ဖဲထံလုၢ်ဘၢတၢ် ဝံၤအလီၢ်ခံ စီၤနိအၤအဖိခွါအမါတဖၣ်န့ၣ်​ အိၣ်ဖျဲၣ်ထီၣ်ဝဲ အဖိအါမး. အဝဲသ့ၣ်​ အဟံၣ်ဖိဃီဖိအါထီၣ်​ ဒီးအိၣ်လီၤပြံလီၤပြါဝဲ လၢတၢ်လီၢ်အါတီၤ ဒ်ယဟိဝၤယွၤ မၤလိာ်တ့ၢ်ဝဲအသိး.

ဘၣ်ဆၣ်​ အဝဲသ့ၣ်​ အဟံၣ်ဖိဃီဖိတနီၤန့ၣ်​ တဒိကနၣ်​ ယဟိဝၤယွၤအကလုၢ်ဘၣ်. အဝဲသ့ၣ်တဲဝဲလၢ ‘မ်ပကတ့ထီၣ်ဝ့ၢ်တဖျၢၣ်ဒီး အိၣ်တပူၤဃီဖဲအံၤ. ဒီးပကတ့ထီၣ်​ တၢးဖးထီတဖျၢၣ်​ တုၤလၢမူခိၣ်​ ဒ်သိး ပမံၤကဟူသၣ်ဖျါ အဂီၢ်.’

 ပှၤဟီၣ်ခိၣ်ဖိတဖၣ်​ တ့ထီၣ်တၢးဖးထီဒ်အံၤန့ၣ်​ ယဟိဝၤယွၤ တဘၣ်သူၣ်ဘၣ်သးဝဲဘၣ်. အဃိ ကစၢ်ယွၤ ဆၢတဲာ်လီၤအသးလၢ ကမၤပတုာ်ကွံာ် အဝဲသ့ၣ်အတၢ်မၤ. ကစၢ်ယွၤ မၤဝဲဒ်လဲၣ်န့ၣ်​ မ့ၢ်နသ့ၣ်ညါဧါ. ကစၢ်ယွၤမၤလီၤဖး အဝဲသ့ၣ်​ အတၢ်ကတိၤလၢ ကျိာ်အကလုာ်ကလုာ်. အဃိ အဝဲသ့ၣ်​ တနၢ်ပၢၢ်လိာ်အသးလၢၤဘၣ်​ ဒီးအဝဲသ့ၣ်တတ့ထီၣ်​ တၢးဖးထီဒီးဝ့ၢ်လၢၤဘၣ်. ဝ့ၢ်လၢအဝဲသ့ၣ်​ တ့ထီၣ်ဝဲတဖျၢၣ်အံၤန့ၣ်​ တၢ်ကိးအမံၤလၢ ဘၤဘ့းလး. ဘၤဘ့းလးန့ၣ်​ အခီပညီမ့ၢ်ဝဲ “ဘံဘူ.” ပှၤဟီၣ်ခိၣ်ဖိတဖၣ်​ စးထီၣ်လဲၤအိၣ်ဝဲလၢ တၢ်လီၢ်အါတီၤ လၢဟီၣ်ခိၣ်ချၢ. ဘၣ်ဆၣ်​ ဖဲအဝဲသ့ၣ်လဲၤအိၣ်လၢ တၢ်လီၢ်အဂၤတဖၣ်အံၤအခါ အဝဲသ့ၣ်​ ဆဲးမၤဝဲ တၢ်အၢတၢ်သီ. လၢအဝဲသ့ၣ်အကျါန့ၣ်​ မ့ၢ်ပှၤလၢ အအဲၣ်ယဟိဝၤယွၤ အိၣ်တဂၤဂၤဒံးဧါ. ဘၣ်ဃးဒီး တၢ်ဂ့ၢ်အံၤန့ၣ်​ ပကမၤလိအါထီၣ်လၢ တၢ်မၤလိ လၢခံတခါ.