တၢ်မၤလိ ၅၃
စီၤယဟိယဒါ အိၣ်ဒီးတၢ်သးဒူ
နီၢ်အံၤစ့ဘ့ၤလး အိၣ်ဒီးအဖိမုၣ်တဂၤ ဒီးအမံၤမ့ၢ်နီၢ်ဧသၤလယၤလီၤ. ဒီးနီၢ်ဧသၤလယၤန့ၣ် အၢသီဝဲဒ်သိးဒီးအမိၢ်လီၤ. နီၢ်ဧသၤလယၤဖျီအသးဒီး ယူဒၤအစီၤပၤလီၤ. ဖဲအဝၤသံဝံၤအလီၢ်ခံ အဖိခွါကဲထီၣ်စီၤပၤလီၤ. ဘၣ်ဆၣ် ဖဲနီၢ်ဧသၤလယၤအဖိခွါသံဝံၤအလီၢ်ခံန့ၣ် အဝဲအဲၣ်ဒိးပၢက့ၤ ပှၤယူဒၤဖိခဲလၢာ်လၢအနီၢ်ကစၢ်လီၤ. လၢတၢ်န့ၣ်အဃိ နီၢ်ဧသၤလယၤဂုာ်ကျဲးစၢးမၤသံကွံာ် ပှၤယူဒၤဖိအစီၤပၤအစၢၤအသွဲၣ်ခဲလၢာ် ဃုာ်ဒီးအလံၤခွါတဖၣ်လီၤ. ဒီးပှၤဂီၢ်မုၢ်ခဲလၢာ်ပျံၤအီၤလီၤ.
နီၢ်ဧသၤလယၤမၤဝဲ တၢ်အၢတၢ်သီန့ၣ် ပှၤလုၢ်တၢ်အခိၣ် စီၤယဟိယဒါ ဒီးအမါနီၢ်ယဟိၤၡ့ဘၤ သ့ၣ်ညါဝဲလီၤ. အဃိ အဝဲသ့ၣ်ပာ်ခူသူၣ်ဝဲ နီၢ်ဧသၤလယၤအလံၤခွါတဂၤ လၢအမံၤမ့ၢ်ဝဲစီၤယိၤအၣ် ဒီးလုၢ်ဒိၣ်ထီၣ်အီၤလၢ တၢ်လုၢ်ဟံၣ်ပူၤလီၤ.
ဖဲစီၤယိၤအၣ်အသးနံၣ်အိၣ်ဝဲနွံနံၣ်အခါ စီၤယဟိယဒါကိးဖှိၣ်ဝဲ ပဒိၣ်ဖးဒိၣ် ဒီးပှၤလ့ၤဝံဖိတဖၣ် ဒီးတဲဘၣ်အဝဲသ့ၣ်လၢ– ‘အိၣ်ခိးကွၢ်တၢ်လုၢ်ဟံၣ်အပဲတရီ ဒီးဒုးဟဲနုာ်လီၤပှၤနီတဂၤတဂ့ၤ.’ ဝံၤဒီး စီၤယဟိယဒါပာ်ထီၣ်ဝဲ စီၤယိၤအၣ်လၢ ပှၤယူဒၤဖိအစီၤပၤ ဒီးဒုးကျီၤထီၣ်အီၤလၢ စီၤပၤအခိၣ်သလုးလီၤ. ပှၤယူဒၤဖိတဖၣ်ကိးပသူထီၣ်ဝဲလၢ– ‘မ်စီၤပၤအိၣ်မူဘၣ်ဖးယံာ်တက့ၢ်.’
ဖဲနီၢ်ပၤမုၣ်ဧသၤလယၤနၢ်ဟူဝဲ ပှၤဂီၢ်မုၢ်ကိးပသူထီၣ်အခါ အဝဲကရီလဲၤဝဲဆူတၢ်လုၢ်ဟံၣ်လီၤ. ဖဲအဝဲလဲၤတုၤအခါ ထံၣ်ဘၣ်ဝဲစီၤပၤအသီတဂၤအံၤ ဆၢထၢၣ်လၢတၢ်လီၢ်ထီၣ်ထီလီၤ. ဒီးနီၢ်ပၤမုၣ်ဧသၤလယၤ ကိးပသူထီၣ်ဝဲလၢ– ‘ပှၤပူထီၣ်တၢ်လံ. ပှၤပူထီၣ်တၢ်လံ.’ ဝံၤဒီး ပဒိၣ်ဖးဒိၣ်တဖၣ်စှီၤထုးဝဲ နီၢ်ပၤမုၣ်လၢအအၢအသီတဂၤအံၤ, ထုးထီၣ်ကွံာ်အီၤလၢတၢ်ချၢ ဒီးမၤသံကွံာ်အီၤလီၤ. ဘၣ်ဆၣ် ဘဧၤလး အတၢ်လုၢ်ဟံၣ် ဒီးအတၢ်ဂီၤတၢ်ဖှီၣ်လၢ အိၣ်လၢကီၢ်ယူဒၤအပူၤန့ၣ် တၢ်ကမၤအီၤဒ်လဲၣ်.
စီၤယဟိယဒါ မၤစၢၤပှၤဂီၢ်မုၢ်တဖၣ်ဒ်သိး အဝဲသ့ၣ် ကမၤတၢ်အၢၣ်လီၤအီလီၤလၢ ကဘူၣ်ထီၣ်ဘါထီၣ်ဝဲထဲ ယဟိဝၤယွၤ တဂၤဧိၤန့ၣ်လီၤ. စီၤယဟိယဒါမၢပှၤဂီၢ်မုၢ်တဖၣ် မၤဟးဂီၤကွံာ်ဝဲ ဘဧၤလးအတၢ်လုၢ်ဟံၣ်ဒီးတၢ်ဂီၤတၢ်ဖှီၣ်ခဲလၢာ်လီၤ. အဝဲပာ်ထီၣ်ပှၤလုၢ်တၢ်အဒိၣ် ဒီးပှၤလ့ၤဝံဖိတဖၣ်လၢ ကလဲၤမၤတၢ်လၢတၢ်လုၢ်ဟံၣ် ဒ်သိးပှၤဂီၢ်မုၢ်တဖၣ် လဲၤဘူၣ်ထီၣ်ဘါထီၣ် ယဟိဝၤယွၤ ဖဲန့ၣ်ကသ့အဂီၢ်လီၤ. စီၤယဟိယဒါ ပာ်ထီၣ်စ့ၢ်ကီးပှၤလၢ အကအိၣ်ခိးကွၢ်တၢ်လုၢ်ဟံၣ်အပဲတရီ ဒ်သိးပှၤလၢအတကဆှီဘၣ်တဖၣ် သုတဟဲနုာ်လီၤဝဲတဂ့ၤအဂီၢ်လီၤ. ဝံၤဒီး စီၤယဟိယဒါဒီး ပဒိၣ်ဖးဒိၣ်တဖၣ် လဲၤကိးဝဲစီၤယိၤအၣ်လၢ စီၤပၤ အနီပူၤဒီးပာ်ထီၣ်အီၤလၢ စီၤပၤအလီၢ်ပစိာ်အဖီခိၣ်န့ၣ်လီၤ. ဒီးပှၤယူဒၤဖိတဖၣ် သးခုဝဲဒိၣ်မးလီၤ. ခဲအံၤအဝဲသ့ၣ် ထူၣ်ဖျဲးထီၣ်လၢဘဧၤလး အတၢ်ဘူၣ်တၢ်ဘါ ဒီးနီၢ်ဧသၤလယၤ လၢအအၢအသီတဂၤအံၤ အစုပူၤလံ. မ့ၢ်လၢစီၤယဟိယဒါ အိၣ်ဒီးတၢ်သးဒူအဃိ အဝဲမၤစၢၤဘၣ်ဝဲပှၤအါဂၤလီၤ.
“ပှၤလၢအမၤသံပနီၢ်ခိ, ဒီးမၤသံပသးတသ့ဘၣ် တဖၣ်န့ၣ်, သုတပျံၤအီၤတဂ့ၤ. မ့မ့ၢ်ဂ့ၤန့ၢ်အန့ၣ်ပျံၤ ပှၤလၢအမၤဟးဂီၤပသးဒီးပနီၢ်ခိလၢ လရာ်ပူၤသ့တဂၤန့ၣ်တက့ၢ်.”—မးသဲ ၁၀:၂၈
