တၢ်မၤလိ ၂၁
အဝဲတြီဆၢမၤနၢၤကွံာ်ဝဲ တၢ်သူၣ်ပျံၤသးဖုး ဒီးတၢ်သးဒ့ဒီ
၁–၃. စီၤပ့းတရူးထံၣ်ဘၣ်ဝဲ တၢ်လီၤလးမနုၤတခါလဲၣ် ဒီးလၢနၤအဝဲန့ၣ် တၢ်မၤအသးဒ်လဲၣ်.
ဖဲမုၢ်နၤခီတၢ်ခံးကျါန့ၣ် စီၤပ့းတရူး ကွၢ်စိဃီၤတၢ်လၢ အယံၤန့ၣ်လီၤ. အဝဲဂုာ်ကျဲးစၢးဝၢ်ဝဲချံ လၢာ်ဂံၢ်လၢာ်ဘါလီၤ. အဝဲထံၣ်ဘၣ်ဝဲ တၢ်ကပီၤထီၣ်ကယီကယီလၢ မုၢ်ထီၣ်တခီ အဃိဆိကမိၣ်ဝဲလၢ မ့ၢ်မုၢ်ဘူးကဆ့ၣ်ဝါထီၣ်လံဧါ. ခီဖျိလၢ အဝဲဝၢ်ချံတဘျုးနၣ်ရံၣ်လံအဃိ အစုဘှံးပျိၢ်ဘှံးလၢာ်လံ. ကလံၤဟဲအူတၢ်ဆူၣ်ဒိၣ်မးအဃိ ပီၣ်လဲၣ်ကၤလံၤလါ ဟူးဝဲဝးဝဲသပှၢ်ကတၢၢ်လီၤ. ပီၣ်လဲၣ်အလပီတဖၣ် စံၣ်စုးထီၣ်ဝဲ တဘျီဝံၤတဘျီ ဒီးထံဖျိးဘၣ်စီၤပ့းတရူးအဃိ အဝဲဘၣ်စီၣ်လၢာ်ဝဲလီၤ. ဘၣ်ဆၣ်သနာ်က့ အဝဲဆဲးဝၢ်ချံဆူညါန့ၣ်လီၤ.
၂ တချုးလၢ စီၤပ့းတရူးဒီးအသကိးတဖၣ် ဒိးထီၣ်ချံန့ၣ် အဝဲသ့ၣ်ပာ်တ့ၢ်ကွံာ် ယ့ၣ်ၡူးထဲတဂၤဧိၤလၢ ပီၣ်လဲၣ်ကၢၢ်နံၤန့ၣ်လီၤ. ဒီးမုၢ်နံၤအဝဲန့ၣ် အဝဲသ့ၣ်ထံၣ်ဘၣ်ဝဲ ယ့ၣ်ၡူးဒုးအီၣ်ဒုးအီဝဲ ပှၤအကထိတဖၣ်လၢ ညၣ်စှၤဘ့ၣ်ဒီးကိၣ်စှၤလိၣ်န့ၣ်လီၤ. ဖဲန့ၣ်အဆၢကတီၢ် ပှၤသ့ၣ်တဖၣ်အံၤ အဲၣ်ဒိးပာ်ထီၣ်ဝဲ ယ့ၣ်ၡူးလၢစီၤပၤလီၤ. ဘၣ်ဆၣ်ယ့ၣ်ၡူးတအဲၣ်ဒိးပၣ်ဃုာ် လၢထံဂ့ၢ်ကီၢ်ဂ့ၢ်အကျါနီတစဲးဘၣ်. တကးဒံးဘၣ် အဝဲအဲၣ်ဒိးပာ်လီၤတၢ်အဒိလၢ အပျဲၢ်အဘီၣ်တဖၣ်အဂီၢ် ဒ်သိးအဝဲသ့ၣ်စ့ၢ်ကီး ကဟးဆှဲးဝဲထံဂ့ၢ်ကီၢ်ဂ့ၢ်န့ၣ်လီၤ. လၢတၢ်န့ၣ်အဃိ ယ့ၣ်ၡူးပဒ့ၣ်ဟးဆှဲးဝဲ ပှၤဂီၢ်မုၢ် ဒီးလဲၤဝဲဆူကစၢၢ်ကလိ ဒ်သိးကဃ့ဘါထုကဖၣ်တၢ်လၢ တၢ်ဘှ့ၣ်တၢ်ဘှီၣ်အပူၤလီၤ. တကးဒံးဘၣ် အဝဲမၢအပျဲၢ်အဘီၣ်တဖၣ် ဒိးထီၣ်ချံ ဒီးလဲၤဆူထံဝၢ်ဘးခီလီၤ.—မၢ်ကူး ၆:၃၅-၄၅; ဖး ယိၤဟၣ် ၆:၁၄-၁၇ တက့ၢ်.
ဖဲခံနံၣ်အတီၢ်ပူၤ စီၤပ့းတရူးမၤလိန့ၢ်တၢ်လၢ ယ့ၣ်ၡူးအအိၣ်အါမံၤ ဘၣ်ဆၣ်တၢ်လၢအဝဲကဘၣ် မၤလိဝဲန့ၣ်အိၣ်ဒံးဝဲလီၤ
၃ ယ့ၣ်ၡူးအပျဲၢ်အဘီၣ်တဖၣ်အံၤ ဝၢ်ဝဲချံဒီတနၤညါ ဘၣ်ဆၣ် အဝဲသ့ၣ်လဲၤတၢ်န့ၢ်ထဲစှၤမံးလာ်လီၤ. ခီဖျိလၢ အဝဲသ့ၣ်ဘၣ်ထဲးဂံၢ်ထဲးဘါ သပှၢ်ကတၢၢ် ဒီးကလံၤအူသီၣ်ဝဲဟူၣ်ဟူၣ်အဃိ အဝဲသ့ၣ်တဲသကိးတၢ် တညီဝဲဘၣ်. လၢတၢ်န့ၣ်အဃိ ဖဲစီၤပ့းတရူးဝၢ်ဝဲချံအဆၢကတီၢ်န့ၣ် အဝဲကဆိကမိၣ်ထီၣ်က့ၤအတၢ်အိၣ်မူအတၢ်လဲၤခီဖျိတဖၣ်န့ၣ်လီၤ.
၄. ဘၣ်မနုၤအဃိ စီၤပ့းတရူး မ့ၢ်ပှၤဒိဂ့ၤတဲာ်ဘၣ်လၢပဂီၢ်လဲၣ်.
၄ စီၤပ့းတရူး အတၢ်ဆိကမိၣ် ကအိၣ်ဝဲအါမးလီၤ. အဝဲထံၣ်လိာ်အသးဒီး ယ့ၣ်ၡူးအိၣ်လံခံနံၣ်လံ ဒီးအဝဲမၤလိန့ၢ်တၢ်လၢအအိၣ်ဒီဒူၣ်ညါ. ဘၣ်ဆၣ် ဒ်သိးစီၤပ့းတရူး ကဆဲးမၤလိတၢ်ဆူညါအဂီၢ် အဝဲကဘၣ်တြီဆၢမၤနၢၤကွံာ်ဝဲ တၢ်သူၣ်ပျံၤသးဖုးဒီးတၢ်သးဒ့ဒီန့ၣ်လီၤ. ခီဖျိလၢ စီၤပ့းတရူး ဂုာ်ကျဲးစၢးမၤဝဲဒ်န့ၣ်အဃိ အဝဲမ့ၢ်ပှၤဒိဂ့ၤတဲာ်ဘၣ်လၢပဂီၢ်လီၤ.
“ပထံၣ်န့ၢ်လံ မ့းၡံအၤန့ၣ်လံ”
၅, ၆. စီၤပ့းတရူးဖံးအီၣ်မၤအီၣ်တၢ်ဒ်လဲၣ်.
၅ တၢ်မၤအသးဖဲ စီၤပ့းတရူးထံၣ်လိာ်အသးဒီး ယ့ၣ်ၡူးအဆိကတၢၢ်တဘျီန့ၣ် အဝဲတသးပ့ၤနီၣ်ကွံာ်ဝဲနီတဘျီဘၣ်. ဘၣ်တနံၤန့ၣ် စီၤပ့းတရူးအဒီပုၢ်ဝဲၢ်ခွါ စီၤအၣ်ဒရ့းလဲၤဝဲဆူအအိၣ် ဒီးတဲဘၣ်အီၤလၢ “ပထံၣ်န့ၢ်လံ မ့းၡံအၤန့ၣ်လံ.” တၢ်ကစီၣ်အံၤ ဆီတလဲကွံာ်ဝဲစီၤပ့းတရူး အတၢ်အိၣ်မူလၢာ်လၢာ်ဆ့ဆ့လီၤ.—ယိၤဟၣ် ၁:၄၁.
၆ စီၤပ့းတရူး အိၣ်ဝဲဆိးဝဲလၢ ဝ့ၢ်ကပ့းရနီၣ်အပူၤလီၤ. ဝ့ၢ်တဖျၢၣ်အံၤ အိၣ်ဝဲလၢ ပီၣ်လဲၣ်ကၤလံၤလါ အကၢၢ်နံၤလၢ ကလံၤစိးတခီန့ၣ်လီၤ. စီၤပ့းတရူး, စီၤအၣ်ဒရ့း ဒီးစီၤစ့းဘ့းဒဲအဖိခွါတဖၣ် လၢအမ့ၢ်စီၤယၤကိာ် ဒီးစီၤယိၤဟၣ်န့ၣ် မၤသကိးတၢ်လၢ တၢ်မၤအီၣ်ညၣ် အတၢ်မၤန့ၣ်လီၤ. စီၤပ့းတရူး, အမါ, အမံၤပှၢ်ပိာ်မုၣ် ဒီးအဒီပုၢ်ဝဲၢ်ခွါ စီၤအၣ်ဒရ့းန့ၣ် အိၣ်ဝဲတပူၤဃီလီၤ. ဒ်သိးစီၤပ့းတရူး လုၢ်အီၣ်လုၢ်အီဝဲ အဟံၣ်ဖိဃီဖိတဖၣ်အံၤလၢ တၢ်မၤအီၣ်ညၣ်အတၢ်မၤကသ့အဂီၢ် အဝဲကဘၣ်မၤတၢ်သ့သ့ဘၣ်ဘၣ် ဒီးထဲးဂံၢ်ထဲးဘါထီဘိလီၤ. ထံၣ်ကမှံကွၢ်လၢ စီၤပ့းတရူး ဒီးပှၤမၤတၢ်ဖိအဂၤတဖၣ် ဃုအီၣ်ညၣ်လၢမုၢ်နၤခီ, ကွံာ်လီၤဝဲပှာ်လၢ ချံခံဘ့ၣ်အဘၢၣ်စၢၤဝံၤဒီး တွံၢ်ထီၣ်ဝဲညၣ်လၢ အဖီၣ်န့ၢ်ဝဲတဖၣ်ဆူချံအပူၤတက့ၢ်. ဒီးထံၣ်ကမှံကွၢ်လၢ မုၢ်ဆါခီန့ၣ် အဝဲသ့ၣ်နီၤဖးဝဲညၣ်အကလုာ်ဝံၤ ဆါလီၤဝဲ, မၤကဆှီထီၣ်ဝဲအပှာ်ဧိၤစၤဧိၤ ဒီးဆးဂ့ၤထီၣ်က့ၤအီၤတက့ၢ်.
၇. ဘၣ်ဃးဒီး ယ့ၣ်ၡူးအဂ့ၢ်န့ၣ် စီၤပ့းတရူးနၢ်ဟူဘၣ်ဝဲတၢ်ဂ့ၢ်မနုၤလဲၣ်, ဒီးဘၣ်မနုၤအဃိ တၢ်ကစီၣ်အံၤမ့ၢ်တၢ်လၢ အလီၤသးခုလဲၣ်.
၇ လံာ်စီဆှံပာ်ဖျါထီၣ်န့ၢ်ပှၤလၢ စီၤအၣ်ဒရ့းန့ၣ် မ့ၢ်ပှၤဘျၢတၢ်ယိၤဟၣ်အပျဲၢ်န့ၣ်လီၤ. ဖဲစီၤအၣ်ဒရ့း တဲဘၣ်စီၤပ့းတရူးဘၣ်ဃးဒီး တၢ်ကစီၣ်လၢပှၤဘျၢတၢ်ယိၤဟၣ်ရၤလီၤဝဲန့ၣ် စီၤပ့းတရူးကဒိကနၣ်ဝဲ ထံထံဆးဆးလီၤ. ဘၣ်တနံၤန့ၣ် စီၤအၣ်ဒရ့း နၢ်ဟူဘၣ်ဝဲ စီၤယိၤဟၣ်တဲဖျါထီၣ်ဝဲလၢ ယ့ၣ်ၡူးန့ၣ်မ့ၢ် “ယွၤအသိဖိ” လီၤ. စီၤအၣ်ဒရ့း ကဲထီၣ်ယ့ၣ်ၡူးအပျဲၢ်အဘီၣ်တဘျီဃီ ဒီးအဝဲက့ၤတဲဘၣ်စီၤပ့းတရူးလၢ မ့းၡံအၤဟဲပၢၢ်ထီၣ်ဝဲလံ. (ယိၤဟၣ် ၁:၃၅-၄၀) တချုးလၢ မ့းၡံအၤဟဲအနံၣ်လၢ အကထိတဖၣ်န့ၣ် ပှၤပူထီၣ်ထီဒါကစၢ်ယွၤလၢ ဧ့ၤဒ့ၣ်တၤသၣ်အလီၢ်န့ၣ်လီၤ. ဖဲန့ၣ်အဆၢကတီၢ် ယဟိဝၤယွၤ တဲဆိပာ်ဝဲလၢ ပှၤလၢအကဟ့ၣ်ပှၤဟီၣ်ခီၣ်ဖိတဖၣ် တၢ်မုၢ်လၢ်နီၢ်နီၢ်န့ၣ် ကဟဲပၢၢ်ထီၣ်ဝဲတဂၤလီၤ. (၁ မိၤ. ၃:၁၅) စီၤအၣ်ဒရ့းထံၣ်ဘၣ်ဝဲ တၢ်အုၣ်က့ၤခီၣ်က့ၤကစၢ်တဂၤအံၤ ဒီးစီၤပ့းတရူးစ့ၢ်ကီးကရီလဲၤဝဲ ဒ်သိးကထံၣ်လိာ်သးဒီးယ့ၣ်ၡူးန့ၣ်လီၤ.
၈. စီၤပ့းတရူးအမံၤလၢ ယ့ၣ်ၡူးယုၢ်န့ၢ်အီၤန့ၣ် အခီပညီမ့ၢ်ဒ်လဲၣ်, ဒီးဘၣ်ဃးဒီးမံၤအံၤ ပှၤတနီၤနီၤဆိကမိၣ်ဝဲဒ်လဲၣ်.
၈ တချုးလၢစီၤပ့းတရူး ထံၣ်လိာ်အသးဒီးယ့ၣ်ၡူးအနံၤန့ၣ် ပှၤကိးအမံၤလၢ စီၤၡံမိၣ်လီၤ. ဘၣ်ဆၣ် ယ့ၣ်ၡူးကွၢ်အီၤဒီးစံးဝဲလၢ “နမံၤမ့ၢ်စီၤၡံမိၣ်ဒီး နပၢ်အမံၤမ့ၢ်စီၤယိၤနါန့ၣ်လီၤ. ဘၣ်ဆၣ် တၢ်ကကိးက့ၤနၤလၢ စီၤက့ၤဖးန့ၣ်လီၤ. (မ့ၢ်တမံၤဃီဒီး စီၤပ့းတရူးလၢအခီပညီမ့ၢ်လၢၢ်လီၤ.)” (ယိၤဟၣ် ၁:၄၂, ခ့ခါစှီၤကျိာ်) ယ့ၣ်ၡူးအတၢ်ကတိၤတဖၣ်အံၤ မ့ၢ်ဝဲတၢ်စံးပာ် ဘၣ်ဃးဒီးစီၤပ့းတရူးအဂ့ၢ်န့ၣ်လီၤ. ယ့ၣ်ၡူးထံၣ်ဆိပာ်ဝဲလၢ စီၤပ့းတရူးကလီၤဂာ် ဒ်သိးဒီးလၢၢ်န့ၣ်လီၤ. အဝဲအဲၣ်ဒိးစံးဝဲလၢ စီၤပ့းတရူး ကကဲထီၣ်ပှၤလၢ အတကဒံကဒါဘၣ်, အဂံၢ်ဆူၣ်လၢနီၢ်သးတခီ ဒီးခရံာ်ဖိအဂၤတဖၣ်နာ်န့ၢ်အီၤသ့ဝဲလီၤ. မ့ၢ်စီၤပ့းတရူးထံၣ်လီၤအသး ဒ်ယ့ၣ်ၡူးထံၣ်အီၤအသိးဧါ. ဖျါလၢ အဝဲတထံၣ်လီၤအသးဒ်န့ၣ်ဘၣ်. မုၢ်မဆါတနံၤအံၤ ပှၤတနီၤနီၤလၢ အဖးဝဲလံာ်စီဆှံန့ၣ် ဆိကမိၣ်ဝဲလၢ စီၤပ့းတရူးတလီၤဂာ်ဒီးလၢၢ်နီတစဲးဘၣ်. အဝဲသ့ၣ်တဖၣ်န့ၣ် တဲဝဲလၢစီၤပ့းတရူးမ့ၢ်ပှၤလၢ အသးကဒံကဒါ ဒီးအသးတတီဘၣ်.
၉. ယဟိဝၤယွၤ ဒီးအဖိခွါဃုထံၣ်ဝဲတၢ်မနုၤလဲၣ် ဒီးပကဘၣ်နာ်တၢ်မနုၤလဲၣ်.
၉ ပမ့ၢ်တဲတီတီန့ၣ် စီၤပ့းတရူးအတၢ်ဂံၢ်စၢ်ဘါစၢ်တဖၣ် အိၣ်ဝဲလီၤ. ဒီးလၢ စီၤပ့းတရူးအတၢ်ဂံၢ်စၢ်ဘါစၢ်တဖၣ်အံၤအဖီခိၣ်န့ၣ် ယ့ၣ်ၡူးတဘံၣ်မဲာ်ဘၣ်. ဘၣ်ဆၣ် ယ့ၣ်ၡူးလီၤဂာ်ဒီးအပၢ်အဃိ အဝဲကွၢ်တၢ်လၢအဂ့ၤတကပၤန့ၣ်လီၤ. ယ့ၣ်ၡူးသ့ၣ်ညါဝဲလၢ စီၤပ့းတရူးန့ၣ် အိၣ်ဒီးတၢ်ဂ့ၤတၢ်ဝါအါမး ဒီးယ့ၣ်ၡူးအဲၣ်ဒိးထုးဖျါထီၣ်ဝဲတၢ်ဂ့ၤတၢ်ဝါတဖၣ်အံၤလၢ အဂ့ၤကတၢၢ်လီၤ. မုၢ်မဆါတနံၤအံၤ ယဟိဝၤယွၤ ဒီးအဖိခွါန့ၣ် ဃုထံၣ်ဝဲပတၢ်ဂ့ၤတၢ်ဝါတဖၣ်လီၤ. ဘၣ်သ့ၣ်သ့ၣ် ပကဆိကမိၣ်လီၤပသးလၢ ပတၢ်ဂ့ၤတၢ်ဝါတအိၣ်အါအါဘၣ်. ဘၣ်ဆၣ်သနာ်က့ ပကဘၣ်နာ်လၢ ယဟိဝၤယွၤ ဒီးယ့ၣ်ၡူးထံၣ်ပှၤ ဒ်ပမ့ၢ်ပှၤလၢအအိၣ်ဒီးတၢ်ဂ့ၤတၢ်ဝါန့ၣ်လီၤ. တကးဒံးဘၣ် ဒ်စီၤပ့းတရူးအသိး ပဝဲစ့ၢ်ကီး ပကဘၣ်ပာ်လီၤပသးလၢ ပကတူၢ်လိာ် ယဟိဝၤယွၤအတၢ်သိၣ်လိနဲၣ်လိပှၤလီၤ.—ဖး ၁ ယိၤဟၣ် ၃:၁၉, ၂၀ တက့ၢ်.
“ပျံၤတၢ်တဂ့ၤ”
၁၀. ဖျါလၢ စီၤပ့းတရူးကထံၣ်ဘၣ် ဒီးနၢ်ဟူဘၣ်ဝဲတၢ်မနုၤလဲၣ်. ဘၣ်ဆၣ် အဝဲက့ၤမၤကဒါက့ၤ တၢ်မနုၤလဲၣ်.
၁၀ ဖဲယ့ၣ်ၡူး လဲၤစံၣ်တဲၤတဲလီၤတၢ်အဆၢကတီၢ်န့ၣ် ဖျါလၢ စီၤပ့းတရူးလဲၤဃုာ်တၢ်ဒီးအီၤလီၤ. လၢတၢ်န့ၣ်အဃိ ဘၣ်သ့ၣ်သ့ၣ် အဝဲကထံၣ်ဘၣ် ယ့ၣ်ၡူးမၤဝဲတၢ်လီၤလးအဆိကတၢၢ်တဘျီလၢ တၢ်ဖျီအမူးလၢ ဝ့ၢ်ကၤနါအပူၤန့ၣ်လီၤ. ဖဲန့ၣ်န့ၣ် ယ့ၣ်ၡူး ဒုးကဲထီၣ်ထံလၢ စပံးထံလီၤ. အါန့ၢ်အန့ၣ် အဝဲနၢ်ဟူဘၣ်ဝဲ ယ့ၣ်ၡူးစံၣ်တဲၤတဲလီၤ ဘီမုၢ်တၢ်သးခုကစီၣ်လၢ အဒုးအိၣ်ထီၣ်တၢ်မုၢ်လၢ်လၢ ပှၤဟီၣ်ခိၣ်ဖိအဂီၢ်လီၤ. ဘၣ်ဆၣ်သနာ်က့ အဝဲဟးဖးဒီးယ့ၣ်ၡူး ဒီးက့ၤမၤကဒါက့ၤ တၢ်မၤအီၣ်ညၣ်အတၢ်မၤန့ၣ်လီၤ. ပူၤကွံာ်စှၤလါဝံၤအလီၢ်ခံ စီၤပ့းတရူးထံၣ်လိာ်က့ၤအသးဒီးယ့ၣ်ၡူးလၢ အသီတဘျီလီၤ. ဖဲန့ၣ်အဆၢကတီၢ် ယ့ၣ်ၡူးကွဲမုာ်အီၤလၢ အဝဲကဟ့ၣ်လီၤအတၢ်ဆၢကတီၢ် လၢလၢပှဲၤပှဲၤ ဒ်သိးကလဲၤပိာ်အခံန့ၣ်လီၤ.
၁၁, ၁၂. (က) ဘၣ်တနၤန့ၣ် တၢ်မၤအသးဒီးစီၤပ့းတရူးဒ်လဲၣ်. (ခ) ဖဲစီၤပ့းတရူးဒိကနၣ်ဝဲ ယ့ၣ်ၡူးအတၢ်စံၣ်တဲၤတဲလီၤတၢ်အခါ အဝဲကဆိကမိၣ်လီၤအသးဒ်လဲၣ်.
၁၁ စီၤပ့းတရူးမၤတၢ်ဒီတနၤညါ ဒီးအသးလီၤဘှံးလီၤတီၤဝဲလီၤ. စီၤပ့းတရူးဒီး ပှၤမၤညၣ်ဖိအဂၤတဖၣ် ကွံာ်လီၤဝဲအပှာ်တဘျီဝံၤတဘျီ ဘၣ်ဆၣ်တန့ၢ်ညၣ်နီတဘ့ၣ်ဘၣ်. စီၤပ့းတရူးကဂုာ်ကျဲးစၢးဃုတၢ်လီၢ်လၢ ညၣ်အိၣ်ဝဲအလီၢ် ဒီးအဝဲကသူဝဲအတၢ်သ့တၢ်ဘၣ်ခဲလၢာ်န့ၣ်လီၤ. ဒ်ပှၤမၤညၣ်ဖိအါဂၤမုၢ်လၢ်ဝဲအသိး စီၤပ့းတရူးကဆိကမိၣ်လီၤအသးလၢ ယကွၢ်ညၣ်လၢ ထံကျါမ့ၢ်ဖျါဒု ကဂ့ၤဝဲလီၤ. လၢတၢ်ဂ့ၢ်သ့ၣ်တဖၣ်အံၤအဃိ အသးကဘၣ်တံာ်တာ်ဒိၣ်မးလီၤ. စီၤပ့းတရူး ဘၣ်လုၢ်အီၣ်လုၢ်အီ အဟံၣ်ဖိဃီဖိလၢ တၢ်မၤညၣ်အဃိ တမ့ၢ်လၢ အဝဲဟးဖီၣ်လိၣ်ကွဲညၣ်ဘၣ်. ဘၣ်ဆၣ် အကတၢၢ်တၢၢ်န့ၣ် အဝဲဟဲက့ၤထီၣ်လၢ ကၢၢ်ကပၤခီလီလီလီၤ. ဒီးဖဲအဝဲသ့စီကွံာ်အပှာ်အဆၢကတီၢ် ယ့ၣ်ၡူးဟဲဆူအအိၣ်လီၤ.
ဖဲစီၤပ့းတရူးဒိကနၣ်ဝဲ ယ့ၣ်ၡူးစံၣ်တဲၤတဲလီၤတၢ် ဘၣ်ဃးဒီးယွၤအဘီအမုၢ်အဆၢကတီၢ်န့ၣ် တၢ်တကၢၣ်အသးနီတဘျီဘၣ်
၁၂ ပှၤဂီၢ်မုၢ်အါဂၤ ဟဲသုးဘူးအသးဆူယ့ၣ်ၡူးအအိၣ် ဒ်သိးကဒိကနၣ် အတၢ်ကတိၤထံထံဆးဆးအဂီၢ်လီၤ. အဝဲသ့ၣ်တဖၣ်န့ၣ် အိၣ်ကတံာ်ကတူာ်ဝဲအဃိ ယ့ၣ်ၡူးလဲၤထီၣ်ဝဲလၢ စီၤပ့းတရူးအချံပူၤ ဒီးမၢစီၤပ့းတရူးသုးယံၤထီၣ်ချံလၢ ကၢၢ်ကပၤတစဲးန့ၣ်လီၤ. ခီဖျိလၢ ယ့ၣ်ၡူးအိၣ်ဝဲလၢ ထံအဖီခိၣ်အဃိ ပှၤဂီၢ်မုၢ်နၢ်ဟူဘၣ်အကလုၢ်ဂ့ၤဂ့ၤလီၤ. ဒ်ပှၤဂီၢ်မုၢ်အါဂၤဒိကနၣ်ဝဲအသိး စီၤပ့းတရူးစ့ၢ်ကီး ဒိကနၣ်ဝဲလီၤတံၢ်လီၤဆဲးန့ၣ်လီၤ. ဖဲစီၤပ့းတရူးဒိကနၣ်ဝဲ ယ့ၣ်ၡူးစံၣ်တဲၤတဲလီၤတၢ် ဘၣ်ဃးဒီးယွၤအဘီအမုၢ်အဆၢကတီၢ်န့ၣ် တၢ်တကၢၣ်အသးနီတဘျီဘၣ်. စီၤပ့းတရူးကဆိကမိၣ်လီၤအသးလၢ ယမ့ၢ်ဟးမၤစၢၤဘၣ် ယ့ၣ်ၡူးခရံာ်လၢ တၢ်ရၤလီၤဘီမုၢ်တၢ်သးခုကစီၣ်တၢ်မၤအပူၤန့ၣ် ကမ့ၢ်တၢ်ခွဲးတၢ်ယာ်ဖးဒိၣ်လၢယဂီၢ်လီၤ. ဘၣ်ဆၣ် အဝဲမၤဝဲကန့ၢ်ဧါ. အဝဲကလုၢ်အီၣ်လုၢ်အီ အဟံၣ်ဖိဃီဖိလၢကျဲဒ်လဲၣ်. စီၤပ့းတရူးကသ့ၣ်နီၣ်ထီၣ်က့ၤလၢ မုၢ်နၤခီန့ၣ် အဝဲဃုအီၣ်ညၣ်တဘျုးနၣ်ရံၣ် ဒီးအဂံၢ်အဘါလၢာ်ဝဲသပှၢ်ကတၢၢ် ဘၣ်ဆၣ် တန့ၢ်ညၣ်နီတဘ့ၣ်ဘၣ်.—လူၤကၣ် ၅:၁-၃.
၁၃, ၁၄. လၢစီၤပ့းတရူးအဂီၢ် ယ့ၣ်ၡူးမၤဝဲတၢ်လီၤလးမနုၤလဲၣ်, ဒီးစီၤပ့းတရူးတူၢ်ဘၣ်ဝဲဒ်လဲၣ်.
၁၃ ဖဲယ့ၣ်ၡူးစံၣ်တဲၤတဲလီၤတၢ်ဝံၤအလီၢ်ခံ အဝဲတဲဘၣ်စီၤပ့းတရူးလၢ “သုးဃီၤကဘီဆူထံယိာ်, ဒီးဒ်သိးသုကန့ၢ်အီၣ်ညၣ်ဒီး, ပျၢ်လီၤသုစၤတက့ၢ်.” ဘၣ်ဆၣ် စီၤပ့းတရူး အသးဒ့ဒီသပှၢ်ကတၢၢ်လီၤ. အဝဲတဲဘၣ်ယ့ၣ်ၡူးလၢ “ကစၢ်ဧၢ, ပမၤတ့ၢ်သီတနၤကျၢၤ, ဒီးပတန့ၢ်ဘၣ်တၢ်နီတမံၤဘၣ်. ဘၣ်ဆၣ်ဒီး မ့ၢ်နကလုၢ်အဃိဒီး, ပကပျၢ်လီၤစၤန့ၣ်လီၤ.” ဖဲမကၢာ် စီၤပ့းတရူးသ့စီကွံာ်ဝဲ ပှာ်တဖၣ်ဝံၤလံ. လၢတၢ်န့ၣ်အဃိ အဝဲတအဲၣ်ဒိးကွံာ်လီၤကဒါက့ၤပှာ်နီတစဲးဘၣ်. အဂၤတမံၤန့ၣ် ဖဲယ့ၣ်ၡူးတဲဝဲဒ်န့ၣ်အဆၢကတီၢ် ဘၣ်လၢညၣ်တအီၣ်တၢ်အဆၢကတီၢ်န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ စီၤပ့းတရူးမၤဝဲဒ် ယ့ၣ်ၡူးတဲဝဲအသိး ဒီးဖျါလၢအဝဲမၢဝဲ အပှၤမၤသကိးတၢ်ဖိတဖၣ် ဟဲပိာ်အခံလၢချံအဂၤတဘ့ၣ်န့ၣ်လီၤ.—လူၤကၣ် ၅:၄, ၅.
၁၄ ဖဲစီၤပ့းတရူး တွံၢ်ထီၣ်ပှာ်အခါ အသးကမၢကမၣ်ဝဲလီၤ. အဝဲတူၢ်ဘၣ်ဝဲလၢ ပှာ်န့ၣ်ဃၢဒိၣ်မးလီၤ. လၢတၢ်န့ၣ်အဃိ အဝဲထုးဝဲလၢာ်ဂံၢ်လၢာ်ဘါ ဒီးထံၣ်ဘၣ်ဝဲလၢပှာ်အပူၤန့ၣ် ညၣ်စံၣ်ဝဲဒီဒူၣ်န့ၣ်လီၤ. ဒီးစီၤပ့းတရူးဖုးဝဲတုၤလၢအသးဘူးကလီၤတဲာ်လီၤ. တဘျီဃီန့ၣ် အဝဲမၢဝဲပှၤအိၣ်လၢချံအဝဲတဘ့ၣ် ဟဲမၤစၢၤအီၤလီၤ. ဖဲအဝဲသ့ၣ် ထၢနုာ်ဝဲညၣ်လၢ ချံပူၤအခါ အဝဲသ့ၣ်သ့ၣ်ညါဘၣ်ဝဲလၢ ချံထဲတဘ့ၣ်န့ၣ် ညၣ်တတြီၢ်ဘၣ်. ဒီးအဝဲသ့ၣ်ထၢနုာ်ဝဲညၣ်တုၤလၢ ချံခံဘ့ၣ်ပှဲၤထးန့ၣ်လီၤ. လၢတၢ်န့ၣ်အဃိ ချံန့ၣ်ဘူးကလီၤဘျၢဝဲလီၤ. လၢညါစီၤပ့းတရူးထံၣ်ဘၣ်ဝဲခရံာ်အတၢ်စိတၢ်ကမီၤ ဘၣ်ဆၣ် တၢ်လီၤလးအဝဲအံၤ ကဲဘျုးလၢအဂီၢ်လီၤလီၤဆီဆီန့ၣ်လီၤ. ဒီးစီၤပ့းတရူးသူၣ်ပျံၤသးဖုးဝဲအဃိ ချံးလီၤအခီၣ် ဒီးတဲဝဲလၢ “ကစၢ်ဧၢ, ဟးထီၣ်စာ်လၢယအိၣ်တက့ၢ်. အဂ့ၢ်ဒ်အံၤ, ယမ့ၢ်ပှၤတၢ်ဒဲးဘးဖိလီၤ.” ဖဲန့ၣ်အဆၢကတီၢ် အဝဲကဆိကမိၣ်လီၤအသးလၢ ယ့ၣ်ၡူးအိၣ်ဒီးတၢ်စိတၢ်ကမီၤထဲအံၤညါအဃိ ယတမ့ၢ်ပှၤလၢ အကြၢးရ့လိာ်သးဒီးအီၤဘၣ်.—ဖး လူၤကၣ် ၅:၆-၉ တက့ၢ်.
“ကစၢ်ဧၢ, . . . ယမ့ၢ်ပှၤတၢ်ဒဲးဘးဖိလီၤ”
၁၅. ဒ်သိး စီၤပ့းတရူးကတြီဆၢမၤနၢၤကွံာ်ဝဲ အတၢ်သူၣ်ပျံၤသးဖုး ဒီးအတၢ်သးဒ့ဒီအဂီၢ်န့ၣ် ယ့ၣ်ၡူးသိၣ်လိအီၤဒ်လဲၣ်.
၁၅ လၢတၢ်အဲၣ်တၢ်ကွံအပူၤ ယ့ၣ်ၡူးစံးဝဲလၢ “ပျံၤတၢ်တဂ့ၤ. တုၤအံၤဆူညါန့ၣ်, နကဖီၣ်န့ၢ်ပှၤကညီလီၤ.” (လူၤကၣ် ၅:၁၀, ၁၁) ဖဲန့ၣ်အဆၢကတီၢ် ယ့ၣ်ၡူးအဲၣ်ဒိးဝဲလၢ စီၤပ့းတရူးကတြီဆၢမၤနၢၤကွံာ်ဝဲ အတၢ်သူၣ်ပျံၤသးဖုး ဒီးအတၢ်သးဒ့ဒီန့ၣ်လီၤ. ဘၣ်ဃးဒီး တၢ်လုၢ်အီၣ်လုၢ်အီအဟံၣ်ဖိဃီဖိ မ့တမ့ၢ် မ့ၢ်အတုၤထီၣ်ထီၣ်ဘးလၢ အကမၤဝဲတၢ်စံၣ်တဲၤတဲလီၤတၢ်မၤဧါန့ၣ် အဝဲတလိၣ်ဘၣ်ယိၣ်တၢ်လၢၤဘၣ်. ယ့ၣ်ၡူးအဲၣ်ဒိးလၢ စီၤပ့းတရူးကပၣ်ဃုာ်ဝဲလၢ တၢ်မၤအရ့ဒိၣ်ကတၢၢ်လၢ ကကဲဘျုးလၢ ပှၤဟီၣ်ခိၣ်ဖိအဂီၢ်လီၤ. လၢတၢ်န့ၣ်အဃိ အရ့ဒိၣ်လၢ စီၤပ့းတရူးကသးစၢၢ်ဆၢဝဲ တၢ်စံၣ်တဲၤတဲလီၤတၢ်မၤလီၤ. ဒီးယဟိဝၤယွၤမ့ၢ် ကစၢ်လၢအ “ကပျၢ်တၢ်အါအါကလဲာ်လီၤ.” (ၡါ. ၅၅:၇) အဃိစီၤပ့းတရူး တကြၢးသးဒ့ဒီလၢ ယဟိဝၤယွၤ ကမၤလၢပှဲၤန့ၢ်အတၢ်လိၣ်ဘၣ်လၢ နီၢ်ခိဒီးနီၢ်သးတခီန့ၣ်ဘၣ်.—မး. ၆:၃၃.
၁၆. စီၤယၤကိာ်, စီၤယိၤဟၣ်ဒီးစီၤပ့းတရူးန့ၣ် မၤဝဲဒ်လဲၣ်, ဒီးအဝဲသ့ၣ်အတၢ်ဆၢတဲာ်န့ၣ် ဘၣ်မနုၤအဃိမ့ၢ်တၢ်ဆၢတဲာ် လၢအဂ့ၤကတၢၢ်လဲၣ်.
၁၆ စီၤယၤကိာ်, စီၤယိၤဟၣ်ဒီးစီၤပ့းတရူးန့ၣ် ဒိကနၣ်ဝဲ ယ့ၣ်ၡူးအကလုၢ်တဘျီဃီလီၤ. လံာ်စီဆှံစံးဝဲလၢ “အဝဲသ့ၣ်တွံၢ်ထီၣ်အချံတဖၣ်လၢ ထံကၢၢ်နံၤ, ပာ်တ့ၢ်ကွံာ်တၢ်ခဲလၢာ်ခဲဆ့ဒီး ပိာ်ထီၣ်ယ့ၣ်ၡူးအခံန့ၣ်လီၤ.” (လူၤကၣ် ၅:၁၁, ခ့ခါစှီၤကျိာ်) ခီဖျိလၢ စီၤပ့းတရူးပာ်ဖျါထီၣ် တၢ်နာ်ယ့ၣ်ၡူး ဒီးကစၢ်ယွၤအဃိ မ့ၢ်တၢ်ဆၢတဲာ်လၢအဂ့ၤကတၢၢ်လီၤ. မုၢ်မဆါတနံၤညါအံၤ ဖဲခရံာ်ဖိတဖၣ် တြီဆၢမၤနၢၤကွံာ်အတၢ်သူၣ်ပျံၤသးဖုး ဒီးအတၢ်သးဒ့ဒီ လၢကမၤယွၤအတၢ်မၤအဂီၢ်န့ၣ် မ့ၢ်ဒၣ်အဝဲသ့ၣ်ပာ်ဖျါထီၣ်တၢ်နာ် ဒ်စီၤပ့းတရူးအသိးလီၤ. ပှၤလၢအပာ်ဖျါထီၣ်တၢ်နာ်ဒ်အံၤန့ၣ် ယဟိဝၤယွၤတပာ်တ့ၢ်ကွံာ်အဝဲသ့ၣ် နီတဘျီဘၣ်.—စံး. ၂၂:၄, ၅.
“ပှၤနာ်တၢ်စှၤဧၢ, ဘၣ်မနုၤလၢနသးဒ့ဒီလဲၣ်”
၁၇. ဘၣ်သ့ၣ်သ့ၣ် စီၤပ့းတရူးကဆိကမိၣ်ထီၣ်က့ၤ တၢ်ဂ့ၢ်မနုၤလဲၣ်.
၁၇ စးထီၣ်လၢစီၤပ့းတရူးထံၣ်လိာ်အသး ဒီးယ့ၣ်ၡူးအဆိကတၢၢ်တဘျီ, ပူၤကွံာ်ခံနံၣ်ဃၣ်ဃၣ်ဝံၤအလီၢ်ခံန့ၣ် အဝဲဝၢ်ဝဲချံလၢ ပီၣ်လဲၣ်ကၤလံၤလါလၢမုၢ်နၤခီ ဒ်တၢ်မၤလိအံၤအခီၣ်ထံးပာ်ဖျါဝဲအသိးန့ၣ်လီၤ. ဒီးအဝဲကဆိကမိၣ်တၢ်ဂ့ၢ်မနုၤလဲၣ်န့ၣ် ပတသ့ၣ်ညါဘၣ်. ဘၣ်သ့ၣ်သ့ၣ် စီၤပ့းတရူးကဆိကမိၣ်က့ၤ တၢ်ဂ့ၢ်လၢလာ်တဖၣ်အံၤအကျါတခါခါန့ၣ်လီၤ. အဒိ ဘၣ်တဘျီန့ၣ် ယ့ၣ်ၡူးမၤဘျါက့ၤ စီၤပ့းတရူးအမံၤပှၢ်ပိာ်မုၣ်လီၤ. ဒီးယ့ၣ်ၡူးဟ့ၣ်ဝဲတၢ်စံၣ်တဲၤတဲလီၤတၢ်လၢ တၢ်လူၢ်ခိၣ်န့ၣ်လီၤ. တကးဒံးဘၣ် ခီဖျိလၢ အတၢ်သိၣ်လိ ဒီးအတၢ်လီၤလးတဖၣ်န့ၣ် ယ့ၣ်ၡူးပာ်ဖျါထီၣ်ဝဲလၢ အဝဲမ့ၢ်မ့းၡံအၤန့ၣ်လီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး စီၤပ့းတရူးအတၢ်သူၣ်ပျံၤသးဖုးဒီး အတၢ်သးဒ့ဒီစှၤလီၤဝဲလီၤ. ဒီးယ့ၣ်ၡူးဃုထၢထီၣ်အီၤလၢ တၢ်မၢဖိ ၁၂ ဂၤအကျါတဂၤလီၤ. ဘၣ်ဆၣ် ဆူညါန့ၣ်ပကမၤလိအါထီၣ်ဘၣ်လၢ စီၤပ့းတရူးတမၤနၢၤကွံာ်ဝဲ အတၢ်သူၣ်ပျံၤသးဖုး ဒီးအတၢ်သးဒ့ဒီလၢလၢပှဲၤပှဲၤဒံးဘၣ်.
၁၈, ၁၉. (က) လၢပီၣ်လဲၣ်ကၤလံၤလါန့ၣ် စီၤပ့းတရူးထံၣ်ဘၣ်ဝဲတၢ်မနုၤလဲၣ်. (ခ) ယ့ၣ်ၡူးမၢစီၤပ့းတရူးမၤဝဲတၢ်မနုၤလဲၣ်.
၁၈ ဘၣ်လၢ တၢ်ပၢၤတၢ်လၢမုၢ်နၤ လွံၢ်တီၤတတီၤ လၢအအဲၣ်ဒိးစံးဝဲ ဂီၤခီသၢနၣ်ရံၣ်တုၤလၢ ဃုနၣ်ရံၣ်အဘၢၣ်စၢၤန့ၣ်လီၤ. စီၤပ့းတရူး ပာ်လီၤဝဲနီၣ်ဝၢ်ဒီးဆ့ၣ်နီၤထူၣ်ကလာ်လီၤ. လၢပီၣ်လဲၣ်အလပီတဖၣ်အကျါန့ၣ် အဝဲထံၣ်ဘၣ်ဝဲ တၢ်မၤအသးလၢအလီၤဆီတခါလီၤ. အဝဲဆိကမိၣ်ဝဲလၢ မ့ၢ်လါအတၢ်ကပီၤ ဆဲးလီၤဘၣ်ဝဲလပီတဖၣ်အဃိဧါ. လ့ၤတက့ၤ တမ့ၢ်ဘၣ်. ဖျါလၢ ပှၤတဂၤဟးလၢထံဖံးခိၣ်လီၤမၢၤ. ဘၣ်ဆၣ် ဒ်အဝဲဟဲဘူးထီၣ်ဒီးချံအသိးန့ၣ် လီၤဂာ်လၢအဝဲကလဲၤပူၤကွံာ်ချံန့ၣ်လီၤ. ယ့ၣ်ၡူးအပျဲၢ်အဘီၣ်တဖၣ်အံၤ အခိၣ်ကဖီထီၣ် ဒီးဆိကမိၣ်လီၤအသးလၢ အဝဲသ့ၣ်ထံၣ်ဘၣ်ဝဲ ပှၤနီၢ်သးဖိတဂၤလီၤ. ဘၣ်ဆၣ် ပှၤတဂၤအံၤတဲဝဲလၢ “ပာ်သုသးဒူဒူတက့ၢ်. မ့ၢ်ဒၣ်ယၤလီၤ. တဘၣ်ပျံၤတၢ်တဂ့ၤ.” ပှၤတဂၤအံၤ မ့ၢ်ဒၣ်ယ့ၣ်ၡူးလီၤ.—မး. ၁၄:၂၅-၂၈, ခ့ခါစှီၤကျိာ်.
၁၉ စီၤပ့းတရူးစံးဆၢက့ၤအီၤလၢ “ကစၢ်ဧၢ, မ့မ့ၢ်နၤဒီး, မၤလိာ်လၢ်ယၤ, ဒ်သိးယကလဲၤဃီၤဆူနအိၣ်လၢ ထံအဖီခိၣ်တက့ၢ်.” စီၤပ့းတရူးအတၢ်စံးဆၢအံၤ ပာ်ဖျါထီၣ်လၢ အဝဲအိၣ်ဒီးတၢ်သးဒူန့ၣ်လီၤ. ခီဖျိလၢ အဝဲထံၣ်ဘၣ်ဝဲတၢ်လီၤလးအံၤအဃိ အသူၣ်ဖှံသးညီဝဲဒီးအဝဲအဲၣ်ဒိးလၢ ယ့ၣ်ၡူးကမၤစၢၤအီၤ ဒ်သိးအတၢ်နာ်ကဆူၣ်ထီၣ်ဝဲအဂီၢ်လီၤ. ဖဲန့ၣ်န့ၣ် ယ့ၣ်ၡူးမၢစီၤပ့းတရူးဟဲဃီၤဆူအအိၣ်အဃိ အဝဲခါကပာ်ဝဲချံအခိၣ်ဒူ ဒီးစံၣ်လီၤဝဲဆူပီၣ်လဲၣ်ထံလၢ အထီၣ်လီၤဝံၢ်ဝၢ်အသးအကျါလီၤ. ဖဲအဝဲပာ်လီၤအခီၣ်လၢထံဖံးခိၣ်အခါန့ၣ် အဝဲတလီၤဘျၢဝဲလၢ ထံကျါဘၣ်. ဒီးဖဲအဝဲလဲၤဝဲဆူယ့ၣ်ၡူးအအိၣ်အဆၢကတီၢ် အသးကမၤအသးဒ်လဲၣ်န့ၣ် ဆိကမိၣ်ကွၢ်တက့ၢ်. ဘၣ်ဆၣ် တယံာ်တမီၢ်န့ၣ် တၢ်ကမၤအသးဒီးစီၤပ့းတရူးဒ်လဲၣ်.—ဖး မးသဲ ၁၄:၂၉ တက့ၢ်.
“တုၤအထံၣ်ကလံၤဆူၣ်ဆူၣ်ကလဲာ်ဒီး, သူၣ်ပျံၤသးဖုးဝဲ”
၂၀. (က) ဘၣ်မနုၤအဃိ စီၤပ့းတရူးအသးဒံဝ့ၤဒံဝီၤလဲၣ်, ဒီးတၢ်မၤအသးဒီးအီၤဒ်လဲၣ်. (ခ) စီၤပ့းတရူး ဒိးန့ၢ်ဘၣ်တၢ်မၤလိ အရ့ဒိၣ်လၢယ့ၣ်ၡူးအအိၣ်ဒ်လဲၣ်.
၂၀ အရ့ဒိၣ်လၢ စီၤပ့းတရူးကသးစၢၢ်ဆၢယ့ၣ်ၡူး လၢလၢပှဲၤပှဲၤလီၤ. ဒ်သိးစီၤပ့းတရူး သုတလီၤဘျၢလၢထံကျါတဂ့ၤအဂီၢ် ယ့ၣ်ၡူးမၤစၢၤအီၤခီဖျိလၢ ယဟိဝၤယွၤ အတၢ်စိတၢ်ကမီၤလီၤ. ဒီးမ့ၢ်လၢစီၤပ့းတရူး နာ်ဝဲယ့ၣ်ၡူးအဃိ ယ့ၣ်ၡူးမၤစၢၤအီၤန့ၣ်လီၤ. ဘၣ်ဆၣ် တယံာ်တမီၢ်န့ၣ် စီၤပ့းတရူးအသးဒံဝ့ၤဒံဝီၤဝဲလီၤ. လံာ်စီဆှံတဲဝဲလၢ “တုၤအထံၣ်ကလံၤဆူၣ်ဆူၣ်ကလဲာ်ဒီး, သူၣ်ပျံၤသးဖုးဝဲ” လီၤ. ခီဖျိလၢ စီၤပ့းတရူး ကွၢ်တရံးတၢ်ဆူ လပီတဖၣ်လၢအဒိဘၣ်ချံဒီးထံလၢ အဟဲက့ၤဖျိးထီၣ်တဖၣ်အဃိ အသးကနိးညါ. ဘၣ်သ့ၣ်သ့ၣ် အဝဲကထံၣ်ကမှံကွၢ်လၢ အနီၢ်ကစၢ်လီၤအုးသံဝဲလၢ ပီၣ်လဲၣ်အပူၤန့ၣ်လီၤ. ဒီးဖဲတၢ်ပျံၤတၢ်ဖုးဟဲနုာ်လီၤဝဲလၢ အသးပူၤအခါ အတၢ်နာ်လီၤအုးဝဲလီၤ. ပှၤတဂၤအံၤ ဘၣ်တၢ်ယုၢ်န့ၢ်အမံၤလၢလၢၢ်, ခီဖျိအဝဲမ့ၢ်ပှၤလၢအဂၢၢ်အကျၢၤ ဘၣ်ဆၣ် မ့ၢ်လၢအတၢ်နာ်ကဒံကဒါဝဲအဃိ အဝဲလီၤဘျၢဝဲလၢထံကျါ ဒ်လၢၢ်အသိးန့ၣ်လီၤ. စီၤပ့းတရူးပီၢ်ထံသ့မး ဘၣ်ဆၣ်ခဲအံၤအဝဲတသန့ၤအသးလၢ အနီၢ်ကစၢ်အတၢ်သ့တၢ်ဘၣ်တဖၣ်ဘၣ်. ဒီးအဝဲကိးပသူထီၣ်ဝဲလၢ “ကစၢ်ဧၢ, အုၣ်က့ၤခီၣ်က့ၤယၤတက့ၢ်.” ယ့ၣ်ၡူးဖီၣ်ဃီၤအစု ဒီးထုးထီၣ်အီၤလၢထံကျါလီၤ. ဖဲအဝဲသ့ၣ်ခံဂၤ ဆၢထၢၣ်လၢထံကျါအဆၢကတီၢ် ယ့ၣ်ၡူးတဲဘၣ်အီၤလၢ “ပှၤနာ်တၢ်စှၤဧၢ, ဘၣ်မနုၤလၢ နသးဒ့ဒီလဲၣ်.” တၢ်လဲၤခီဖျိအံၤ ဒီးယ့ၣ်ၡူးအတၢ်ကတိၤတဖၣ် ကဲထီၣ်တၢ်မၤလိအရ့ဒိၣ်တခါလၢ စီၤပ့းတရူးအဂီၢ်လီၤ.—မး. ၁၄:၃၀, ၃၁.
၂၁. ဘၣ်မနုၤအဃိ တၢ်သးဒ့ဒီန့ၣ် ကဲထီၣ်တၢ်လီၤဘၣ်ယိၣ်လၢပဂီၢ်လဲၣ်, ဒီးပတြီဆၢအီၤကသ့ဒ်လဲၣ်.
၂၁ “ဘၣ်မနုၤလၢနသးဒ့ဒီလဲၣ်”—တၢ်သံကွၢ်တဖျၢၣ်အံၤ အရ့ဒိၣ်ဝဲဒိၣ်မးလီၤ. တၢ်သးဒ့ဒီန့ၣ် ယူၢ်လီၤကွံာ်ဝဲပတၢ်နာ် ဝံၤဒီးပလီၤအုးသံဝဲလၢ နီၢ်သးတခီသ့ဝဲလီၤ. လၢတၢ်န့ၣ်အဃိ ပကဘၣ်တြီဆၢတၢ်သးဒ့ဒီသပှၢ်ကတၢၢ်လီၤ. ပမၤကသ့လၢကျဲဒ်လဲၣ်. ပကဘၣ်ပလီၢ်ပသး ဘၣ်ဃးဒီး တၢ်လၢပသးစၢၢ်ဆၢအီၤတဖၣ်လီၤ. အဒိ ပမ့ၢ်သးစၢၢ်ဆၢတၢ်လၢ အမၤပျံၤမၤဖုးပှၤ, တၢ်လၢအမၤစှၤလီၤပသးအသဟီၣ်, ဒီးတၢ်လၢအမၤယံၤထီၣ်ပှၤဒီး ယဟိဝၤယွၤဒီးအဖိခွါန့ၣ် ပတၢ်သးဒ့ဒီ ဒံးယံာ်ဒံးအါထီၣ်ဝဲလီၤ. ဘၣ်ဆၣ် ပမ့ၢ်သးစၢၢ်ဆၢယဟိဝၤယွၤဒီးအဖိခွါ, တၢ်လၢအဝဲသ့ၣ်မၤတ့ၢ်ဝဲတဖၣ် ဒီးတၢ်လၢအဝဲသ့ၣ်ကမၤန့ၢ်ပှၤလၢ ခါဆူညါန့ၣ် ပတြီဆၢမၤနၢၤကွံာ် ပတၢ်သးဒ့ဒီသ့ဝဲလီၤ.
၂၂. ဘၣ်မနုၤအဃိ စီၤပ့းတရူးအဒိအတဲာ်ကဲထီၣ်တၢ်မၤစၢၤလၢနဂီၢ်သ့ဝဲလဲၣ်.
၂၂ ဖဲစီၤပ့းတရူးပိာ်ထီၣ်ယ့ၣ်ၡူးအခံဆူ ချံပူၤအဆၢကတီၢ် အဝဲထံၣ်ဘၣ်ဝဲလၢကလံၤန့ၣ် ပတုာ်ကွံာ်ဝဲလီၤ. ပီၣ်လဲၣ်ကၤလံၤလါ လီၤကယးဝဲဝံၤဒီး စီၤပ့းတရူး ဒီးယ့ၣ်ၡူးအပျဲၢ်အဘီၣ်လၢအဂၤတဖၣ်တဲဝဲလၢ “နဲဒၣ်အံၤ, နမ့ၢ်မးယွၤအဖိခွါနီၢ်နီၢ်လီၤ.” (မး. ၁၄:၃၃) ဖဲမုၢ်ဆ့ၣ်ဝါထီၣ်န့ၣ် စီၤပ့းတရူးကသူၣ်ဖှံသးညီဝဲဒိၣ်မးလီၤ. မ့ၢ်လၢအဝဲတြီဆၢဝဲအတၢ်သူၣ်ပျံၤသးဖုးဒီး အတၢ်သးဒ့ဒီအဃိလီၤ. ပမ့ၢ်တဲတီတီန့ၣ် ဒ်သိးအဝဲကကဲထီၣ်ခရံာ်ဖိတဂၤလၢ အဂၢၢ်ဝဲကျၢၤဝဲဒ်လၢၢ်အသိးန့ၣ် အဝဲကဘၣ်ဆီတလဲကွံာ်အတၢ်ပာ်သူၣ်ပာ်သး အိၣ်ဒံးဝဲအါမံၤလီၤ. ဘၣ်ဆၣ်အဝဲပာ်လီၤအသးလၢ အဝဲကဂုာ်ကျဲးစၢးဝဲထီဘိန့ၣ်လီၤ. မ့ၢ်နပာ်လီၤနသးဒ်န့ၣ်စ့ၢ်ကီးဧါ. နမ့ၢ်ပာ်လီၤနသးဒ်န့ၣ်န့ၣ် စီၤပ့းတရူးအဒိအတဲာ် ကကဲထီၣ်တၢ်မၤစၢၤလၢနဂီၢ်လီၤ.
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
စီၤပ့းတရူး—အဝဲ လဲၤခီဖျိတၢ်မၤကွၢ်တဖၣ်လၢ တၢ်သးတီအပူၤ
ဒ်သိးစီၤပ့းတရူး ကတူၢ်လိာ်ဝဲယ့ၣ်ၡူး အတၢ်သိၣ်က့ၤသီက့ၤအဂီၢ် အတၢ်နာ်ဒီးအတၢ်သးတီ မၤစၢၤအီၤဒ်လဲၣ်.
ကွၢ်လိမၤဒိးအဝဲသ့ၣ်အတၢ်နာ်
စီၤပ့းတရူး—အဝဲမၤလိ တၢ်ပျၢ်တၢ်ကမၣ်လၢ အသရၣ်အအိၣ်
ဘၣ်ဃးဒီးတၢ်ပျၢ်တၢ်ကမၣ်န့ၣ် ယ့ၣ်ၡူးသိၣ်လိဝဲ စီၤပ့းတရူးဒ်လဲၣ်. ယ့ၣ်ၡူးပျၢ်ဝဲစီၤပ့းတရူးအတၢ်ကမၣ်န့ၣ် အဝဲပာ်ဖျါထီၣ်ဝဲဒ်လဲၣ်.
တၢ်မၤလိလၢလံာ်စီဆှံအပူၤ
ယ့ၣ်ၡူးဃုထၢထီၣ် အတၢ်မၢဖိတဆံခံဂၤ
ယ့ၣ်ၡူးဃုထၢထီၣ်အဝဲသ့ၣ်လၢ တၢ်မနုၤအဂီၢ်လဲၣ်. မ့ၢ်နနီၣ်ဘၣ်အဝဲသ့ၣ်အမံၤဒံးဧါ.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
