ယ့ၣ်ၡူးဟဲလီၤလၢ ဟီၣ်ခိၣ်ချၢ ဒ်သိး ကစံၣ်တဲၤတဲလီၤ တၢ်သးခုကစီၣ်အဂီၢ်. ဒီးယဟိဝၤယွၤ ဟ့ၣ်လီၤအီၤသးစီဆှံလၢ အကမၤတၢ်လီၤလးတဖၣ်. အဃိ ယ့ၣ်ၡူး မၤဘျါတၢ်ဆါ သ့အကလုာ်ကလုာ်. တၢ်လီၤလးတဖၣ်အံၤ ပာ်ဖျါထီၣ်တၢ်လၢ ယ့ၣ်ၡူး ကမၤန့ၢ် ပှၤဟီၣ်ခိၣ်ဖိ ဖဲအဝဲပၢတၢ်ဒ်စီၤပၤအခါ. ဖဲယ့ၣ်ၡူးလဲၤ တၢ်လီၢ်တတီၤဂ့ၤ တတီၤဂ့ၤန့ၣ်​ ပှၤဆူးပှၤဆါ ဟဲလၢအအိၣ်​ ဒီးယ့ၣ်ၡူး မၤဘျါအဝဲသ့ၣ်​ ကိးဂၤဒဲး. ပှၤမဲာ်တထံၣ်တၢ် ထံၣ်ထီၣ်က့ၤတၢ်, ပှၤနၢ်တအၢ နၢ်ဟူထီၣ်က့ၤတၢ်, ပှၤခီၣ်ဟးဂီၤ ဟးက့ၤသ့ ဒီးယ့ၣ်ၡူး နီဟးထီၣ်ကွံာ် တၢ်ဝံတၢ်နါလၢ အအိၣ်လၢပှၤလိၤ. ပှၤဆူးပှၤဆါ မ့ၢ်ဖီၣ်ဘၣ်ထဲ ယ့ၣ်ၡူးအဆ့ကၤ တစဲးဖိဒၣ်လဲာ် အဝဲသ့ၣ်​ ဘျါက့ၤဝဲ. ဖဲယ့ၣ်ၡူး လဲၤဝဲလၢ တၢ်လီၢ်တတီၤဂ့ၤ တတီၤဂ့ၤန့ၣ်​ ပှၤဂီၢ်မုၢ် လဲၤပိာ်အခံ. တဘျီတခီၣ်​ ယ့ၣ်ၡူး အဲၣ်ဒိးအိၣ်ဝဲ ထဲတဂၤ ဘၣ်ဆၣ်​ ပှၤမ့ၢ်လဲၤလၢအအိၣ်န့ၣ်​ အတနီက့ၤ အဝဲသ့ၣ်​ နီတဂၤဘၣ်.

ဘၣ်တဘျီ ပှၤဟဲစိာ် ပိာ်ခွါလၢ အလီၤဘျ့တဂၤ လၢဟံၣ်လၢ ယ့ၣ်ၡူးအိၣ်ဝဲ. ဘၣ်ဆၣ်​ ပှၤအိၣ်လၢဟံၣ်ပူၤ ပှဲၤပှဲၤအဃိ အဝဲသ့ၣ်​ နုာ်လီၤလၢဟံၣ်ပူၤတန့ၢ်ဘၣ်. အဃိ အဝဲသ့ၣ်​ မၤဖျိဟံၣ်ခိၣ်​ ဒီးစဲၤလီၤ ပှၤဆါတဂၤအံၤလၢ ယ့ၣ်ၡူးအအိၣ်. ဝံၤဒီး ယ့ၣ်ၡူးတဲဘၣ်​ ပိာ်ခွါတဂၤအံၤလၢ ‘ဆၢထၢၣ်ဒီးဟးသၢၤ.’ ဖဲပိာ်ခွါန့ၣ်​ ဆၢထၢၣ်​ ဒီးဟးဝဲအခါ ပှၤအါဂၤ ကမၢကမၣ်ဝဲဒိၣ်မး.

ဘၣ်တဘျီ ဖဲယ့ၣ်ၡူး လဲၤနုာ်လီၤလၢ သဝီတဖျၢၣ်အခါ ပှၤဘၣ်တၢ်ဆါအၢ အဂၤတဆံ ဆၢထၢၣ်ဝဲလၢအယံၤ ဒီးကိးပသူထီၣ်လၢ ‘ယ့ၣ်ၡူးဧၢ, မၤစၢၤပှၤ.’ ဖဲစိၤအဝဲန့ၣ်​ ပှၤဘၣ်တၢ်ဆါအၢတဖၣ်​ အိၣ်ဘူးဒီး ပှၤအဂၤတန့ၢ်ဘၣ်. ယဟိဝၤယွၤ အတၢ်သိၣ်တၢ်သီ အိၣ်ဝဲလၢ ဖဲပှၤဘၣ်တၢ်ဆါအၢတဖၣ်​ အတၢ်ဆါဘျါက့ၤအခါ အဝဲသ့ၣ်​ ဘၣ်လဲၤလၢ တၢ်လုၢ်ဟံၣ်. အဃိ ယ့ၣ်ၡူးမၢ ပှၤဘၣ်တၢ်ဆါအၢတဖၣ်အံၤ လဲၤလၢတၢ်လုၢ်ဟံၣ်. ဖဲအဝဲသ့ၣ်​  လဲၤလၢကျဲအခါ အတၢ်ဆါဘျါက့ၤဝဲ. ပှၤဘၣ်တၢ်ဆါအၢတဖၣ်​ အကျါတဂၤန့ၣ်​ ဟဲက့ၤစံးဘျုးစံးဖှိၣ်က့ၤ ယ့ၣ်ၡူး ဒီးစံးထီၣ်ပတြၢၤဝဲ ကစၢ်ယွၤ. လၢပှၤဘၣ်တၢ်ဆါအၢ အဂၤတဆံအကျါန့ၣ်​ ပှၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်​ အိၣ်ဝဲထဲတဂၤလီၤ.

ပိာ်မုၣ်လၢ အအိၣ်တဆူၣ်ဘၣ်​ န့ၢ် ၁၂ နံၣ်တဂၤ အဲၣ်ဒိးဝဲလၢ အတၢ်ဆါ ကဘျါက့ၤသပှၢ်ကတၢၢ်. အဃိ ဖဲယ့ၣ်ၡူးဟးဝဲလၢ ပှၤဂီၢ်မုၢ်အကျါအခါ အလဲၤလၢ ယ့ၣ်ၡူးအလီၢ်ခံ ဒီးဖီၣ်အဆ့ကၤတစဲး. တဘျီဃီန့ၣ်​ ပိာ်မုၣ်တဂၤအံၤ အတၢ်ဆါဘျါက့ၤဝဲ. ဖဲတၢ်မၤအသးဒ်န့ၣ်အခါ ယ့ၣ်ၡူး တဲဝဲလၢ “မတဂၤထိးဘၣ်ယၤလဲၣ်.” ပိာ်မုၣ်အံၤ ပျံၤတၢ်ဒိၣ်မး ဘၣ်ဆၣ်​ အလဲၤလၢ ယ့ၣ်ၡူးအအိၣ်​ ဒီးတဲဘၣ်ယ့ၣ်ၡူး တၢ်မ့ၢ်တၢ်တီ. ယ့ၣ်ၡူး မၤမုာ်ထီၣ်က့ၤအသး ခီဖျိ အတဲဘၣ်အီၤလၢ ‘ဖိမုၣ်ဧၢ, က့ၤမုာ်မုာ်နီၤ.’

ဘူၣ်ဘျီၣ်ခိၣ်တဂၤလၢ အမံၤမ့ၢ် စီၤယၤအ့ၤရူးန့ၣ်​ ဃ့ကညး ယ့ၣ်ၡူးလၢ ‘ယဖိမုၣ်ဖိ ဆိးက့နးမး, ဝံသးစူၤ ဟဲလၢယဟံၣ်မီၤ.’ ဘၣ်ဆၣ်​ တချုးလၢ ယ့ၣ်ၡူးလဲၤတုၤလၢ စီၤယၤအ့ၤရူး အဟံၣ်န့ၣ်​ ပိာ်မုၣ်ဖိအံၤသံလံ. ဖဲယ့ၣ်ၡူး လဲၤတုၤအခါ အထံၣ်ဘၣ်ဝဲလၢ ပှၤအါဂၤ ဟီၣ်ဃုာ်ဒီး စီၤယၤအ့ၤရူး အဟံၣ်ဖိဃီဖိ. ယ့ၣ်ၡူးတဲဘၣ်​ အဝဲသ့ၣ်လၢ ‘ဟီၣ်တဂ့ၤ, ပိာ်မုၣ်ဖိအံၤ တသံဘၣ်, မ့ၢ်ဒၣ်အမံလီၤ.’ ဝံၤဒီး ယ့ၣ်ၡူးဖီၣ်ထီၣ်​ ပိာ်မုၣ်ဖိအစု ဒီးတဲဝဲလၢ “ဖိဧၢ, ဂဲၤထၢၣ်ဟီ.” ပိာ်မုၣ်ဖိအံၤ ဂဲၤဆၢထၢၣ်ဝဲ တဘျီဃီ ဒီးယ့ၣ်ၡူးမၢ အမိအပါ ဒုးအီၣ်ပိာ်မုၣ်ဖိအံၤ တၢ်တမံၤမံၤ. ပိာ်မုၣ်ဖိသၣ်အံၤ အမိအပါ ကသးခုဝဲထဲလဲၣ်.