မ့ၢ်​န​ဘၣ်​ဟး​စံၣ်တဲၤ​တဲလီၤ​တၢ်​န့ၣ်​ ကီ​လၢ​နဂီၢ်​ဧါ. ပဝဲ​သ့ၣ်​အါတက့ၢ်န့ၣ်​ ပ​က​စံးဆၢ​လၢ အကီ​လီၤ. ဘၣ်​မနုၤ​အဃိ​လဲၣ်. ဘၣ်​သ့ၣ်​သ့ၣ်​ လၢ​ပ​လီၢ်ကဝီၤ​အ​ပူၤ ပ​က​ကွၢ်ဆၢၣ်မဲာ်​ဘၣ်​ဒီး တၢ်​ထီဒုၣ်​ထီဒါ မ့တမ့ၢ် ပှၤ​တ​သးအိၣ်​ဒိကနၣ်​ ပ​တၢ်ကစီၣ်​ မ့တမ့ၢ် ပ​ပျံၤတၢ်​လၢ ပ​က​စံၣ်တဲၤ​တဲလီၤ ပှၤလၢ​ပ​တ​သ့ၣ်ညါ​အီၤ တဂၤဂၤ​န့ၣ်​လီၤ. တၢ်​သ့ၣ်​တဖၣ်​အံၤ မၤဘၣ်ဒိ ပ​တၢ်သးခု​သ့ဝဲ​လီၤ. ဘၣ်ဆၣ်, ပ​ဘူၣ်ထီၣ်​ဘါထီၣ်​ ယွၤ​လၢ​အိၣ်ဒီး​တၢ်​သူၣ်ခု​သးခု​အဃိ အ​အဲၣ်ဒိး​လၢ ပ​မၤ​အ​တၢ်မၤ​လၢ တၢ်​သူၣ်ခု​သးခု​အ​ပူၤ​လီၤ. (စံး. ၁၀၀:၂; ၁ တံၤ. ၁:၁၁, nwt) တၢ်ဂ့ၢ်​သၢ​မံၤ​လၢ ပ​ကအိၣ်​ဒီး တၢ်​သူၣ်ခု​သးခု​အဂီၢ်​န့ၣ်​ က​မ့ၢ်​မနုၤ​လဲၣ်.

တၢ, ပ​စံၣ်တဲၤ​တဲလီၤ တၢ်​မုၢ်လၢ်​အ​တၢ်ကစီၣ်​န့ၣ်​လီၤ. မုၢ်မဆါ​တနံၤ​အံၤ ပှၤ​အါဂၤ တအိၣ်​ဒီး တၢ်​မုၢ်လၢ်​အါအါ​လၢၤ​သနာ်က့ ပ​မၤမုာ် ပှၤကညီ​အသး​လၢ​တၢ် “စံၣ်တဲၤ​တဲလီၤ​တၢ်အဂ့ၤ” လီၤ. (ၡါ. ၅၂:၇) ဒီး​ယွၤ​အဘီ​အမုၢ် တၢ်သးခု​ကစီၣ်​န့ၣ်​ မၤ​သးခု​ပှၤ​သ့​န့ၣ်​လီၤ. တချုး​လၢ​န​လဲၤ စံၣ်တဲၤ​တဲလီၤ​တၢ်​ဒံး​ဘၣ်​န့ၣ်​ ဆိကမိၣ်​ထံ ဘီမုၢ်​အ​တၢ်​ဆိၣ်ဂ့ၤ​တဖၣ်​လၢ က​ဟဲ​အိၣ်​ထီၣ်​လၢ ဟီၣ်ခိၣ်​ချၢ​န့ၣ်​တက့ၢ်.

ခံ, တၢ်သးခု​ကစီၣ်​လၢ ပ​စံၣ်တဲၤ​တဲလီၤ​အီၤ​န့ၣ်​ အဘျုး​အိၣ်​လၢ ပ​နီၢ်ခိ​ဒီး​နီၢ်သး​န့ၣ်​လီၤ. အဝဲသ့ၣ်​မၤလိ​ဘၣ်​ဝဲ​လၢ က​ဘၣ်​ပာ်တ့ၢ်​ကွံာ် အလုၢ်​အလၢ်​လၢ အ​မၤဘၣ်ဒိ​အီၤ ဒီး​အိၣ်ဒီး​တၢ်​မုၢ်လၢ်​လၢ က​အိၣ်မူ​ဘၣ်​လီၤထူ​လီၤယိာ်​အဂီၢ်​လီၤ. (ၡါ. ၄၈:၁၇, ၁၈; ရိ. ၁:၁၆) ထံၣ်တမှံ​ကွၢ်​လၢ ပ​မၤ​တၢ်မၤ​လၢ အ​မၤ​ထူၣ်ဖျဲး ပှၤ​သးသမူ​န့ၣ်​တက့ၢ်. ပှၤ​တနီၤ​တ​အဲၣ်ဒိး ပူၤဖျဲး​ဘၣ်​သနာ်က့ ပ​ဆဲး​ဃု​ဒံး​ပှၤအဂၤ​လၢ အ​အဲၣ်ဒိး​ပူၤဖျဲး​တဖၣ်​န့ၣ်​လီၤ.—မး. ၁၀:၁၁-၁၄.

သၢ, တၢ်​လၢ​အရ့ဒိၣ်​ကတၢၢ်​န့ၣ်​ ပ​တၢ်​စံၣ်တဲၤ​တဲလီၤ​တၢ်မၤ​အံၤ မၤ​လၤကပီၤ ယဟိဝၤ​ယွၤ​န့ၣ်​လီၤ. အဝဲ ပာ်လုၢ်​ပာ်ပှ့ၤ​ဝဲ ပ​တၢ်​စံၣ်တဲၤ​တဲလီၤ​တၢ်မၤ​န့ၣ်​လီၤ. (ၡါ. ၄၃:၁၀; ဧ့ၤ. ၆:၁၀) အါန့ၢ်​အန့ၣ်​ ဒ်သိး​ပ​က​မၤဝံၤ တၢ်မၤ​အံၤ​အဂီၢ် အဝဲ​ဟ့ၣ်​ပှၤ သးစီဆှံ​လီၤ. လၢတၢ်န့ၣ်​အဃိ ဃ့​ယဟိဝၤ​ယွၤ ဒ်သိး​န​ကအိၣ်​ဒီး တၢ်​သူၣ်ခု​သးခု လၢ​အမ့ၢ် သး​အ​တၤသၣ်​န့ၣ်​တက့ၢ်. (ကလၤ. ၅:၂၂) ပ​လဲၤခီဖျိ ပ​တၢ်​သူၣ်ကိၢ်​သးဂီၤ ဒီး​စံၣ်တဲၤ​တဲလီၤ​တၢ်​လၢ တၢ်​သူၣ်ဒူ​သးဒူ​သ့ ခီဖျိ​လၢ​ကစၢ်​ယွၤ အ​တၢ်မၤစၢၤ​အဃိ​န့ၣ်​လီၤ. (မၤတၢ်. ၄:၃၁) ပှၤလၢ ပ​လီၢ်ကဝီၤ​ပူၤ​တဖၣ်​ မ့ၢ်​ဒိကနၣ်​ဂ့ၤ, တ​ဒိကနၣ်​ဂ့ၤ ပ​အိၣ်ဒီး​တၢ်​သူၣ်ခု​သးခု​လၢ ပ​တၢ်​စံၣ်တဲၤ​တဲလီၤ​တၢ်မၤ​အ​ပူၤ​သ့ဝဲ​လီၤ.—ဃ့း. ၃:၃.

ကွၢ်​တၢ်ဂီၤမူ​လၢ အ​ခိၣ်တီ​မ့ၢ်ဝဲ ပ​ဒိးန့ၢ်ဘၣ်​က့ၤ တၢ်သးခု ခီဖျိ​ပ​မၤလိ​ဒီး ဆိကမိၣ်​ထံ လံာ်စီဆှံ, မ့ၢ်ဝံၤ​န့ၣ်​ စံးဆၢ​တၢ်​သံကွၢ်​လၢ လာ်​တဖၣ်​အံၤ​တက့ၢ်–

• ကိးလါဒဲး ပ​မ့ၢ်​စံၣ်တဲၤ​တဲလီၤ​တၢ် နၣ်ရံၣ်​အါမး သနာ်က့ ဘၣ်​မနုၤ​အဃိ ပ​က​ဘၣ်​မၤလိ​တၢ်​ထီဘိ​လဲၣ်.

• ပ​ကြၢး​ကွၢ်လိမၤဒိး နီၢ်​မၤရံ​လၢ​ကျဲ​ဒ်လဲၣ်.

• န​ဆိကမိၣ်​ထံ ကစၢ်​ယွၤ အ​ကလုၢ်​ကထါ ဖဲလဲၣ်​အဆၢ​ကတီၢ်​လဲၣ်.

• ဖဲ​န​စံၣ်တဲၤ​တဲလီၤ တၢ်သးခု​ကစီၣ်​အခါ န​အိၣ်ဒီး​တၢ်​သူၣ်ခု​သးခု လၢ​တၢ်မနုၤ​အဃိ​လဲၣ်.