ဖဲ​စီၤ​ယိၤၡံယၤ​အသး​အိၣ်ဝဲ​ဃိး​နံၣ်​အခါ အဝဲ​ကဲထီၣ်​ဝဲ​ယူဒၤ​အ​စီၤပၤ​လီၤ. ဖဲ​န့ၣ်​အဆၢ​ကတီၢ် ပှၤ​ဂီၢ်မုၢ်​တဖၣ်​မၤဝဲ တၢ်ဝံ​တၢ်နါ​အ​တၢ်ဖံး​တၢ်မၤ ဒီး​ဘူၣ်ထီၣ်​ဘါထီၣ်​ဝဲ တၢ်ဂီၤ​တၢ်ဖှီၣ်​တဖၣ်​လီၤ. ဖဲ​စီၤ​ယိၤၡံယၤ​အိၣ် ၁၆ နံၣ်​အခါ အဝဲ​ဃု​သ့ၣ်ညါ ယဟိဝၤ​ယွၤ​အဂ့ၢ် ဒ်သိး​က​ဘူၣ်ထီၣ်​ဘါထီၣ်​အီၤ ဒီး​မၤ​သးခု​အီၤ​အဂီၢ်​လီၤ. ဖဲ​စီၤ​ယိၤၡံယၤ ပှဲၤထီၣ်​အ​နံၣ် ၂၀ အခါ အဝဲ​စးထီၣ်​မၤ​ဟးဂီၤ​ကွံာ်ဝဲ တၢ်ဂီၤ​တၢ်ဖှီၣ်​ဒီး တၢ်​လုၢ်လီၢ်​လၢ ကီၢ်​ယူဒၤ​အ​ပူၤ​လီၤ. ဖဲ​စီၤ​ယိၤၡံယၤ​အိၣ်ဝဲ ၂၆ နံၣ်​အခါ အဝဲ​ရဲၣ်ကျဲၤ​ဝဲ​လၢ ပှၤ​က​ဘှီဂ့ၤ​ထီၣ်​က့ၤ ယဟိဝၤ​ယွၤ​အ​တၢ်လုၢ်ဟံၣ်​လီၤ.

ပှၤလုၢ်တၢ်​အခိၣ် စီၤဃံးလကံယၤ ထံၣ်န့ၢ်ဝဲ​ယဟိဝၤ​ယွၤ အ​တၢ်သိၣ်​တၢ်သီ​အ​လံာ်ထူ​လၢ တၢ်လုၢ်ဟံၣ်​ပူၤ​လီၤ. ဘၣ်​သ့ၣ်​သ့ၣ် လံာ်ထူ​အံၤန့ၣ် စီၤ​မိၤၡ့​ကွဲးဝဲ​လီၤ. စီၤပၤ​အ​နဲၣ်ရွဲၣ်​စီၤမၡူလၣ် ဟဲက့ၤ​စိာ်ဝဲ​လံာ်ထူ​အံၤ​လၢ စီၤ​ယိၤၡံယၤ​အ​အိၣ်ဒီး ဖး​ဝဲ​လံာ်​တၢ်သိၣ်​တၢ်သီ​အံၤ​လၢ အ​ကလုၢ်​ဖးဒိၣ်​လီၤ. ဖဲ​စီၤ​ယိၤၡံယၤ ဒိကနၣ်​ဝဲ​အခါ​န့ၣ် အဝဲ​သ့ၣ်ညါ​ဘၣ်​ဝဲ​လၢ ပှၤ​ဂီၢ်မုၢ်​တဖၣ်​အံၤ​တ​ဒိကနၣ် ယဟိဝၤ​ယွၤ​အ​ကလုၢ် အိၣ်​လံ အ​နံၣ်​အါမး​လံ. စီၤပၤ​ယိၤၡံယၤ​တဲဘၣ် စီၤဃံးလကံယၤ​လၢ– ‘ယဟိဝၤ​ယွၤ သးပှံၢ်​ထီၣ်​ပှၤ​ဒိၣ်မး​လံ. လဲၤ​သံကွၢ်​တၢ်​လၢ​ကစၢ်​ယွၤ​အ​အိၣ် ဒီး​ကစၢ်​ယွၤ​က​တဲဘၣ်​ပှၤလၢ တၢ်​လၢ​ပ​ကြၢး​မၤ​န့ၣ်​လီၤ.’ ယဟိဝၤ​ယွၤ​တဲဘၣ် အ​ဝံမုၣ်​နီၢ်ဃူးလဒါ​လၢ– ‘ပှၤ​ယူဒၤ​ဖိ​တဖၣ် ပာ်တ့ၢ်​ကွံာ်​ယၤ​လံ. အဝဲသ့ၣ်​က​ဘၣ်​တၢ်​စံၣ်ညီၣ်​လီၤ. ဘၣ်ဆၣ် ခီဖျိ​လၢ​စီၤပၤ​ယိၤၡံယၤ အိၣ်ဒီး​တၢ်ဆီၣ်​လီၤသး​အဃိ တၢ်​စံၣ်ညီၣ်​တ​ဟဲ​ဘၣ်​ပှၤ​ဂီၢ်မုၢ်​ဖဲ စီၤ​ယိၤၡံယၤ​အ​စိၤ​ဘၣ်.’

ဖဲ​စီၤ​ယိၤၡံယၤ​နၢ်ဟူ​ဝဲ တၢ်ကစီၣ်​အံၤ​အခါ အဝဲ​လဲၤ​လၢ​တၢ်လုၢ်ဟံၣ် ဒီး​ကိးဖှိၣ်ဝဲ​ပှၤ​ယူဒၤ​ဖိ​ခဲလၢာ်​လီၤ. ဝံၤဒီး စီၤ​ယိၤၡံယၤ​ဖး​ထီၣ်ဝဲ ယဟိဝၤ​ယွၤ​အ​တၢ်သိၣ်​တၢ်သီ​လၢ​အ​ကလုၢ်​ဖးဒိၣ်​လၢ ပှၤ​ဂီၢ်မုၢ်​တဖၣ်​အမဲာ်​ညါ​လီၤ. စီၤ​ယိၤၡံယၤ​ဒီး​ပှၤ​ဂီၢ်မုၢ်​တဖၣ်​အံၤ အၢၣ်လီၤ​အီလီၤ​ဝဲ​လၢ က​ဒိကနၣ်​ဝဲ ယဟိဝၤ​ယွၤ အ​ကလုၢ်​လၢ အဝဲသ့ၣ်​အသး​ဒီဖျၢၣ်​ညါ​လီၤ.

 ပှၤ​ယူဒၤ​ဖိ​တဖၣ်​အံၤ တ​မၤဝဲ​ဘူၣ်လဲၤကပာ်​န့ၣ် အိၣ်ဝဲ​အ​နံၣ်​အါမး​လံ. ဘၣ်ဆၣ် ဖဲ​စီၤ​ယိၤၡံယၤ​ဖး​ဝဲ တၢ်သိၣ်​တၢ်သီ​လၢ ပှၤ​က​ဘၣ်​မၤ​ဘူၣ်လဲၤကပာ်​ကိးနံၣ်ဒဲး​အခါ အဝဲ​တဲဘၣ်​ပှၤ​ဂီၢ်မုၢ်​လၢ– ‘ပ​က​မၤ​ဘူၣ်လဲၤကပာ်​လၢ ယဟိဝၤ​ယွၤ​အဂီၢ်​လီၤ.’ ဝံၤဒီး စီၤ​ယိၤၡံယၤ​ကတဲာ်​ကတီၤဝဲ တၢ်​လုၢ်​အါမး ဒီး​ရဲၣ်ကျဲၤ​ဝဲ​လၢ ပှၤ​သးဝံၣ်​တၢ်ဖိ​တဖၣ် က​ဟဲ​သးဝံၣ်​တၢ်​လၢ​တၢ်လုၢ်ဟံၣ်​လီၤ. ပှၤ​ဂီၢ်မုၢ်​တဖၣ် မၤဝဲ​ဘူၣ်လဲၤကပာ် ဝံၤဒီး​မၤဝဲ ဘူၣ်ကိၣ်​တအိၣ်​ဘၣ်​ဒီး​ကိၣ်မံၣ်​န့ၣ် ယံာ်ဝဲ​နွံ​သီ​လီၤ. စီၤ​ယိၤၡံယၤ​န့ၣ် အဲၣ်​ယဟိဝၤ​ယွၤ အ​တၢ်သိၣ်​တၢ်သီ​နီၢ်နီၢ်​လီၤ. မ့ၢ်​န​သးအိၣ်​မၤလိ​အါထီၣ် ယဟိဝၤ​ယွၤ​အဂ့ၢ်​စ့ၢ်ကီး​ဧါ.