1-2. Yinki kele mosi ya mambu yina kele mfunu samu na Yehova, mpe yinki yandi kezolaka beto sala?

 MUTINDU beto kesadilaka bantu yankaka mambu kevuandaka mpenza na mfunu samu na Yehova. Yesu longaka ti beto fueti zola bafinangani na beto mutindu beto kekukizolaka. (Mat. 22:37-39) Yamesangisa kuvuanda na kimpombo ata na bantu yina kesadilaka ve Yehova. Ntangu beto kemonisaka kimpombo yango, beto kelandaka kifuani ya Yehova Nzambi, yina “kebimisaka muini na yandi samu na bantu ya yimbi mpe bantu ya mbote mpe yandi kenokisaka mvula samu na bantu ya lunungu mpe bantu yina mekondua lunungu.”​—Mat. 5:45.

² Atako Yehova kezolaka bantu nionso, yandi kezolaka mingimingi bantu yina kesalaka mambu ya mbote. (Yoa. 14:21) Yandi kezolaka beto landa kifuani na yandi. Na yau, yandi mekindisa beto beto “zolanaka ngolo” na bampangi na beto mpe beto “zolanaka na ntima.” (1 Pe. 4:8; Rom. 12:10) Nzola yango kevuandaka mutindu mosi na mutindu yina beto kekukimonaka samu na mpangi mosi ya dibuta yina beto kezolaka to samu na nkundi mosi ya ntima.

3. Yinki beto fueti zimbakana ve samu na nzola?

³ Nzola kele lokola flere, yakelombaka kutanina yau mbote samu yakula. Ntumua Paulo pesaka Baklisto dilongi yayi: “Beno tatamana kuzolana mutindu bampangi kezolanaka.” (Ebr. 13:1) Yehova zola ti beto tatamana kukudisa nzola na beto samu na bantu yankaka. Na disolo yayi beto ketubila mfunu ya kupusana penepene ya bampangi na beto Baklisto mpe mutindu beto lenda tatamana kusala yau.

 MFUNU YA KUPUSANA PENEPENE YA BAMPANGI NA BETO BAKLISTO

4. Mutindu Nzembo 133:1 memonisa yau, yinki mutindu beto lenda tatamana kubaka bumosi na beto ya kimpangi na valere? (Tala diaka bafoto.)

⁴ Tanga Nzembo 133:1. Beto kendimaka bampova ya nsoniki ya nkunga yina sonikaka ti kinkundi ya kedika na bantu yina kezolaka Yehova kele “mbote” mpe “kiese.” Kasi mutindu kaka muntu lenda kondua kutula dikebi na yinti mosi ya kitoko yina yandi kemonaka konso kilumbu, beto lenda kondua kutula dikebi na kitoko ya bumosi na beto ya Buklisto. Beto kemonaka mbala na mbala bampangi na beto, ntangu yankaka mbala mingi na sabala. Yinki mutindu beto lenda tatamana kubaka bau na valere? Nzola na beto samu na bampangi na beto kekula kana beto kena kubaka ntangu ya kukanisa na mfunu yina konso muntu kele na yau na kimvuka mpe na beto.

5. Yinki bupusi nzola na beto ya kimpangi lenda vuanda na yau na bantu yankaka?

⁵ Bantu yankaka yina kuizaka samu na mbala ya ntete na balukutakanu na beto kekamuaka mpenza na nzola yina beto kemonasanaka. Na nzila ya nzola yango, balenda kukindimisa ti bamemona kedika. Yesu tubaka: “Na mutindu yango bantu nionso kezaba ti beno kele banlonguki na munu: kana beno kele na nzola na kati na beno.” (Yoa. 13:35) Beto tadila kifuani ya Chaithra, yina vuandaka tanga na iniversite ntangu yandi vuandaka longuka Biblia na Bambangi ya Yehova. Yandi ndimaka invitation ya kukutakana na lukutakanu mosi ya nene. Na manima ya kukutakana kilumbu ya ntete, yandi tubilaka nlongisi na yandi ya Biblia: “Bibuti na munu mesalaka yamba munu ata fioti ve. Kasi na lukutakanu na beno ya nene, bantu 52 yambaka munu kaka na kilumbu mosi! Munu monaka  nzola ya Yehova na nzila ya dibuta yango ya kimpeve. Munu kele na nsatu ya kukota na dibuta yango.” Chaithra tatamanaka kukula na kimpeve mpe yandi bakaka mbotama na 2024. Ya kedika, ntangu bantu ya yimpa kemonaka bikadulu na beto ya kitoko, na kifuani nzola yina beto kemonasanaka, mbala mingi yaketindaka bau basadila Yehova.​—Mat. 5:16.

6. Yinki mutindu kupusana penepene ya bampangi na beto lenda tanina beto?

⁶ Kupusana penepene ya bampangi na beto lenda tanina beto. Paulo kindisaka bampangi na yandi Baklisto ti: “Beno tatamana kukindasana konso kilumbu . . . samu mosi ve kati na beno kuma na ntima ya ngolo samu na kilendo ya luvunu ya disumu.” (Ebr. 3:13) Kana beto melemba mpenza nzutu mpe makulu na beto mebanda kukatuka na nzila ya lunungu, Yehova lenda tinda mpangi mosi Muklisto samu yandi pesa beto lusadusu yina beto kele na yau nsatu. (Nz. 73:2, 17, 23) Lusadusu ya mutindu yina kele mpenza na mfunu samu na beto.

7. Yinki nguizani kele kati na nzola mpe bumosi? (Bakolose 3:13, 14)

⁷ Beto kele na kati ya grupe ya bantu yina kesalaka ngolo samu na kumonasana nzola, na yau beto kebakaka balusakumunu mingi. (1 Yoa. 4:11) Na kifuani, nzola ketindaka beto na “kutatamana kukanga ntima muntu na muntu na mambu ya muntu yankaka,” mpe yakesalaka ti beto vuanda na bumosi ya Buklisto. (Tanga Bakolose 3:13, 14; Ef. 4:2-6) Na yau, balukutakanu na beto kele bisika ya nsambudulu yina meluta bisika nionso yankaka na yinza.

BENO PESANAKA LOKUMU

8. Yinki Yehova kesalaka samu na kusadisa beto beto vuanda na bumosi?

⁸ Bumosi na beto ya yinza ya mvimba kele kimangu. Yehova nde kesalaka ti bumosi yango vuanda atako beto kele bantu ya kukondua kukoka. (1 Ko. 12:25) Biblia metuba ti beto “melongama na Nzambi ti beto zolanaka.” (1 Tes. 4:9) Na bampova yankaka, na nzila ya Masonukua, Yehova ketubilaka beto mpenza mambu yina beto fueti sala samu beto pusana penepene ya bampangi na beto. Beto lenda “longama na Nzambi” na kutadilaka mbotembote malongi na yandi mpe na kusadilaka yau. (Ebr. 4:12; Yak. 1:25) Mpe yau nde mpenza diambu Bambangi ya Yehova kesalaka ngolo samu na kusala.

9. Yinki malongi beto mebaka na Baroma 12:9-13 na diambu metadila kupesana lokumu?

⁹ Yinki mutindu Mpova ya Nzambi kelongaka beto samu beto pusana penepene ya bampangi na beto? Beto tadila mambu yina Paulo tubaka samu na diambu yango, na Baroma 12:9-13. (Tanga.) Simba ti yandi tubaka “samu na kupesana lokumu, beno vuanda bantu ya ntete.” Yinki yazola monisa? Beto fueti sosaka maluaku samu na kumonisa ‘nzola ya ntima’ na bantu yankaka na kunlemvukilaka bau, na kuyambaka bau, na kukabilaka bau, mpe na kusadilaka bau mambu yankaka ya mutindu yina. (Ef. 4:32) Yakele na mfunu ve nge vingila ti mpangi mosi pusana ntete penepene na nge. Nge lenda “vuanda muntu ya ntete” na kusala yau. Yesu tubaka puelele ti: “Kiese ya kupesa meluta kiese ya kubaka.”​—Mis. 20:35.

10. Yinki mutindu beto lenda vuanda bantu yina kesalaka kisalu ya ngolo na diambu metadila “kupesana lokumu”? (Tala diaka foto.)

¹⁰ Simba ti, kaka na manima ya kutubila beto beto vuanda bantu ya ntete samu na kupesa bantu yankaka lokumu, Paulo mekindisa beto “beto salaka kisalu ya ngolo, beto vuanda ve bamolo.” Muntu yina kele kisadi ya ngolo kevuandaka na vema mpe yandi kekukipesaka na kisalu. Kana bamepesa yandi kisalu mosi, yandi kekokisaka yau mbotembote. Masese 3:27, 28 mekindisa beto na: “Kumanga ve kusadisa bantu yina kele na nsatu ya lusadusu kana [beto] kele na dikoki ya kusala yau.” Na nguizani na diambu yango, kana beto memona ti muntu  mosi kele na nsatu ya lusadusu, beto kesalaka nionso yina beto lenda samu na kusadisa yandi. Beto kevingilaka ve samu na kusadisa; beto kekanisaka mpe ve ti muntu yankaka nde kepesa lusadusu yango na kisika na beto.​—1 Yoa. 3:17, 18.

11. Yinki lenda sadisa beto samu beto pusana penepene ya bampangi na beto?

¹¹ Mutindu yankaka yina beto lenda pesa bantu yankaka lokumu kele na kuvuandaka pene ya kunlemvukila bau ntangu bamesala beto mpasi. Baefese 4:26 metuba: “Muini leka ve beno kele kaka na nganzi.” Samu na yinki? Verse 27 metuba ti kana beto mesala plina beto ‘kepesa Diabulu diluaku.’ Na Mpova na yandi, Yehova ketubilaka beto mbala na mbala ti beto nlemvukilanaka. Bakolose 3:13 mekindisa beto na “kutatamana . . . kunlemvukilanaka na ntima mosi.” Kunlemvukila banzimbala ya bantu yankaka kele mosi ya mitindu yina meluta mbote ya kupusana penepene na bau. Kana beto mesala mutindu yina, beto kepesa maboko “samu na kutanina bumosi ya kimpeve na kikangulu ya kiyenge yina kesangisaka.” (Ef. 4:3) Na nkufi, kunlemvukila lenda sadisa mbala mosi samu beto vuanda na bumosi mpe na kiyenge.

12. Yinki mutindu Yehova kesadisaka beto samu beto nlemvukilaka?

¹² Yakele kedika ti yalenda vuanda mpasi samu beto nlemvukila bantu yina mesala beto mpasi. Kasi beto lenda nlemvukila bau na lusadusu ya mpeve ya Nzambi. Na manima ya kukindisa beto beto “zolanaka na ntima” mpe beto “salaka kisalu ya ngolo,” Biblia metubila beto beto: “Vuanda na vema mingi na lusadusu ya mpeve ya nlongo.” Muntu yina kevuandaka na “vema mingi” kele “muntu yina mefuluka na vema mpe na kiese na lutuadusu” ya mpeve ya nlongo. (Tala noti ya ndongokolo samu na Baroma 12:11.) Na yau, mpeve ya Nzambi lenda sadisa beto beto zolanaka na ntima mpe beto nlemvukilanaka na ntima ya mvimba. Yakele samu na yau nde beto kelombaka Yehova lusadusu na ntima ya mvimba.​—Luka 11:13.

“BUKABUANI VUANDA VE NA KATI NA BENO”

13. Yinki mambu lenda kotisa bukabuani kati na beto?

¹³ Kimvuka mesangisa “bantu ya mitindu nionso” yina mekatuka na makanda ya kusuasana.  (1 Tim. 2:3, 4) Kana beto kenga ve, balusuasanu yango lenda kotisa bukabuani na mambu yina metadila banzengolo ya muntu na muntu, na kifuani, diambu metadila mvuatulu to munzele, lusadusu ya munganga, to bandutusulu ya ntangu. (Rom. 14:4; 1 Ko. 1:10) Lokola Nzambi kelongaka beto beto zolana, beto fueti kenga samu beto bika monisa ti banzengolo na beto kele mbote kuluta ya bantu yankaka.​—Flp. 2:3.

14. Yinki diambu beto fueti sosa kusala ntangu nionso, mpe samu na yinki?

¹⁴ Beto lenda manga diaka kukotisa bukabuani na kimvuka na kusalaka ngolo samu na kubomba mpe kukindisa bantu yankaka konso ntangu. (1 Tes. 5:11) Na bilumbu mekatuka luta, bantu mingi yina melembaka na kimpeve to yina bamekatulaka na kimvuka vutukaka na kimvuka. Beto keyambaka bau na nzola nionso! (2 Ko. 2:8) Tala diambu yina kuminaka mpangi mosi ya nketo yina kuizaka diaka na Yinzo ya Kimfumu na manima ya kulemba na kimpeve samu na bamvula 10. Yandi tubaka: “Bantu nionso vuandaka sekisa munu mpe kupesa munu bambote.” (Mis. 3:19) Yinki mutindu yandi kukimonaka samu na mua mambu yango ya kimpombo? Yandi metuba: “Yasalaka munu mona ti Yehova vuandaka sadisa munu samu munu vutukila diaka kiese na munu.” Kana beto kena kusosa kukindisa bantu yankaka, Klisto lenda sadila beto samu beto bomba bantu yina ‘kena kumona mpasi mpe kena kunata bizitu ya kilo.’​—Mat. 11:28, 29.

15. Yinki kele mutindu yankaka yina beto lenda pesa maboko na bumosi na beto? (Tala diaka foto.)

 ¹⁵ Mutindu yankaka yina beto lenda pesa maboko na bumosi na beto kele na nzila ya bampova na beto. Yobo 12:11 metuba: “Dikutu kemekaka bampova ve mutindu ludimi kemekaka madia?” Mutindu kaka muntu yina mezaba kulamba mbote kemekaka ntangu nionso madia na yandi samu na kukindimisa ti yakele kitoko tekila ya kupesa yau bantu yankaka, beto fueti kanisaka mbotembote na mambu yina beto ketuba tekila beto tuba yau. (Nz. 141:3) Lukanu na beto fueti vuanda ntangu nionso ya kukindimisa ti mambu yina beto zola tuba ketunga, kebomba, mpe “kepesa bantu yina kena kuwa yau kima ya mfunu.”​—Ef. 4:29.

16. Banani mingimingi fueti sadila bampova ya kukindisa?

¹⁶ Mingimingi babakala mpe bibuti nde fueti kenga samu na kutubaka na mutindu ya kukindisa. (Kol. 3:19, 21; Tito 2:4) Bankulutu diaka fueti vuanda bamvungi yina kekindisaka mpe kebombaka mameme ya Yehova. (Yis. 32:1, 2; Gal. 6:1) Kingana mosi ya Biblia kebambulaka beto ti: “Mpova yina metubama na ntangu yina mebonga kele mpenza mbote!”​—Mas. 15:23.

NZOLA “NA BISALU MPE NA KEDIKA”

17. Yinki mutindu beto lenda kukindimisa ti nzola na beto samu na bampangi kele mpenza ya kedika?

¹⁷ Ntumua Yoane mekindisa beto na “kuzola ve na bampova to na mbebu, kasi na bisalu mpe na kedika.” (1 Yoa. 3:18) Beto kezolaka ti nzola na beto samu na bampangi na beto katuka na ntima. Yinki mutindu beto lenda sala yau? Kana beto kena kulutisa ntangu mingi kintuadi na bampangi na beto, beto kepusana diaka mingi penepene na bau mpe beto kezolana diaka mingi kuluta. Na yau sosaka maluaku ya kulutisa ntangu kintuadi na bampangi yankaka​—na balukutakanu mpe na kisalu ya kusamuna. Bakaka ntangu ya kukuenda tala bantu yankaka. Ntangu beto kesalaka mambu yango, beto kemonisaka ti beto ‘melongama na Nzambi ti beto zolanaka.’ (1 Tes. 4:9) Mpe beto ketatamana kumona beto mosi ti “yakele mbote mpe kiese ti bampangi vuanda na bumosi!”​—Nz. 133:1.