တၢ်မၤလိ ၇၇
ပိာ်မုၣ်တဂၤလဲၤဒၢၣ်ထံလၢ ထံပူၤ
ဖဲမၤဝဲဘူၣ်လဲၤကပာ်ဝံၤအလီၢ်ခံ ယ့ၣ်ၡူးဒီးအပျဲၢ်အဘီၣ်တဖၣ် က့ၤဝဲလၢကီၢ်ကၤလံၤလါ ဒီးဘၣ်ခီဂာ်ဝဲဝ့ၢ်ၡၤမရံလီၤ. ယ့ၣ်ၡူးဒီးအပျဲၢ်အဘီၣ်တဖၣ် အိၣ်ပတုာ်ဝဲလၢ စီၤယၤကိာ်အထံပူၤလၢ အအိၣ်ဘူးဝဲဒီး ဝ့ၢ်စံဃၢ်န့ၣ်လီၤ. ဖဲယ့ၣ်ၡူးအိၣ်ဘှံးဝဲဖဲန့ၣ်အခါ အပျဲၢ်အဘီၣ်တဖၣ်လဲၤပှ့ၤဝဲ တၢ်အီၣ်တၢ်အီလၢဝ့ၢ်ပူၤလီၤ.
ဖဲန့ၣ်အဆၢကတီၢ် ပိာ်မုၣ်တဂၤဟဲဒၢၣ်ထံလၢ ထံပူၤအံၤလီၤ. ယ့ၣ်ၡူးတဲဘၣ်အီၤလၢ– “ဟ့ၣ်အီယၤ ထံတက့ၢ်.” အဝဲတဲဘၣ်ယ့ၣ်ၡူးလၢ– ‘ဘၣ်မနုၤအဃိ နတဲတၢ်ဒီးယၤလဲၣ်. ယမ့ၢ်ပှၤၡၤမရံမုၣ်လီၤ. ပှၤယူဒၤဖိတတဲတၢ်ဒီး ပှၤၡၤမရံဖိဘၣ်.’ ယ့ၣ်ၡူးတဲဆၢက့ၤအီၤလၢ– ‘နမ့ၢ်သ့ၣ်ညါလၢ ယမ့ၢ် မတၤတဂၤလဲၣ်န့ၣ် နကဃ့အီထံလၢယအိၣ်ဒီး ယကဟ့ၣ်အီနၤ တၢ်မူအထံလီၤ.’ ပိာ်မုၣ်တဂၤအံၤ သံကွၢ်အီၤလၢ– ‘နအဲၣ်ဒိးတဲအခီပညီဒ်လဲၣ်. နထံဒၢလၢ နကဒၢၣ်ထံအဂီၢ်မးတအိၣ်ဘၣ်.’ ယ့ၣ်ၡူးတဲဝဲလၢ– ‘ပှၤတဂၤဂၤမ့ၢ် အီဘၣ်ထံလၢယဟ့ၣ်လီၤအီၤန့ၣ် လၢခံအဝဲတအဲၣ်ဒိးအီထံနီတဘျီလၢၤဘၣ်.’ ပိာ်မုၣ်တဲဆၢက့ၤအီၤလၢ– ‘ဟ့ၣ်ဒုးအီယၤထံအဝဲန့ၣ်တက့ၢ်.’
ဝံၤဒီး ယ့ၣ်ၡူးတဲဘၣ်အီၤလၢ– ‘ဟဲကိးနဝၤဖဲအံၤတက့ၢ်.’ ပိာ်မုၣ်တဲဘၣ်အီၤလၢ– ‘ယဝၤတအိၣ်နီတဂၤဘၣ်.’ ယ့ၣ်ၡူးတဲဝဲလၢ– ‘နတဲတၢ်မ့ၢ်တၢ်တီလီၤ. နဖျီနသးအိၣ်ဝဲယဲၢ်ဘျီလံ. ဒီးခဲအံၤ နအိၣ်ဒီးပိာ်ခွါတဂၤဘၣ်ဆၣ် နတဖျီဘၣ်နသးဒီးအီၤဒံးဘၣ်.’ ပိာ်မုၣ်တဲဆၢက့ၤဝဲလၢ– ‘ခဲအံၤယနာ်လၢ နမ့ၢ်ဝံတဂၤလီၤ. ယပှၤကလုာ်တဖၣ်နာ်ဝဲလၢ ပဘူၣ်ထီၣ်ဘါထီၣ်ယွၤလၢ ကစၢၢ်ခိၣ်အံၤသ့ဝဲလီၤ. ဘၣ်ဆၣ် ပှၤယူဒၤဖိတဲဝဲလၢ ပဘူၣ်ထီၣ်ဘါထီၣ်ယွၤသ့ထဲလၢ ဝ့ၢ်ယရူၤၡလ့ၣ်အပူၤလီၤ. ဒီးယနာ်လၢ ဖဲမ့းၡံအၤဟဲတုၤအခါ အဝဲကသိၣ်လိပှၤလၢ ပကဘၣ်ဘူၣ်ထီၣ်ဘါထီၣ် ကစၢ်ယွၤဒ်လဲၣ်အဂ့ၢ်န့ၣ်လီၤ.’ ဝံၤဒီး ယ့ၣ်ၡူးတဲဘၣ်ပိာ်မုၣ်အံၤ တၢ်ဂ့ၢ်တခါလၢအတတဲဘၣ် ပှၤနီတဂၤဒံးဘၣ်. အဝဲတဲဝဲလၢ– ‘ယမ့ၢ်မ့းၡံအၤလီၤ.’
ပိာ်မုၣ်တဂၤအံၤ က့ၤကဒါက့ၤလၢ ဝ့ၢ်ပူၤလၢအချ့ဒီး တဲဘၣ် ပှၤၡၤမရံဖိတဖၣ်လၢ– ‘ယဆိကမိၣ်လၢ ယထံၣ်န့ၢ်မ့းၡံအၤလံ. အဝဲသ့ၣ်ညါယဂ့ၢ် ခဲလၢာ်ခဲဆ့လီၤ. ဟဲပိာ်ယခံ, ပကလဲၤလၢအအိၣ်.’ အဝဲသ့ၣ်လဲၤပိာ်ဝဲ ပိာ်မုၣ်အံၤအခံလၢထံပူၤ ဒီးဒိကနၣ်ဝဲယ့ၣ်ၡူးသိၣ်လိတၢ်န့ၣ်လီၤ.
ပှၤၡၤမရံဖိတဖၣ် မၢယ့ၣ်ၡူးအိၣ်တ့ၢ်လၢ အဝဲသ့ၣ်အဝ့ၢ်ပူၤလီၤ. ယ့ၣ်ၡူးသိၣ်လိတၢ်ဖဲန့ၣ်ခံသီ ဒီးပှၤအါဂၤစူၢ်က့ၤနာ်က့ၤအီၤလီၤ. အဝဲသ့ၣ်တဲဘၣ်ၡၤမရံမုၣ်လၢ– ‘ခီဖျိပနၢ်ဟူပိာ်ခွါတဂၤအံၤ အတၢ်သိၣ်လိအဃိ ပနာ်လၢအဝဲမ့ၢ်ပှၤတဂၤလၢ အဟဲအုၣ်က့ၤခီၣ်က့ၤပှၤဟီၣ်ခိၣ်ဖိလီၤ.’
“ပှၤလၢ တၢ်သူအသးလၢထံန့ၣ်, မ်အဟဲတက့ၢ်. ဒီးဖဲဒၣ်ပှၤလၢအသးအိၣ်, မ်အဟံးန့ၢ်ကလီထံမူန့ၣ်တက့ၢ်.”—လီၣ်ဖျါ ၂၂:၁၇
