၁ ၡမူၤအ့လး ၁၆:၁-၂၃
၁၆ လၢခံ ယဟိဝၤယွၤ တဲဘၣ် စီၤၡမူၤအ့လးလၢ “ယစူးကွံာ်ညိကွံာ် စီၤစီလူး လၢစီၤပၤအလီၢ် လၢအံၣ်စရ့လး အဖီခိၣ်ဝံၤလံ.+ နကသူၣ်အုးသးအုး လၢအဃိ ဆံးယံာ်ဒံးလဲၣ်.+ ဟံးန့ၢ်တၢ်အနၢၤတဘိ, မၤပှဲၤအီၤဒီးသိ+ ဒီးလဲၤတၢ်တက့ၢ်. မ့ၢ်လၢ ယဃုထၢထီၣ်ပာ်စၢၤ စီၤပၤတဂၤ+ လၢပှၤဘ့ၤသလ့ဃ့ၣ်ဖိ စီၤယံးၡဲ အဖိခွါတဖၣ်အကျါ အဃိ ယကဆှၢလီၤနၤ လၢစီၤယံးၡဲ အအိၣ်လီၤ.”+
၂ ဘၣ်ဆၣ် စီၤၡမူၤအ့လး တဲဝဲလၢ “ယလဲၤကသ့ဒ်လဲၣ်. စီၤစီလူးမ့ၢ်နၢ်ဟူဝဲန့ၣ် အကမၤသံယၤလီၤ.”+ ဒီးယဟိဝၤယွၤ တဲဆၢက့ၤလၢ “လဲၤကိးဃုာ်ဒီး ကျီၢ်ဖိတဒု ဒီးတဲလၢ ‘ယဟဲဒ်သိး ယကလုၢ်ထီၣ်တၢ်လၢ ယဟိဝၤယွၤအအိၣ်လီၤ.’
၃ ဒီးနဘၣ်ကွဲမုာ် စီၤယံးၡဲလၢ တၢ်လုၢ်ထီၣ်တၢ်အလီၢ် ဝံၤဒီး နကဘၣ်မၤ မနုၤလဲၣ်န့ၣ် ယက ဒုးသ့ၣ်ညါနၤလီၤ. ဒီးပှၤတဂၤဂၤလၢ ယကဒုးနဲၣ်နၤန့ၣ် နကဘၣ် ဒိးဖှူအီၤလီၤ.”+
၄ ဒီးစီၤၡမူၤအ့လး မၤဝဲဒ်ယဟိဝၤယွၤ တဲဝဲအသိးလီၤ. ဖဲအဝဲ လဲၤတုၤလၢ ဝ့ၢ်ဘ့ၤသလ့ဃ့ၣ်အခါ+ ဝ့ၢ်အပှၤသူၣ်က့သးပှၢ်တဖၣ် ထံၣ်အီၤဒီး အဝဲသ့ၣ် သူၣ်ကနိးသးကနိးလီၤ. အဃိ အဝဲသ့ၣ် သံကွၢ်အီၤလၢ “နဟဲန့ၣ် မ့ၢ်တၢ်ကီတၢ်ခဲ အိၣ်တမံၤမံၤဧါ.”
၅ ဒီးအဝဲ တဲဆၢက့ၤဝဲလၢ “တၢ်ကီတၢ်ခဲ တအိၣ်နီတမံၤဘၣ်. ယဟဲ ဒ်သိး ယကလုၢ်ထီၣ်တၢ်လၢ ယဟိဝၤယွၤ အအိၣ်လီၤ. မၤစီဆှံထီၣ်သုသး ဒီးလဲၤပိာ်ယခံ လၢတၢ်လုၢ်ထီၣ်တၢ်အလီၢ်တက့ၢ်.” ဒီးအဝဲမၤစီဆှံထီၣ် စီၤယံးၡဲ ဒီးအဖိခွါတဖၣ် ဝံၤဒီး ကွဲမုာ်အဝဲသ့ၣ် လၢတၢ်လုၢ်ထီၣ်တၢ်အလီၢ်လီၤ.
၆ ဖဲအဝဲသ့ၣ် လဲၤနုာ်လီၤ ဒီးစီၤၡမူၤအ့လး ထံၣ်ဝဲ စီၤအလံအာ်အခါ+ အတဲဝဲလၢ “ပှၤတဂၤအံၤ ကဘၣ်မ့ၢ် ယဟိဝၤယွၤ အပှၤဒိးဖှူသးတဂၤသၢၤ.”
၇ ဘၣ်ဆၣ် ယဟိဝၤယွၤ တဲဘၣ် စီၤၡမူၤအ့လးလၢ “အနီၢ်ထီထဲလဲၣ် ဒီးအဒိၣ်တၢ်ဂ့ၤထဲလဲၣ်န့ၣ် ကွၢ်တဂ့ၤ,+ မ့ၢ်လၢ ယစူးကွံာ်ညိကွံာ်အီၤလံ. ပှၤကညီန့ၣ် ထံၣ်တၢ်လၢအအိၣ်ဖျါလၢခိ မ့မ့ၢ် ယဟိဝၤယွၤန့ၣ် ထံၣ်တၢ်လၢ ပှၤသးကံၢ်ပူၤလီၤ.+ အဃိ ပှၤကညီအတၢ်ထံၣ်န့ၣ် တဒ်သိးဒီး ကစၢ်ယွၤအတၢ်ထံၣ်ဘၣ်.”
၈ ဒီးစီၤယံးၡဲ ကိးန့ၢ် စီၤအဘံနဒာ်+ ဒီးမၢအလဲၤလၢ စီၤၡမူၤအ့လးအမဲာ်ညါ ဘၣ်ဆၣ် စီၤၡမူၤအ့လး တဲဝဲလၢ “ပှၤတဂၤအံၤစ့ၢ်ကီး ယဟိဝၤယွၤ တဃုထၢအီၤဘၣ်.”
၉ ဒီးစီၤယံးၡဲ ကိးန့ၢ်စီၤၡးမၤ+ ဘၣ်ဆၣ် စီၤၡမူၤအ့လး တဲဝဲလၢ “ပှၤတဂၤအံၤစ့ၢ်ကီး ယဟိဝၤယွၤ တဃုထၢအီၤဘၣ်.”
၁၀ အဃိ စီၤယံးၡဲ မၢအဖိခွါနွံဂၤ လဲၤလၢ စီၤၡမူၤအ့လးအမဲာ်ညါ ဘၣ်ဆၣ် စီၤၡမူၤအ့လး တဲဝဲလၢ “ယဟိဝၤယွၤ တဃုထၢ အဝဲသ့ၣ် နီတဂၤဘၣ်.”
၁၁ လၢခံ စီၤၡမူၤအ့လး တဲဘၣ် စီၤယံးၡဲလၢ “နဖိခွါတဖၣ် အိၣ်ပှဲၤအံၤလီၤဧါ.” စီၤယံးၡဲ တဲဝဲလၢ “အဆံးကတၢၢ်+ အိၣ်တဂၤဒံး ဒီးအလဲၤကွၢ်သိလီၤ.”+ ဒီးစီၤၡမူၤအ့လး တဲဘၣ် စီၤယံးၡဲလၢ “မၢပှၤလဲၤကိးန့ၢ်အီၤတက့ၢ်. အဟဲက့ၤ မ့ၢ်တတုၤဒံးဘၣ်န့ၣ် ပတဆ့ၣ်နီၤ အီၣ်တၢ်ဘၣ်.”
၁၂ ဒီးစီၤယံးၡဲ မၢပှၤလဲၤကိးန့ၢ်အီၤလီၤ. ဒီးအညၣ်ဂီၤ, အမဲာ်ချံလီၤအဲၣ် ဒီးအဒိၣ်တၢ်ဂ့ၤမးလီၤ.+ ဒီးယဟိဝၤယွၤ တဲဝဲလၢ “အီၤလီၤ, ဒိးဖှူအီၤတက့ၢ်.”+
၁၃ အဃိ စီၤၡမူၤအ့လး ဟံးန့ၢ်တၢ်အနၢၤတဘိလၢအပူၤ အိၣ်ဒီးသိ+ ဒီးဒိးဖှူဝဲ စီၤဒၤဝံး လၢအကၠီတဖၣ် အမဲာ်ညါလီၤ. စးထီၣ်ဖဲ တၢ်တနံၤန့ၣ် ယဟိဝၤယွၤ အသးစီဆှံ ဟ့ၣ်စိဟ့ၣ်ကမီၤအီၤလီၤ.+ လၢခံ စီၤၡမူၤအ့လး က့ၤကဒါက့ၤဝဲလၢ ဝ့ၢ်ရၤမါလီၤ.+
၁၄ ဒီးယဟိဝၤယွၤ အသးစီဆှံ ဟးထီၣ်ကွံာ်လၢ စီၤစီလူးအအိၣ်လီၤ.+ ဒီးယဟိဝၤယွၤ ပျဲဝဲလၢ စီၤစီလူး အတၢ်ပာ်သူၣ်ပာ်သး လၢအအၢ မၤကိၢ်မၤဂီၤအီၤလီၤ.*+
၁၅ စီၤစီလူး အခ့အပှၤတဖၣ် တဲအီၤလၢ “နသ့ၣ်ညါလၢ ကစၢ်ယွၤပျဲဝဲလၢ နတၢ်ပာ်သူၣ်ပာ်သး လၢအအၢ မၤကိၢ်မၤဂီၤနၤလီၤ.
၁၆ ဝံသးစူၤ မ်ကစၢ် မၤလိာ် နခ့နပှၤလၢ အအိၣ်လၢနမဲာ်ညါ ပဝဲဒၣ်အံၤလၢ ပကလဲၤဃုန့ၢ်နၤ ပိာ်ခွါတဂၤလၢ အဒ့တနၢ်ဖၠဲးတက့ၢ်.+ ဒီးဖဲကစၢ်ယွၤ ပျဲဝဲလၢ နတၢ်ပာ်သူၣ်ပာ်သး ကအၢထီၣ်အခါ အဝဲကဒ့တနၢ် ဒီးနအိၣ်ကမုာ်ထီၣ်လီၤ.”
၁၇ အဃိ စီၤစီလူး တဲဘၣ် အခ့အပှၤတဖၣ်လၢ “ဝံသးစူၤ လဲၤဃုန့ၢ်ယၤ ပှၤလၢအဒ့တၢ်ဖၠဲးတဂၤ ဒီးဟဲကိးအီၤလၢ ယအိၣ်တက့ၢ်.”
၁၈ ပှၤမၤစၢၤတၢ်အကျါတဂၤ တဲအီၤလၢ “ပှၤဘ့ၤသလ့ဃ့ၣ်ဖိ စီၤယံးၡဲအဖိခွါတဂၤန့ၣ် ယသ့ၣ်ညါလၢ အဒ့တၢ်ဖၠဲးမး. အမ့ၢ် ပှၤလၢအသးဒူ ဒီးပှၤဒူပှၤဃိၤ တဂၤလီၤ.+ အတဲတၢ်ဖၠဲးမး, အဒိၣ်တၢ်ဂ့ၤမး+ ဒီးယဟိဝၤယွၤ အိၣ်ဒီးအီၤလီၤ.”+
၁၉ စီၤစီလူး ဆှၢလီၤ ပှၤစိာ်တၢ်ကစီၣ်ဖိတဖၣ် လၢစီၤယံးၡဲအအိၣ် ဒီးတဲအီၤလၢ “နဖိခွါစီၤဒၤဝံး လၢအကွၢ်သိန့ၣ် မၢအဟဲလၢ ယအိၣ်တက့ၢ်.”+
၂၀ အဃိ စီၤယံးၡဲ ဆှၢလီၤ အဖိခွါ စီၤဒၤဝံးလၢ စီၤစီလူးအအိၣ် ဃုာ်ဒီး ကိၣ်, စပံးထံ အထၢၣ်တၢ်ဖံးတဖျၢၣ် ဒီးမဲာ်တဲးလဲးဖိတဒုလၢ အတီၣ်ထီၣ်ပာ်စၢၤ လၢကသ့ၣ်ယီၤအလိၤလီၤ.
၂၁ စီၤဒၤဝံး လဲၤတုၤလၢ စီၤစီလူးအအိၣ် ဒီးမၤတၢ်လၢ စီၤစီလူးအဂီၢ်လီၤ.+ စီၤစီလူး အဲၣ်စီၤဒၤဝံးဒိၣ်မး ဒီးစီၤဒၤဝံး ကဲထီၣ် ပှၤလၢအစိာ် အတၢ်စုကဝဲၤတဂၤလီၤ.
၂၂ စီၤစီလူး ဆှၢလီၤ တၢ်ကစီၣ်လၢ စီၤယံးၡဲအအိၣ် ဒီးတဲဝဲလၢ “မ့ၢ်လၢ ယဘၣ်သူၣ်ဘၣ်သး စီၤဒၤဝံးဒိၣ်မးအဃိ ဝံသးစူၤ ပျဲစီၤဒၤဝံး အိၣ်တ့ၢ်ဒီးမၤတၢ်လၢ ယဂီၢ်တက့ၢ်.”
၂၃ ဒီးဖဲကစၢ်ယွၤ ပျဲဝဲလၢ စီၤစီလူး အတၢ်ပာ်သူၣ်ပာ်သး ကအၢထီၣ်အခါ စီၤဒၤဝံး ဒ့ဝဲတနၢ် ဒီးစီၤစီလူး အသးမုာ်ထီၣ်က့ၤဝဲ ဒီးအအိၣ်မုာ်ထီၣ်က့ၤလီၤ. အဃိ တၢ်ပာ်သူၣ်ပာ်သး လၢအအၢန့ၣ် ဟးထီၣ်ကွံာ်လၢ အအိၣ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “သးလၢအအၢလၢ အဟဲလၢယဟိဝၤယွၤအအိၣ်န့ၣ် မၤပျံၤမၤဖုးအီၤ.”
