၂ ကွဲးနီၣ်တၢ် ၃၂:၁-၃၃
၃၂ ဖဲစီၤဃံးစကံယၤ မၤတၢ်သ့ၣ်တဖၣ်န့ၣ် လၢတၢ်သးတီအပူၤ+ ဝံၤအလီၢ်ခံ ကီၢ်အၤၡူၢ် အစီၤပၤစၤနဃ့ရံာ် ဟဲနုာ်လီၤလၢ ယူဒၤဘီမုၢ်လီၤ. အဝဲကဝီၤဃာ် ဝ့ၢ်တဖၣ်လၢ အအိၣ်ဒီးအဒူၣ်လၢအကျၢၤ ဒီးပာ်လီၤအသးလၢ အကမၤလီၤပှီၢ် ဝ့ၢ်ဒူၣ်တဖၣ် ဒ်သိးကမၤန့ၢ်ဝ့ၢ်တဖၣ် အဂီၢ်လီၤ.+
၂ ဖဲစီၤဃံးစကံယၤ ထံၣ်ဘၣ်ဝဲလၢ စီၤစၤနဃ့ရံာ် ဟဲထီၣ်ဝဲဒ်သိး ကဒုး ဝ့ၢ်ယရူၤၡလ့ၣ် အခါ
၃ အဝဲတၢၣ်ပီၣ်သကိးတၢ်ဒီး အပဒိၣ်ဖးဒိၣ်တဖၣ် ဒီးအသုးဖိလၢ အဂံၢ်ဆူၣ်ဘါဆူၣ်တဖၣ်လီၤ. ဝံၤဒီး အဝဲဆၢတဲာ်လီၤအသးလၢ အကဆွံတံာ်ထံထီၣ်ပၢၢ်တဖၣ်လၢ အအိၣ်ဝဲလၢ ဝ့ၢ်ချၢ+ ဒီးအဝဲသ့ၣ် ဆီၣ်ထွဲအီၤလီၤ.
၄ ပှၤဂီၢ်မုၢ်အါဂၤ ပာ်ဖှိၣ်ထီၣ်အသး ဒီးအဝဲသ့ၣ် ဆွံတံာ်ဝဲ ထံထီၣ်ပၢၢ်တဖၣ် ဒီးထံကျိဖိလၢ အလဲၤယွၤလီၤလၢ ကီၢ်ပူၤန့ၣ်လီၤ. အဝဲသ့ၣ်တဲဝဲလၢ “ဖဲကီၢ်အၤၡူၢ် အစီၤပၤတဖၣ် ဟဲအခါ ပတအဲၣ်ဒိးလၢ အဝဲသ့ၣ် ကထံၣ်န့ၢ်ထံ အါအါဂီၢ်ဂီၢ်ဘၣ်.”
၅ တကးဒံးဘၣ် လၢတၢ်သူၣ်ဆူၣ်သးဆူၣ်အပူၤ စီၤပၤတ့ထီၣ်က့ၤ ဝ့ၢ်ဒူၣ်လၢ အဟးဂီၤပာ်စၢၤဝဲ ခဲလၢာ်, တ့ထီၣ်တၢးတဖၣ်လၢ ဝ့ၢ်ခိၣ်ဒူအလိၤ ဒီးအဝဲတ့ထီၣ်တၢ်ဒူၣ်လၢ တၢ်ချၢတခါလီၤ. တကးဒံးဘၣ် အဝဲဘှီဂ့ၤထီၣ်က့ၤ တၢ်လူၢ်*+ လၢစီၤဒၤဝံးအဝ့ၢ်ပူၤ ဒီးတ့ထီၣ်တၢ်စုကဝဲၤ ဒီးကတီၤဒီဒူၣ်လီၤ.
၆ အဝဲပာ်ထီၣ် သုးမုၢ်အခိၣ်တဖၣ်လၢ ပှၤဂီၢ်မုၢ်အဖီခိၣ် ဒီးအဝဲကိးဖှိၣ်အဝဲသ့ၣ် လၢဝ့ၢ်အတၢ်ဆါတၢ်ပှ့ၤအလီၢ် ဖဲဝ့ၢ်အတြဲၤန့ၣ်လီၤ. စီၤဃံးစကံယၤ ဟ့ၣ်ဂံၢ်ဟ့ၣ်ဘါအဝဲသ့ၣ် ဒီးတဲဝဲလၢ
၇ “ပာ်ဆူၣ်သုသးဒီး အိၣ်ဒီးတၢ်သူၣ်ဒူသးဒူတက့ၢ်. တဘၣ်ပျံၤ ကီၢ်အၤၡူၢ် အစီၤပၤ+ ဒီးပှၤလၢ အအိၣ်ဒီးအီၤတဖၣ်တဂ့ၤ. ပှၤလၢအအိၣ်ဒီးပှၤန့ၣ် အိၣ်အါန့ၢ်ဒံး ပှၤလၢအိၣ်ဒီးအီၤလီၤ.+
၈ အဝဲသန့ၤအသးလၢ ပှၤကညီ အတၢ်ဂံၢ်တၢ်ဘါ မ့မ့ၢ်ပဝဲန့ၣ် ပအိၣ်ဒီး ပကစၢ်ယဟိဝၤယွၤ လၢအကမၤစၢၤပှၤ ဒီးဒုးန့ၢ်တၢ်လၢ ပဂီၢ်လီၤ.”+ ဒီးပှၤဂီၢ်မုၢ် န့ၢ်ဂံၢ်န့ၢ်ဘါလၢ ယူဒၤအစီၤပၤဃံးစကံယၤ အတၢ်ကတိၤတဖၣ်အဃိလီၤ.+
၉ လၢခံ ဖဲကီၢ်အၤၡူၢ် အစီၤပၤစၤနဃ့ရံာ် ဒီးအသုးမုၢ်အိၣ်ဒံးဝဲဖဲ ဝ့ၢ်လၤကံၣ်အခါန့ၣ်+ အဝဲဆှၢလီၤ အခ့အပှၤတဖၣ်လၢ ယူဒၤအစီၤပၤဃံးစကံယၤ ဒီးယူဒၤ အပှၤဂီၢ်မုၢ်ခဲလၢာ်အအိၣ် လၢဝ့ၢ်ယရူၤၡလ့ၣ်လီၤ.+ ဒီးအဝဲသ့ၣ်တဲဝဲလၢ
၁၀ “ကီၢ်အၤၡူၢ် အစီၤပၤစၤနဃ့ရံာ် တဲဝဲဒ်အံၤ, ‘ပကဝီၤဃာ် ဝ့ၢ်ယရူၤၡလ့ၣ်လံ, သုအိၣ်ဒံးလၢအပူၤန့ၣ် မ့ၢ်သုနာ်န့ၢ်မတဂၤလဲၣ်.+
၁၁ စီၤဃံးစကံယၤ တဲသုလၢ သုကစၢ် ယဟိဝၤယွၤ ကမၤပူၤဖျဲးသုလၢ ကီၢ်အၤၡူၢ် အစီၤပၤအစုပူၤလီၤ.+ သနာ်က့ မ့ၢ်ဒၣ် အဝဲလံၣ်န့ၢ်လီန့ၢ်သု ဒီးအဲၣ်ဒိးလၢ သုကလီၤဒိလၢတၢ်အီၣ် ဒီးလီၤဘဲအီထံ တုၤလၢသုသံလီၤ.
၁၂ အဝဲမ့ၢ် စီၤဃံးစကံယၤ လၢအမၤဟးဂီၤကွံာ် သုကစၢ်ယွၤ အတၢ်လီၢ်ထီၣ်ထီတဖၣ်+ ဒီးအတၢ်လုၢ်လီၢ်တဖၣ်+ ဒီးတဲဘၣ် ယူဒၤ ဒီးဝ့ၢ်ယရူၤၡလ့ၣ် အပှၤဂီၢ်မုၢ်လၢ “သုကဘၣ်ဘူၣ်ထီၣ်ဘါထီၣ် တၢ်လၢတၢ်လုၢ်လီၢ်ထဲတဖျၢၣ်အံၤ အမဲာ်ညါ ဒီးလၢတၢ်လုၢ်လီၢ်ထဲတဖျၢၣ်အံၤ အဖီခိၣ်န့ၣ် သုကဘၣ် ဒွဲၣ်ခုၣ်ထီၣ်တၢ်လုၢ်” တမ့ၢ်ဧီၤ.+
၁၃ ယၤဒီး ယမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲ ပှၤလၢကီၢ်အဂၤတဖၣ် ဒ်လဲၣ်န့ၣ် သုတသ့ၣ်ညါဧီၤ.+ ပှၤကလုာ်ဂၤ အယွၤတဖၣ် မၤပူၤဖျဲးအဝဲသ့ၣ် အကီၢ်လၢ ယစုပူၤသ့တဂၤဂၤဧါ.+
၁၄ ပှၤကလုာ်ဂၤ အယွၤတဖၣ် လၢယမိၢ်ပၢ်ဖံဖု လၢပျၢၤတဖၣ် မၤဟးဂီၤတ့ၢ်ဝဲအကျါန့ၣ် အဝဲသ့ၣ် မၤပူၤဖျဲး အပှၤဂီၢ်မုၢ်လၢ ယစုပူၤသ့ပှဲၤဂၤလဲၣ်. အဃိ သုကစၢ်ယွၤ မၤပူၤဖျဲးသုလၢ ယစုပူၤကသ့ဧါ.+
၁၅ တဘၣ်ပျဲ စီၤဃံးစကံယၤ လံၣ်န့ၢ်လီန့ၢ်သုဒ်အံၤတဂ့ၤ.+ ဒီးတဘၣ်နာ်န့ၢ်အီၤတဂ့ၤ. ပှၤကလုာ်ဒီး ဘီမုၢ်အယွၤတဂၤမး မၤပူၤဖျဲး အပှၤဂီၢ်မုၢ်လၢ ယၤဒီး ယမိၢ်ပၢ်ဖံဖု လၢပျၢၤတဖၣ် အစုပူၤ တသ့ဘၣ်. အဃိ သုကစၢ်ယွၤ မၤပူၤဖျဲးသုလၢ ယစုပူၤ ကသ့ဒ်လဲၣ်.’”+
၁၆ စီၤစၤနဃ့ရံာ် အခ့အပှၤတဖၣ် ဒုၣ်ဒွဲၣ်စံးအၢဝဲ ယဟိဝၤယွၤ လၢအမ့ၢ်ယွၤလၢ အမ့ၢ်အတီ ဒီးအခ့အပှၤ စီၤဃံးစကံယၤ အါန့ၢ်ဒံးအလီၢ်လီၤ.
၁၇ ဒီးအဝဲဆှၢလီၤ စ့ၢ်ကီး လံာ်ပရၢတဖၣ်လၢ+ အဒုၣ်ဒွဲၣ်စံးအၢ အံၣ်စရ့လး အကစၢ် ယဟိဝၤယွၤလီၤ.+ အဝဲတဲဝဲလၢ “ဒ်ပှၤကလုာ်ဂၤ အယွၤတဖၣ် မၤပူၤဖျဲး အပှၤဂီၢ်မုၢ်လၢ ယစုပူၤတသ့ဘၣ်အသိး+ စီၤဃံးစကံယၤ အကစၢ်ယွၤ မၤပူၤဖျဲး အပှၤဂီၢ်မုၢ်လၢ ယစုပူၤတသ့ဘၣ်.”
၁၈ ဒ်သိးအဝဲသ့ၣ် ကမၤန့ၢ်ဝ့ၢ်အဂီၢ် အဝဲသ့ၣ်တဲပျံၤတဲဖုးဝဲ ပှၤလၢအအိၣ်လၢ ဝ့ၢ်ယရူၤၡလ့ၣ် အခိၣ်ဒူလၢ အကလုၢ်ဒိၣ်ဒိၣ်လၢ ယူဒၤအကျိာ်လီၤ.+
၁၉ အဝဲသ့ၣ် ဒုၣ်ဒွဲၣ်စံးအၢ ဝ့ၢ်ယရူၤၡလ့ၣ် အကစၢ်ယွၤ ဒ်အဝဲသ့ၣ် ဒုၣ်ဒွဲၣ်စံးအၢ ပှၤဟီၣ်ခိၣ်ဖိ အယွၤတဖၣ် လၢပှၤကညီတ့ထီၣ်ဝဲလၢ အစုန့ၣ်လီၤ.
၂၀ ဘၣ်ဆၣ် စီၤပၤဃံးစကံယၤ ဒီးစီၤအၤမိး အဖိခွါ ဝံယၡါယၤန့ၣ်+ ဃ့ထုကဖၣ်ဝဲ ဘၣ်ဃးဒီး တၢ်ဂ့ၢ်အံၤ ဒီးဃ့တၢ်မၤစၢၤလၢ ကစၢ်ယွၤအအိၣ် လၢမူခိၣ်လီၤ.+
၂၁ ဒီးယဟိဝၤယွၤ ဆှၢလီၤ မူခိၣ်ကလူးတဂၤ ဒီးမၤဟးဂီၤကွံာ်ဝဲ ပှၤသုးဖိလၢ အဂံၢ်ဆူၣ်ဘါဆူၣ်,+ ပှၤအခိၣ် ဒီးသုးခိၣ်လၢ အအိၣ်လၢ ကီၢ်အၤၡူၢ်အစီၤပၤ အဒဲကဝီၤအပူၤ ကိးဂၤဒဲးလီၤ. ဒီးစီၤစၤနဃ့ရံာ် က့ၤကဒါက့ၤလၢ အနီၢ်ကစၢ်အထံကီၢ် လၢတၢ်မဲာ်ဆှးအပူၤလီၤ. လၢခံ အဝဲလဲၤနုာ်လီၤလၢ အကစၢ်ယွၤအဟံၣ်ပူၤ ဒီးအဖိခွါတနီၤ ကျီသံကွံာ်အီၤ ဖဲန့ၣ်လီၤ.+
၂၂ အဃိ ယဟိဝၤယွၤ မၤပူၤဖျဲး စီၤဃံးစကံယၤ ဒီးပှၤလၢအအိၣ်လၢ ဝ့ၢ်ယရူၤၡလ့ၣ်အပူၤခဲလၢာ်လၢ ကီၢ်အၤၡူၢ်အစီၤပၤ စၤနဃ့ရံာ် အစုပူၤ ဒီးပှၤအဂၤတဖၣ်အစုပူၤ ဒီးကစၢ်ယွၤ ဟ့ၣ်အဝဲသ့ၣ် တၢ်မုာ်တၢ်ခုၣ်လၢ တၢ်လီၢ်လၢ အကပိာ်ကပၤ ဝးဝးလီၤ.
၂၃ ဒီးပှၤအါဂၤ ဟဲစိာ်တၢ်ဟ့ၣ်တဖၣ်လၢ ယဟိဝၤယွၤအဂီၢ် ဆူဝ့ၢ်ယရူၤၡလ့ၣ် ဒီးတၢ်လၢအလုၢ်ဒိၣ်ပှ့ၤဒိၣ်တဖၣ် ဆူယူဒၤ အစီၤပၤဃံးစကံယၤ အအိၣ်လီၤ.+ ဒီးစးထီၣ်ဖဲန့ၣ် ပှၤကလုာ်ခဲလၢာ် ပာ်ဒိၣ်ပာ်ကဲ စီၤဃံးစကံယၤ ဒိၣ်မးလီၤ.
၂၄ ဖဲန့ၣ်အဆၢကတီၢ် စီၤဃံးစကံယၤ ဆိးက့ဝဲ ဘူးထီၣ်လၢအကသံလီၤ. ဒီးအဝဲဃ့ထုကဖၣ်လၢ ယဟိဝၤယွၤအအိၣ်+ ဒီးကစၢ်ယွၤစံးဆၢအီၤ ဒီးဟ့ၣ်အီၤ တၢ်ပနီၣ်တခါလီၤ.+
၂၅ ကစၢ်ယွၤ မၤဂ့ၤတၢ်လၢ စီၤဃံးစကံယၤအဂီၢ် ဘၣ်ဆၣ် စီၤဃံးစကံယၤ တသ့ၣ်ညါဆၢက့ၤ တၢ်ဘျုးတၢ်ဖှိၣ်ဘၣ်. အဝဲပာ်ထီၣ်ထီအသးအဃိ ကစၢ်ယွၤ သးပှံၢ်ထီၣ်အီၤ ဃုာ်ဒီး ယူဒၤ ဒီးဝ့ၢ်ယရူၤၡလ့ၣ် အပှၤဂီၢ်မုၢ်လီၤ.
၂၆ ဘၣ်ဆၣ် စီၤဃံးစကံယၤ ဒီးဝ့ၢ်ယရူၤၡလ့ၣ် အပှၤဂီၢ်မုၢ် ဆီၣ်လီၤအသး ဒီးတပာ်ထီၣ်ထီအသးလၢၤဘၣ်+ အဃိ ယဟိဝၤယွၤ အတၢ်သးဒိၣ် တလီၤဘၣ်အဝဲသ့ၣ် ဖဲစီၤဃံးစကံယၤ အိၣ်မူဒံး အဆၢကတီၢ်ဘၣ်.+
၂၇ စီၤဃံးစကံယၤ ထူးထီၣ်တီၤထီၣ်ဝဲ ဒိၣ်မး ဒီးအိၣ်ဒီးတၢ်လၤကပီၤ အါမးလီၤ.+ အဝဲတ့ထီၣ် တၢ်ပာ်ဖှိၣ်အလီၢ်တဖၣ်လၢ+ အနီၢ်ကစၢ်အဂီၢ် ဒ်သိးအကပာ်ဖှိၣ် ထူ, စ့ညၣ်, လၢၢ်လၢအလုၢ်ဒိၣ်ပှ့ၤဒိၣ်တဖၣ်, သ့ၣ်စရံအထုး, ကတီၤတဖၣ် ဒီးတၢ်ဖိတၢ်လံၤလၢ အလုၢ်ဒိၣ်ပှ့ၤဒိၣ်အဂၤတဖၣ်လီၤ.
၂၈ အဝဲတ့ထီၣ်စ့ၢ်ကီး တၢ်ပာ်ဖှိၣ်တၢ်ဖိတၢ်လံၤအလီၢ်တဖၣ် လၢပှၤကပာ် ဘုချံ, စပံးထံအသီ ဒီးသိအဂီၢ်လီၤ. ဒီးအဝဲတ့ထီၣ်စ့ၢ်ကီး ဒၢးတဖၣ်လၢ ဆၣ်ဖိကီၢ်ဖိ အကလုာ်ကလုာ် ဒီးဒၢးတဖၣ်လၢ သိအဖုတဖၣ်အဂီၢ်လီၤ.
၂၉ ကစၢ်ယွၤဟ့ၣ်အီၤ တၢ်ဖိတၢ်လံၤတဖၣ် အါအါဂီၢ်ဂီၢ်အဃိ အဝဲမၤန့ၢ်ဝဲ ဆၣ်ဖိကီၢ်ဖိ, သိဒီးမဲာ်တဲးလဲးအဖု ဒီးကျီၢ်အဖု ဒီဒူၣ်လီၤ. ဒီးအဝဲမၤန့ၢ်စ့ၢ်ကီး ဝ့ၢ်တဖၣ်လၢ အနီၢ်ကစၢ်အဂီၢ်လီၤ.
၃၀ စီၤဃံးစကံယၤ မ့ၢ်ပှၤလၢ အဆွံတံာ် ကံဃိၣ်+ အထံလၢ ထးခီ+ ဒီးဒုးယွၤလီၤဝဲလၢ မုၢ်နုာ်တကပၤ လိၤလိၤဆူ စီၤဒၤဝံးအဝ့ၢ်လီၤ.+ ဒီးစီၤဃံးစကံယၤ အတၢ်မၤခဲလၢာ်န့ၣ် ကဲထီၣ်လိၣ်ထီၣ်ဝဲလီၤ.
၃၁ ဘၣ်ဆၣ် ဖဲကီၢ်ဘၤဘူၤလိၣ် အပဒိၣ်ဖးဒိၣ်ဆှၢလီၤ အပှၤလၢကတဲ တၢ်လၢအဝဲသ့ၣ် ခၢၣ်စး ဆူစီၤဃံးစကံယၤ အအိၣ်ဒ်သိး ကသံကွၢ်အီၤ ဘၣ်ဃးဒီး တၢ်ပနီၣ်လၢ+ အဟဲကဲထီၣ်အသးလၢ ကီၢ်ပူၤအခါန့ၣ်+ ယွၤလၢအမ့ၢ်အတီတဂၤ ပျဲစီၤဃံးစကံယၤလၢ အကမၤဝဲ ဒ်အနီၢ်ကစၢ် တၢ်ဘၣ်အသးအသိးလီၤ. ကစၢ်ယွၤမၤဝဲဒ်န့ၣ် ဒ်သိးကမၤကွၢ်အီၤ+ ဒီးဒ်သိးကသ့ၣ်ညါ တၢ်အိၣ်လၢ အသးပူၤခဲလၢာ် အဂီၢ်လီၤ.+
၃၂ မ့မ့ၢ် စီၤဃံးစကံယၤ အဂ့ၢ်လၢအဂၤတဖၣ် ဒီးတၢ်လၢအမၤဝဲ ခီဖျိလၢ အတၢ်အဲၣ်လၢအတီအဃိန့ၣ်+ ဘၣ်တၢ်ကွဲးလီၤအီၤလၢ စီၤအၤမိး အဖိခွါ ဝံယၡါယၤ အတၢ်ကွဲးနီၣ်ကွဲးဃါ လၢအဘၣ်ဃးဒီး အတၢ်ထံၣ်လၢညါခီ+ လၢအအိၣ်လၢ ယူဒၤဒီးအံၣ်စရ့လး အစီၤပၤတဖၣ် အလံာ်ပူၤလီၤ.+
၃၃ ဒီးစီၤဃံးစကံယၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤဖဲ တၢ်လီၤဘံလၢ အလဲၤထီၣ်လၢ စီၤဒၤဝံး အစၢၤအသွဲၣ်တဖၣ် အတၢ်သွၣ်ခိၣ်န့ၣ်လီၤ.+ ဒီးဖဲအသံအခါ ပှၤလၢအအိၣ်လၢ ယူဒၤဒီး ဝ့ၢ်ယရူၤၡလ့ၣ် အပူၤခဲလၢာ် ခူၣ်လီၤအီၤလၢ တၢ်ပာ်ကဲအပူၤလီၤ. ဒီးအဖိခွါ စီၤမနၤၡ့ၤ ကဲထီၣ်က့ၤ စီၤပၤလၢအလီၢ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မံးလိၤ.” အဝဲန့ၣ် မ့ၢ်ဧ့ၤဘြံၤ အတၢ်ကတိၤလၢ အခီပညီမ့ၢ်ဝဲ “မၤပှဲၤ.”
