaka yandi ntangu yandi vuandaka mvungi ya mameme, kesadisa yandi diaka na mbala yayi. Lokola yandi zabaka ti Nzambi kesadisa yandi, Davidi nuanisaka Goliati mpe yandi nungaka!​—1 Sam. 17:45-51.

8. Yinki mutindu beto lenda tanina Yehova na makanisi na beto ntangu beto kena kukutana na mambu ya mpasi? (Tala diaka foto.)

⁸ Beto diaka beto lenda nunga mambu ya mpasi kana beto kena kuzimbakana ve ti Nzambi ya moyo kele pene ya kusadisa beto. (Nk. 118:6) Beto lenda kumisa ngolo kikadulu na beto ya kutula ntima ti Yehova kesadisa beto kana beto mekanisa mambu yina yandi sadilaka beto na ntama. Tanga masolo ya Biblia yina kebambulaka nge mutindu Yehova vukisaka bisadi na yandi. (Yez. 37:17, 33-37) Diaka, tanga to tala masolo na site na beto jw.org yina kena kumonisa mutindu Yehova sadisaka bampangi na beto ya babakala mpe ya banketo ya bubu yayi. Katula yau, kanisa ntangu yina Yehova salaka diambu  mosi samu na nge. Mbala yankaka nge kekukimoka ti Yehova sadila nge ntete ve diambu mosi ya kukamua lokola kuvukisa nge na nkosi to na urse. Diambu ya kedika kele ti, Yehova mesadilaka nge mambu mingi na luzingu na nge! Yandi bokilaka nge samu nge kuma nkundi na yandi. (Yoa. 6:44) Ata tii bubu yayi, yakele samu na lusadusu na yandi nde nge kena kutatamana kusadila yandi. Na yau, lomba Yehova sadisa nge nge bambuka na ntangu yina yandi pesaka mvutu na bisambu na nge, yandi pesaka nge mpenza yina nge vuandaka na yau nsatu na ntangu yina mebonga, to yandi sadisaka nge na ntangu mosi ya mpasi. Kukanisa mambu yango kekumisa ngolo kikadulu na nge ya kutula ntima ti Yehova ketatamana kusadisa nge.

9. Yinki mutindu beto lenda tadila bampasi na beto? (Bingana 27:11)

⁹ Kutadila Yehova lokola Muntu ya moyo, kesadisa beto beto tadila bampasi na beto na mutindu ya mbote. Na yinki mutindu? Ntangu beto kena kukutana na mambu ya mpasi, beto fueti tula makanisi na diambu yina meluta mfunu. Diabulu ketubaka ti kana beto kena kukutana na mambu ya mpasi, beto kebika Yehova. Na yau mambu yina beto kesalaka ntangu beto kena kukutana na mambu ya mpasi, kele na bupusi na banguilu ya Yehova. (Yobi 1:10, 11; tanga Bingana 27:11.) Ntangu beto kena kubikana ya kukuikama na Yehova atako beto kele na bampasi, beto kemonisaka ti beto kezolaka Yehova mpe beto kemonisaka ti Diabulu kele muntu ya luvunu. Nge kena kukutana na kutelemina ya guvernema, nge kele na mikakatano ya mbongo, bantu nge kena kusamunina kena kusepela ve na nsangu ya mbote, to nge kena kukutana na diambu yankaka ya mpasi? Kana yakele mutindu yina, kuzimbakana ve ti diambu yango kena kupesa nge diluaku ya kusepedisa ntima ya Yehova. Zaba diaka ti yandi kebika ve nge kutana na kumekama yina nge lenda kangila ve ntima. (1 Bak. 10:13) Yandi kepesa nge ngolo samu nge kanga ntima.

NZAMBI YA MOYO KEPESA NGE N’SENDO

10. Yinki Nzambi ya moyo kesalaka samu na bantu yina kesadilaka yandi?

¹⁰ Yehova kele Muntu yina kepesaka ntangu  nionso n’sendo na bantu yina kesambilaka yandi. (Baeb. 11:6) Yandi kena kusadisa beto beto sepela na yina beto kele na yau bubu yayi, yandi kena kupesa beto kiyenge, mpe yandi kepesa beto luzingu ya mvula na mvula na bilumbu kena kuiza. Beto lenda tudila Yehova kivuvu samu beto mezaba ti yandi kele na nsatu mpe kilendo ya kupesa beto n’sendo. Samu na mfunu yango, beto kena kutatamana kusala nionso yina beto lenda na nsambudulu na beto, kaka mutindu bisadi na yandi ya ntama salaka. Yau nde diambu Timote salaka.​—Baeb. 6:10-12.

11. Yinki tindaka Timote na kusala kisalu ya ngolo na kimvuka? (1 Timoteo 4:10)

¹¹ Tanga 1 Timoteo 4:10. Timote vuandaka na kivuvu ya ngolo ti Nzambi kepesa yandi n’sendo. Samu na yau, yandi vuandaka sala kisalu ya ngolo samu na Yehova mpe bantu yankaka. Na yinki mitindu? Ntumua Paulo kindisaka yandi yandi kudisa makoki na yandi ya kulonga mpe ya kutuba na ntuala ya bantu. Paulo tubilaka yandi diaka ti yandi vuanda kifuani ya mbote samu na bampangi na yandi Baklisto, yavuanda bantuenia mpe bambuta. Mpe bapesaka yandi biyekua yankaka ya mpasi, na kifuani kupesa malongi ya ngolo kasi ya nzola na bantu yina vuandaka na nsatu na yau. (1 Tim. 4:11-16; 2 Tim. 4:1-5) Na bantangu yankaka bantu yankaka vuandaka mona ve kisalu yina Timote vuandaka sala to bavuandaka na butondi ve samu na yau, kasi yandi vuandaka kukindimisa ti Yehova kepesa yandi n’sendo.​—Bar. 2:6, 7.

12. Yinki lenda tinda bankulutu bavuanda na mingi ya kusala na kisalu na bau? (Tala diaka foto.)

¹² Bubu yayi, bankulutu diaka lenda kukindimisa ti Yehova kemonaka mpe kebakaka na mfunu kisalu na bau ya mbote. Katula kisalu na bau ya bamvungi, ya kulonga, mpe ya kusamuna, bankulutu mingi kepesaka maboko na baproje ya kutunga mpe kana bisumbula mebima. Bayankaka kesalaka na Bagrupe yina kekuendaka tala bantu ya maladi to na Bakomite samu na kusolola na minganga. Bankulutu kezabaka ti kimvuka kele ya Yehova, kasi ya muntu ve. Na  yau bakekokisaka biyekua yango na muela na bau ya mvimba mpe baketulaka mpenza ntima ti Nzambi kepesa bau n’sendo samu na mambu yina bakena kusala.​—Bakol. 3:23, 24.

13. Yinki mutindu Yehova kekukimonaka na bangolo yina beto kesalaka na kisalu na yandi?

¹³ Muntu nionso ve lenda vuanda nkulutu. Kasi beto nionso beto kele na kima mosi ya kupesa Yehova. Nzambi na beto kesepelaka ntangu beto kena kusala nionso yina beto lenda samu na kusadila yandi. Yandi kemonaka ntangu beto kepesaka maboko samu na kusala kisalu yina kena kusalama na yinza ya mvimba, ata kana beto kele ve na dikoki ya kusala mingi. Yandi kevuandaka na kiese ntangu beto kesalaka ngolo samu na kununga nsoni na beto mpe kumonisa musapi samu na kupesa komantere na balukutakanu, mpe ntangu beto kenlemvukilaka muntu yina kena kusala beto mpasi. Ata kana nge kena kumona ti nge lenda sala diaka mingi ve mutindu nge zodila, ndima ti Yehova kebakaka na valere yina nge kele na dikoki ya kusala. Yandi kezolaka nge samu na yau, mpe yandi kepesa nge n’sendo.​—Luka 21:1-4.

BIKANA PENEPENE YA NZAMBI YA MOYO

14. Na yinki mutindu kubikana penepene ya Yehova kesadisaka beto beto bikana ya kukuikama? (Tala diaka foto.)

¹⁴ Kana Yehova kele mpenza muntu ya kedika samu na beto, yakevuanda pete samu na beto na kubikana ya kukuikama na yandi. Diambu yango monanaka kedika na Yozefi. Yandi mangaka kusala pite. Nzambi vuandaka muntu ya kedika samu na yandi, mpe yandi mangaka kusala diambu yina kesepedisa Yandi ve. (Kuy. 39:9) Samu Yehova vuanda muntu ya kedika samu na beto, beto fueti baka ntangu ya kusambila yandi mpe kulonguka Mpova na yandi. Kinkundi na beto na yandi kekula. Mutindu mosi na Yozefi ntangu beto kele na kinkundi ya penepene na Yehova, beto kemanga kusala diambu yina kesepedisa Yandi ve.​—Yak. 4:8.

15. Yinki dilongi beto lenda baka na mambu yina kuminaka Bayisaele na dezere? (Baebreo 3:12)

¹⁵ Bantu yina kezimbakanaka ti Yehova kele Nzambi ya moyo lenda kondua kumonisa ti bakele ya kukuikama na yandi na pete nionso. Beto tadila mambu yina kuminaka Bayisaele  ntangu bavuandaka na dezere. Bazabaka ti Yehova kele, kasi babandaka kutula ntembe ti yandi kekokisa bansatu na bau. Bayuvusaka kutu: ‘Yehova kele na kati na beto to ve?’ (Kub. 17:2, 7) Yau salaka ti batombokila Nzambi. Kondua ntembe beto fueti manga kulanda kifuani na bau ya kukondua luzitu.​—Tanga Baebreo 3:12.

16. Yinki lenda meka kiminu na beto?

¹⁶ Yinza kena kusala ti yavuanda mpasi samu na beto kubikana penepene ya Yehova. Bantu mingi kendimaka ve ti Nzambi kele. Mbala mingi yakemonanaka ti bantu yina kezitisaka ve mambu yina Nzambi kelombaka kevuandaka na luzingu ya mbote. Kana beto kena kumona mambu ya mutindu yina, kiminu na beto lenda mekama. Atako beto kendimaka ti Nzambi kele, beto lenda banda kutula bantembe ti yandi kesadisa beto. Na ntangu mosi nsoniki ya Nkunga 73 kukimonaka mutindu yina. Yandi vuandaka mona bantu yina vuandaka zitisa ve bansiku ya Nzambi nzinganzinga na yandi, kasi bavuandaka na luzingu ya kiese. Yau salaka yandi banda kukiyuvusa kana yavuandaka na mfunu kusadila Nzambi.​—Nk. 73:11-13.

17. Yinki kesadisa beto beto bikana penepene ya Yehova?

¹⁷ Yinki sadisaka nsoniki ya nkunga samu yandi soba makanisi na yandi? Yandi yindulaka na mpinda na zulu ya mambu yina kekumina bantu yina kezimbakanaka Yehova. (Nk. 73:18, 19, 27) Yandi tadilaka diaka mambote yina kebimaka kana beto kena kusadila Nzambi. (Nk. 73:24) Beto diaka beto lenda kanisa na zulu ya balusakumunu yina Yehova pesaka beto. Mpe kanisa mutindu luzingu na beto zolaka vuanda kana beto vuandaka sadila Yehova ve. Kana beto kena kuzimbakana ve mfunu yina yakele mbote samu na beto na kusadila Yehova, yakesadisa beto beto bikana ya kukuikama na yandi mpe mutindu mosi na nsoniki ya nkunga beto ketuba: ‘Samu na munu, kupusana penepene ya Nzambi kele mbote.’​—Nk. 73:28.

18. Samu na yinki beto fueti banga ve bilumbu kena kuiza?

¹⁸ Beto lenda nunga mambu ya mpasi ya mitindu nionso na bilumbu yayi ya nsuka samu beto ‘kesadilaka Nzambi ya moyo mpe ya kedika lokola bananga.’ (1 Bate. 1:9) Nzambi na beto kele mpenza Muntu yina kesalaka samu na mambote ya bantu yina kesadilaka yandi. Yandi monisaka ti yandi vuandaka kintuadi na bisadi na yandi ya ntama, mpe yandi kele kintuadi na beto bubu yayi. Ntama mingi ve beto kekutana na mpasi ya nene yina kesalama na ntoto. Kasi beto kevuanda beto mosi ve. Yehova kevuanda kintuadi na beto. (Yez. 41:10) Bika beto nionso beto “vuanda na kibakala mingi mpe [beto] tuba ti: ‘Yehova kele nsadisi na munu; munu kebanga ve.’”​—Baeb. 13:5, 6.