အိၣ်မူဒ် ခရံာ်ဖိအသိး
သူလံာ်လဲၢ်လၢ တၢ်ကူၣ်သ့အပူၤတက့ၢ်
ယ့ၣ်ၡူးစံးဝဲ– “သုဒိးန့ၢ် ကလီတၢ်လံ, ဟ့ၣ်ကလီတၢ်တက့ၢ်.” (မး. ၁၀.၈) အဃိ ဖဲပနီၤလီၤ လံာ်စီဆှံဒီး လံာ်လဲၢ်တဖၣ်အခါ ပတဃ့အပှ့ၤ မ့ၢ်လၢ ပမၤထွဲ တၢ်နဲၣ်လိအံၤအဃိလီၤ. (၂ ကရံၣ်. ၂:၁၇) ဘၣ်ဆၣ် လံာ်လဲၢ်တဖၣ်အပူၤ ပၣ်ဃုာ်ဒီး ကစၢ်ယွၤအကလုၢ်ကထါ တၢ်မ့ၢ်တၢ်တီလီၤ. ဒ်သိးပကထုးထီၣ် ရၤလီၤ လံာ်လဲၢ်တဖၣ်အဂီၢ် ပဘၣ်ဂုာ်ကျဲးစၢးအါမးဒီး တၢ်လၢာ်ဘူၣ်လၢာ်စ့ၤ အိၣ်ဝဲအါမးလီၤ. ပှၤစဲကျံးထုးထီၣ်အီၤဝံၤ ဘၣ်တၢ်ဆှၢအီၤဆူ တၢ်အိၣ်ဖှိၣ်လၢ အအိၣ်လၢ ဟီၣ်ခိၣ်ဒီဘ့ၣ်န့ၣ်လီၤ. အဃိ ပကြၢးဟံးန့ၢ်အီၤထဲ ပလိၣ်ဘၣ်န့ၣ်လီၤ.
ဖဲနနီၤလီၤ လံာ်လဲၢ်တဖၣ်ဆူ ပှၤဂၤအအိၣ်ခါ အိၣ်ဒီး တၢ်သ့ပဲာ်ဖးနီၤဖးတက့ၢ်. ဒီးဖဲပမၤ တၢ်စံၣ်တဲၤတဲလီၤတၢ်လၢ ကမျၢၢ်အမဲာ်ညါအခါ တမ့ၢ်လၢ ပကဟးဟ့ၣ်ကြီ ကယဲၢ်ပှၤလၢ ပထံၣ်ဘၣ် တဖၣ်ဘၣ်. (မး. ၇:၆) လၢတၢ်န့ၣ်အလီၢ် ပကြၢးအိၣ်ဒီး တၢ်ကူၣ်သ့လီၤ. ဖဲပှၤလ့ၣ်ထီၣ်လ့ၣ်လိၤအခါ မ့ၢ်အဝဲသ့ၣ် အသးအိၣ်ဧါ တသးအိၣ်ဧါန့ၣ် ဂုာ်ကျဲးစၢးကတိၤတၢ်ဒီး အဝဲသ့ၣ်ဝံၤမး နီၤလီၤတက့ၢ်. နစံးဆၢ တၢ်သံကွၢ်တဖၣ်လၢ လာ်အံၤအစှၤကတၢၢ် တဖျၢၣ်ကသ့ဧါ. အဝဲသ့ၣ် အသးအိၣ်ဧါ တသးအိၣ်ဧါ ပမ့ၢ်တသ့ၣ်ညါလီၤတံၢ်ဘၣ်ဒီး နမ့ၢ်ဟ့ၣ်အီၤ လံာ်ဖိန့ၣ် မ့ၢ်ဒၣ်ကျဲအဂ့ၤကတၢၢ်လီၤ. ဘၣ်ဆၣ် အဝဲသ့ၣ် မ့ၢ်တဲလၢ အအဲၣ်ဒိးဖး မဲးကစံ မ့တမ့ၢ် လံာ်အဂၤန့ၣ် နဟ့ၣ်အီၤ လံာ်လၢအဃ့ဝဲန့ၣ် သ့လီၤ.—ကတိၤ. ၃:၂၇, ၂၈.
