၁ စီၤပၤ ၅:၁-၁၈
၅ ခီဖျိလၢ စီၤဃံရၣ်န့ၣ် ကဲဝဲ စီၤဒၤဝံး အသကိးထီဘိအဃိ ဖဲဝ့ၢ်စိၢ်အစီၤပၤ+ စီၤဃံရၣ် နၢ်ဟူဘၣ်ဝဲလၢ စီၤၡလိၤမိၤ ဘၣ်တၢ်ဒိးဖှူအီၤ ဒ်စီၤပၤအသိး လၢအပၢ်အလီၢ်အခါ စီၤဃံရၣ် ဆှၢလီၤ အခ့အပှၤတဖၣ်လၢ စီၤၡလိၤမိၤအအိၣ်လီၤ.+
၂ ဒီးစီၤၡလိၤမိၤ မၢပှၤက့ၤတဲဘၣ် စီၤဃံရၣ်လၢ+
၃ “နသ့ၣ်ညါလၢ ယပၢ်စီၤဒၤဝံး ဘၣ်ဒုးဝဲ အဒုၣ်အဒါလၢ အအိၣ်လၢ အကပိာ်ကပၤဝးဝး တုၤလၢ ယဟိဝၤယွၤ ပာ်လီၤအဒုၣ်အဒါတဖၣ် လၢအခီၣ်ညါသး အဖီလာ်လီၤ. အဃိ အဝဲတ့ထီၣ်ဘၣ် ဟံၣ်လၢအကစၢ် ယဟိဝၤယွၤ အမံၤအဂီၢ် တန့ၢ်ဘၣ်.+
၄ ဘၣ်ဆၣ် ခဲအံၤ ယကစၢ် ယဟိဝၤယွၤ ဟ့ၣ်လီၤယၤ တၢ်မုာ်တၢ်ခုၣ်လၢ တၢ်လီၢ်လၢ ယကပိာ်ကပၤဝးဝးလီၤ.+ ပှၤလၢ အထီဒါယၤန့ၣ် တအိၣ်နီတဂၤဘၣ် ဒီးတၢ်လၢအလီၤဘၣ်ယိၣ် တအိၣ်နီတမံၤဘၣ်.+
၅ ဒ်ယဟိဝၤယွၤ အၢၣ်လီၤပာ်စၢၤ ယပၢ် စီၤဒၤဝံးလၢ ‘နဖိခွါလၢ ယကပာ်ထီၣ်အီၤ လၢနလီၢ်ပစိာ်အဖီခိၣ်န့ၣ် အကကဲ ပှၤတဂၤလၢ အကသူၣ်ထီၣ်ဟံၣ်တဖျၢၣ် လၢယမံၤအဂီၢ်’+ အသိး ယပာ်လီၤယသးလၢ ယကသူၣ်ထီၣ် ဟံၣ်တဖျၢၣ်လၢ ယကစၢ် ယဟိဝၤယွၤ အမံၤအဂီၢ်လီၤ.
၆ အဃိ ခဲအံၤ မၤလိာ်နပှၤတဖၣ်လၢ အဝဲသ့ၣ်ကကူာ်လီၤ လဘၤနိၣ် အသ့ၣ်ဆှိအ့ရ့းတဖၣ်+ လၢယဂီၢ်တက့ၢ်. ဒ်နသ့ၣ်ညါအသိး ပှၤလၢအကူာ်လီၤသ့ၣ် သ့ထဲသိးဒီး ပှၤစံဒိၣ်ဖိတဖၣ် အသိး တအိၣ်လၢပကျါ နီတဂၤဘၣ်. အဃိ ယခ့ယပှၤတဖၣ် ကမၤသကိးတၢ်ဒီး နခ့နပှၤတဖၣ် ဒီးယကဟ့ၣ်လီၤ နခ့နပှၤတဖၣ် အဘူးအလဲ ဒ်နပာ်ပနီၣ်အီၤ အသိးလီၤ.”+
၇ ဖဲစီၤဃံရၣ် နၢ်ဟူဘၣ် စီၤၡလိၤမိၤ အတၢ်ကတိၤအခါ အဝဲ သးခုဒိၣ်မး ဒီးတဲဝဲလၢ “ယဟိဝၤယွၤ ဟ့ၣ်စီၤဒၤဝံး ဖိခွါလၢ အကူၣ်တၢ်သ့တဂၤ လၢကပၢဝဲ ပှၤဂီၢ်မုၢ် လၢအအိၣ်အါအါဂီၢ်ဂီၢ် တဖုအံၤအဃိ မ်ကစၢ်ယွၤ ဘၣ်တၢ်စံးထီၣ်ပတြၢၤအီၤတက့ၢ်.”+
၈ အဃိ စီၤဃံရၣ် မၢပှၤက့ၤတဲဘၣ် စီၤၡလိၤမိၤလၢ “ယနၢ်ဟူဘၣ် တၢ်ကစီၣ်လၢ နဆှၢလီၤလံ. ယကဟ့ၣ်လီၤနၤ သ့ၣ်ဆှိအ့ရ့း ဒီးသ့ၣ်ကၠူနံးဖၢၤ ဒ်နလီကီအသိး ခဲလၢာ်လီၤ.+
၉ ယခ့ယပှၤတဖၣ်လၢ လဘၤနိၣ် ကစၢၢ်ကလိကျါန့ၣ် ကဟဲစိာ်လီၤအီၤ တုၤလၢပီၣ်လဲၣ် ဒီးယကစၢထီၣ်အီၤတပူၣ် တပူၣ် ဒ်ထိတဖၣ်အသိး ဒီးထိၣ်ထွံလီၤအီၤလၢ ပီၣ်လဲၣ်ဆူ တၢ်လီၢ်လၢ နတဲဘၣ်ယၤလီၤ. ဒီယကမၢ ပှၤဃဲၣ်လီၤအီၤဖဲန့ၣ် ဝံၤဒီးနက့ၤစိာ်အီၤသ့လီၤ. ဒီးမ့မ့ၢ်နၤတခီန့ၣ် နကဘၣ်ဟ့ၣ်လီၤ တၢ်အီၣ်တၢ်အီလၢ ယဃ့လၢ ပှၤလၢအအိၣ်ဟံၣ် တဖျၢၣ်ဃီဒီးယၤ အဂီၢ်လီၤ.”+
၁၀ အဃိ စီၤဃံရၣ် ဟ့ၣ်လီၤဝဲ စီၤၡလိၤမိၤ လၢသ့ၣ်ဆှိအ့ရ့း ဒီးသ့ၣ်ကၠူနံးဖၢၤ ဒ်အလီကီဝဲအသိး ခဲလၢာ်လီၤ.
၁၁ ဒီးစီၤၡလိၤမိၤ ဟ့ၣ်လီၤ စီၤဃံရၣ် ဘုကၠူၣ်အကိၢ် ၂၀,၀၀၀* ဒ်တၢ်အီၣ်အသိးလၢ ပှၤလၢအအိၣ်လၢ အဟံၣ်တဖျၢၣ်ဃီဒီးအီၤ အဂီၢ် ဒီးသ့ၣ်စၤယံးအသိ လၢအဂ့ၤကတၢၢ် အကိၢ်* ၂၀ လီၤ. တနံၣ်ဘၣ်တနံၣ်န့ၣ် စီၤၡလိၤမိၤ ဟ့ၣ်လီၤ စီၤဃံရၣ် တၢ်သ့ၣ်တဖၣ်န့ၣ်လီၤ.+
၁၂ ယဟိဝၤယွၤ ဟ့ၣ်လီၤဝဲ စီၤၡလိၤမိၤ တၢ်ကူၣ်သ့ ဒ်အအၢၣ်လီၤပာ်စၢၤ စီၤၡလိၤမိၤ အသိးလီၤ.+ ဒီးစီၤဃံရၣ် ဒီးစီၤၡလိၤမိၤ မၤဝဲ တၢ်အၢၣ်လီၤအီလီၤအဃိ လၢအဝဲသ့ၣ် အထံကီၢ်ခံဘ့ၣ် အဘၢၣ်စၢၤန့ၣ် တၢ်မုာ်တၢ်ခုၣ်အိၣ်ဝဲလီၤ.
၁၃ ဒီးလၢကီၢ်အံၣ်စရ့လး ဒီဘ့ၣ်ညါအပူၤန့ၣ် စီၤပၤၡလိၤမိၤ မၤလိာ် ပှၤပိာ်ခွါ အဂၤ ၃၀,၀၀၀ ဒ်ပှၤဘၣ် တၢ်မၢဆူၣ်အီၤလၢ ကမၤတၢ်မၤအဂီၢ် အသိးလီၤ.+
၁၄ ဒီးစီၤၡလိၤမိၤ ဆှၢလီၤအဝဲသ့ၣ်ဆူ လဘၤနိၣ် တလါန့ၣ် ပှၤကညီအဂၤ ၁၀,၀၀၀ လီၤ. ဒီးအဝဲသ့ၣ် အိၣ်ဘၣ်လၢ လဘၤနိၣ် တလါဝံၤ ဒီးက့ၤအိၣ်လၢ အဝဲသ့ၣ်အဟံၣ် ခံလါလီၤ. ဒီးစီၤအဒိၤနံရၣ်+ အိၣ်ဝဲလၢ ပှၤဘၣ်တၢ်မၢဆူၣ်အီၤလၢ ကမၤတၢ်မၤတဖၣ်အံၤ အဖီခိၣ်လီၤ.
၁၅ စီၤၡလိၤမိၤ အိၣ်ဒီး အပှၤအဂၤ ၇၀,၀၀၀ လၢအဝံတၢ်ယိးတၢ်ဃၢတဖၣ် ဒီးအပှၤဘူးတဲာ်လၢၢ်+ အဂၤ ၈၀,၀၀၀ လၢကစၢၢ်ကျါလီၤ.+
၁၆ တကးဒံးဘၣ် စီၤၡလိၤမိၤ အိၣ်စ့ၢ်ကီးဒီး ပှၤခိၣ်ပှၤနၢ်+ အဂၤ ၃,၃၀၀ လၢအကွၢ်ထွဲဝဲ ပှၤမၤတၢ်ဖိတဖၣ်လီၤ.
၁၇ ဒ်စီၤပၤ မၤလိာ်ဝဲအသိး အဝဲသ့ၣ်ခူၣ်န့ၢ်ဝဲ လၢၢ်ဖးဒိၣ် ဒီးလၢၢ်လၢ အပှ့ၤဒိၣ်တဖၣ်+ ဒ်သိး ကဆီလီၤဝဲ တၢ်လုၢ်ဟံၣ်အခီၣ်ထံး+ လၢလၢၢ်လၢအဘၣ် တၢ်ပျၤန့ၢ်အီၤတဖၣ် အဂီၢ်လီၤ.+
၁၈ စီၤၡလိၤမိၤ အပှၤသူၣ်ဟံၣ်ဖိ, စီၤဃံရၣ် အပှၤသူၣ်ဟံၣ်ဖိ ဒီးပှၤကံးဘလးဖိတဖၣ်+ ဘူးတဲာ်လၢၢ် ဒီးအဝဲသ့ၣ် ကတဲာ်ကတီၤပာ်စၢၤ သ့ၣ်ဘၣ်တဖၣ် ဒီးလၢၢ်တဖၣ် ဒ်သိးကတ့ထီၣ် တၢ်လုၢ်ဟံၣ်အဂီၢ်လီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “ဘုကၠူၣ် ၃,၂၀၀,၀၀၀ ကံလိ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
