Na kilumbu ya 11 juin 2022, prezidan Vladimir Putin tulaka siniatire na baproje zole ya nsiku yina kesala ti Russie katuka mvimbamvimba na cour européenne des droits de l’homme tii na kilumbu ya 15 mars 2022. Yazola monisa ti, banzengolo ya bansambusulu nionso ya cour européenne des droits de l’homme kevuanda diaka ve na bupusi na zulu ya Russie kubanda na kilumbu ya 15 mars 2022. Yau mesangisa diaka nsambusulu cour européenne des droits de l’homme ya 7 juin, yina tubaka ti kupekisa kisalu ya Bambangi ya Yehova kele ve na nguizani na nsiku mpe yapekisaka Russie yalemba kuniokola bau, kubimisa Bambangi ya Yehova yina kele ntete na buloko tii bubu yayi mpe kuvutula bima na bau nionso yina bazionaka to kufuta ntalu ya mbongo ya badolare bamilion 63.

Komite ya baministre ya Conseil ya Europe kena kusala nionso samu babuala nionso yina kele na kati ya cour européenne des droits de l’homme zitisa nsambusulu yina tribinale ya nene ya Europe mebaka. Russie mekotaka na nkubukulu yango ya Eupero yina kesangisaka babuala mingi banda 1996.

Na kilumbu ya 15 mars 2022, Russie zabisaka Conseil de l’Europe ti yandi mekatula nkumbu na yandi na luwawanu yango. Na kilumbu landaka, Conseil de l’Europe katulaka Russie na nkubukulu yango. Batubilaka guvernema ya Russie ti na kutadila luwawanu yina yandimaka ntangu ya kotaka na Conseil ya Europe, Russie fueti tatamana kuzitisa banzengolo ya tribinale ya cour européenne des droits de l’homme tii na kilumbu ya 16 septembre 2022.

Russie mekaka kubima mvimbamvimba na tribinale ya Europe yina ketadilaka yinsua ya bantu na kutulaka bansiku zole yina baponaka na kilumbu ya 7 juin 2022. Yavuandaka kaka kilumbu yina tribinale ya Europe yina ketadilaka yinsua ya bantu bakaka nzengolo na yandi samu na kukotila bampangi na beto na Russie.

Nzengolo ya tribinale ya Europe yina ketadilaka yinsua ya bantu lenda sadulua na batribinale ya babuala 46 yina kele na kati ya Conseil de l’Europe na diambu metadila Bambangi ya Yehova. Yina meluta mfunu, yakena kumonisa puelele ti mambu yina Russie kefundilaka Bambangi ya Yehova kele luvunu. Na yinza ya mvimba, nzengolo yango kena kupesa kimbangi ya nene samu na Yehova mpe yamesukula nkumbu na yandi. Yakena kupesa Yehova nkembo ya nene!—Nkunga 83:18.