တၢ်မၤလိ ၂၃
တၢ်အၢၣ်လီၤအီလီၤဒီးယဟိဝၤယွၤ
ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤဝံၤ ခံလါဃၣ်ဃၣ်န့ၣ် အဝဲသ့ၣ် လဲၤတုၤဝဲဆူ ကစၢၢ်စံၤနါ ဒီးအိၣ်ကတီၢ်ဝဲဖဲန့ၣ်. ယဟိဝၤယွၤ ကိးထီၣ်စီၤမိၤၡ့ ဒီးစီၤမိၤၡ့ လဲၤထီၣ်ဆူ ကစၢၢ်ခိၣ်. ဖဲန့ၣ်ကစၢ်ယွၤ တဲဘၣ်အီၤလၢ ‘ယမၤပူၤဖျဲး ပှၤအံၣ်စရ့လးဖိလံ. အဃိ အဝဲသ့ၣ် မ့ၢ်ဒိကနၣ် ယကလုၢ် ဒီးမၤထွဲ ယတၢ်သိၣ်တၢ်သီတဖၣ်န့ၣ် အဝဲသ့ၣ် ကကဲထီၣ် ပှၤလီၤဆီတကလုာ် လၢယဂီၢ်.’ ဖဲစီၤမိၤၡ့ ဟဲက့ၤလီၤအခါ အဝဲတဲဘၣ် ပှၤအံၣ်စရ့လးဖိလၢ တၢ်လၢယဟိဝၤယွၤ တဲဘၣ်အီၤတဖၣ်. ပှၤအံၣ်စရ့လးဖိတဖၣ်န့ၣ် တဲဆၢက့ၤ ယဟိဝၤယွၤဒ်လဲၣ်. အဝဲသ့ၣ် တဲဝဲလၢ ‘ကယဲၢ်တၢ်လၢ ယဟိဝၤယွၤ တဲဘၣ်ပှၤတဖၣ်န့ၣ် ပကမၤထွဲခဲလၢာ်.’
ဝံၤဒီး စီၤမိၤၡ့ လဲၤထီၣ်ကဒီး လၢကစၢၢ်ခိၣ်. ဖဲန့ၣ်န့ၣ် ယဟိဝၤယွၤ တဲဘၣ်အီၤလၢ ‘ဆူမဲာ်ညါသၢသီန့ၣ် ယကတဲတၢ်ဒီးနၤ. ဒီးဟ့ၣ်ပလီၢ် ပှၤဂီၢ်မုၢ်တဖၣ်လၢ တဘၣ်ဟဲဘူးထီၣ်ဒီး ကစၢၢ်စံၤနါတဂ့ၤ.’ စီၤမိၤၡ့ က့ၤလီၤဝဲဒီး တဲဘၣ် ပှၤအံၣ်စရ့လးဖိတဖၣ်လၢ အဝဲသ့ၣ် ကဘၣ်အိၣ်ကတဲာ်ကတီၤအသး ဒ်သိး ကနၢ်ဟူ ကစၢ်ယွၤ အတၢ်ကတိၤအဂီၢ်.
လၢသၢနံၤတနံၤန့ၣ် ပှၤအံၣ်စရ့လးဖိတဖၣ် ထံၣ်ဘၣ်ဝဲ လီဝၢ်ဒံး ဒီးတၢ်အၢၣ်ခံးသူ ကျၢၢ်ဘၢဃာ်ဝဲကစၢၢ်. ဒီးပှၤအံၣ်စရ့လးဖိတဖၣ် နၢ်ဟူဝဲလီသီၣ် ဒီးကွဲၤသီၣ်ထီၣ်ဝဲ. ဝံၤဒီး ယဟိဝၤယွၤ ဟဲလီၤဝဲလၢ ကစၢၢ်ဒီခိၣ်ဒီးမ့ၣ်အူ. ပှၤအံၣ်စရ့လးဖိတဖၣ် ပျံၤတၢ်ဒိၣ်မးအဃိ ကနိးကစုာ်ဝဲ. ကစၢၢ်ဒီတဖျၢၣ်န့ၣ် ကျၢၢ်ဘၢအသးလၢ မ့ၣ်အူခုၣ် ဒီးဟူးဝးဝဲဒိၣ်မး. ဒီးကွဲၤအကလုၢ် သီၣ်ထီၣ်ဝဲ ဒိၣ်ထီၣ်ဒိၣ်ထီၣ်ဝဲ. ဝံၤဒီး ကစၢ်ယွၤ တဲဘၣ်အဝဲသ့ၣ်လၢ ‘ယမ့ၢ်ယဟိဝၤယွၤ. သုတဘၣ် ဘူၣ်ထီၣ်ဘါထီၣ်ယွၤလၢ အဂၤတဖၣ်ဘၣ်.’
စီၤမိၤၡ့ လဲၤထီၣ်ကဒီးဆူ ကစၢၢ်ခိၣ်. ဒီးယဟိဝၤယွၤ ဟ့ၣ်လီၤအီၤ တၢ်သိၣ်တၢ်သီတဖၣ်လၢ ဘၣ်ဃးဒီး ပှၤအံၣ်စရ့လးဖိတဖၣ် ကဘၣ်ဘူၣ်ထီၣ်ဘါထီၣ်ယဟိဝၤယွၤ ဒ်လဲၣ် ဒီးအဝဲသ့ၣ် ကဘၣ်အိၣ်မူဝဲ ဒ်လဲၣ်အဂ့ၢ်. စီၤမိၤၡ့ ကွဲးလီၤဝဲ တၢ်သိၣ်တၢ်သီတဖၣ်အံၤ ဝံၤဒီးဖးထီၣ်ဝဲလၢ ပှၤအံၣ်စရ့လးဖိ အမဲာ်ညါ. အဝဲသ့ၣ်အၢၣ်လီၤဝဲလၢ ‘ကယဲၢ်တၢ်လၢ ယဟိဝၤယွၤ တဲဘၣ်ပှၤန့ၣ် ပကမၤထွဲခဲလၢာ်.’ ပှၤအံၣ်စရ့လးဖိတဖၣ် မၤဝဲတၢ်အၢၣ်လီၤအီလီၤဒီး ကစၢ်ယွၤ. ဘၣ်ဆၣ် မ့ၢ်အဝဲသ့ၣ် မၤပိာ်ထွဲဝဲစ့ၢ်ကီးဧါ.
“နကဘၣ်အဲၣ် နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ ဒီးလၢနတၢ်ကူၣ်တၢ်ဆး ခဲလၢာ်လီၤ.”—မးသဲ ၂၂:၃၇
