၂ ကွဲးနီၣ်တၢ် ၂၁:၁-၂၀
၂၁ လၢခံ စီၤယဟိၤၡၤဖး သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးဘၣ်တၢ်ခူၣ်လီၤကွံာ်အီၤ တပူၤဃီဒီး အမိၢ်ပၢ်ဖံဖု လၢပျၢၤတဖၣ်လၢ စီၤဒၤဝံး အဝ့ၢ်ပူၤလီၤ. ဒီးအဖိခွါ စီၤယဟိရၣ် ကဲထီၣ်စီၤပၤလၢ အလီၢ်လီၤ.+
၂ ဒီးစီၤယဟိရၣ် အဒီပုၢ်ဝဲၢ်ခွါ လၢအမ့ၢ် စီၤယဟိၤၡၤဖး အဖိခွါတဖၣ်န့ၣ် မ့ၢ်ဝဲ စီၤဧစၤရယၤ, စီၤယဃံအ့လး, စီၤစကၤရယၤ, စီၤဧစၤရယၤ, စီၤမံၤက့လး ဒီးစီၤၡဖးတယၤလီၤ. ပှၤသ့ၣ်တဖၣ်န့ၣ်မ့ၢ်ဝဲ အံၣ်စရ့လး အစီၤပၤယဟိၤၡၤဖး အဖိခွါခဲလၢာ်လီၤ.
၃ ဒီးအဝဲသ့ၣ်အပၢ် ဟ့ၣ်လီၤအဝဲသ့ၣ် တၢ်ဟ့ၣ်အါအါဂီၢ်ဂီၢ် ဒ်သိးဒီး စ့ညၣ်, ထူ, တၢ်လုၢ်ဒိၣ်ပှ့ၤဒိၣ်တဖၣ် ဃုာ်ဒီး ဝ့ၢ်တဖၣ်လၢအအိၣ်ဒီး အဒူၣ်လၢအကျၢၤလၢ ယူဒၤအပူၤလီၤ.+ မ့မ့ၢ် ဘီမုၢ်န့ၣ် အဝဲဟ့ၣ်လီၤဝဲလၢ စီၤယဟိရၣ် မ့ၢ်လၢ စီၤယဟိရၣ်+ မ့ၢ်ဝဲ ဖိဝဲၢ်ကိအဃိလီၤ.
၄ ဖဲစီၤယဟိရၣ် ပၢက့ၤဘီမုၢ်လၢ အပၢ်အလီၢ်အခါ အဝဲမၤဂၢၢ်ကျၢၤထီၣ် အတၢ်ပၢ ခီဖျိကျီသံကွံာ်ဝဲ အဒီပုၢ်ဝဲၢ်ခွါခဲလၢာ်+ ဒီးမၤသံစ့ၢ်ကီးဝဲ အံၣ်စရ့လး အပဒိၣ်ဖးဒိၣ် တနီၤလီၤ.
၅ ဖဲစီၤယဟိရၣ် ကဲထီၣ် စီၤပၤအခါ အသးနံၣ်အိၣ်ဝဲ ၃၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ဃိးနံၣ်လီၤ.+
၆ အဝဲအိၣ်မူပိာ်ထွဲဒ် အံၣ်စရ့လး အစီၤပၤတဖၣ် မၤဝဲအသိး+ ဒီးအိၣ်မူပိာ်ထွဲဒ် စီၤအၤဃာ် အဒူၣ်ဖိထၢဖိ မၤဝဲအသိး, မ့ၢ်လၢ အဝဲဟံးန့ၢ်အမါလၢ စီၤအၤဃာ် အဖိမုၣ်အဃိလီၤ.+ ဒီးအဝဲမၤတၢ်လၢ ယဟိဝၤယွၤ ထံၣ်ဝဲလၢအအၢ တလီၢ်လီၢ်လီၤ.
၇ ဘၣ်ဆၣ် ခီဖျိလၢ ယဟိဝၤယွၤ မၤပာ်စၢၤ တၢ်အၢၣ်လီၤအီလီၤဒီး စီၤဒၤဝံး+ လၢအကဟ့ၣ်လီၤအီၤဒီး အဖိခွါတဖၣ်လၢ အမ့ၣ်အူဒၢတဖျၢၣ်* ထီဘိအဃိ အဝဲ တအဲၣ်ဒိးမၤဟးဂီၤ စီၤဒၤဝံး အစၢၤအသွဲၣ်တဖၣ်ဘၣ်.+
၈ ဖဲစီၤယဟိရၣ် ပၢတၢ်အဆၢကတီၢ်န့ၣ် ပှၤအဒိၣ်ဖိ ထီဒါက့ၤဝဲ ယူဒၤအဘီမုၢ်+ ဝံၤဒီး ပာ်ထီၣ်ဝဲ အနီၢ်ကစၢ် အစီၤပၤလီၤ.+
၉ အဃိ စီၤယဟိရၣ် ဒီးအသုးခိၣ်တဖၣ် လဲၤခီဃီၤတၢ် ဃုာ်ဒီး အလ့ၣ်ကဟၣ်တဖၣ် ဒီးပှၤအဒိၣ်ဖိတဖၣ် ကဝီၤဃာ်အီၤ ဒီးအလ့ၣ်ကဟၣ် အသုးခိၣ်တဖၣ်လီၤ. ဘၣ်ဆၣ် လၢမုၢ်နၤခီန့ၣ် စီၤယဟိရၣ် ဂဲၤဆၢထၢၣ် ဒီးဒုးအဝဲသ့ၣ်နၢၤလီၤ.
၁၀ ဘၣ်ဆၣ် ပှၤအဒိၣ်ဖိတဖၣ် ဆဲးထီဒါ ယူဒၤအဘီမုၢ် တုၤလၢ မုၢ်မဆါတနံၤအံၤလီၤ. ဒီးဖဲန့ၣ်အဆၢကတီၢ် ပှၤလံးဘနၤဖိ+ ထီဒါ စ့ၢ်ကီးအီၤ မ့ၢ်လၢ အဝဲပာ်တ့ၢ်ကွံာ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ အဃိလီၤ.+
၁၁ အဝဲတ့ထီၣ်စ့ၢ်ကီး တၢ်လီၢ်ထီၣ်ထီတဖၣ်လၢ+ ယူဒၤအကစၢၢ်တဖၣ်အလိၤ ဒီးအဆီၣ်ထွဲ ဝ့ၢ်ယရူၤၡလ့ၣ် အပှၤဂီၢ်မုၢ်လၢ အဝဲသ့ၣ် ကဘူၣ်ထီၣ်ဘါထီၣ် ယွၤလၢအဂၤတဖၣ်* ဒီးဆှၢကမၣ်ဝဲ ပှၤလၢအအိၣ်လၢ ယူဒၤဘီမုၢ်အပူၤလီၤ.
၁၂ လၢခံ ဝံအ့ၤလံယၤ+ ဆှၢလီၤဝဲ လံာ်ပရၢတဘ့ၣ် လၢအတဲဝဲလၢ “နဖုဖးဒိၣ် စီၤဒၤဝံး အကစၢ် ယဟိဝၤယွၤ တဲဝဲဒ်အံၤ ‘နတအိၣ်မူပိာ်ထွဲဒ် နပၢ်စီၤယဟိၤၡၤဖး+ ဒီးယူဒၤအစီၤပၤအၤစါ+ မၤဝဲအသိးဘၣ်.
၁၃ လၢတၢ်န့ၣ်အလီၢ် နအိၣ်မူပိာ်ထွဲ ဒ်အံၣ်စရ့လး အစီၤပၤတဖၣ်မၤဝဲအသိး+ ဒီးနဆီၣ်ထွဲ ယူဒၤဘီမုၢ် ဒီးဝ့ၢ်ယရူၤၡလ့ၣ် အပှၤဂီၢ်မုၢ် လၢအဝဲသ့ၣ် ကဘူၣ်ထီၣ်ဘါထီၣ် ယွၤလၢအဂၤတဖၣ်+ ဒ်စီၤအၤဃာ် အဒူၣ်ဖိထၢဖိ ဘူၣ်ထီၣ်ဘါထီၣ်တ့ၢ်ဝဲ အသိးလီၤ.+ တကးဒံးဘၣ် နဒီပုၢ်ဝဲၢ်ခွါတဖၣ်လၢ+ နပၢ်အဒူၣ်ဖိထၢဖိအကျါ လၢအမ့ၢ် ပှၤလၢအဂ့ၤဒိၣ်န့ၢ်ဒံးနၤဒၣ်လဲာ် နမၤသံအီၤလီၤ.
၁၄ အဃိ ယဟိဝၤယွၤ ကဒုးလီၤဘၣ် တၢ်နးတၢ်ဖှီၣ်ဖးဒိၣ်တခါလၢ နပှၤဂီၢ်မုၢ်, နဖိခွါတဖၣ်, နမါတဖၣ် ဒီးနတၢ်ဖိတၢ်လံၤ ခဲလၢာ်အလိၤလီၤ.
၁၅ နကတူၢ်ဘၣ် တၢ်ဆူးတၢ်ဆါအါမံၤ ပၣ်ဃုာ်ဒီး ပှံာ်တၢ်ဆါတခါလၢ အကအၢထီၣ်နးထီၣ်ဝဲ တနံၤဘၣ်တနံၤ တုၤလၢ နပှံာ်ဖျိးထီၣ်လီၤ.’”
၁၆ လၢခံ ယဟိဝၤယွၤ ထိၣ်ဟူးထိၣ်ဂဲၤထီၣ်+ ပှၤဖလ့ၡသးဖိ+ ဒီးပှၤဧ့ရ့းဖိလၢ+ အအိၣ်ဘူးဒီး ပှၤအဲၤသံအီးပးဖိ ဒ်သိးကထီဒါ စီၤယဟိရၣ်လီၤ.
၁၇ အဃိ အဝဲသ့ၣ်နုာ်လီၤဆူၣ်ဝဲလၢ ယူဒၤဘီမုၢ်အပူၤ ဒီးဟံးန့ၢ်ကွံာ်ဝဲ တၢ်ဖိတၢ်လံၤ ခဲလၢာ်လၢ အထံၣ်ဝဲလၢ စီၤပၤအဟံၣ်ပူၤလီၤ.+ အဝဲသ့ၣ် က့ၤဖီၣ်စ့ၢ်ကီး စီၤပၤအဖိခွါတဖၣ် ဒီးအမါတဖၣ်လီၤ. ဒီးအိၣ်တ့ၢ်က့ၤထဲဒၣ် စီၤပၤအဖိခွါသဒါ စီၤယဟိအါဃး* တဂၤလီၤ.+
၁၈ တၢ်မၤအသးတဖၣ်န့ၣ်ခဲလၢာ် ဝံၤအလီၢ်ခံ ယဟိဝၤယွၤ ဒုးလီၤဘၣ် စီၤပၤလၢ ပှံာ်တၢ်ဆါတခါလၢ အဘျါက့ၤ တသ့ဘၣ်လီၤ.+
၁၉ ခံနံၣ်ဝံၤအလီၢ်ခံ ခီဖျိလၢ အတၢ်ဆါအဃိ အပှံာ်ဖျိးထီၣ် ဒီးအဝဲတူၢ်ဘၣ်တၢ်ဆါ နးဒိၣ်မးအဃိ အဝဲသံဝဲလီၤ. ဒီးအပှၤဂီၢ်မုၢ် တမၤကဲၤထီၣ်မ့ၣ်အူ ဒ်သိးကမၤလၤကပီၤအီၤ ဒ်အဝဲသ့ၣ် မၤန့ၢ် အမိၢ်ပၢ်ဖံဖု လၢပျၢၤတဖၣ်အသိးဘၣ်.+
၂၀ ဖဲစီၤယဟိရၣ် ကဲထီၣ်စီၤပၤအခါ အသးနံၣ်အိၣ်ဝဲ ၃၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ဃိးနံၣ်လီၤ. ဖဲအသံအခါ ပှၤတသူၣ်အုးသးအုးနီတဂၤဘၣ်. ဒီးပှၤခူၣ်လီၤကွံာ်အီၤလၢ စီၤဒၤဝံးအဝ့ၢ်ပူၤ+ ဘၣ်ဆၣ် တမ့ၢ်လၢ စီၤပၤတဖၣ် အတၢ်သွၣ်ခိၣ်အပူၤဘၣ်.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ အစၢၤအသွဲၣ်.
^ အခီပညီလိၤလိၤ “မၤကမၣ်မုၣ်ကမၣ်ခွါ လၢနီၢ်သးတခီ ဒ်ပိာ်မုၣ်ဆါလီၤအီၣ်သးအသိး.”
^ ဘၣ်တၢ်ကိးစ့ၢ်ကီးအီၤလၢ စီၤအဃၤစယၤ.
