၂ စီၤပၤ ၁၅:၁-၃၈
၁၅ ဖဲအံၣ်စရ့လး အစီၤပၤယၤရၤဘၣ်* ပၢတၢ် ၂၇ နံၣ်တနံၣ်န့ၣ် ယူဒၤအစီၤပၤအမၤစယါ+ အဖိခွါ စီၤဧစၤရယၤ*+ ကဲထီၣ်စီၤပၤလီၤ.+
၂ ဖဲစီၤဧစၤရယၤ ကဲထီၣ် စီၤပၤအခါ အသးနံၣ်အိၣ်ဝဲ ၁၆ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၅၂ နံၣ်လီၤ. အမိၢ်မ့ၢ်ဝဲ နီၢ်ယကိးလယၤ လၢအအိၣ်လၢ ဝ့ၢ်ယရူၤၡလ့ၣ်န့ၣ်လီၤ.
၃ စီၤဧစၤရယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒ်အပၢ် စီၤအမၤစယါ မၤတ့ၢ်ဝဲအသိးလီၤ.+
၄ ဘၣ်ဆၣ် တၢ်လီၢ်ထီၣ်ထီတဖၣ် အိၣ်ဒံးဝဲလီၤ.+ ဒီးပှၤဂီၢ်မုၢ် ဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ် အဖီခိၣ်လီၤ.+
၅ ဒီးမ့ၢ်လၢ ယဟိဝၤယွၤ တီၢ်စီၤပၤအဃိ အဝဲဆဲးကဲဝဲ ပှၤဘၣ်တၢ်ဆါအၢ+ တုၤလၢအသံတစုလီၤ. အဝဲအိၣ်လၢ ဟံၣ်လီၤလီၤဆီဆီ တဖျၢၣ်အပူၤ+ ဒီးအဖိခွါ စီၤယိၤသၣ်+ တီခိၣ်ရိၤမဲတၢ်လၢ နီပူၤ ဒီးစံၣ်ညီၣ်န့ၢ်တၢ်လၢ ပှၤအိၣ်လၢ ကီၢ်ပူၤတဖၣ် အဂီၢ်လီၤ.+
၆ မ့မ့ၢ် စီၤဧစၤရယၤ+ အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၇ ဒီးစီၤဧစၤရယၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဒီးပှၤခူၣ်လီၤကွံာ်အီၤဒီး အမိၢ်ပၢ်ဖံဖု လၢပျၢၤတဖၣ် လၢစီၤဒၤဝံး အဝ့ၢ်ပူၤလီၤ. ဒီးအဖိခွါ စီၤယိၤသၣ် ကဲထီၣ်စီၤပၤလၢအလီၢ်လီၤ.
၈ ဖဲယူဒၤ အစီၤပၤဧစၤရယၤ+ ပၢတၢ် ၃၈ နံၣ်တနံၣ်န့ၣ် စီၤယၤရၤဘၣ် အဖိခွါ စီၤစကၤရယၤ+ ကဲထီၣ်စီၤပၤလၢ အံၣ်စရ့လးအဖီခိၣ် လၢဝ့ၢ်ၡၤမရံ အပူၤလီၤ. ဒီးအဝဲ ပၢဘၣ်တၢ်ဃုလါလီၤ.
၉ စီၤစကၤရယၤ မၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်အမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲအသိးလီၤ. အဝဲတပာ်တ့ၢ်ကွံာ် တၢ်ဒဲးဘးလၢ စီၤနဘးအဖိခွါ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိ လၢကမၤဝဲန့ၣ်ဘၣ်.+
၁၀ လၢခံ စီၤယၤဘ့ၣ်အဖိခွါ စီၤၡၤလူၣ် ကူၣ်အၢ စီၤစကၤရယၤ ဒီးမၤသံကွံာ်အီၤလၢ+ ဝ့ၢ်ယံးဘျၣ်န့ၣ်လီၤ.+ ဖဲစီၤၡၤလူၣ် မၤသံ စီၤစကၤရယၤ ဝံၤအလီၢ်ခံ အဝဲထီၣ်က့ၤ စီၤပၤလၢ စီၤစကၤရယၤ အလီၢ်လီၤ.
၁၁ မ့မ့ၢ် စီၤစကၤရယၤ အဂ့ၢ်လၢအဂၤတဖၣ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၁၂ တၢ်မၤအသးအံၤ မၤလၢပှဲၤထီၣ် ယဟိဝၤယွၤ အတၢ်ကတိၤလၢ အတဲပာ်စၢၤဝဲ စီၤယ့ၤဟူလၢ “နဖိခွါ အစိၤလွံၢ်စိၤန့ၣ်+ ကဆ့ၣ်နီၤဘၣ်လၢ အံၣ်စရ့လးအလီၢ်ပစိာ် အဖီခိၣ်လီၤ.”+ ဒီးတၢ်ဟဲကဲထီၣ်အသး ဒ်န့ၣ်လီၤ.
၁၃ ဖဲယူဒၤ အစီၤပၤဧူးစံယါ+ ပၢတၢ် ၃၉ နံၣ်တနံၣ်န့ၣ် စီၤယၤဘ့ၣ်အဖိခွါ စီၤၡၤလူၣ် ကဲထီၣ်စီၤပၤလီၤ. ဒီးစီၤၡၤလူၣ် ပၢဘၣ်တၢ်လၢ ဝ့ၢ်ၡၤမရံအပူၤ တလါပှဲၤပှဲၤလီၤ.
၁၄ လၢခံ စီၤကးဒံ အဖိခွါ စီၤမနၤဃ့ၣ် လၢအအိၣ်လၢ ဝ့ၢ်တံးရစၢ်န့ၣ်+ လဲၤလၢ ဝ့ၢ်ၡၤမရံ ဒီးမၤသံကွံာ်ဝဲ စီၤယၤဘ့ၣ် အဖိခွါ စီၤၡၤလူၣ်+ လၢဝ့ၢ်ၡၤမရံအပူၤလီၤ. ဖဲစီၤမနၤဃ့ၣ် မၤသံ စီၤၡၤလူၣ် ဝံၤအလီၢ်ခံ အဝဲထီၣ်က့ၤ စီၤပၤလၢ စီၤၡၤလူၣ် အလီၢ်လီၤ.
၁၅ မ့မ့ၢ်စီၤၡၤလူၣ် အဂ့ၢ်လၢအဂၤတဖၣ် ဒီးအတၢ်ကူၣ်အၢအဂ့ၢ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၁၆ ဖဲန့ၣ်အဆၢကတီၢ် စီၤမနၤဃ့ၣ် ဟးထီၣ်လၢ ဝ့ၢ်တံးရစၢ် ဒီးလဲၤဝဲလၢ ဝ့ၢ်တံပစၤလီၤ. ဒီးမ့ၢ်လၢ အဝဲသ့ၣ် တအိးထီၣ်န့ၢ်အီၤ ဝ့ၢ်အတြဲၤတဖၣ်ဘၣ် အဃိ အဝဲမၤဟးဂီၤဝ့ၢ် ဒီးပှၤလၢ အအိၣ်လၢဝ့ၢ်ပူၤ ဒီးပှၤလၢအအိၣ်လၢ ဝ့ၢ်အဟီၣ်ကဝီၤဖဲန့ၣ်လီၤ. တကးဒံးဘၣ် ပိာ်မုၣ်လၢ အဒၢလၢ အအိၣ်ဖဲန့ၣ်တဖၣ်န့ၣ် အဝဲဖှဲးသ့ၣ်ဖး အဝဲသ့ၣ်အဟၢဖၢလီၤ.
၁၇ ဖဲယူဒၤ အစီၤပၤဧစၤရယၤ ပၢတၢ် ၃၉ နံၣ်တနံၣ်န့ၣ် စီၤကးဒံ အဖိခွါ စီၤမနၤဃ့ၣ် ကဲထီၣ် စီၤပၤလၢ အံၣ်စရ့လးအဖီခိၣ်လီၤ. ဒီးအဝဲပၢဘၣ်တၢ်လၢ ဝ့ၢ်ၡၤမရံအပူၤ အနံၣ်တဆံလီၤ.
၁၈ စီၤမနၤဃ့ၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ လၢအတၢ်အိၣ်မူဒီတစိၤလီၤ. ဒီးကယဲၢ် တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲဝဲ ပှၤအံၣ်စရ့လးဖိလၢ ကမၤဝဲန့ၣ် စီၤမနၤဃ့ၣ် တပာ်တ့ၢ်ကွံာ်ဝဲ နီတမံၤဘၣ်.+
၁၉ ကီၢ်အၤၡူၢ် အစီၤပၤပူလး+ ဟဲထီၣ်ဒ်သိးကဒုး ကီၢ်အံၣ်စရ့လး အဃိ စီၤမနၤဃ့ၣ် ဟ့ၣ်စီၤပူလးလၢ စ့ညၣ်အတၤလၣ်* ၁,၀၀၀ ဒ်သိး အကဆီၣ်ထွဲက့ၤအီၤလၢ အတၢ်စိတၢ်ကမီၤ ကဒိၣ်ထီၣ်လၢ အဘီမုၢ်တၢ်ပၢ အဖီခိၣ်လီၤ.+
၂၀ ဒီးဒ်သိး စီၤမနၤဃ့ၣ် ကန့ၢ်ဘၣ်စ့ညၣ်အဂီၢ် အဝဲဃ့ဆူၣ်ဝဲ ပှၤလၢအကဲဒိၣ်တဖၣ်လၢ+ ကီၢ်အံၣ်စရ့လးအပူၤလီၤ. အဝဲဃ့ဝဲ တဂၤန့ၣ် စ့ၡက့လး* ၅၀ ဒ်သိးအကဟ့ၣ်လီၤဝဲ ကီၢ်အၤၡူၢ် အစီၤပၤလီၤ. ဒီးကီၢ်အၤၡူၢ်အစီၤပၤ က့ၤကဒါက့ၤ ဒီးတအိၣ်ဝဲလၢ ကီၢ်ပူၤဖဲန့ၣ်လၢၤဘၣ်.
၂၁ မ့မ့ၢ် စီၤမနၤဃ့ၣ်+ အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၂ ဒီးစီၤမနၤဃ့ၣ် သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးအဖိခွါ စီၤပကၤဃယၤ ကဲထီၣ် စီၤပၤလၢအလီၢ်လီၤ.
၂၃ ဖဲယူဒၤ အစီၤပၤဧစၤရယၤ ပၢတၢ် ၅၀ နံၣ်အနံၣ်န့ၣ် စီၤမနၤဃ့ၣ် အဖိခွါ စီၤပကၤဃယၤ ကဲထီၣ်စီၤပၤလၢ အံၣ်စရ့လးအဖီခိၣ် လၢဝ့ၢ်ၡၤမရံအပူၤလီၤ. ဒီးအဝဲပၢဘၣ်တၢ် ခံနံၣ်လီၤ.
၂၄ စီၤပကၤဃယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢလီၤ. စီၤပကၤဃယၤ တပာ်တ့ၢ်ကွံာ် တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲဝဲ ပှၤအံၣ်စရ့လးဖိလၢ ကမၤဝဲဘၣ်.+
၂၅ ဒီးစီၤပၤပကၤဃယၤ အသုးခိၣ် စီၤပ့ကး+ လၢအမ့ၢ် စီၤရမါလယၤ အဖိခွါန့ၣ် ကူၣ်အၢအီၤ ဒီးမၤသံအီၤဖဲ တၢ်လီၢ်လၢ အဘံၣ်အဘၢလၢ စီၤပၤအဟံၣ်ပူၤလၢ ဝ့ၢ်ၡၤမရံ ဃုာ်ဒီး စီၤအၢ်ကိး ဒီးစီၤအၢ်ယ့လီၤ. ဖဲစီၤပ့ကး မၤဝဲဒ်န့ၣ်အခါ ပှၤကံးလဧးဖိ အဂၤ ၅၀ အိၣ်ဒီးအီၤလီၤ. ဖဲစီၤပ့ကးမၤသံအီၤ ဝံၤအလီၢ်ခံ စီၤပ့ကး ထီၣ်က့ၤ စီၤပၤလၢအလီၢ်လီၤ.
၂၆ မ့မ့ၢ် စီၤပကၤဃယၤ အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၇ ဖဲယူဒၤ အစီၤပၤဧစၤရယၤ ပၢတၢ် ၅၂ နံၣ်တနံၣ်န့ၣ် စီၤရမါလယၤ အဖိခွါ စီၤပ့ကး+ ကဲထီၣ်စီၤပၤလၢ အံၣ်စရ့လးအဖီခိၣ် လၢဝ့ၢ်ၡၤမရံ အပူၤလီၤ. ဒီးအဝဲပၢဘၣ်တၢ် အနံၣ် ၂၀ လီၤ.
၂၈ စီၤပ့ကး ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢလီၤ. စီၤပ့ကး တပာ်တ့ၢ်ကွံာ် တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲဝဲ ပှၤအံၣ်စရ့လးဖိလၢ ကမၤဝဲန့ၣ်ဘၣ်.+
၂၉ ဖဲအံၣ်စရ့လး အစီၤပၤပ့ကး ပၢတၢ်အဆၢကတီၢ် ကီၢ်အၤၡူၢ် အစီၤပၤတံးကလးပလ့စ့ၢ်+ ဟဲနုာ်လီၤလၢ ကီၢ်ပူၤဒီးမၤန့ၢ် ဝ့ၢ်ဧံၤယိၣ်, ဝ့ၢ်အၤဘ့ၤလးဘ့ၤသမၤကၤ,+ ဝ့ၢ်ယၤနိဃၤ, ဝ့ၢ်က့ဒ့ၣ်,+ ဝ့ၢ်ဃါစိၢ်, ကံးလဧးအဟီၣ်ကဝီၤ,+ ကၤလံၤလါအဟီၣ်ကဝီၤ, နးသၤလံ အတၢ်လီၢ်တၢ်ကျဲခဲလၢာ်+ ဒီးဖီၣ်န့ၢ် ပှၤလၢအအိၣ်ဖဲန့ၣ်တဖၣ် ဒီးက့ၤကိးအဝဲသ့ၣ်လၢ ကီၢ်အၤၡူၢ်အပူၤလီၤ.+
၃၀ လၢခံ စီၤအ့လၤ အဖိခွါ စီၤဟိၤၡ့+ ကူၣ်အၢ စီၤရမါလယၤ အဖိခွါ စီၤပ့ကး ဒီးမၤသံကွံာ်အီၤလီၤ. ဒီးစီၤဟိၤၡ့ ထီၣ်က့ၤ စီၤပၤလၢ စီၤပ့ကးအလီၢ် ဖဲစီၤဧူးစံယါ အဖိခွါ စီၤယိၤသၣ်+ ပၢတၢ် အနံၣ် ၂၀ နံၣ်အနံၣ်န့ၣ်လီၤ.
၃၁ မ့မ့ၢ် စီၤပ့ကး အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၃၂ ဖဲအံၣ်စရ့လး အစီၤပၤရမါလယၤ အဖိခွါ စီၤပ့ကး ပၢတၢ်ခံနံၣ်တနံၣ်န့ၣ် ယူဒၤ အစီၤပၤဧူးစံယါ+ အဖိခွါ စီၤယိၤသၣ်+ ကဲထီၣ်စီၤပၤလီၤ.
၃၃ ဖဲစီၤယိၤသၣ် ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၆ နံၣ်လီၤ. စီၤယိၤသၣ် အမိၢ်မ့ၢ်ဝဲ နီၢ်ယရူၡၤ လၢအမ့ၢ် စီၤစၤဒိး အဖိမုၣ်န့ၣ်လီၤ.+
၃၄ စီၤယိၤသၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒ်အပၢ်စီၤဧူးစံယါ မၤတ့ၢ်ဝဲအသိးလီၤ.+
၃၅ ဘၣ်ဆၣ် တၢ်လီၢ်ထီၣ်ထီတဖၣ် အိၣ်ဒံးဝဲလီၤ. ဒီးပှၤဂီၢ်မုၢ်တဖၣ် ဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ် အဖီခိၣ်လီၤ.+ ဒီးစီၤယိၤသၣ် မ့ၢ်ပှၤလၢ အတ့ထီၣ် ယဟိဝၤယွၤ အဟံၣ်အတြဲၤလၢ တၢ်ဖီခိၣ်တဘ့ၣ်န့ၣ်လီၤ.+
၃၆ မ့မ့ၢ် စီၤယိၤသၣ် အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲန့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၃၇ ဖဲန့ၣ်အဆၢကတီၢ် ယဟိဝၤယွၤ ထိၣ်ဟူးထိၣ်ဂဲၤထီၣ် ကီၢ်စူၤရံ အစီၤပၤရစံၣ် ဒီးစီၤရမါလယၤ အဖိခွါ စီၤပ့ကး+ ဒ်သိး ကထီဒါ ယူဒၤဘီမုၢ်အဂီၢ်လီၤ.+
၃၈ လၢခံ စီၤယိၤသၣ် သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤ တပူၤဃီဒီး အမိၢ်ပၢ်ဖံဖု လၢပျၢၤတဖၣ် လၢအဖုဖးဒိၣ် စီၤဒၤဝံးအဝ့ၢ်ပူၤလီၤ. ဒီးအဖိခွါ စီၤအၤဃး ကဲထီၣ်စီၤပၤလၢ အလီၢ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ စီၤယၤရၤဘၣ် ခံဂၤတဂၤ.
^ အခီပညီမ့ၢ်ဝဲ “ယဟိဝၤ မၤစၢၤတ့ၢ်.” လၢ ၂ စီၤပၤ ၁၅:၁၃; ၂ ကွဲး ၂၆:၁-၂၃; ၡါ ၆:၁ ဒီး ကၤ ၁၄:၅ အပူၤန့ၣ် ဘၣ်တၢ်ကိးအမံၤလၢ စီၤဧူးစံယါ.
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
