တၢ်မၤလိ ၇၃
စီၤယိၤဟၣ်ကတဲာ်ကတီၤဝဲကျဲ
စီၤယိၤဟၣ်မ့ၢ်ဝဲ စီၤစဃၤရံ ဒီးနီၢ်အ့းလံၤစါဘ့း အဖိခွါ. ဒီးလၢခံ ဖဲစီၤယိၤဟၣ်ဒိၣ်ထီၣ်အခါ အကဲထီၣ်ဝဲ ဝံတဂၤ. ယဟိဝၤယွၤသူဝဲ စီၤယိၤဟၣ်လၢ ကစံၣ်တဲၤတဲလီၤတၢ် ဘၣ်ဃးဒီး မ့းၡံအၤကဟဲအဂ့ၢ်. စီၤယိၤဟၣ် တစံၣ်တဲၤတဲလီၤတၢ်လၢ ဘူၣ်ဘျီၣ် ဒီးလၢဝ့ၢ်ပူၤဘၣ်. ဘၣ်ဆၣ် အစံၣ်တဲၤတဲလီၤတၢ်လၢ ပှၢ်မုၢ်ကနၢ. ပှၤအိၣ်လၢ ဝ့ၢ်ယရူၤၡလ့ၣ် ဒီးကီၢ်ယူဒၤအပူၤန့ၣ် လဲၤဝဲလၢ စီၤယိၤဟၣ်အအိၣ်ဒ်သိး ကမၤလိန့ၢ်တၢ်လၢအအိၣ်. ဒ်သိးပှၤဂီၢ်မုၢ် ကမၤတၢ်ဘၣ်ယွၤအသးအဂီၢ် စီၤယိၤဟၣ်သိၣ်လိဝဲလၢ အဝဲသ့ၣ်တဘၣ်မၤ တၢ်အၢတၢ်သီလၢၤဘၣ်. ဖဲပှၤဂီၢ်မုၢ် နၢ်ဟူတၢ်လၢ စီၤယိၤဟၣ် တဲဝဲဝံၤအလီၢ်ခံ အဝဲသ့ၣ်အါဂၤ ပီၢ်ယၢ်လီၤက့ၤအသး ဒီးစီၤယိၤဟၣ် ဒိးဘျၢအဝဲသ့ၣ်လၢ ထံကျိယၢ်ဒ့ၣ်အပူၤ.
စီၤယိၤဟၣ်အိၣ်မူဝဲ ယိယိဖိ. အကူအကၤန့ၣ် ပှၤတ့ဝဲလၢ ကီၤလၤအူးအဆူၣ် ဒီးအတၢ်အီၣ်န့ၣ် မ့ၢ်ဝဲဒွဲၣ်တဖၣ် ဒီးကနဲစီ. ပှၤဂီၢ်မုၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး စီၤယိၤဟၣ်အဂ့ၢ်. ပှၤဖၤရံၤၡဲ ဒီးပှၤစးဒူၤကဲတဖၣ် လၢအပာ်ထီၣ်ထီအသးန့ၣ် ဟဲထံၣ်လိာ်သးဒီး စီၤယိၤဟၣ်စ့ၢ်ကီး. စီၤယိၤဟၣ်တဲဘၣ် အဝဲသ့ၣ်လၢ ‘သုကဘၣ်ဆီတလဲ သုတၢ်အိၣ်မူ ဒီးပီၢ်ယၢ်လီၤက့ၤသုသး. သုတဲလီၤသုသးလၢ သုကဲစီၤအၤဘြၤဟၣ် အဖိအဃိ တဘၣ်ဆိကမိၣ်လၢ သုကဲပှၤလီၤဆီ တဒူၣ်တဂ့ၤ. သုမ့ၢ်တပီၢ်ယၢ်လီၤက့ၤ သုသးဘၣ်န့ၣ် ကစၢ်ယွၤ တတူၢ်လိာ်သုဘၣ်.’
ပှၤအါဂၤဟဲလၢ စီၤယိၤဟၣ်အအိၣ် ဒီးသံကွၢ်အီၤလၢ ‘ဒ်သိး ပကမၤတၢ်ဘၣ် ကစၢ်ယွၤ အသးအဂီၢ် ပကဘၣ်မၤဒ်လဲၣ်.’ စီၤယိၤဟၣ်တဲဘၣ် အဝဲသ့ၣ်လၢ ‘သုဆ့ကၤမ့ၢ်အိၣ် ခံဘ့ၣ်န့ၣ် ဟ့ၣ်လီၤပှၤလၢ အလိၣ်ဘၣ်ဝဲတဘ့ၣ်.’ ဘၣ်မနုၤအဃိ စီၤယိၤဟၣ် တဲဝဲဒ်န့ၣ်လဲၣ်. စီၤယိၤဟၣ် ပာ်ဖျါထီၣ်ဝဲလၢ အပျဲၢ်အဘီၣ်တဖၣ် မ့ၢ်အဲၣ်ဒိး မၤတၢ်ဘၣ် ကစၢ်ယွၤအသးန့ၣ် အဝဲသ့ၣ်ကဘၣ်အဲၣ် ပှၤလၢအဃၢၤ.
စီၤယိၤဟၣ်တဲဘၣ် ပှၤထၢ တၢ်ခိတၢ်သွဲတဖၣ်လၢ ‘မၤတၢ်တီတီလိၤလိၤ ဒီးလံၣ်အီၣ်ပှၤဂၤတဂ့ၤ.’ ဒီးစီၤယိၤဟၣ်တဲဘၣ် ပှၤသုးဖိတဖၣ်လၢ ‘တဘၣ်တူၢ်လိာ် တၢ်ထီးကျိၣ်ထီးစ့ ဒီးတဘၣ်လံၣ်အီၣ်တၢ်တဂ့ၤ.’
ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် ဟဲစ့ၢ်ကီးလၢ စီၤယိၤဟၣ်အအိၣ် ဒီးသံကွၢ်ဝဲလၢ ‘နမ့ၢ်မတဂၤလဲၣ်. ပှၤကိးဂၤဒဲးအဲၣ်ဒိးသ့ၣ်ညါဝဲ.’ စီၤယိၤဟၣ် တဲဆၢက့ၤအဝဲသ့ၣ်လၢ ‘ဒ်ဝံယၡါယၤ တဲဝဲအသိး ပှၤလၢ အကလုၢ် သီၣ်ထီၣ်လၢ ပှၢ်မုၢ်ကနၢတဂၤန့ၣ် မ့ၢ်ယၤလီၤ.’
တၢ်လၢစီၤယိၤဟၣ် သိၣ်လိဝဲန့ၣ် ပှၤဂီၢ်မုၢ် ဘၣ်သူၣ်ဘၣ်သးဝဲဒိၣ်မး. အဃိ ပှၤအါဂၤဆိကမိၣ်ဝဲလၢ စီၤယိၤဟၣ်န့ၣ် အကဲမ့းၡံအၤဧါ. ဘၣ်ဆၣ် စီၤယိၤဟၣ်တဲဘၣ် အဝဲသ့ၣ်လၢ ‘ပှၤတဂၤလၢ အဒိၣ်န့ၢ်ယၤန့ၣ် ကဟဲဝဲလီၤ. ယကဃဲၣ်လီၤကွံာ် အခီၣ်ဖံးပျံၤဒၣ်လဲာ် ယတကြၢးဘၣ်. ယၤန့ၣ်ယဒိးဘျၢသုလၢထံ ဘၣ်ဆၣ် အဝဲကဒိးဘျၢသုလၢ သးစီဆှံ.’
“အဝဲဟဲဒ် ပှၤအုၣ်အသးတဂၤလၢ ကအုၣ်အသး ဘၣ်ဃးဒီး တၢ်ကပီၤအဝဲန့ၣ်အဂ့ၢ် ဒ်သိး ပှၤအကလုာ်ကလုာ် ကနာ်တၢ် ခီဖျိလၢအီၤလီၤ.”—ယိၤဟၣ် ၁:၇
