1-2. (a) Samu na yinki beto lenda kukindimisa ti beto kevuandaka ata fioti ve beto mosi ntangu beto kena kukutana na banzomono? (b) Yinki beto ketubila na disolo yayi?

 NTANGU beto kena kukutana na banzomono ya ngolo, beto lenda kukimona lokola beto kele kaka beto mosi na bato mosi ya fioti yina kele na katikati ya nzadi mungua yina kele ya kufuema. Kasi, beto kele ata fioti ve beto mosi. Tata na beto ya nzola ya dizulu kemonaka mambu ya mpasi yina beto kena kukutana na yau mpe yandi melaka ti yandi kesadisa beto samu beto nunga yau. Na nzola nionso, Yehova melaka beto: “Munu kesadisa nge.”​—Yis. 41:10.

² Na disolo yayi beto ketubila mutindu Yehova kesadisaka beto (1) na kutuadisaka beto, (2) na kukokisaka bansatu na beto, (3) na kutaninaka beto, mpe (4) na kubombaka beto. Yehova melaka beto ti yavuanda yinki mambu yina beto kena kukutana na yau na luzingu, yandi kesala zimbakana beto ata fioti ve. Yandi kesundola beto ata fioti ve. Na yau, beto kele ata fioti ve beto mosi.

YEHOVA KETUADISAKA BETO

3-4. Yinki mutindu Yehova ketuadisaka beto? (Nzembo 48:14)

³ Tanga Nzembo 48:14. Yehova kelombaka beto ve beto kukituadisa beto mosi. Yinki mutindu yandi ketuadisaka bisadi na yandi ya kukuikama bubu yayi? Mosi ya mutindu yina yandi kesalaka yau kele na nzila ya Biblia. (Nz. 119:105) Na nzila ya Mpova na yandi yina mepemama, Yehova kesadisaka beto samu beto baka banzengolo ya mbote mpe beto kudisa bikadulu yina kepesaka beto kiese mingi bubu yayi mpe yina kepesa beto luzingu ya mvula na mvula na bilumbu kena kuiza. a Na kifuani, yandi kelongaka beto beto bika lunda nganzi, beto vuanda ya kukuikama na mambu nionso, mpe beto vuanda na nzola ya ngolo ya ntima samu  na bantu yankaka. (Nz. 37:8; Ebr. 13:18; 1 Pe. 1:22) Kana beto kena kumonisa bikadulu yango, beto kekuma bibuti, bankuelani, mpe bankundi ya mbote kuluta.

⁴ Katula yau, Yehova sonikisaka na Biblia masolo ya bantu yina kutanaka na banzomono mpe yina vuandaka na banguilu ya mutindu mosi na beto. (1 Ko. 10:13; Yak. 5:17) Ntangu beto ketangaka masolo ya luzingu ya bantu yango mpe beto kesadilaka malongi yina beto kebakaka na masolo yango, beto kebakaka mambote na mitindu yayi zole. Ya ntete, beto kebakusaka ti beto kele ve beto mosi​—yakele diaka na bantu yankaka yina mekutanaka na mambu ya mutindu yina mpe banungaka kukangila yau ntima. (1 Pe. 5:9) Mpe ya zole, beto kelongukaka mutindu ya kukanga ntima na banzomono na beto.​—Rom. 15:4.

5. Yehova kesadilaka banani samu na kutuadisa beto na nzila ya luzingu?

⁵ Yehova kesadilaka diaka bampangi na beto Baklisto samu na kutuadisa beto. b Na kifuani, bankengi ya kizungidila kekuizaka tala mbala na mbala bimvuka samu na kukindisa beto. Badiskur na bau kekindisaka kiminu na beto mpe yakesadisaka beto samu beto tanina bumosi na beto yina kele na mfunu. (Mis. 15:40–16:5) Bankulutu diaka kesalaka ngolo samu na kusadisa mosimosi kati na beto na kubikana penepene ya Yehova. (1 Pe. 5:2, 3) Bibuti kelongaka bana na bau kuzola Yehova, kubaka banzengolo ya mbote, mpe kuvuanda na mimeseno ya mbote. (Mas. 22:6) Mpe banketo Baklisto yina kele ya kuyela na kimpeve kesadisaka bampangi ya bantuenia ya banketo na nzila ya kifuani na bau ya mbote, na kuluengisaka bau, mpe na kukindisaka bau.​—Tito 2:3-5.

6. Yinki beto fueti sala samu beto baka mambote na lutuadusu ya Yehova?

⁶ Yehova kepesaka beto lutuadusu yina beto kele na yau nsatu. Yinki mutindu beto lenda monisa butondi samu na mambu nionso yina yandi kesalaka samu na beto? Masese 3:5, 6 metuba: “Tudila Yehova ntima na nge ya mvimba, mpe kutula ve ntima na mayele na nge mosi.” Kana beto mesala mutindu yina, “yandi kesungika banzila na [beto],” yazola tuba, yandi kesadisa beto samu beto tina mambu mingi ya mpasi mpe beto vuanda na luzingu ya kiese. Beto kele mpenza na butondi mutindu Yehova kepesaka beto malongi ya nzola mpe yina beto kele mpenza na yau nsatu!​—Nz. 32:8.

YEHOVA KEKOKISAKA BANSATU NA BETO

7. Yinki kele ndambu ya mitindu yina Yehova kekokisaka bansatu na beto? (Bafilipi 4:19)

⁷ Tanga Bafilipi 4:19. Katula kutuadisa beto na kimpeve, Yehova kesakumunaka diaka bangolo na beto samu na kubaka madia, bilele, mpe kisika ya kuvuanda. (Mat. 6:33; 2 Tes. 3:12) Atako yakele yimbi ve kukitungisa samu na bansatu na beto ya kinsuni, Yehova kekindisaka beto beto bika kukitungisa kuluta ndilu samu na mambu yango. (Tala noti ya ndongokolo ya Matai 6:25 na Biblia ya ndongokolo ya Français.) Samu na yinki? Samu Tata na beto kesala sundola ata fioti ve bisadi na yandi ya kukuikama ntangu bakele na nsatu ya lusadusu. (Mat. 6:8; Ebr. 13:5) Beto lenda tudila yandi ntima ya mvimba ntangu yandi metuba ti yandi kekokisa bansatu na beto.

8. Yinki Yehova salaka samu na Davidi?

⁸ Beto tadila mutindu Yehova sadisaka Davidi. Na bamvula ya mpasi yina yandi lutisaka na kutinatinaka, Yehova pesaka yandi mpe bantu na yandi bima yina bavuandaka na yau nsatu. Na kukanisaka na mutindu Yehova taninaka yandi na bamvula yango, Davidi tubaka: “Munu vuandaka ntuenia mpe bubu yayi munu mekuma kiboba, kasi munu mona ntete ve muntu ya lunungu sundolama, to bana na yandi kena kusosa dimpa.” (Nz. 37:25) Kondua ntembe, nge diaka nge memonaka deja na luzingu na nge mutindu Yehova  kekokisaka na nzola nionso bansatu ya bisadi na yandi.

9. Yinki mutindu Yehova kekokisaka bansatu ya bisadi na yandi bubu yayi na ntangu ya bisumbula? (Tala diaka bafoto.)

⁹ Yehova kekokisaka diaka bansatu ya bisadi na yandi na bantangu ya bisumbula. Na kifuani, ntangu nsatu mosi ya ngolo bimaka na siekle ya ntete, Baklisto ya babuala mutindu na mutindu tindilaka bampangi na bau bima yina bavuandaka na yau nsatu. (Mis. 11:27-30; Rom. 15:25, 26) Bubu yayi bisadi ya Nzambi kemonisaka kikadulu ya kukaba ya mutindu yina. Kana kisumbula mosi mebima, Yehova ketindaka na nzola nionso bisadi na yandi batindila bantu yina mekutana na kisumbula yango bima ya mfunu lokola bima ya kudia, maza, bilele, mpe bilongo. Baekipe ya kutunga kebongisaka bayinzo mpe Bayinzo ya Kimfumu yina bebaka. Mpe kondua kuvingila, bisadi ya Yehova kebombaka mpe kekindisaka na nzila ya Biblia bantu yina mezimbisa bima mpe mefuila bantu yina bakezolaka. c

10-11. Yinki malongi nge mebaka na disolo ya Borys?

¹⁰ Yehova kekokisaka diaka na nzola nionso bansatu ya bantu yina banda ntete ve kusambila yandi. Mutindu mosi na Yehova, beto kesosaka maluaku ya kumonisa kimpombo na bantu yina kesambilaka ve Yehova. (Gal. 6:10) Mbala mingi yakepesaka beto diluaku ya kupesa kimbangi mosi ya mbote. Beto tadila disolo ya Borys, direktere ya ekole mosi yina kezingaka na Ukraine. Atako Borys kele ve Mbangi ya Yehova, yandi vuandaka sadila ntangu nionso bana kalasi na yandi yina vuandaka Bambangi ya Yehova mambu na kimpombo mpe yandi vuandaka zitisa bindimeli na bau. Ntangu Borys babaka nzengolo  ya kutina kizunga yina vuandaka na mvita kisika yandi vuandaka zinga samu na kukuenda kisika yankaka ya buala na bau yina vuandaka na lutanunu, bampangi na beto sadisaka yandi. Na manima, Borys kutakanaka na Mbambukulu ya lufua ya Yesu. Na kukanisaka na diambu yina yandi kutanaka na yau, Borys tubaka: “Bambangi ya Yehova vuandaka tudila munu mpenza dikebi mpe kukokisa bansatu na munu. Munu kele na butondi samu na Bambangi ya Yehova.”

¹¹ Beto diaka beto lenda landa kifuani ya ntima kiadi ya Tata na beto ya dizulu na kumonisaka nzola na bantu yina kele na nsatu ya lusadusu, yavuanda bakele Bambangi ya Yehova to ve. (Luka 6:31, 36) Beto kevuandaka na kivuvu ti bangolo na beto ya kuzola bantu kesala ti bakuma banlonguki ya Klisto. (1 Pe. 2:12) Kasi, yavuanda bakekuma banlonguki ya Klisto to ve, beto kevuanda na kiese mingi yina kekatukaka na kupesa.​—Mis. 20:35.

YEHOVA KETANINAKA BETO

12. Yinki lutanunu Yehova melaka kupesa bisadi na yandi nionso? (Nzembo 91:1, 2, 14)

¹² Tanga Nzembo 91:1, 2, 14. Bubu yayi, Yehova melaka ti yandi kepesa beto lutanunu ya kimpeve. Yandi kebika nzila ata fioti ve Satana bebisa nsambudulu ya kedika. (Yoa. 17:15) Mpe ntangu “mpasi ya nene” kebanda, beto lenda kukindimisa mpenza ti Yehova kekokisa nsilulu na yandi ya kutanina bisadi na yandi na kimpeve mpe na kinsuni.​—Em. 7:9, 14.

13. Na yinki mitindu Yehova ketaninaka mosimosi kati na beto?

¹³ Yinki lutanunu Yehova kepesaka mosimosi kati na beto? Na nzila ya Masonukua, Yehova kesadisaka beto samu beto zaba kusuasikisa mambu ya mbote mpe mambu ya yimbi. (Ebr. 5:14) Ntangu beto kezitisaka bansikudusu yina kele na Mpova ya Nzambi, beto kekukitaninaka na kimpeve mpe na kinsuni. (Nz. 91:4) Diaka, Yehova ketaninaka beto na nzila ya kimvuka. (Yis. 32:1, 2) Kulutisa ntangu kintuadi na bantu yina kezolaka Yehova mpe kezitisaka bansikudukusu na yandi, kepesaka beto lukindusu mpe ngolo ya kutelemina bupusi ya yimbi.​—Mas. 13:20.

14. (a) Samu na yinki Nzambi kebikaka nzila ti bisadi na yandi kutana na banzomono? (b) Yinki Nzembo 9:10 mendimisa beto? (Tala diaka noti na yinsi ya paje.)

¹⁴ Na ntama, na bantangu yankaka, Yehova vuandaka tanina bisadi na yandi na kinsuni. Kasi yandi vuandaka sala yau ve na maluaku nionso. Na bantangu yankaka bavuandaka kutana na “mambu yina kanama ve.” (Mos. 9:11) Diaka, Yehova bikaka nzila ti bisadi na yandi yankaka kutana na kutelemina mpe ata na lufua samu na kumonisa ti Satana kele muntu ya luvunu. (Yobo 2:4-6; Mat. 23:34) Yakele kaka mutindu yina bubu yayi. Atako Yehova kekatulaka ve ntangu nionso banzomono na beto, beto lenda kukindimisa ti yandi kesala sundola ata fioti ve bantu yina kezolaka yandi. d​—Nz. 9:10.

YEHOVA KEBOMBAKA BETO

15. Yinki mutindu beto lenda baka lukindusu na nzila ya kisambu, ya Mpova ya Nzambi, mpe ya bampangi na beto Baklisto? (2 Bakorinti 1:3, 4)

¹⁵ Tanga 2 Bakorinti 1:3, 4. Na bantangu yankaka beto lenda vuanda na kiadi, na mitungisi, mpe na mpasi. Mbala yankaka nge kena kukutana na diambu mosi ya mpasi bubu yayi yina kena kusala ti nge kukimona nge mosi. Nge kena kumona ti muntu mosi ve kena kubakusa banguilu na nge? Yehova kena kubakusa yau. Yandi kemonaka kaka ve bampasi na beto kasi diaka yandi “kebombaka beto na kumekama na beto nionso.” Na yinki mutindu? Ntangu beto kesambilaka Yehova na ntima ya mvimba, yandi kepesaka beto “kiyenge ya Nzambi yina meluta makanisi na beto.” (Flp. 4:6, 7) Beto kebakaka diaka lukindusu ntangu beto ketangaka bampova yina Yehova sonikisaka na Biblia samu na beto. Bampova yango yina kemonisaka  nzola, nduenga, mpe kivuvu yina Yehova mepesa beto lenda bomba beto. Mpe balukutakanu ya Buklisto kebombaka beto na nzila ya nzola ya bampangi mpe na nzila ya balukindusu yina mesimbama na Biblia.

16. Yinki malongi nge mebaka na kifuani ya Nathan mpe Priscilla?

¹⁶ Samu na kumona mutindu Yehova kebombaka mpe kekindisaka beto na nzila ya Mpova na yandi, beto tadila kifuani ya Nathan mpe Priscilla, yina kezingaka na États-Unis. Yameluta mua bamvula, babakaka nzengolo ya kukuenda kisika yina nsatu ya bansamuni ya Kimfumu vuandaka mingi. Nathan metuba: “Beto tulaka ntima ti Yehova kesakumuna bangolo na beto.” Kasi, na manima ya kukuma na terituare na bau ya yimpa, bakutanaka na mitungisi ya mavimpi mpe na mikakatano ya mbongo yina bakukivingilaka na yau ve. Nsukansuka bankuelani yango vutukaka na buala na bau, kasi batatamanaka kukutana na mikakatano ya mbongo. Nathan metuba: “Munu kukiyuvusaka samu na yinki Nzambi sakumunaka beto ve na mutindu yina beto vuandaka kanisa. Munu bandaka ata kukiyuvusa kana munu salaka diambu mosi ya yimbi.” Kasi na manima ya mua ntangu, Nathan mpe Priscilla bandaka kubakusa ti Nzambi sundolaka bau ve. Nathan mebuela: “Na bantangu yango ya mpasi, Biblia kumaka lokola nkundi mosi ya nduenga yina vuandaka pesa beto lukindusu mpe lutuadusu. Kutula makanisi na mutindu Yehova vuandaka sadisa beto samu na kukanga ntima na kisika ya kutula makanisi na banzomono na beto, sadisaka beto beto kukindimisa ti Yehova ketatamana kusadisa beto na bilumbu kena kuiza.”

17. Yinki mutindu Yehova bombaka mpangi ya nketo na nkumbu ya Helga? (Tala diaka foto.)

¹⁷ Bampangi na beto diaka lenda bomba beto. Na yinki mutindu? Beto tadila kifuani ya Helga, yina kezingaka na Hongrie. Samu na bamvula mingi, yandi kutanaka na mambu ya mpasi ya mutindu na mutindu yina salaka ti yandi kukimona lokola yandi mekondua kivuvu mpe yandi kele ve na valere. Kasi ntangu yandi kekanisaka na mambu yango, yandi kemonaka mutindu Yehova bombaka yandi na nzila ya kimvuka. Yandi mesonika:  “Yehova vuandaka sadisa munu ntangu nionso, ntangu yandi vuandaka mona ti kisalu na munu ya kinsuni, kutanina muana na munu kaka mosi yina vuandaka bela, mpe banzomono yankaka vuandaka lutila munu. Na bamvula 30 yayi meluta, yavuandaka ata na kilumbu mosi ve yina Yehova kokisaka ve nsilulu na yandi ya kubomba munu. Yandi kebombaka munu mbala na mbala na nzila ya bampova ya kukindisa ya bantu yankaka. Mbala na mbala, munu kebakaka bamesaje, baletre, to bafelisitasion na ntangu yina munu kele mpenza na nsatu na yau.”

18. Yinki mutindu beto lenda bomba bantu yankaka?

¹⁸ Beto kele na lokumu ya kulanda kifuani ya Nzambi na beto na kubombaka bantu yankaka. Yinki mutindu beto lenda sala yau? Beto lenda sala yau na kuwaka bau na ntima yinda nionso, na kutubilaka bau na mutindu ya kubomba, mpe na kupesaka bau lusadusu yina bakele na yau nsatu. (Mas. 3:27) Beto kesalaka ngolo samu na kubomba bantu nionso yina kena kuniokuama, yavuanda bantu yina banda ntete ve kusadila Yehova. Ntangu bafinangani na beto kele na kiadi, kena kubela, to kena kutungisama, beto kekuendaka tala bau, beto kekuwaka bau, mpe beto kekindisaka bau na nzila ya baverse ya Biblia. Ntangu beto kelandaka kifuani ya Yehova, “Nzambi ya kubomba nionso,” beto kesadisaka kaka ve bampangi na beto Baklisto bakanga ntima na banzomono, kasi beto kesadisaka diaka bantu yina kesadilaka ve Nzambi bakuma na nsatu ya kulonguka mambu yina metadila yandi.​—Mat. 5:16.

YEHOVA KEVUANDAKA NTANGU NIONSO VANA SAMU NA BETO

19. Yinki Yehova kesalaka samu na beto, mpe yinki mutindu beto lenda landa kifuani na yandi?

¹⁹ Yehova kekukitungisaka mpenza samu na bantu nionso yina kezolaka yandi. Yandi kesundolaka beto ve ntangu beto kena kukutana na mambu ya mpasi. Mutindu kaka kibuti ya nzola ketaninaka muana na yandi, Yehova ketaninaka bisadi na yandi ya kukuikama. Yandi ketuadisaka beto, yandi kekokisaka bansatu na beto, yandi ketaninaka beto, mpe yandi kebombaka beto. Beto kelandaka kifuani ya Tata na beto ya nzola ya dizulu ntangu beto kesadisaka mpe beto kekindisaka bantu yankaka ntangu bakena kukutana na banzomono. Atako beto lenda kutana na mambu ya mpasi mpe ya kiadi, beto lenda kukindimisa ti Yehova kele kintuadi na beto. Kutu, yandi melaka beto ti: “Kubanga ve, samu munu kele na nge.” (Yis. 41:10) Yakena kubomba beto mpenza! Ya kedika, beto kele ata fioti ve beto mosi.