DISOLO YA NDONGOKOLO 40
MUYIMBU 30 Tata na ngai, Nzambe na ngai, mpe moninga na ngai
Yehova “kebelusaka bantu yina meluala na ntima”
“Yandi kebelusaka bantu yina meluala na ntima; yandi kekangaka bamputa na bau.”—NZ. 147:3.
MAMBU YINA BETO KELONGUKA
Yehova ketulaka dikebi mingi na bantu yina kena kuniokuama na makanisi. Disolo yayi kemonisa mutindu yandi kebombaka beto ntangu beto kena kukitungisa mpe mutindu yandi kesadisaka beto samu beto bomba bantu yankaka.
1. Yinki mutindu Yehova kekukimonaka samu na bisadi na yandi?
YINKI Yehova kemonaka ntangu yandi ketalaka bisadi na yandi na ntoto? Yandi mezaba kiese mpe bampasi na beto. (Nz. 37:18) Ntangu yandi kemonaka ti beto kena kusadila yandi na makoki na beto nionso atako beto kena kunuana na mitungisi ya makanisi, yandi kevuandaka na kiese! Diambu ya mfunu kuluta, yandi kevuandaka na nsatu ya ngolo ya kusadisa beto mpe ya kubomba beto.
2. Yinki Yehova kesalaka samu na bantu yina meluala na ntima, mpe yinki mutindu beto lenda bakila lusadusu na yandi mambote?
2 Nzembo 147:3 metuba ti Yehova “kekangaka bamputa” ya bantu yina meluala na ntima. Verse yango kemonisaka mutindu Yehova kesadisaka bantu yina kena kukitungisa. Yinki beto fueti sala samu beto baka mambote na mitindu nionso yina Yehova ketudilaka beto dikebi? Beto tadila kifuani mosi. Munganga ya makoki lenda sala mambu mingi samu na kusadisa muntu mosi yina meluala samu yandi beluka. Kasi, samu muntu yango yina meluala beluka, yandi fueti zitisa mbotembote malako ya munganga. Na disolo yayi, beto kemona mambu yina Yehova metuba na Mpova na yandi samu na bantu yina kena kuniokuama na makanisi mpe beto kemona mutindu ya kusadila malongi na yandi ya nzola.
YEHOVA KENDIMISAKA BETO TI BETO KELE NA VALERE
3. Samu na yinki bantu yankaka kekukimonaka ti bakele ve na valere?
3 Beto kena kuzinga na yinza mosi yina mekondua nzola, mpe diambu ya kiadi, bantu mingi na yinza kezolaka ve bantu yankaka. Yakesalaka ti baniokola bau mpe basala ti bakukimona lokola bakele ve na valere. Mpangi mosi ya nketo na nkumbu ya Helen a metuba: “Munu yundukaka na dibuta mosi yina mekondua nzola. Tata na munu vuandaka muntu ya kinkesi mpe yandi vuandaka tubila beto ntangu nionso ti beto kele ve na valere.” Mutindu mosi na Helen, mbala yankaka bavuandaka niokola nge, kuvueza nge ntangu nionso, to kusala ti nge kukimona lokola nge kele ve na valere. Kana yakele mutindu yina, yalenda vuanda mpasi samu nge ndima ti muntu mosi ketudilaka nge dikebi na mutindu ya kedika.
4. Na kutadila Nzembo 34:18, yinki lukindusu Yehova mepesa beto?
4 Ata kana bantu yankaka vuandaka niokola nge, nge lenda kukindimisa ti Yehova kezolaka nge mpe yandi kebakaka nge na valere. Yandi ‘kele pene ya bantu yina bantima metoluka.’ (Tanga Nzembo 34:18.) Kana nge kena kumona ti nge ‘melemba nzutu,’ kuzimbakana ve ti Yehova kemonaka mambu ya mbote yina kele na ntima na nge mpe yandi mosi bendaka nge penepene na yandi. (Yoa. 6:44) Yandi kevuandaka ntangu nionso pene ya kusadisa nge samu nge kele na mfunu na meso na yandi.
5. Yinki malongi beto lenda baka na mutindu Yesu sadilaka mambu na bantu yina vuandaka kukimona ti bakele ve na valere mingi?
5 Beto lenda longuka banguilu ya Yehova na kutadilaka kifuani ya Yesu. Ntangu Yesu vuandaka na ntoto, yandi vuandaka tula dikebi mpe kumonisa ntima kiadi na bantu yina bantu yankaka vuandaka mona mpamba. (Mat. 9:9-12) Ntangu nketo mosi yina vuandaka na nsatu ya kubeluka na maladi mosi ya ngolo simbaka kinkuti na yandi, Yesu bombaka yandi mpe yandi pesaka yandi felisitasion samu na kiminu na yandi. (Mrk. 5:25-34) Yesu monisaka kimuntu ya Tata na yandi na mutindu ya kukoka. (Yoa. 14:9) Na yau, nge lenda kukindimisa ti Yehova kebakaka nge na valere mpe yandi kemonaka bikadulu na nge ya mbote, na kifuani kiminu mpe nzola na nge samu na yandi.
6. Yinki nge lenda sala kana nge kena kukimona ti nge kele ve na valere?
6 Yinki nge lenda sala kana nge kena tatamana kumona ti nge kele ve na valere? Tanga baverse ya Biblia yina kendimisa nge ti nge kele na valere na meso ya Yehova mpe yindula na mpinda na zulu ya baverse yango. b (Nz. 94:19) Kana nge nunga ve kukokisa lukanu mosi to nge melemba nzutu samu nge kele ve na makoki ya kusala mingi lokola bantu yankaka, kutula ve makanisi na nge na mambu yina nge kele ve na makoki ya kusala. Yehova kelombaka beto ve beto sala mambu yina beto kele ve na dikoki ya kusala. (Nz. 103:13, 14) Kana bameniokolaka nge na ntama na nzutu, na makanisi, to bamesangisaka na nge nzutu na kingolo, kukipesa ve foti samu na mambu yina basalaka nge. Kuzimbakana ve ti Yehova kesambisa bantu yina keniokolaka bantu yankaka, kasi yandi kesadisaka bantu yina bakeniokolaka. (1 Pe. 3:12) Sandra, yina bavuandaka sadila mambu na kinkesi ntangu yandi vuandaka muana fioti metuba: “Munu vuandaka lomba Yehova mbala na mbala yandi sadisa munu munu mona bikadulu ya mbote yina yandi kemonaka na munu.”
7. Yinki mutindu beto lenda sadila mambu yina beto mekutanaka na yau na ntama na kisalu na beto samu na Yehova?
7 Kutula ve ntembe ti Yehova lenda sadila nge samu na kusadisa bantu yankaka. Yandi mepesa nge lokumu ya kusala kintuadi na yandi na kisalu ya kusamuna. (1 Ko. 3:9) Kondua ntembe mambu yina nge mekutanaka na yau na luzingu lenda sadisa nge samu nge koka kukitula na kisika ya bantu yankaka mpe nge bakusa mpenza mutindu bakena kukimona. Nge lenda sala mambu mingi samu na kusadisa bau. Helen, yina beto tubilaka na paragrafe 3, bakaka lusadusu mpe bubu yayi yandi kele na dikoki ya kusadisa bantu yankaka. Yandi metuba: “Munu vuandaka kukimona ti munu kele na valere ve. Kasi Yehova salaka munu mona ti bakezolaka munu mpe yandi sadilaka munu samu na kusadisa bantu yankaka.” Helen kele na kiese ya kusala lokola mpasudi nzila ya ngonda na ngonda.
YEHOVA KEZOLAKA TI BETO NDIMA NLEMVO NA YANDI
8. Yinki Yehova metubila beto na Yisaya 1:18?
8 Bisadi ya Yehova yankaka kekukitungisaka mingi samu na mambu ya yimbi yina bamesalaka na ntama, yavuanda tekila to na manima ya mbotama na bau. Kasi yakele mbote beto zimbakana ve ti Yehova pesaka nkudulu samu yandi kezolaka beto mingi mpenza. Ya kedika, yandi kele na nsatu beto ndima dikabu ya nkudulu. Yehova kena kundimisa beto ti na manima ya “kubongisa mambu” c na yandi, yandi ketatamana ve kusadila beto mambu na kutadila masumu yina beto salaka. (Tanga Yisaya 1:18.) Beto kele na butondi mpenza samu Tata na beto ya nzola, Yehova kezimbakanaka masumu yina beto mesalaka na ntama! Mpe kaka na ntangu yango, yandi kezimbakanaka ve mambu ya mbote yina beto salaka.—Nz. 103:9, 12; Ebr. 6:10.
9. Samu na yinki beto fueti sala nionso yina beto lenda samu na kutula makanisi na beto na mambu yina beto kena kusala bubu yayi mpe yina beto kesala na bilumbu kena kuiza?
9 Kana nge kena kukitungisa samu na mambu ya yimbi yina nge salaka na ntama, sala nionso yina nge lenda samu na kutula makanisi na nge na mambu yina nge kena kusala bubu yayi mpe na mambu yina nge kele na dikoki ya kusala na bilumbu kena kuiza. Beto tadila kifuani ya ntumua Paulo. Yandi niongaka mutindu yandi niokolaka ngolo Baklisto, kasi yandi zabaka ti Yehova nlemvukilaka yandi. (1 Tim. 1:12-15) Na manima, yandi tatamanaka kukanisa na masumu yina yandi salaka na ntama? Kondua ntembe yandi mangaka kusala mutindu yina, yandi mangaka diaka kukanisa mambu yina yandi salaka na ntama ntangu yandi vuandaka na dibundu ya Bayuda. (Flp. 3:4-8, 13-15) Kutu, Paulo tatamanaka kukokisa kiyekua na yandi ya kusamuna na vema nionso mpe yandi tatamanaka kutula makanisi na yandi na bilumbu kena kuiza. Mutindu mosi na Paulo, nge lenda soba ve mambu yina nge salaka na ntama. Kasi nge lenda kumisa Yehova mpe nge lenda sepedisa yandi bubu yayi. Nge lenda kanisa na luzingu ya mbote yina yandi melaka nge na bilumbu kena kuiza.
10. Yinki beto lenda sala kana mambu yina beto salaka na ntama luadisaka bantu yankaka?
10 Nge lenda kukitungisa samu na mambu ya yimbi yina nge salaka na ntama yina luadisaka bantu yankaka. Yinki lenda sadisa nge? Sala nionso yina nge lenda samu na kubongisa mambu, mpe lomba nlemvo na bantu yina nge salaka yimbi. (2 Ko. 7:11) Lomba Yehova sadisa bantu yina nge luadisaka na mambu yina nge salaka. Yandi lenda sadisa nge mpe bantu yina nge luadisaka na kukanga ntima mpe na kubaka diaka kiyenge.
11. Yinki dilongi beto lenda baka na kifuani ya mbikudi Yona? (Tala diaka ya kuvertire.)
11 Baka malongi na banzimbala na nge ya ntama, mpe bika Yehova sadila nge na mutindu yina yandi kemona mbote. Beto tadila kifuani ya mbikudi Yona. Na kisika Yona kuenda na Ninive mutindu Nzambi pesaka yandi ntumu, yandi kuendaka na kisika yankaka. Yehova pesaka yandi disiplini, mpe Yona bakaka malongi na nzimbala na yandi. (Yona 1:1-4, 15-17; 2:7-10) Yehova sundolaka ve Yona. Nzambi pesaka yandi diluaku yankaka ya kukuenda na Ninive, mpe ntangu yayi yandi zitisaka mbala mosi. Yandi bikaka ve ti nzimbala na yandi ya ntama pekisa yandi kundima kiyekua yina Yehova pesaka yandi.—Yona 3:1-3.
Ntangu mbikudi Yona vukaka na kivumu ya mbizi ya nene, Yehova tubilaka yandi diaka yandi kuenda na Ninive mpe yandi samuna nsangu na Yandi (Tala paragrafe 11)
YEHOVA KEBOMBAKA BETO NA NZILA YA MPEVE YA NLONGO
12. Yinki mutindu Yehova kepesaka beto kiyenge ntangu diambu mosi ya mpasi mekumina beto? (Bafilipi 4:6, 7)
12 Na nzila ya mpeve ya nlongo na yandi, Yehova kebombaka beto ntangu diambu mosi ya mpasi mpenza mekumina beto. Beto tadila kifuani ya Ron mpe Carol. Diambu ya mpasi, muana na bau ya bakala kukivondaka. Bametuba: “Beto mekutanaka deja na mambu ya mpasi, kasi yayi yavuandaka diambu ya mpasi kuluta. Bampipa mingi beto vuandaka koka ve kuleka, na yau beto vuandaka sambila Yehova, mpe beto vuandaka mona mpenza kiyenge yina Biblia metubila na Bafilipi 4:6, 7.” (Tanga.) Kana nge kena kukitungisa samu na diambu mosi ya mpasi yina mekumina nge, tubila Yehova mutindu nge kena kukimona mpenza. Nge lenda solola na yandi mbala nionso mpe ntangu nionso yina nge zola. (Nz. 86:3; 88:1) Lomba Yehova mbala na mbala yandi pesa nge mpeve ya nlongo na yandi. Yandi kekuwa nge mpe yandi kesadisa nge ntangu nionso.—Luka 11:9-13.
13. Yinki mutindu mpeve ya nlongo kesadisaka beto samu beto tatamana kusadila Yehova na kukuikama nionso? (Baefese 3:16)
13 Nge melemba nzutu samu na nzomono mosi yina nge kutanaka na yau? Mpeve ya nlongo lenda pesa nge kilendo samu nge tatamana kusadila Yehova na kukuikama nionso. (Tanga Baefese 3:16.) Beto tadila kifuani ya mpangi mosi ya nketo na nkumbu ya Flora. Yandi mpe bakala na yandi vuandaka sala lokola bamisionere ntangu bakala na yandi sadilaka yandi diambu mosi ya kukondua kukuikama, mpe bakufuaka dikuela na bau. Yandi metuba: “Munu vuandaka kukimona mpenza yimbi samu na diambu yina yandi salaka munu. Munu sambilaka Yehova samu yandi pesa munu mpeve ya nlongo na yandi samu munu tatamana kusadila yandi. Yehova pesaka munu yina munu vuandaka na yau nsatu samu munu kukimona mbote mpe munu nunga diambu yina na ebandeli vuandaka monana lokola munu lenda nunga ve.” Flora monaka ti Nzambi sadisaka yandi samu yandi tudila yandi diaka ntima mingi mpe yandi ndimaka ti Yehova kesadisa yandi diaka na banzomono nionso yina yandi kekutana yau. Yandi mebuela: “Bampova yina kele na Nzembo 119:32 kena kumonisa mbote mutindu Yehova sadisaka munu: ‘Munu kelanda mpenza nzila ya bantumu na nge samu nge mezibula ntima na munu.’”
14. Yinki mutindu beto lenda bika mpeve ya Nzambi sadisa beto?
14 Na manima ya kulomba Yehova yandi pesa nge mpeve ya nlongo, yinki nge fueti sala? Kukipesa na bisalu yina kesala ti mpeve ya Nzambi sala kati na nge. Na kifuani, kukutakana na balukutakanu mpe kusamuna. Fulusa makanisi na nge na makanisi ya Yehova na kutangaka Mpova na yandi konso kilumbu. (Flp. 4:8, 9) Ntangu nge kena kutanga, tula dikebi na bantu yina Biblia metubila yina kutanaka na banzomono, mpe yindula na mpinda na mutindu Yehova sadisaka bau samu bakanga ntima. Sandra, yina beto tubilaka na baparagrafe yina meluta, niokuamaka samu yandi kutanaka na mambu mingi ya mpasi na luzingu na yandi. Yandi metuba: “Disolo ya Yozefi simbaka mpenza ntima na munu. Yandi bikaka ve ti banzomono mpe mambu ya kukondua lunungu yina yandi kutanaka na yau lembisa nguizani na yandi na Yehova.”—Eba. 39:21-23.
YEHOVA KEBOMBAKA BETO NA NZILA YA BAMPANGI NA BETO BAKLISTO
15. Banani lenda bomba beto, mpe yinki mutindu balenda sadisa beto? (Tala diaka foto.)
15 Ntangu beto kena kuniokuama, bampangi na beto Baklisto lenda kuma bantu yina ‘kebombaka mpenza.’ (Kol. 4:11) Bampangi na beto kele kidimbu yina kena kumonisa mpenza ti Yehova kezolaka beto. Balenda bomba beto na kuwaka beto na dikebi nionso, to balenda sadisa beto na nzila ya baviziti na bau. Balenda kindisa beto na nzila ya verse mosi ya Biblia to balenda sala kisambu kintuadi na beto. d (Rom. 15:4) Na bantangu yankaka, mpangi mosi lenda bambula beto makanisi ya Yehova mpe yandi lenda sadisa beto samu beto tatamana kukanga ntima. Bampangi yango lenda pesa beto diaka lusadusu ya kinsuni, na kifuani balenda pesa beto madia samu beto kukimona mbote kuluta.
Bankundi ya kuyela mpe yina beto lenda tudila ntima, lenda bomba mpe lenda sadisa beto mingi (Tala paragrafe 15)
16. Yinki yalenda lomba beto sala samu na kubaka lusadusu ya bantu yankaka?
16 Samu beto baka lusadusu ya bantu yankaka, yalenda lomba beto lomba yau. Bampangi na beto kezolaka beto mpe bakevuandaka na nsatu ya kusadisa beto. (Mas. 17:17) Kasi mbala yankaka balenda zaba ve mutindu beto kena kukimona to balenda zaba ve nsatu na beto. (Mas. 14:10) Kana nge kena kukitungisa na makanisi, vuanda pene ya kutubila banguilu na nge na bankundi na nge Baklisto yina kele ya kuyela na kimpeve. Tubila bau mambu yina balenda sala samu na kusadisa nge. Nge lenda pona kutubila mambu yina kena kutungisa nge na nkulutu mosi to na bankulutu zole yina nge memesanaka kusolola na bau. Bampangi yankaka ya banketo kemonaka mbote kusolola na mpangi yankaka ya nketo yina kele ya kuyela na kimpeve.
17. Yinki kele ndambu ya mambu ya mpasi yina lenda pekisa beto beto baka lukindusu, mpe yinki mutindu beto lenda nunga yau?
17 Kukivambulaka ve na bampangi. Kana nge kena kuniokuama na makanisi, mbala yankaka yalenda sala ti nge bika vuanda na nsatu ya kusolola na bantu yankaka. Na bantangu yankaka, bampangi lenda bakusa nge ve to balenda tuba bampova yina bonga ve. (Yak. 3:2) Kubika ve mambu yango ya mpasi pekisa nge kubaka lukindusu yina nge kele na yau nsatu. Nkulutu mosi na nkumbu ya Gavin, yina kebelaka maladi ya kuniokuama na makanisi, metuba: “Mbala mingi munu kevuandaka ve na nsatu ya kusolola to ya kulutisa ntangu kintuadi na bankundi na munu.” Kasi, Gavin kesalaka ngolo samu na kulutisa ntangu kintuadi na bampangi na yandi. Mpe mbala mingi yandi kukimonaka mbote na manima ya kusala mutindu yina. Mpangi mosi ya nketo na nkumbu ya Amy metuba: “Samu na mambu ya mpasi yina munu mekutanaka na yau na ntama, yakevuandaka mpasi samu munu tudila bantu yankaka ntima. Kasi munu kena kulonguka kuzola mpe kutudila bampangi na munu ntima mutindu Yehova kesalaka yau. Munu mezaba ti yakesepedisaka Yehova mpe munu mosi.”
BANSILULU YA NZAMBI SAMU NA BILUMBU KENA KUIZA LENDA BOMBA BETO
18. Yinki beto lenda vingila na nsatu ya ngolo na bilumbu kena kuiza, mpe yinki beto lenda sala bubu yayi?
18 Beto lenda ndima ti mambu kevuanda mbote na bilumbu kena kuiza, na kuzabaka ti ntama mingi ve, Yehova kekatula mvimbamvimba mambu nionso yina ketungisaka beto na nzutu mpe na makanisi. (Em. 21:3, 4) Na ntangu yango, mambu ya mpasi yina beto mekutanaka na yau ‘kekuiza [diaka] ve na ntima.’ (Yis. 65:17) Mutindu beto melonguka yau, ata bubu yayi Yehova ‘kekangaka bamputa na beto.’ Baka mambote mingi na bankubukulu ya nzola ya Yehova samu na kubomba nge mpe kupesa nge kiyenge. Kuvuanda na ntembe ata fioti ve ti “yandi ketudilaka [nge] dikebi.”—1 Pe. 5:7.
MUYIMBU 7 Yehova azali makasi na biso
a Beto mepesa bau bankumbu yankaka.
b Tala ankadre “ Yehova kebakaka nge na valere.”
c Samu na “kubongisa mambu” na Yehova, beto fueti monisa ti beto mebalula ntima na kulombaka yandi nlemvo samu na masumu na beto mpe na kusobaka bikadulu na beto. Kana beto salaka disumu mosi ya nene, beto fueti lomba diaka lusadusu ya bankulutu ya kimvuka.—Yak. 5:14, 15.
