တၢ်မၤလိ ၁၆
စီၤယိၤဘးမ့ၢ်မတၤတဂၤလဲၣ်
လၢကီၢ်ဧူးစးအပူၤ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အိၣ်ဝဲတဂၤ ဒီးအမံၤမ့ၢ် စီၤယိၤဘးလီၤ. စီၤယိၤဘး မ့ၢ်ပှၤထူးပှၤတီၤတဂၤ ဒီးအဟံၣ်ဖိဃီဖိအိၣ်ဝဲအါဂၤလီၤ. စီၤယိၤဘးမ့ၢ်ပှၤလၢအသးဂ့ၤ, မၤစၢၤပှၤဖှီၣ်ဖိယာ်ဖိ, ပိာ်မုၣ်လၢအဝၤသံတဖၣ်, ဒီးဖိသၣ်လၢအမိၢ်အပၢ် တအိၣ်လၢၤဘၣ်တဖၣ်န့ၣ်လီၤ. ခီဖျိလၢ စီၤယိၤဘးမၤတၢ်တီတီလိၤလိၤအဃိ မ့ၢ်အကအိၣ်မူဘၣ် မုာ်မုာ်ခုၣ်ခုၣ်ထီဘိဧါ.
မုၣ်ကီၤလံၢ်ကွၢ်ဝဲတၢ်လၢ စီၤယိၤဘးမၤဝဲတဖၣ် ဘၣ်ဆၣ်စီၤယိၤဘးတသ့ၣ်ညါဝဲဘၣ်. ယဟိဝၤယွၤတဲဘၣ် မုၣ်ကီၤလံၢ်လၢ– ‘နထံၣ်ယခ့ယပှၤစီၤယိၤဘးဧါ. လၢဟီၣ်ခိၣ်ချၢန့ၣ် ပှၤဒ်သိးဒီးအီၤတအိၣ်နီတဂၤဘၣ်. အဝဲဒိကနၣ်ယကလုၢ် ဒီးမၤတၢ်လၢအဘၣ်ထီဘိလီၤ.’ မုၣ်ကီၤလံၢ်စံးဆၢက့ၤ ကစၢ်ယွၤလၢ– ‘စီၤယိၤဘးကဒိကနၣ်နကလုၢ်သၢၣ်. နဒီသဒၢအီၤ, နဆိၣ်ဂ့ၤအီၤ, နဟ့ၣ်လီၤအီၤ တၢ်လီၢ်တၢ်ကျဲဒီး ဆၣ်ဖိကီၢ်ဖိတဖၣ်ဒီဒူၣ်. ဘၣ်ဆၣ် နမ့ၢ်ဟံးထီၣ်ကွံာ်တၢ်လၢအအိၣ်ဒီးအီၤခဲလၢာ်န့ၣ် အဝဲတဘူၣ်ထီၣ်ဘါထီၣ်နၤလၢၤဘၣ်.’ ယဟိဝၤယွၤတဲဆၢက့ၤ မုၣ်ကီၤလံၢ်လၢ– ‘နမၤကွၢ်စီၤယိၤဘးသ့, ဘၣ်ဆၣ် တဘၣ်မၤသံအီၤတဂ့ၤ.’ ဘၣ်မနုၤအဃိ ယဟိဝၤယွၤပျဲမုၣ်ကီၤလံၢ် မၤကွၢ်စီၤယိၤဘးလဲၣ်. ခီဖျိယဟိဝၤယွၤနာ်ဝဲလၢ စီၤယိၤဘးကတီဒီးအီၤ တုၤလၢအကတၢၢ်အဃိလီၤ.
မုၣ်ကီၤလံၢ်စးထီၣ်မၤကွၢ်ဝဲ စီၤယိၤဘးလၢတၢ်နးတၢ်ဖှီၣ်အကလုာ်ကလုာ်လီၤ. အဆိကတၢၢ်န့ၣ် ပှၤစဘၤဖိတဖၣ် ဟုၣ်ဝဲစီၤယိၤဘးအကျီၢ် ဒီးကသ့ၣ်ယီၤတဖၣ်လီၤ. ဝံၤဒီး မ့ၣ်အူဟဲလီၤလၢ မူခိၣ်ဒီး အီၣ်ကွံာ်ဝဲ စီၤယိၤဘးအသိခဲလၢာ်လီၤ. လၢခံ ပှၤက့ၤစ့းဖိတဖၣ် ဟုၣ်ဝဲစီၤယိၤဘးအကီၤလၤအူးတဖၣ်လီၤ. မ့မ့ၢ်စီၤယိၤဘးအကုၢ်တဖၣ်လၢ အကွၢ်ထွဲဝဲဆၣ်ဖိကီၢ်ဖိတဖၣ်အံၤန့ၣ် ဘၣ်တၢ်မၤသံကွံာ်အဝဲသ့ၣ်လီၤ. တကးဒံးဘၣ် စီၤယိၤဘးနၢ်ဟူဘၣ်ဝဲတၢ်ကစီၣ်လၢ အလီၤသူၣ်အုးသးအုးအဒိၣ်ကတၢၢ်တခါလီၤ. ဖဲစီၤယိၤဘးအဖိတဖၣ် အီၣ်သကိးတၢ်အခါန့ၣ် ဟံၣ်လီၤပှီၢ်ဒိးအဝဲသ့ၣ်ဒီး သံဝဲခဲလၢာ်လီၤ. ဖဲစီၤယိၤဘးနၢ်ဟူဘၣ်ဝဲ တၢ်ဂ့ၢ်အံၤအခါ အသးဘၣ်ဒိဒိၣ်မးလီၤ. ဘၣ်ဆၣ် စီၤယိၤဘး ဆဲးဘူၣ်ထီၣ်ဘါထီၣ် ယဟိဝၤယွၤလီၤ.
မုၣ်ကီၤလံၢ်အဲၣ်ဒိးဝဲလၢ စီၤယိၤဘး ကတူၢ်ဘၣ်တၢ် အါန့ၢ်ဒံးအလီၢ်လီၤ. အဃိ မုၣ်ကီၤလံၢ် ဒုးလီၤတၢ်ဝ့အၢလၢ စီၤယိၤဘးအလိၤ ဒီဂၤညါ, ဒီးစီၤယိၤဘးအလိၤဆါဒိၣ်မးလီၤ. ဘၣ်မနုၤတၢ်သ့ၣ်တဖၣ်အံၤ ဟဲကဲထီၣ်အသးဒီးအီၤလဲၣ်န့ၣ် စီၤယိၤဘးတသ့ၣ်ညါဝဲဘၣ်. ဘၣ်ဆၣ် အဝဲဆဲးဘူၣ်ထီၣ်ဘါထီၣ်ဒံး ယဟိဝၤယွၤလီၤ. မ့ၢ်လၢ ကစၢ်ယွၤထံၣ်စီၤယိၤဘးအတၢ်သးတီအဃိ ကစၢ်ယွၤ ဘၣ်သူၣ်ဘၣ်သးအီၤဒိၣ်မးလီၤ.
လၢခံ မုၣ်ကီၤလံၢ် ပျဲလီၤပှၤသၢဂၤလၢ ကဟဲမၤကွၢ် စီၤယိၤဘးလီၤ. အဝဲသ့ၣ်တဲဘၣ်စီၤယိၤဘးလၢ– ‘နမၤဘၣ်တၢ်ဒဲးဘးဒီး ပာ်ခူသူၣ်အီၤအဃိ ကစၢ်ယွၤစံၣ်ညီၣ်နၤလီၤ.’ စီၤယိၤဘးတဲဆၢက့ၤ အဝဲသ့ၣ်လၢ– ‘ယတမၤကမၣ်ဘၣ်တၢ်နီတမံၤဘၣ်.’ ဘၣ်ဆၣ်လၢခံ စီၤယိၤဘးစးထီၣ်ဆိကမိၣ်ဝဲလၢ ယဟိဝၤယွၤဒုးအိၣ်ထီၣ်ဝဲ တၢ်ကီတၢ်ခဲတဖၣ်အံၤလီၤ. အဃိ စီၤယိၤဘးတဲဝဲလၢ ကစၢ်ယွၤမၤဝဲဒ်အံၤန့ၣ် တကြၢးဝဲဘၣ်ဝဲဘၣ်.
ဖဲအဝဲသ့ၣ်တဲသကိးတၢ်အခါ ပှၤသးစၢ်တဂၤလၢအမံၤမ့ၢ် စီၤအလံဟူၤန့ၣ် ဒိကနၣ်ဝဲလီၤတံၢ်လီၤဆဲးလီၤ. ဝံၤဒီး စီၤအလံဟူၤတဲဝဲလၢ– ‘သုတဲတၢ်န့ၣ် တဘၣ်နီတဂၤဘၣ်. ယဟိဝၤယွၤ အတၢ်ဖံးတၢ်မၤန့ၣ် ပနၢ်ပၢၢ်အီၤတလၢာ်ဘၣ်. ကစၢ်ယွၤတမၤတၢ်အၢတၢ်သီ နီတဘျီဘၣ်. ကစၢ်ယွၤထံၣ်တၢ်ခဲလၢာ် ဒီးမၤစၢၤပှၤလၢအအိၣ်ဒီးတၢ်ကီတၢ်ခဲတဖၣ်လီၤ.’
ဝံၤဒီး ယဟိဝၤယွၤတဲတၢ်ဒီး စီၤယိၤဘးလီၤ. ကစၢ်ယွၤတဲဘၣ်အီၤလၢ– ‘ဖဲယတ့လီၤမူခိၣ်ဒီး ဟီၣ်ခိၣ်အခါန့ၣ် မ့ၢ်နအိၣ်ဖဲလဲၣ်. ဘၣ်မနုၤအဃိ နတဲလၢယမၤတၢ်တကြၢးဝဲဘၣ်ဝဲလဲၣ်. နတဲဒ်န့ၣ် ဘၣ်ဆၣ် နတသ့ၣ်ညါတၢ်လၢ အဟဲကဲထီၣ်အသးနီၢ်ကီၢ်ဘၣ်.’ စီၤယိၤဘးအၢၣ်လီၤအတၢ်ကမၣ် ဒီးတဲဝဲလၢ– ‘ယတဲကမၣ်ဘၣ်နၤလံ. လၢညါယနၢ်ဟူဘၣ် နဂ့ၢ်နကျိၤဘၣ်ဆၣ် ခဲအံၤ ယသ့ၣ်ညါနၤနီၢ်ကီၢ်လံ. တၢ်လၢနမၤတသ့ဘၣ်န့ၣ် တအိၣ်နီတမံၤဘၣ်. ယတဲကမၣ်အဃိ ယပီၢ်ယၢ်လီၤက့ၤယသးလီၤ.’
ဖဲစီၤယိၤဘးဘၣ်တၢ်မၤကွၢ်အီၤဝံၤအလီၢ်ခံ ယဟိဝၤယွၤမၤဘျါက့ၤ စီၤယိၤဘး အတၢ်ဆူးတၢ်ဆါ ဒီးဟ့ၣ်လီၤက့ၤအီၤ တၢ်ထူးတၢ်တီၤအါန့ၢ်ဒံးလၢညါလီၤ. ဒီးစီၤယိၤဘးဆဲးအိၣ်မူဘၣ်ဒံးဝဲဖးယံာ် ဒီးအိၣ်ဘၣ်ဝဲမုာ်မုာ်ခုၣ်ခုၣ်လီၤ. ဖဲစီၤယိၤဘးထံၣ်ဘၣ် တၢ်ကီတၢ်ခဲဖးဒိၣ်အခါ အဝဲဆဲးဘူၣ်ထီၣ်ဘါထီၣ် ယဟိဝၤယွၤအဃိ ကစၢ်ယွၤဆိၣ်ဂ့ၤအီၤလီၤ. ဖဲနထံၣ်ဘၣ် တၢ်ကီတၢ်ခဲအခါ မ့ၢ်နကကွၢ်လိ စီၤယိၤဘးဒီး ဆဲးဘူၣ်ထီၣ်ဘါထီၣ် ယဟိဝၤယွၤဒံးဧါ.
“သုနၢ်ဟူတ့ၢ်လံ စီၤယိၤဘး အတၢ်သးစူၤအဂ့ၢ်, ဒီးသုသ့ၣ်ညါ ကစၢ်အတၢ်တိာ် ဒီးအတၢ်ဆိၣ်ဂ့ၤအီၤ လၢခံကတၢၢ်ဒ်လဲၣ် အဂ့ၢ်န့ၣ်လီၤ.”—ယၤကိာ် ၅:၁၁, ခ့ခါစှီၤကျိာ်
တၢ်ဂ့ၤအဂၤလၢ နကဘၣ်သး
တၢ်ဂီၤမူလၢ လံာ်စီဆှံ အကတြူၢ်အဂီၢ်
တၢ်ကတိၤအိးထီၣ်လၢ လံာ်ယိၤဘးအဂီၢ်
ပှၤလၢအအဲၣ် ယဟိဝၤယွၤန့ၣ် ကထံၣ်ဘၣ်တၢ်မၤကွၢ်လီၤ. စီၤယိၤဘးအဒိအတဲာ်န့ၣ် ဒုးနာ်န့ၢ်ပှၤလၢ ပဝဲစ့ၢ်ကီး ပတီဒီးယဟိဝၤယွၤ ဒီးဆီၣ်ထွဲယဟိဝၤယွၤ ပၢတၢ်အခွဲး သ့ဝဲန့ၣ်လီၤ.
လံာ်စီဆှံအံၤ အတၢ်ကစီၣ် မ့ၢ်မနုၤလဲၣ်
စီၤယိၤဘးတီဒီးယွၤထီဘိ
ဘၣ်ဃးဒီး ကစၢ်ယွၤအတၢ်ခွဲးတၢ်ယာ်လၢ အကပၢတၢ်န့ၣ် လံာ်ယိၤဘးပာ်ဖျါထီၣ်ဝဲတၢ်မနုၤလဲၣ်
