၂ စီၤပၤ ၆:၁-၃၃
၆ ဝံအဖိခွါတဖၣ်+ တဲဘၣ် စီၤအလံၤၡါလၢ “တၢ်လီၢ်လၢ ပအိၣ်ဒီးနၤ ဖဲအံၤန့ၣ် အအံၣ်တလၢ လၢပဂီၢ်လီၤ.
၂ ဝံသးစူၤ ပျဲပလဲၤလၢ ထံကျိယၢ်ဒ့ၣ် ဒီးဟံးန့ၢ်သ့ၣ်ဖဲန့ၣ် တဂၤတဖူ ဒီးတ့ထီၣ်တၢ်လီၢ်လၢ ပကအိၣ်အဂီၢ်ဖဲန့ၣ်မီၤ.” ဒီးစီၤအလံၤၡါ တဲဝဲလၢ “လဲၤသၢၤ.”
၃ ဒီးပှၤလၢအဝဲသ့ၣ်အကျါတဂၤ တဲဝဲလၢ “ကစၢ်ဧၢ, ဝံသးစူၤ လဲၤဒီးပှၤမီၤ.” ဒီးစီၤအလံၤၡါတဲဝဲလၢ “ယကလဲၤ.”
၄ အဃိ စီၤအလံၤၡါ လဲၤပိာ်အဝဲသ့ၣ်အခံ ဒီးဖဲအဝဲသ့ၣ်လဲၤတုၤလၢ ထံကျိယၢ်ဒ့ၣ်အခါ အဝဲသ့ၣ် ကူာ်လီၤဝဲသ့ၣ်တဖၣ်လီၤ.
၅ ဖဲပှၤလၢ အဝဲသ့ၣ်အကျါတဂၤ ကူာ်လီၤသ့ၣ်တထူၣ်အခါ အကွါကနၣ် လဲၤဖျိးလၢ ထံကျါလီၤ. အဝဲတဲစီၤအလံၤၡါလၢ အကလုၢ်ဖးဒိၣ်လၢ “အၣ်လါ ကစၢ်ဧၢ, ကွါတဘ့ၣ်အံၤ ယဃ့ဆိပှၤတၢ်လီၤ.”
၆ ယွၤလၢအမ့ၢ်အတီ အပှၤတဂၤ သံကွၢ်အီၤလၢ “အလီၤတဲာ်ဖဲလဲၣ်.” ဒီးပှၤတဂၤန့ၣ် ဒုးနဲၣ်အီၤအလီၢ် ဒီးယွၤလၢ အမ့ၢ်အတီ အပှၤတဂၤန့ၣ် ကျီတဲာ် သ့ၣ်တကူာ်ဒီး ကွံာ်လီၤဝဲဖဲန့ၣ် ဒီးဒုးထီၣ်ဖီက့ၤ ကွါကနၣ်လီၤ.
၇ ဒီးအဝဲတဲဝဲလၢ “ထုးထီၣ်ကွံာ်အီၤတက့ၢ်.” အဃိ ပှၤတဂၤန့ၣ် ယူာ်ဃီၤအစုဒီး ထုးထီၣ်ကွံာ်ဝဲလီၤ.
၈ ဒီးကီၢ်စူၤရံ အစီၤပၤ လဲၤဒုး ပှၤအံၣ်စရ့လးဖိလီၤ.+ အဝဲတၢၣ်ပီၣ်သကိးဒီး အခ့အပှၤတဖၣ် ဒီးတဲအဝဲသ့ၣ်လၢ အဝဲသ့ၣ် ကဘၣ်လဲၤဆီလီၤအသးဒီးအီၤ လၢတၢ်လီၢ်ဖဲလဲၣ်န့ၣ်လီၤ.
၉ ဒီးယွၤလၢ အမ့ၢ်အတီ+ အပှၤတဂၤ ဆှၢလီၤတၢ်ကစီၣ်လၢ အံၣ်စရ့လး အစီၤပၤ အအိၣ်လၢ “မ့ၢ်လၢ ပှၤစူၤရံဖိတဖၣ် ဟဲလီၤဖဲအံၤအဃိ တဘၣ်ဟဲခီဃီၤတၢ် ဖဲန့ၣ်တဂ့ၤ.”
၁၀ အဃိ အံၣ်စရ့လး အစီၤပၤ ဆှၢလီၤတၢ်ကစီၣ်လၢ ပှၤလၢအအိၣ်လၢ တၢ်လီၢ်ဖဲ ယွၤလၢအမ့ၢ်အတီ အပှၤတဂၤ ဟ့ၣ်ပလီၢ်အီၤ အလီၢ်န့ၣ်လီၤ. ဒီးစီၤအလံၤၡါ ဆဲးဟ့ၣ်ပလီၢ် စီၤပၤ ဒီးစီၤပၤ ဟးဆှဲးတၢ်လီၢ်ဖဲန့ၣ် တဘျုးဘျီလီၤ.*+
၁၁ ဒီးကီၢ်စူၤရံအစီၤပၤ သးပှံၢ်ထီၣ်တၢ်ဒိၣ်မးအဃိ အဝဲကိးဖှိၣ်အခ့အပှၤတဖၣ် ဒီးတဲအဝဲသ့ၣ်လၢ “လၢပကျါအံၤ မတဂၤ အိၣ်ဃူ အံၣ်စရ့လးအစီၤပၤ တဂၤလဲၣ်. တဲဘၣ်ယၤတထံၣ်.”
၁၂ ဒီးလၢအခ့အပှၤအကျါတဂၤ တဲဝဲလၢ “ယကစၢ်စီၤပၤဧၢ, ပတအိၣ်ဃူအီၤ နီတဂၤဘၣ်. ပှၤလၢ အတဲဘၣ်အံၣ်စရ့လးအစီၤပၤ တၢ်လၢနတဲလၢ နဒၢးကိပူၤန့ၣ် မ့ၢ်ဝဲဝံအလံၤၡါလၢ အအိၣ်လၢ ကီၢ်အံၣ်စရ့လး အပူၤန့ၣ်လီၤ.”+
၁၃ ဒီးစီၤပၤတဲဝဲလၢ “အအိၣ်ဖဲလဲၣ်. လဲၤဃုတထံၣ်. ယကမၢပှၤပိာ်ခွါတဖၣ် လဲၤဖီၣ်န့ၢ်အီၤ.” လၢခံပှၤတဲဘၣ်အီၤလၢ “စီၤအလံၤၡါ အိၣ်လၢ ဝ့ၢ်ဒိၤသၣ်လီၤ.”+
၁၄ တဘျီဃီန့ၣ်စီၤပၤဆှၢလီၤဝဲ အသုးမုၢ်ဖးဒိၣ်တဖု ဃုာ်ဒီးကသ့ၣ်တဖၣ် ဒီးလ့ၣ်ကဟၣ်သုးတဖၣ်လီၤ. အဝဲသ့ၣ်ဟဲလၢ မုၢ်နၤခီဒီး ကဝီၤဃာ်ဝဲဝ့ၢ်လီၤ.
၁၅ ဖဲစီၤအလံၤၡါ အပှၤမၤစၢၤတၢ်တဂၤ ဂဲၤဆၢထၢၣ်ဂီၤဂီၤ ဒီးလဲၤလၢ တၢ်ချၢအခါ အဝဲထံၣ်ဝဲလၢ သုးမုၢ်တဖုလၢ အအိၣ်ဒီးကသ့ၣ်တဖၣ် ဒီးလ့ၣ်ကဟၣ်သုးတဖၣ်န့ၣ် ကဝီၤဃာ်ဝဲဝ့ၢ်လီၤ. ဒီးပှၤမၤစၢၤတၢ်တဂၤန့ၣ် တဲဘၣ်အီၤတဘျီဃီလၢ “အၣ်လါ ကစၢ်ဧၢ, ပကဘၣ်မၤဒ်လဲၣ်.”
၁၆ ဘၣ်ဆၣ် စီၤအလံၤၡါတဲဝဲလၢ “ပှၤလၢအအိၣ်ဒီးပှၤန့ၣ် အိၣ်အါန့ၢ်ဒံး ပှၤလၢအိၣ်ဒီးအဝဲသ့ၣ်လီၤ.+ အဃိ တဘၣ်ပျံၤတၢ်တဂ့ၤ.”+
၁၇ ဒီးစီၤအလံၤၡါ ဃ့ထုကဖၣ်လၢ “အိ ယဟိဝၤယွၤဧၢ, ဝံသးစူၤအိးထီၣ် အမဲာ်ချံ ဒ်သိးအကထံၣ်ဝဲန့ၣ်တက့ၢ်.”+ ဒီးယဟိဝၤယွၤ အိးထီၣ်ဝဲ ပှၤမၤစၢၤတၢ်န့ၣ် အမဲာ်ချံတဘျီဃီလီၤ. ဒီးအဝဲထံၣ်ဘၣ်ဝဲလၢ လၢကစၢၢ်ကလိကျါန့ၣ် အိၣ်ပှဲၤဝဲဒီး ကသ့ၣ်တဖၣ် ဒီးလ့ၣ်ကဟၣ်သုးလၢ အကပီၤဒ် မ့ၣ်အူ+ အိၣ်ဝးတရံး အဝဲသ့ၣ်လီၤ.+
၁၈ ဖဲပှၤစူၤရံဖိ ဟဲလီၤအခါ စီၤအလံၤၡါ ဃ့ထုကဖၣ်လၢ ယဟိဝၤယွၤအအိၣ် ဒီးဃ့အီၤလၢ “ဝံသးစူၤ မၤဒ်သိး ပှၤတကလုာ်အံၤ အမဲာ်သုတထံၣ်တၢ်လၢၤတဂ့ၤ အဂီၢ်တက့ၢ်.”+ အဃိ ကစၢ်ယွၤ မၤဝဲဒ် စီၤအလံၤၡါ ဃ့ဝဲအသိး ဒီးမၤဝဲဒ်သိး အဝဲသ့ၣ်အမဲာ် သုတထံၣ်တၢ်လၢၤတဂ့ၤ အဂီၢ်လီၤ.*
၁၉ ဒီးစီၤအလံၤၡါ တဲအဝဲသ့ၣ်လၢ “သုကျဲကမၣ်လံ. ဝ့ၢ်တဖျၢၣ်အံၤ တမ့ၢ်ဝ့ၢ်လၢ သုအဲၣ်ဒိးလဲၤဘၣ်. လဲၤပိာ်ယခံ ဒီးယကလဲၤဆှၢသုလၢ ပှၤတဂၤလၢ သုဃုအီၤအအိၣ်လီၤ.” ဘၣ်ဆၣ် အဝဲလဲၤဆှၢ အဝဲသ့ၣ်လၢ ဝ့ၢ်ၡၤမရံလီၤ.+
၂၀ ဖဲအဝဲသ့ၣ် လဲၤတုၤလၢ ဝ့ၢ်ၡၤမရံအပူၤအခါ စီၤအလံၤၡါ တဲဝဲလၢ “အိ ယဟိဝၤယွၤဧၢ, အိးထီၣ် အဝဲသ့ၣ်အမဲာ်ချံ ဒ်သိး အဝဲသ့ၣ် ကထံၣ်တၢ်တက့ၢ်.” အဃိ ယဟိဝၤယွၤ အိးထီၣ် အဝဲသ့ၣ်အမဲာ်ချံ ဒီးအဝဲသ့ၣ် ထံၣ်ဝဲလၢ အဝဲသ့ၣ်အိၣ်လၢ ဝ့ၢ်ၡၤမရံအပူၤလီၤ.
၂၁ ဖဲအံၣ်စရ့လး အစီၤပၤ ထံၣ်အဝဲသ့ၣ်အခါ အဝဲတဲဘၣ် စီၤအလံၤၡါလၢ “ပၢ်ဧၢ, မ့ၢ်ယကဘၣ် ကျီသံကွံာ် အဝဲသ့ၣ်ဧါ.”
၂၂ ဘၣ်ဆၣ် စီၤအလံၤၡါ တဲဝဲလၢ “တဘၣ် ကျီသံကွံာ် အဝဲသ့ၣ်တဂ့ၤ. ပှၤလၢနဖီၣ်န့ၢ်အီၤတဖၣ်န့ၣ် မ့ၢ်နကမၤသံကွံာ် အဝဲသ့ၣ်လၢ နနးဒီးနချံၣ်ဧါ. ဟ့ၣ်လီၤအဝဲသ့ၣ်လၢ ကိၣ်ဒီးထံ ဒ်သိးအဝဲသ့ၣ် ကအီၣ်ကအီဝဲ+ ဒီးက့ၤကဒါက့ၤလၢ အဝဲသ့ၣ် အကစၢ်အအိၣ်အဂီၢ်တက့ၢ်.”
၂၃ အဃိ အံၣ်စရ့လးအစီၤပၤ မၤဝဲ တၢ်အီၣ်တၢ်အီ အမူးဖးဒိၣ်လၢ အဝဲသ့ၣ်အဂီၢ် ဒီးအဝဲသ့ၣ် အီၣ်တၢ်အီတၢ်လီၤ. ဝံၤဒီးအဝဲပျဲက့ၤ အဝဲသ့ၣ်လၢ အဝဲသ့ၣ် အကစၢ်အအိၣ်လီၤ. ဒီးစူၤရံ အသုးဖိအဒူၣ်တဖၣ်+ တဟဲလၢ ကီၢ်အံၣ်စရ့လးအပူၤ နီတဘျီလၢၤဘၣ်.
၂၄ လၢခံန့ၣ် ကီၢ်စူၤရံအစီၤပၤဘ့ၣ်ဟဒး ပာ်ဖှိၣ်ထီၣ် အသုးမုၢ်ခဲလၢာ် ဒီးလဲၤထီၣ်ကဝီၤဝဲ ဝ့ၢ်ၡၤမရံလီၤ.+
၂၅ အဃိ တၢ်သၣ်ဝံၤလီၤဒိ+ အိၣ်ထီၣ်လၢ ဝ့ၢ်ၡၤမရံအပူၤ နးမး ဒီးအဝဲသ့ၣ် ဆဲးကဝီၤဃာ်ဝ့ၢ် တုၤလၢ ကသ့ၣ်ယီၤ အခိၣ်သၣ်ဃံတဖျၢၣ်+ အပှ့ၤအိၣ်ဝဲ စ့ညၣ်အဘ့ၣ် ၈၀ ဒီးထိၣ်လွံၢ်အအ့ၣ် ခံစှီၤန့ၣ်* အပှ့ၤအိၣ်ဝဲ စ့ညၣ် ၅ ဘ့ၣ်လီၤ.
၂၆ ဖဲအံၣ်စရ့လး အစီၤပၤ ဟးလၢဝ့ၢ်ခိၣ်ဒူ အလိၤအခါ ပိာ်မုၣ်တဂၤ တဲအီၤလၢ အကလုၢ်ဖးဒိၣ်လၢ “ကစၢ်စီၤပၤဧၢ, မၤစၢၤပှၤမီၤ.”
၂၇ ဒီးစီၤပၤတဲဝဲလၢ “ယဟိဝၤယွၤ မ့ၢ်တမၤစၢၤနၤဘၣ်န့ၣ် ယကဘၣ်လဲၤဃ့န့ၢ်နၤ တၢ်မၤစၢၤဖဲလဲၣ်. ယကဘၣ်လဲၤဃ့လၢ ကြဲၢ်ပူၤဧါ, လၢစပံးထံအကျီးပူၤဧါ မ့တမ့ၢ် လၢသိအကျီးပူၤဧါ.”
၂၈ စီၤပၤ သံကွၢ်အီၤလၢ “မ့ၢ်နဘၣ်မနုၤလဲၣ်.” ပိာ်မုၣ်န့ၣ် တဲဆၢဝဲလၢ “တၢ်ပိာ်မုၣ်တဂၤအံၤ တဲယၤလၢ ‘တနံၤအံၤ ဟ့ၣ်လီၤယၤနဖိခွါ ဒီးပကအီၣ်အီၤ ဒီးခဲမုၢ်ဆ့ၣ်န့ၣ် ပကအီၣ်ယဖိခွါလီၤ.’+
၂၉ အဃိ ပချီထီၣ် ယဖိခွါဒီး အီၣ်အီၤလီၤ.+ လၢခံတနံၤန့ၣ် ယတဲအီၤလၢ ‘ဟ့ၣ်လီၤယၤနဖိခွါ ဒီးပကအီၣ်အီၤလီၤ.’ ဘၣ်ဆၣ် အဝဲပာ်ခူသူၣ် အဖိခွါလီၤ.”
၃၀ ဖဲစီၤပၤနၢ်ဟူဝဲလၢ ပိာ်မုၣ်တဲဝဲဒ်န့ၣ်အခါ အဝဲဖှီညာ်လီၤအဆ့ကၤလီၤ.+ ဖဲအဝဲဟးလၢ ဝ့ၢ်ခိၣ်ဒူ အလိၤအခါ ပှၤဂီၢ်မုၢ်တဖၣ် ထံၣ်ဝဲလၢ အကၤဒီး ထၢၣ်တၢ်ကံးညာ်လၢ အဆ့အဖီလာ်လီၤ.
၃၁ အဝဲတဲဝဲလၢ “တနံၤအံၤ စီၤၡၤဖးအဖိခွါ စီၤအလံၤၡါ အခိၣ်သၣ်ဃံ မ့ၢ်ဆဲးအိၣ်ဒံးလၢ အနီၢ်ကစၢ်အလိၤဒံးန့ၣ် မ်ကစၢ်ယွၤ သိၣ်ဃီၣ်ယၤ ဆူၣ်ဆူၣ်တက့ၢ်.”+
၃၂ ဒီးစီၤပၤဆှၢလီၤ ပှၤစိာ်တၢ်ကစီၣ်ဖိတဂၤလၢ အကလဲၤဆိလၢ အမဲာ်ညါလီၤ. ဖဲန့ၣ်အခါ စီၤအလံၤၡါ ဆ့ၣ်နီၤလၢ အဟံၣ်ပူၤ ဒီးပှၤသူၣ်က့သးပှၢ်တဖၣ် ဆ့ၣ်နီၤဒီးအီၤဖဲန့ၣ်လီၤ. တချုးလၢ ပှၤစိာ်တၢ်ကစီၣ်ဖိတဂၤ လဲၤတုၤဒံးဘၣ်န့ၣ် စီၤအလံၤၡါ တဲဘၣ်ပှၤသူၣ်က့သးပှၢ်တဖၣ်လၢ “ပှၤမၤသံတၢ်ကစၢ်တဂၤ အဖိခွါ+ ဆှၢလီၤပှၤလၢ ကဒီၣ်တဲာ်ကွံာ် ယခိၣ်သၣ်ဃံန့ၣ် မ့ၢ်သုသ့ၣ်ညါဧါ. ပှၤစိာ်တၢ်ကစီၣ်ဖိတဂၤ ဟဲမ့ၢ်တုၤန့ၣ် ပံးပဲတြီ ဒီးဆီၣ်တံၢ်ပဲတြီ ဒ်သိးအဟဲနုာ်သု တန့ၢ်တဂ့ၤအဂီၢ်တက့ၢ်. အကစၢ်စီၤပၤ ဟးသီၣ်လၢ အဝဲဒၣ်အလီၢ်ခံန့ၣ် သုတနၢ်ဟူဧီၤ.”
၃၃ ဖဲစီၤအလံၤၡါ တဲဒံးတၢ်ဒီး အဝဲသ့ၣ် အခါ ပှၤစိာ်တၢ်ကစီၣ်ဖိတဂၤ ဟဲတုၤလၢအအိၣ်လီၤ. ဝံၤဒီးစီၤပၤ ဟဲတဲဝဲလၢ “တၢ်နးတၢ်ဖှီၣ်တခါအံၤ ဟဲလၢ ယဟိဝၤယွၤ အအိၣ်လီၤ. အဃိ ဘၣ်မနုၤလၢ ယကြၢးဆဲးအိၣ်ခိးဒံး ယဟိဝၤယွၤ အတၢ်မၤစၢၤလဲၣ်.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “အါန့ၢ်ဒံး တဘျီခံဘျီ.”
^ ဘၣ်သ့ၣ်သ့ၣ် တအဲၣ်ဒိးတဲဝဲ ယွၤမၤဘျီၣ် အဝဲသ့ၣ်အမဲာ်ချံ နီၢ်ကီၢ်ဘၣ်. ဘၣ်သ့ၣ်သ့ၣ် ယွၤမၤခံး အဝဲသ့ၣ်အသးအဃိ အဝဲသ့ၣ် တသ့ၣ်ညါလီၤအသးလၢၤဘၣ်.
^ အခီပညီလိၤလိၤ “တကာ်လွံၢ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
