၂ ၡမူၤအ့လး ၉:၁-၁၃
-
စီၤဒၤဝံး အတၢ်အဲၣ်လၢအတီ လၢစီၤမဖံဘိၤၡ့း အဖီခိၣ် (၁-၁၃)
၉ ဒီးစီၤဒၤဝံး တဲဝဲ “လၢစီၤစီလူး အဟံၣ်ဖိဃီဖိအကျါ ပှၤလၢယကပာ်ဖျါထီၣ် တၢ်အဲၣ်လၢအတီ လၢအဖီခိၣ် ခီဖျိလၢ စီၤယိနၤသၣ်အဃိန့ၣ် မ့ၢ်အအိၣ်တဂၤဂၤဒံးဧါ.”+
၂ ဒီးစီၤစီလူး အဟံၣ်ဖိဃီဖိ အခ့အပှၤလၢအမံၤမ့ၢ် စီၤစံဘၤ အိၣ်ဝဲတဂၤလီၤ.+ အဃိ ပှၤလဲၤကိးအီၤလၢ စီၤပၤဒၤဝံး အအိၣ် ဒီးစီၤပၤ သံကွၢ်အီၤလၢ “နကဲ စီၤစံဘၤဧါ.” အဝဲတဲဆၢက့ၤဝဲလၢ “မ့ၢ် ကစၢ်ဧၢ, ယကဲ စီၤစံဘၤလီၤ.”
၃ စီၤပၤသံကွၢ်အီၤလၢ “လၢစီၤစီလူး အဟံၣ်ဖိဃီဖိအကျါ ပှၤလၢ ယကပာ်ဖျါထီၣ် ကစၢ်ယွၤ အတၢ်အဲၣ်လၢအတီ လၢအဖီခိၣ်န့ၣ် မ့ၢ်အအိၣ်ဒံးတဂၤဂၤဧါ.” စီၤစံဘၤ တဲဆၢစီၤပၤလၢ “စီၤယိနၤသၣ် အဖိခွါ အိၣ်ဒံးဝဲတဂၤ သနာ်က့ အခီၣ်* တဂ့ၤဘၣ် ခံခီလၢာ်လီၤ.”+
၄ ဒီးစီၤပၤ သံကွၢ်စီၤစံဘၤလၢ “အဝဲအိၣ်ဖဲလဲၣ်.” စီၤစံဘၤ တဲဆၢက့ၤ စီၤပၤလၢ “အဝဲအိၣ်လၢ လိဒဘၢ် လၢစီၤဧးမံၤအ့လး အဖိခွါ စီၤမၤကံၢ် အဟံၣ်လီၤ.”+
၅ တဘျီဃီန့ၣ် စီၤပၤဒၤဝံး မၢပှၤလဲၤကိးန့ၢ်အီၤလၢ လိဒဘၢ် လၢစီၤဧးမံၤအ့လး အဖိခွါ စီၤမၤကံၢ် အဟံၣ်န့ၣ်လီၤ.
၆ ဖဲစီၤယိနၤသၣ် အဖိခွါ စီၤမဖံဘိၤၡ့း လၢအမ့ၢ် စီၤစီလူး အလံၤခွါန့ၣ် ဟဲတုၤလၢ စီၤဒၤဝံး အအိၣ်အခါ တဘျီဃီန့ၣ် အဝဲထိၣ်လီၤပှီၤအသးလီၤ. ဒီးစီၤဒၤဝံး တဲဝဲလၢ “စီၤမဖံဘိၤၡ့းဧၢ.” ဒီးစီၤမဖံဘိၤၡ့း တဲဆၢဝဲလၢ “မ့ၢ်ကစၢ်ဧၢ.”
၇ စီၤဒၤဝံး တဲအီၤလၢ “တဘၣ်ပျံၤတၢ်တဂ့ၤ, ခီဖျိလၢနပၢ် စီၤယိနၤသၣ်အဃိ ယကပာ်ဖျါထီၣ် တၢ်အဲၣ်လၢအတီ+ လၢနဖီခိၣ် သပှၢ်တၢၢ်လီၤ. ဒီးယကဟ့ၣ်က့ၤနၤ နဖု စီၤစီလူး အတၢ်လီၢ်တၢ်ကျဲခဲလၢာ် ဒီးနကအီၣ်တၢ်လၢ ယစီၢ်နီၤခိၣ် ထီဘိလီၤ.”+
၈ ဒီးအဝဲ ထိၣ်လီၤပှီၤအသး ဒီးတဲဝဲလၢ “ကစၢ်ဧၢ, ယတမ့ၢ်တၢ်နီတမံၤဘၣ်. ဘၣ်မနုၤအဃိ နသူၣ်အိၣ်သးအိၣ် ထွံၣ်လၢအသံတဒု+ ဒ်သိးဒီးယၤလဲၣ်.”
၉ စီၤပၤ မၢပှၤလဲၤကိးန့ၢ်ဝဲ စီၤစီလူး အခ့အပှၤ စီၤစံဘၤ ဒီးတဲအီၤလၢ “တၢ်ခဲလၢာ်လၢ အကဲ စီၤစီလူး ဒီးအဟံၣ်ဖိဃီဖိတဖၣ် အတၢ်န့ၣ် ယဟ့ၣ်လီၤအီၤလၢ နကစၢ် စီၤစီလူး အလံၤခွါလီၤ.+
၁၀ နၤ, နဖိခွါတဖၣ် ဒီးနခ့နပှၤတဖၣ် သူၣ်အီၣ်ဖျးအီၣ်တၢ်လၢ နကစၢ်အလံၤခွါအဂီၢ် ဒီးနကထၢဖှိၣ် တၢ်လၢအမဲထီၣ်သၣ်ထီၣ်တဖၣ် ဒ်သိးနကဟ့ၣ်လီၤတၢ်အီၣ်လၢ အဟံၣ်ဖိဃီဖိအဂီၢ်လီၤ. မ့မ့ၢ် နကစၢ်အလံၤခွါ စီၤမဖံဘိၤၡ့း အနီၢ်ကစၢ်န့ၣ် ကအီၣ်တၢ်လၢ ယစီၢ်နီၤခိၣ် ထီဘိလီၤ.”+
စီၤစံဘၤ အဖိခွါ အိၣ်ဝဲ ၁၅ ဂၤ ဒီးအခ့အပှၤ အိၣ်ဝဲ အဂၤ ၂၀ လီၤ.+
၁၁ ဒီးစီၤစံဘၤ တဲစီၤပၤလၢ “ကစၢ်စီၤပၤဧၢ, ယကမၤဒ် နမၤလိာ်ယၤအသိး ခဲလၢာ်လီၤ.” ဒီးစီၤမဖံဘိၤၡ့း အီၣ်တၢ်လၢ စီၤဒၤဝံး အစီၢ်နီၤခိၣ် ဒ်စီၤပၤအဖိခွါတဂၤအသိးလီၤ.
၁၂ ဒီးစီၤမဖံဘိၤၡ့း အိၣ်ဒီး အဖိခွါသးစၢ်တဂၤလၢ အမံၤမ့ၢ် စီၤမံၤကးလီၤ.+ ဒီးပှၤလၢ အအိၣ်လၢ စီၤစံဘၤ အဟံၣ် ကိးဂၤဒဲးန့ၣ် ကဲထီၣ်ဝဲ စီၤမဖံဘိၤၡ့း အခ့အပှၤတဖၣ်လီၤ.
၁၃ စီၤမဖံဘိၤၡ့းန့ၣ် အခီၣ်တဂ့ၤဘၣ် ခံခီလၢာ်လီၤ.+ ဒီးစီၤမဖံဘိၤၡ့းန့ၣ် အီၣ်တၢ်လၢ စီၤပၤ အစီၢ်နီၤခိၣ် ထီဘိအဃိ+ အိၣ်ဘၣ်ဝဲလၢ ဝ့ၢ်ယရူၤၡလ့ၣ်အပူၤလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အခီၣ်လၣ်.”
