တၢ်မၤလိ ၅
ယွၤအတၢ်တိာ်ပာ်လၢ ဟီၣ်ခိၣ်အဂီၢ်န့ၣ် မ့ၢ်မနုၤလဲၣ်
၁. ဘၣ်မနုၤအဃိ ကစၢ်ယွၤတ့လီၤဝဲဟီၣ်ခိၣ်လဲၣ်.
ယဟိဝၤယွၤဟ့ၣ်လီၤဝဲ ပိာ်မုၣ်ဒီးပိာ်ခွါအံၤလၢ ဟီၣ်ခိၣ်လီၤ. တၢ်အံၤမ့ၢ်ပတၢ်အိၣ်ဆိးအလီၢ်လီၤ. လၢတၢ်န့ၣ်အဃိ, ပှၤဒီမါဝၤအဆိကတၢၢ်ခံဂၤ လၢအမ့ၢ်စီၤအၤဒၣ်ဒီးနီၢ်အံၣ်အုန့ၣ် ယွၤတတ့လီၤအဝဲသ့ၣ်လၢ ကအိၣ်ဝဲဆိးဝဲလၢမူခိၣ်ဘၣ်. ယွၤတ့လီၤတ့ၢ်လံမူခိၣ်ကလူးတဖၣ် လၢကအိၣ်ဝဲဆိးဝဲလၢမူခိၣ်အဂီၢ်လီၤ. (ယိၤဘး ၃၈:၄, ၇) လၢခံန့ၣ်, ကစၢ်ယွၤပာ်လီၤဝဲ ပိာ်ခွါအဆိကတၢၢ်တဂၤအံၤလၢ ပၤရဒံစူး (ကရၢၢ်ဃံလၤ) လၢဘၣ်တၢ်ကိးအီၤလၢ ဧ့ၤဒ့ၣ်တၤသၣ်လီၢ်န့ၣ်လီၤ. (၁ မိၤၡ့ ၂:၁၅-၁၇) ယဟိဝၤယွၤ ဟ့ၣ်စီၤအၤဒၣ်ဒီးအစၢၤအသွဲၣ် တၢ်ခွဲးတၢ်ယာ်လၢ ကအိၣ်မူဘၣ်ဝဲလီၤထူလီၤယိာ်လၢဟီၣ်ခိၣ်ချၢန့ၣ်လီၤ.—ဖး စံးထီၣ်ပတြၢၤ ၃၇:၂၉; ၁၁၅:၁၆ တက့ၢ်.
လၢအခီၣ်ထံးန့ၣ် ထဲဧ့ၤဒ့ၣ်တၤသၣ် လီၢ်တတီၤန့ၣ် မ့ၢ်ပၤရဒံစူးလီၤ. ဘၣ်ဆၣ်ပှၤဒီမါဝၤ အဆိကတၢၢ်ခံဂၤအံၤ ကဘၣ်မၤပှဲၤထီၣ်ဝဲ ဟီၣ်ခိၣ်ဒီဘ့ၣ်လၢ အဝဲသ့ၣ်အဖိအလံၤတဖၣ်လီၤ. လၢခံန့ၣ်, အဝဲသ့ၣ် ကဘၣ်မၤနၢၤဝဲ ဒီးမၤကဲထီၣ်ဝဲဟီၣ်ခိၣ်ဒီဘ့ၣ်လၢ ပၤရဒံစူးလီၤ. (၁ မိၤၡ့ ၁:၂၈) ဟီၣ်ခိၣ်အံၤတဘၣ်တၢ်မၤဟးဂီၤအီၤနီတဘျီဘၣ်. ထီဘိန့ၣ်ကမ့ၢ်ဝဲ ပှၤဟီၣ်ခိၣ်ဖိအတၢ်အိၣ်ဆိးအလီၢ်န့ၣ်လီၤ.—ဖး စံးထီၣ်ပတြၢၤ ၁၀၄:၅ တက့ၢ်.
ကွၢ်တၢ်ဂီၤမူလၢအမ့ၢ် ဘၣ်မနုၤအဃိ ကစၢ်ယွၤတ့လီၤဝဲဟီၣ်ခိၣ်လဲၣ်
၂. ဘၣ်မနုၤအဃိ ဟီၣ်ခိၣ်တကဲထီၣ်ပၤရဒံစူးလဲၣ်.
စီၤအၤဒၣ်ဒီးနီၢ်အံၣ်အု တဒိကနၣ်ယွၤအကလုၢ်အဃိ ယဟိဝၤယွၤဒုးဟးထီၣ်ကွံာ်အဝဲသ့ၣ်လၢ တၤသၣ်လီၢ်အပူၤလီၤ. ပၤရဒံစူးဟါမၢ်ကွံာ်ဝဲလီၤ. ဒီးပှၤဟီၣ်ခိၣ်ဖိမၤကဲထီၣ်က့ၤအီၤတန့ၢ်နီတဂၤဒံးဘၣ်. လံာ်စီဆှံစံးဝဲလၢ “တၢ်ဟ့ၣ်လီၤလံဟီၣ်ခိၣ်လၢ ပှၤတတီတလိၤဘၣ်တဖၣ် အစုပူၤလံ” လီၤ.—ယိၤဘး ၉:၂၄.—ဖး ၁ မိၤၡ့ ၃:၂၃, ၂၄ တက့ၢ်.
မ့ၢ်ယဟိဝၤယွၤပာ်တ့ၢ်ကွံာ်ဝဲ အတၢ်တိာ်ပာ်လၢအခီၣ်ထံးလၢ ပှၤဟီၣ်ခိၣ်ဖိတဖၣ်အဂီၢ်လံဧါ. တပာ်တ့ၢ်ကွံာ်ဝဲဘၣ်. ယဟိဝၤယွၤန့ၣ် မ့ၢ်သ့တၢ်လၢာ်ကစၢ်အဃိ တၢ်လၢကစၢ်မၤဝဲတသ့ဘၣ်န့ၣ် တအိၣ်ဝဲနီတမံၤဘၣ်. (ယၡါယၤ ၄၅:၁၈) ဒ်အတၢ်တိာ်ပာ်လၢ အခီၣ်ထံးအိၣ်ဝဲအသိးန့ၣ် ကစၢ်ကမၤကဲထီၣ်ဝဲလီၤ.—ဖး စံးထီၣ်ပတြၢၤ ၃၇:၁၁, ၃၄ တက့ၢ်.
၃. ပၤရဒံစူး ကဘၣ်တၢ်မၤကဲထီၣ် က့ၤအီၤဒ်လဲၣ်.
ဟီၣ်ခိၣ်အံၤကကဲထီၣ်က့ၤ ပၤရဒံစူးဖဲယ့ၣ်ၡူး ပၢတၢ်ဒ်စီၤပၤအဆၢကတီၢ်န့ၣ်လီၤ. တၢ်ဒုးဖးဒိၣ်လၢ ဘၣ်တၢ်ကိးအီၤလၢ အၢ်မက့းဒိၣ်န့ၣ် ယ့ၣ်ၡူးကကဲခိၣ်ကဲနၢ်လၢ မူခိၣ်ကလူးတဖၣ်အဖီခိၣ် ဒီးကမၤဟးဂီၤကွံာ်ဝဲပှၤလၢ အထီဒါယွၤခဲလၢာ်လီၤ. လၢခံန့ၣ် ယ့ၣ်ၡူးကစၢဃာ်ဝဲ မုၣ်ကီၤလံၢ်လၢဃိာ်ပူၤ အနံၣ် ၁,၀၀၀ လီၤ. ခီဖျိလၢ ယ့ၣ်ၡူးအတၢ်နဲၣ်လိဒီး တၢ်ကဟုကယာ်အဃိ ယွၤအပှၤဂီၢ်မုၢ်တဖၣ်န့ၣ် ကပူၤဖျဲးဝဲလၢ တၢ်စံၣ်ညီၣ်အတီၢ်ပူၤအံၤန့ၣ်လီၤ. ဒီးအဝဲသ့ၣ်ကဒိးန့ၢ်ဘၣ် တၢ်မူအထူအယိာ်လၢ ဟီၣ်ခိၣ်ပၤရဒံစူးအပူၤလီၤ.—ဖး လီၣ်ဖျါ ၂၀:၁–၃; ၂၁:၃, ၄ တက့ၢ်.
၄. တၢ်နးတၢ်ဖှီၣ် ကကတၢၢ်ကွံာ်ဝဲလၢ အဆၢကတီၢ်ဖဲလဲၣ်.
ကစၢ်ယွၤကမၤကတၢၢ်ကွံာ်ဝဲ တၢ်အၢတၢ်သီလၢဟီၣ်ခိၣ်ချၢလၢ အဆၢကတီၢ်ဖဲလဲၣ်. ယ့ၣ်ၡူးဟ့ၣ်တ့ၢ်ဝဲ “တၢ်ပနီၣ်” လၢကဒုးသ့ၣ်ညါပှၤလၢ တၢ်အကတၢၢ် ဘူးထီၣ်လံန့ၣ်လီၤ. ဆၢကတီၢ်ခဲအံၤ ဟီၣ်ခိၣ်တၢ်မၤအသးတဖၣ်န့ၣ် ကဲထီၣ်တၢ်ဘၣ်ယိၣ်ဘၣ်ဘီလၢပှၤဟီၣ်ခိၣ်ဖိအဂီၢ်ဒီး ပာ်ဖျါထီၣ်ဝဲလၢ ပအိၣ်မူဘၣ်လၢ “ဟီၣ်ခိၣ်အစိၤအကတၢၢ်” န့ၣ်လီၤ.—ဖး မးသဲ ၂၄:၃, ၇–၁၄, ၂၁, ၂၂ တက့ၢ်.
ဖဲယ့ၣ်ၡူးပၢဟီၣ်ခိၣ်အနံၣ် ၁,၀၀၀ အတီၢ်ပူၤန့ၣ် အဝဲကမၤကတၢၢ်ကွံာ်ဝဲ တၢ်နးတၢ်ဖှီၣ်ခဲလၢာ်လီၤ. (ယၡါယၤ ၉:၆, ၇; ၁၁:၉) ယ့ၣ်ၡူးကမၤတၢ်ဒ် စီၤပၤအသိးတကးဘၣ် ကမၤတၢ်ဒ်ပှၤလုၢ်တၢ်အခိၣ် ဒီးကထုးထီၣ်ကွံာ်ဝဲ ပှၤဟီၣ်ခိၣ်ဖိတဖၣ် အတၢ်ဒဲးဘးလီၤ. ခီဖျိယ့ၣ်ၡူးအဃိ ယွၤကမၤဟါမၢ်ကွံာ်ဝဲ တၢ်ဆူးတၢ်ဆါ, ဒီး တၢ်သံတၢ်ပှၢ်လီၤ.—ဖး ယၡါယၤ ၂၅:၈; ၃၃:၂၄ တက့ၢ်.
၅. ခါဆူညါန့ၣ် မတၤတဖၣ်ကအိၣ်မူဘၣ်လၢ ပၤရဒံစူးအပူၤလဲၣ်.
လၢဘီမုၢ်ဘျီၣ်ဒိၣ်န့ၣ် နကထံၣ်ဘၣ် ပှၤလၢအအဲၣ်ယွၤဒီး သးအိၣ်မၤလိကစၢ်အတၢ်ဘၣ်သးတဖၣ်လီၤ
ပှၤလၢအဒိကနၣ် ယွၤအကလုၢ်န့ၣ် ကအိၣ်မူဘၣ်လၢ ပၤရဒံစူးအပူၤလီၤ. (၁ ယိၤဟၣ် ၂:၁၇) ယ့ၣ်ၡူးဆှၢလီၤဝဲအပျဲၢ်အဘီၣ်တဖၣ်လၢ ကဃုပှၤလၢအိၣ်ဒီးတၢ်ဆီၣ်လီၤသးဒ်သိး ကသိၣ်လိအဝဲသ့ၣ်လၢကကဲထီၣ် ပှၤလၢယွၤဘၣ်သူၣ်ဘၣ်သးတဖၣ်န့ၣ်လီၤ. မုၢ်မဆါတနံၤအံၤ ကစၢ်ယွၤကတဲာ်ကတီၤဝဲ ပှၤဟီၣ်ခိၣ်ဖိလၢအကကွဲၢ်တဖၣ် ဒ်သိးကအိၣ်မူဘၣ်ဝဲလၢဟီၣ်ခိၣ်ပၤရဒံစူးအဂီၢ်န့ၣ်လီၤ. (စဖါနယၤ ၂:၃) ဖဲယဟိဝၤပှၤအုၣ်အသးတဖၣ်အဘီမုၢ်ဘျီၣ်ဒိၣ်န့ၣ် ပှၤမၤလိတၢ်ဒ်သိးကကဲထီၣ်ဝဲဝၤ, မါဒီးမိၢ်ပၢ်လၢအဂ့ၤလီၤ. မိၢ်ပၢ်ဒီးဖိဒံဖိသၣ်တဖၣ် ဘူၣ်ထီၣ်ဘါထီၣ်ယွၤဒ်သိးသိး ဒီးဒိးန့ၢ်ဘၣ်ဝဲတၢ်အဘျုးအဖှိၣ်လၢတၢ်သးခုကစီၣ်အံၤအဃိန့ၣ်လီၤ.—ဖး မံကၤ ၄:၁-၄ တက့ၢ်.
