တၢ်နီၤဖး​တခါ​အံၤ က​ပာ်ဖျါ​ထီၣ်ဝဲ လံာ်စီဆှံ​အ​တၢ်ဂ့ၢ် လၢ​ကြံး​ကျိာ်​တ​ကတြူၢ်​န့ၣ်​လီၤ. ယ့ၣ်ၡူး​ဟဲ​အိၣ်ဖျဲၣ် ထီၣ်​လၢ ဟံၣ်ဖိ​ဃီဖိ​လၢ​အမ့ၢ်​ပှၤ​မုၢ်ဆ့ၣ်​မုၢ်ဂီၤ​ဖိ ဒီး​အဝဲသ့ၣ်​အိၣ်​လၢ ဝ့ၢ်​ဆံး​ဆံး​ဖိ​တဖျၢၣ်​အ​ပူၤ​လီၤ. ယ့ၣ်ၡူး​မၤတၢ်​ဒီး​အ​ပၢ် ဒ်​ပှၤ​စုသ့​ဖိ​တဂၤ​အသိး​လီၤ. ယ့ၣ်ၡူး​မ့ၢ်​ပှၤ​တဂၤ​လၢ က​အုၣ်က့ၤ​ခီၣ်က့ၤ ပှၤ​ဟီၣ်ခိၣ်​ဖိ​လီၤ. ယဟိဝၤ​ယွၤ​ဃုထၢ​ထီၣ်​အီၤ လၢ​မူခိၣ်​ဘီမုၢ်​အ​စီၤပၤ​လီၤ. ခီဖျိ​လၢ​ယဟိဝၤ​ယွၤ​အဲၣ်​ယ့ၣ်ၡူး​အဃိ အဝဲ​အဲၣ်ဒိးဝဲ​လၢ ယ့ၣ်ၡူး​က​ဒိၣ်ထီၣ်​ဘၣ်​ဝဲ​လၢ ဟံၣ်ဖိ​ဃီဖိ​လၢ အပှဲၤ​ဒီး​တၢ်အဲၣ်​တၢ်ကွံ ဒီး​တၢ်အဲၣ်​ယွၤ​န့ၣ်​လီၤ. သု​မ့မ့ၢ်​မိ​ပါ​န့ၣ် မၤစၢၤ​သု​ဖိ​ဒ်သိး က​နၢ်ပၢၢ်ထီၣ်​ဝဲ​တၢ်ဂ့ၢ်​အံၤ​တက့ၢ်. ယဟိဝၤ​ယွၤ ဒီသဒၢ​ယ့ၣ်ၡူး​လၢ စီၤပၤ​ဟ့ၤရိာ်​အစုပူၤ ဒီး​တၢ်​လၢ​က​မၤ​ဟးဂီၤ​ကစၢ်​ယွၤ အ​တၢ်တိာ်ပာ်​တအိၣ်​ဝဲ​နီ​တခါ​ဘၣ်​အဂ့ၢ်​န့ၣ် တဲ​နၢ်ပၢၢ်​သု​ဖိ​တဖၣ်​တက့ၢ်. ယဟိဝၤ​ယွၤ မၢ​ပှၤ​ဘျၢတၢ်​စီၤ​ယိၤဟၣ် ကတဲာ်​ကတီၤဝဲ​ယ့ၣ်ၡူး​အကျဲ ဒ်လဲၣ်​န့ၣ်​ဃု​သ့ၣ်ညါ​ကွၢ်​တက့ၢ်. စးထီၣ်​လၢ​ယ့ၣ်ၡူး​မ့ၢ်​ဒံး​ပှၤသးစၢ်​အခါ​န့ၣ် အဝဲ​တ​ဒိးသန့ၤ​ထီၣ်​အသး​လၢ အ​နီၢ်ကစၢ်​အ​တၢ်​သ့ၣ်ညါ​အဖီခိၣ်​ဘၣ်. အဝဲ​သးအိၣ်​တူၢ်လိာ်ဝဲ တၢ်ဟ့ၣ်ကူၣ်​လၢ​အ​ဟဲ​လၢ ယဟိဝၤ​ယွၤ​အ​အိၣ်​န့ၣ်​လီၤ.