တၢ်မၤလိ ၅၀
ယဟိဝၤယွၤဒီသဒၢ စီၤယဟိၡၤဖး
စီၤယဟိၡၤဖးမ့ၢ်ပှၤယူဒၤဖိအစီၤပၤတဂၤလၢ မၤဟးဂီၤကွံာ်ဝဲ ဘဧၤလးအတၢ်လုၢ်လီၢ်တဖၣ် ဒီးအတၢ်ဂီၤတၢ်ဖှီၣ်တဖၣ်လၢ ထံကီၢ်အပူၤလီၤ. ဒီးအဝဲအဲၣ်ဒိးဝဲလၢ ပှၤဂီၢ်မုၢ်တဖၣ်သ့ၣ်ညါဝဲ ယဟိဝၤယွၤအတၢ်သိၣ်တၢ်သီတဖၣ်လီၤ. လၢတၢ်န့ၣ်အဃိ စီၤယဟိၡၤဖးဆှၢလီၤဝဲ ပဒိၣ်ဒီးပှၤလ့ၤဝံဖိတဖၣ်လၢ ယူဒၤအဝ့ၢ်တဖၣ်အပူၤ ဒ်သိးကသိၣ်လိပှၤဂီၢ်မုၢ် ဘၣ်ဃးဒီးယဟိဝၤယွၤအတၢ်သိၣ်တၢ်သီအဂီၢ်လီၤ.
ခီဖျိလၢ ယဟိဝၤယွၤအိၣ်ဃူအပှၤဂီၢ်မုၢ်အဃိ ထံကီၢ်လၢအအိၣ်ဘူးဒီးကီၢ်ယူဒၤန့ၣ် ဟဲဒုးအဝဲသ့ၣ် တဘူၣ်ဘၣ်. လၢတၢ်န့ၣ်အလီၢ် အဝဲသ့ၣ်ဟဲစိာ်ဝဲတၢ်ဟ့ၣ်လၢ စီၤယဟိၡၤဖးအဂီၢ်လီၤ. ဘၣ်ဆၣ် ပှၤမိၤအးဖိဒီးပှၤဧၣ်မိၣ်ဖိ ဒီးပှၤလၢအိၣ်လၢစ့ဧၢ်အဟီၣ်ကဝီၤတဖၣ် ဟဲဒုးဝဲပှၤယူဒၤဖိတဖၣ်လီၤ. စီၤယဟိၡၤဖးသ့ၣ်ညါဝဲလၢ အဝဲလိၣ်ဘၣ်ဝဲယဟိဝၤယွၤ အတၢ်မၤစၢၤန့ၣ်လီၤ. အဝဲမၢကယဲၢ်ပှၤပိာ်ခွါ, ပိာ်မုၣ်ဒီးဖိသၣ်တဖၣ် ဟဲပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ်အပူၤလီၤ. စီၤယဟိၡၤဖးဆၢထၢၣ်ဝဲလၢ ပှၤဂီၢ်မုၢ်အမဲာ်ညါ ဒီးဃ့ထုကဖၣ်ဝဲလၢ– ‘ယဟိဝၤယွၤဧၢ, မ့တမ့ၢ်လၢနၤန့ၣ် ပမၤနၢၤတၢ်တသ့ဘၣ်, ပကဘၣ်မၤဒ်လဲၣ်န့ၣ် ဝံသးစူၤတဲဘၣ်ပှၤတက့ၢ်.’
ယဟိဝၤယွၤ စံးဆၢက့ၤအတၢ်ထုကဖၣ် ဒီးတဲဝဲလၢ– ‘ပျံၤတၢ်တဂ့ၤ. ယကမၤစၢၤသုလီၤ. အိၣ်ဂၢၢ်ဆိးကျၢၤလၢသုလီၢ် ဒီးယကမၤပူၤဖျဲးသုဒ်လဲၣ်န့ၣ် အိၣ်ခိးကွၢ်တက့ၢ်.’ ယဟိဝၤယွၤ ကမၤပူၤဖျဲးအဝဲသ့ၣ်ဒ်လဲၣ်.
လၢခံတဂီၤန့ၣ် စီၤယဟိၡၤဖးဃုထၢထီၣ် ပှၤသးဝံၣ်တၢ်ဖိတဖၣ် ဒီးမၢအဝဲသ့ၣ်လဲၤအိၣ်လၢ ပှၤသုးဖိအမဲာ်ညါလီၤ. ပှၤသးဝံၣ်တၢ်ဖိတဖၣ်အံၤ ဟးထီၣ်ဝဲလၢဝ့ၢ်ယရူၤၡလ့ၣ် ဒီးလဲၤတုၤဝဲလၢတၢ်ဒုးပျီပူၤ ကိးဝဲအမံၤလၢတကိၤလီၤ.
ဖဲပှၤသးဝံၣ်တၢ်ဖိတဖၣ် သးဝံၣ်စံးထီၣ်ပတြၢၤ ယဟိဝၤယွၤလၢအကလုၢ်ဖးဒိၣ်အခါ ယဟိဝၤယွၤဒုးတၢ်လၢအပှၤဂီၢ်မုၢ်အဂီၢ်လီၤ. ယဟိဝၤယွၤမၤဝဲတၢ်လီၤလး ဒ်သိးပှၤဧၣ်မိၣ်ဖိဒီးပှၤမိၤအးဖိ ကက့ၤဒုးလိာ်က့ၤအသး ဒီးအဝဲသ့ၣ်သံဝဲခဲလၢာ်လီၤ. ဘၣ်ဆၣ် ယဟိဝၤယွၤဒီသဒၢဝဲ ပှၤယူဒၤဖိ, ပှၤလုၢ်တၢ်အဒိၣ် ဒီးသုးဖိတဖၣ်လီၤ. တၢ်ကစီၣ်အံၤ ရၤလီၤအသးဆူထံကီၢ်လၢ အအိၣ်ဘူးဒီးပှၤယူဒၤဖိတဖၣ်န့ၣ်လီၤ. ဒီးအဝဲသ့ၣ်သ့ၣ်ညါဝဲလၢ ယဟိဝၤယွၤဒီသဒၢဝဲအပှၤဂီၢ်မုၢ်လီၤ. ယဟိဝၤယွၤ မၤပူၤဖျဲးအပှၤဂီၢ်မုၢ်ဒ်လဲၣ်. ယဟိဝၤယွၤ မၤပူၤဖျဲးအဝဲသ့ၣ်လၢကျဲအါဘိလီၤ. ယဟိဝၤယွၤ တလိၣ်ဘၣ်ဝဲပှၤဟီၣ်ခိၣ်ဖိ အတၢ်မၤစၢၤဒ်သိး ကမၤပူၤဖျဲးဝဲအပှၤဂီၢ်မုၢ်အဂီၢ်ဘၣ်.
“သုတဒုးသုးဘၣ်လၢ တၢ်အံၤအပူၤဘၣ်. ပာ်ဆၢထၢၣ်သုသး, ဒီးဆၢထၢၣ်, ဒီးထံၣ်ဘၣ် ယွၤအတၢ်အုၣ်က့ၤခီၣ်က့ၤ အိၣ်ဒီးသုတက့ၢ်.”—၂ ကွဲးနီၣ်တၢ် ၂၀:၁၇
