၃ ယိၤဟၣ် ၁:၁-၁၄
၁ ယၤ, လၢအမ့ၢ် ပှၤသးပှၢ်တဂၤန့ၣ် ကွဲးလံာ်အံၤဆူ ဒီပုၢ်ဝဲၢ်သးဘိ စီၤကါယူး လၢယအဲၣ်အီၤနီၢ်ကီၢ်န့ၣ် အအိၣ်လီၤ.
၂ ဒီပုၢ်ဝဲၢ်သးဘိဧၢ, ယဃ့ထုကဖၣ်လၢ နတၢ်အိၣ်ဆူၣ်အိၣ်ချ့ ကဂ့ၤထီဘိ ဒီးနကဆဲး ဘီၣ်ထီၣ်ညီထီၣ်လၢ တၢ်ခဲလၢာ်အပူၤ ဒ်နဘီၣ်ထီၣ်ညီထီၣ်လၢ ဆၢကတီၢ်ခဲအံၤ အသိးလီၤ.
၃ ဖဲဒီပုၢ်ဝဲၢ်ခွါတဖၣ် ဟဲအုၣ်အသးလၢ နသးတီဒီး တၢ်မ့ၢ်တၢ်တီအခါ ယသးခုဒိၣ်မး ဒီးနဆဲးလဲၤတၢ်လၢ တၢ်မ့ၢ်တၢ်တီအပူၤအဃိ ယသးခုလီၤ.+
၄ ဖဲယနၢ်ဟူလၢ ယဖိတဖၣ် ဆဲးလဲၤတၢ်လၢ တၢ်မ့ၢ်တၢ်တီ အပူၤအခါ တၢ်သးခုလၢ အဒိၣ်န့ၢ်အန့ၣ်လၢယဂီၢ် တအိၣ်နီတမံၤဘၣ်.+
၅ ဒီပုၢ်ဝဲၢ်သးဘိဧၢ, ဒီပုၢ်ဝဲၢ်တဖၣ် မ့မ့ၢ်ပှၤလၢ နတသ့ၣ်ညါအီၤဘၣ် သနာ်က့ နပာ်ဖျါထီၣ် နတၢ်သးတီ ခီဖျိလၢ နမၤစၢၤအဝဲသ့ၣ် အဃိလီၤ.+
၆ ဘၣ်ဃးဒီး နတၢ်အဲၣ်အဂ့ၢ်န့ၣ် အဝဲသ့ၣ် အုၣ်အသးလၢ တၢ်အိၣ်ဖှိၣ်အမဲာ်ညါလီၤ. ဖဲအဝဲသ့ၣ်က့ၤအခါ ဝံသးစူၤ မၤစၢၤအဝဲသ့ၣ် ဒ်ကစၢ်ယွၤ အတၢ်ဘၣ်သး အိၣ်ဝဲအသိးန့ၣ်တက့ၢ်.+
၇ အဝဲသ့ၣ်ဟးလၢ ကစၢ်ယွၤ အမံၤအဂီၢ်ဒီး တဟံးန့ၢ် တၢ်မၤစၢၤလၢ+ ပှၤကလုာ်တဖၣ်အအိၣ် နီတမံၤဘၣ်.
၈ အဃိ ပအိၣ်ဒီးမူဒါလၢ ပကဆီၣ်ထွဲမၤစၢၤ ပှၤဒ်န့ၣ်တဖၣ်+ ဒ်သိး ပကကဲထီၣ် ပှၤမၤသကိးတၢ်ဒီး အဝဲသ့ၣ်လၢ တၢ်မ့ၢ်တၢ်တီအပူၤအဂီၢ်လီၤ.+
၉ ယကွဲးလံာ်ပရၢတဘ့ၣ်လၢ တၢ်အိၣ်ဖှိၣ်အအိၣ် ဘၣ်ဆၣ် စီၤဒံအိၤတြ့ၤဖံ လၢအအဲၣ်ဒိးကဲ နီၣ်ဂံၢ်တၢလၢ အဝဲသ့ၣ်အကျါန့ၣ်+ တတူၢ်လိာ် တၢ်လၢပတဲတဖၣ် လၢတၢ်ယူးယီၣ်ပာ်ကဲအပူၤ နီတမံၤဘၣ်.+
၁၀ အဃိ ယမ့ၢ်လဲၤလၢသုအိၣ်န့ၣ် ယကသ့ၣ်နီၣ်ထီၣ်တၢ်လၢ အဝဲမၤဝဲတဖၣ် လၢအပၣ်ဃုာ်ဒီး တၢ်ဟးတဲဟးဂီၤ ပဂ့ၢ်လီၤ.+ ဒီးအဝဲမၤဝဲထဲန့ၣ်လံ သနာ်က့ အသးတမံဒံးဘၣ်. အဝဲတသးအိၣ် တူၢ်လိာ်ခီၣ်ဆၢစ့ၢ်ကီး ဒီပုၢ်ဝဲၢ်ခွါတဖၣ်လၢ+ တၢ်ပာ်ကဲအပူၤဘၣ်. ဒီးပှၤလၢအအဲၣ်ဒိး တူၢ်လိာ်အဝဲသ့ၣ်န့ၣ် အဝဲဂုာ်ကျဲးစၢးတြီဝဲ တကးဒံးဘၣ် ဂုာ်ကျဲးစၢး နီဟးထီၣ်ကွံာ် အဝဲသ့ၣ်လၢ တၢ်အိၣ်ဖှိၣ်အပူၤလီၤ.
၁၁ ဒီပုၢ်ဝဲၢ်သးဘိဧၢ, တဘၣ်ကွၢ်လိမၤဒိး ပှၤလၢအမၤတၢ်အၢတဂ့ၤ. ကွၢ်လိမၤဒိး ပှၤလၢအမၤတၢ်ဂ့ၤတက့ၢ်.+ ပှၤလၢအမၤတၢ်ဂ့ၤန့ၣ် ဘၣ်ဃးဒီး ကစၢ်ယွၤလီၤ.+ မ့မ့ၢ် ပှၤလၢအမၤတၢ်အၢန့ၣ် တသ့ၣ်ညါထီၣ် ကစၢ်ယွၤဘၣ်.+
၁၂ ဒီပုၢ်ဝဲၢ်ခဲလၢာ် အုၣ်အသးလၢ စီၤဒ့ၤမ့ၤတြံ အတၢ်ဂ့ၤတၢ်ဝါအဂ့ၢ် ဒီးတၢ်မ့ၢ်တၢ်တီ ပာ်ဂၢၢ်ပာ်ကျၢၤ တၢ်ဂ့ၢ်အဝဲအံၤလီၤ. ဒီးပဝဲစ့ၢ်ကီး ပအုၣ်ပသးလၢအဂ့ၢ် ဒီးသုသ့ၣ်ညါလၢ ပတၢ်အုၣ်အသးန့ၣ် မ့ၢ်တၢ်မ့ၢ်တၢ်တီလီၤ.
၁၃ ယဘၣ်တဲနၤ တၢ်ဂ့ၢ်အိၣ်ဒံးဒီဒူၣ်ဒံး. ဘၣ်ဆၣ် ယတအဲၣ်ဒိး ဆဲးကွဲးန့ၢ်နၤလၢ ထိၣ်ဒံးဘိ ဒီးကသံၣ်ထံဘၣ်.
၁၄ ဒီးယမုၢ်လၢ်လၢ တယံာ်လၢၤဘၣ်န့ၣ် ယကထံၣ်ဘၣ်နၤ ဒီးပကတဲတၢ်လၢ မဲာ်သကိးမဲာ်လီၤ.
မ်နအိၣ်ဒီး တၢ်မုာ်တၢ်ခုၣ်တက့ၢ်.
ဒီပုၢ်ဝဲၢ်တဖၣ် ဆၢဂ့ၤဆၢဝါနၤလီၤ. ဆၢဂ့ၤဆၢဝါန့ၢ်ယၤ ဒီပုၢ်ဝဲၢ်ဖဲန့ၣ်တဖၣ် တဂၤစုာ်စုာ်တက့ၢ်.
