ပှၤအံၣ်စရ့လး ပိာ်မုၣ်ဖိတဂၤ ဘၣ်လဲၤအိၣ်လၢ ကီၢ်စူၤရံလၢ အအိၣ်ယံၤဒီးအဟံၣ်. ပိာ်မုၣ်ဖိတဂၤအံၤန့ၣ်​ ပှၤစူၤရံအသုး က့ၤဖီၣ်န့ၢ်အီၤ. ခဲအံၤန့ၣ်​ ပိာ်မုၣ်ဖိအံၤဘၣ်ကဲဝဲ သုးခိၣ်ဖးဒိၣ်​ စီၤနဧၤမၣ်အမါအပျဲၢ်. ပှၤလၢအိၣ်ဝးတရံးအီၤတဖၣ်​ မ့ၢ်တဘူၣ်ထီၣ်ဘါထီၣ်​ ယဟိဝၤယွၤ သနာ်က့ အဝဲဘူၣ်ထီၣ်ဘါထီၣ်​ ယဟိဝၤယွၤ.

စီၤနဧၤမၣ်​ အိၣ်ဒီးဖံးဘ့ၣ်​ တၢ်ဆါအၢတခါ. ဒီးအဝဲဘၣ်တူၢ်ဝဲ တၢ်ဆါအံၤနးမး. ပှၤအံၣ်စရ့လး ပိာ်မုၣ်ဖိအံၤ အဲၣ်ဒိးမၤစၢၤဝဲ စီၤနဧၤမၣ်. အဃိ အဝဲတဲဘၣ်​ စီၤနဧၤမၣ်အမါလၢ ‘ယသ့ၣ်ညါ ပှၤလၢအမၤဘျါ နဝၤအတၢ်ဆါသ့န့ၣ်​ အိၣ်ဝဲတဂၤ. လၢအံၣ်စရ့လး အထံကီၢ်အပူၤန့ၣ်​ ယဟိဝၤယွၤအဝံ အိၣ်ဝဲတဂၤ. ဝံတဂၤအံၤ အမံၤမ့ၢ်ဝဲ ဝံအလံၤၡါ ဒီးအဝဲမၤဘျါက့ၤ နဝၤတၢ်ဆါသ့ဝဲ.’

စီၤနဧၤမၣ်အမါ တဲဘၣ်အဝၤ ဘၣ်ဃးဒီး တၢ်ဂ့ၢ်လၢ ပှၤအံၣ်စရ့လး ပိာ်မုၣ်ဖိတဂၤအံၤ တဲဘၣ်အီၤ. ဒ်သိး စီၤနဧၤမၣ်အတၢ်ဆါ ကဘျါက့ၤအဂီၢ် အဝဲသးအိၣ်မၤပိာ်ထွဲဝဲ ပှၤဂၤအတၢ်ဟ့ၣ်ကူၣ်​ ကိးမံၤဒဲး. လၢတၢ်န့ၣ်အဃိ စီၤနဧၤမၣ်​ လဲၤဝဲလၢ ဝံအလံၤၡါအဟံၣ်လၢ ကီၢ်အံၣ်စရ့လးအပူၤ. စီၤနဧၤမၣ်​ မုၢ်လၢ်ဝဲလၢ ဝံအလံၤၡါ ကပာ်ဒိၣ်အီၤ. ဘၣ်ဆၣ်​ ဝံအလံၤၡါ တလဲၤထံၣ်လိာ်သးဒီးအီၤ လၢအနီၢ်ကစၢ်ဘၣ်​  အဝဲမၢအပျဲၢ် လဲၤတဲဘၣ်​ စီၤနဧၤမၣ်လၢ ‘လဲၤစုၣ်လီၤနသးလၢ ထံကျိယၢ်ဒ့ၣ်အပူၤ နွံဘျီ ဝံၤဒီး နတၢ်ဆါ ကဘျါကွံာ်ဝဲ.’

စီၤနဧၤမၣ်​ သးဟးဂီၤဝဲ. အဝဲတဲဝဲလၢ ‘ယဆိကမိၣ်လၢ ဝံတဂၤအံၤ ကကိးထီၣ်အယွၤ, ဝံၢ်ဝၢ်အစုလၢ ယဖီခိၣ်​ ဒီးမၤဘျါယၤ တဘျီဃီ. ဘၣ်ဆၣ်​ အဝဲ မၢယလဲၤစုၣ်လီၤယသးလၢ ပှၤအံၣ်စရ့လးဖိ အထံကျိအပူၤ. လၢကီၢ်စူၤရံအပူၤန့ၣ်​ ထံကျိ ဂ့ၤန့ၢ်ဒံးဖဲအံၤ. ယမ့ၢ်က့ၤစုၣ်လီၤယသးလၢ စူၤရံထံကျိပူၤန့ၣ်​ ဝံၤလီၤ.’ စီၤနဧၤမၣ်​ သးပှံၢ်ထီၣ်တၢ် ဒီးဟးထီၣ်ကွံာ်လၢ စီၤအလံၤၡါအဟံၣ်.

ဝံၤဒီးစီၤနဧၤမၣ်​ အပျဲၢ်တဖၣ်​ တဲဘၣ်အီၤလၢ ‘နမ့ၢ်အဲၣ်ဒိးလၢ နတၢ်ဆါကဘျါက့ၤန့ၣ်​ နတကြၢးမၤကွၢ်တၢ်လၢ ပှၤတဲနၤဘၣ်ဧါ. တၢ်လၢဝံအလံၤၡါ မၢနမၤန့ၣ်​ ညီညီဖိလီၤ. နမ့ၢ်မၤကွၢ်န့ၣ်​ တဂ့ၤဧီၤ.’ စီၤနဧၤမၣ်​ ဒိကနၣ်အဝဲသ့ၣ်​ အကလုၢ် ဒီးလဲၤစုၣ်လီၤအသးလၢ ထံကျိယၢ်ဒ့ၣ်အပူၤ နွံဘျီ. ဖဲစီၤနဧၤမၣ်​ စုၣ်လီၤအသးပှဲၤထီၣ်နွံဘျီဝံၤဒီး ဟဲက့ၤထီၣ်လၢ ထံကျါအခါ အတၢ်ဆါဘျါက့ၤဝဲ. စီၤနဧၤမၣ်​ သးခုဝဲဒိၣ်မး ဒီးက့ၤစံးဘျုးစံးဖှိၣ်က့ၤ ဝံအလံၤၡါ. စီၤနဧၤမၣ်​ တဲဝဲလၢ ‘ခဲအံၤန့ၣ်​ ယသ့ၣ်ညါလၢ ယဟိဝၤယွၤ မ့ၢ်ယွၤလၢ အမ့ၢ်အတီတဂၤ.’ ဖဲစီၤနဧၤမၣ်​ အတၢ်ဆါဘျါ ဒီးဟဲက့ၤတုၤလၢ အဟံၣ်အခါ ပှၤအံၣ်စရ့လးပိာ်မုၣ်ဖိအံၤ ကသးခုဝဲ ဒိၣ်မး.