၁ ကရံၣ်သူး ၃:၁-၂၃
-
ပှၤကရံၣ်သူးဖိတဖၣ် အိၣ်ဒီး ဟီၣ်ခိၣ်အတၢ်သူၣ်လီသးကွံဒံး (၁-၄)
-
ကစၢ်ယွၤ ဒုးဒိၣ်ထီၣ်တၢ် (၅-၉)
-
ပှၤလၢ အမၤသကိးတၢ်ဒီး ကစၢ်ယွၤ (၉)
-
-
သူၣ်ထီၣ်တၢ်ဒီး တၢ်ပီးတၢ်လီလၢ အတူၢ်မ့ၣ်အူန့ၢ် (၁၀-၁၅)
-
သုမ့ၢ် ကစၢ်ယွၤ အတၢ်လုၢ်ဟံၣ် (၁၆, ၁၇)
-
ဟီၣ်ခိၣ်အတၢ်ကူၣ်သ့န့ၣ် မ့ၢ်ဝဲတၢ်ကလီကလီလၢ ကစၢ်ယွၤအမဲာ်ညါ (၁၈-၂၃)
၃ အဃိ ဒီပုၢ်ဝဲၢ်သ့ၣ်ဧၢ, ယတဲတၢ်ဒီးသု ဒ်ယတဲတၢ်ဒီးပှၤလၢ သးစီဆှံ ဟံးစုနဲၣ်ကျဲအီၤတဖၣ်အသိး တသ့ဘၣ်.+ ယကဘၣ်တဲတၢ်ဒီးသု ဒ်ပှၤလၢအအိၣ်ဒီး ဟီၣ်ခိၣ် အတၢ်သူၣ်လီသးကွံအသိး+ ဒီးဒ်ဖိဒံဖိသၣ်လၢ ခရံာ်အပူၤအသိးလီၤ.
၂ မ့ၢ်လၢ သုတဒိၣ်တုာ်ခိၣ်ပှဲၤလၢ နီၢ်သးတခီ ဒံးဘၣ်အဃိ ယတဒုးအီၣ်သုလၢ တၢ်အီၣ်အသံးအကာ်ဘၣ်. ယဒုးအီသုလၢ တၢ်နုၢ်ထံလီၤ. ခဲအံၤဒၣ်လဲာ် သုတဒိၣ်တုာ်ခိၣ်ပှဲၤလၢ နီၢ်သးတခီဒံးဘၣ်,+
၃ မ့ၢ်လၢသုသးအိၣ် ဟီၣ်ခိၣ် အတၢ်သူၣ်လီသးကွံဒံး အဃိလီၤ.+ တၢ်သူၣ်က့ၣ်သးကါ ဒီးတၢ်အ့ၣ်လိာ်ဆိးက့ အိၣ်လၢသုကျါဒံးအဃိ သုအိၣ်ဒီးဟီၣ်ခိၣ် အတၢ်သူၣ်လီသးကွံ+ ဒီးသုအိၣ်မူဒ်သိးဒီး ပှၤတၢ်ချၢတဖၣ် တမ့ၢ်ဧီၤ.
၄ ဖဲပှၤတဂၤတဲလၢ “ယမ့ၢ်စီၤပီလူးအပျဲၢ်” ဘၣ်ဆၣ် အဂၤတဂၤတဲလၢ “ယမ့ၢ်စီၤအပီးလိၤအပျဲၢ်”+ အခါ မ့ၢ်သုတလီၤဂာ်ဒီး ပှၤတၢ်ချၢတဖၣ်ဧီၤ.
၅ မ့မ့ၢ်ဒ်န့ၣ်န့ၣ် စီၤအပီးလိၤ မ့ၢ်မတဂၤလဲၣ်. ဒီးစီၤပီလူး မ့ၢ်မတဂၤလဲၣ်. ပဝဲဒၣ်အံၤ ပမ့ၢ်ဒၣ်တၢ်အခ့အပှၤလၢ+ ကစၢ်ဟ့ၣ်လီၤပှၤ တၢ်မၤတဂၤစုာ်စုာ် ဒီးသုကဲထီၣ် ပှၤစူၢ်က့ၤနာ်က့ၤတၢ် ခီဖျိလၢပှၤလီၤ.
၆ ယသူၣ်လီၤတၢ်+ ဒီးစီၤအပီးလိၤ လူအထံ+ မ့မ့ၢ် ကစၢ်ယွၤန့ၣ် ဒုးဒိၣ်ထီၣ်တၢ် ကွ့ၢ်ကွ့ၢ်လီၤ.
၇ အဃိ ပှၤလၢအသူၣ်လီၤတၢ်မ့ၢ်ဂ့ၤ, ပှၤလၢအလူထံမ့ၢ်ဂ့ၤ တမ့ၢ်တၢ်နီတမံၤဘၣ်. ကစၢ်ယွၤမ့ၢ်ပှၤလၢ အဒုးဒိၣ်ထီၣ်တၢ်လီၤ.+
၈ ပှၤလၢအသူၣ်လီၤတၢ် ဒီးပှၤလၢအလူထံန့ၣ် မ့ၢ်တၢ်တမံၤဃီလီၤ.* ဘၣ်ဆၣ် ပှၤတဂၤစုာ်စုာ် ကန့ၢ်ဘၣ်ခိၣ်ဖး ဒ်တၢ်လၢအမၤဝဲအသိးလီၤ.+
၉ ပမ့ၢ်ပှၤလၢ အမၤသကိးတၢ်ဒီး ကစၢ်ယွၤလီၤ. ဒီးသုမ့ၢ်ကစၢ်ယွၤ အစံာ်ပျီလၢ အဝဲသူၣ်လီၤဖျးလီၤ တၢ်လၢအပူၤ ဒီးကစၢ်ယွၤ အတၢ်သူၣ်ထီၣ်လီၤ.+
၁၀ ခီဖျိလၢ ကစၢ်ယွၤပာ်ဖျါထီၣ် တၢ်သးကညီၤဒိၣ်ဒိၣ်မုၢ်မုၢ် လၢယဖီခိၣ်အဃိ ယပာ်လီၤ တၢ်သူၣ်ထီၣ်အခီၣ်ထံး+ ဒ်ပှၤသူၣ်ထီၣ်ဘှီထီၣ်တၢ် သ့ဂ့ၤဂ့ၤတဂၤအသိးလီၤ. ဘၣ်ဆၣ် ပှၤလၢအဂၤတဂၤ သူၣ်ထီၣ်တၢ်လၢအဖီခိၣ်လီၤ. ဒီးပှၤသူၣ်ထီၣ်တၢ်လၢအဖီခိၣ် ဒ်လဲၣ်ဒ်လဲၣ်န့ၣ် မ်အဝဲသ့ၣ်ကိးဂၤဒဲး ပလီၢ်အသးတက့ၢ်.
၁၁ ယ့ၣ်ၡူးခရံာ်မ့ၢ်ဝဲ တၢ်သူၣ်ထီၣ်အခီၣ်ထံးလၢ အဘၣ်တၢ်ပာ်လီၤအီၤ တခါအံၤလီၤ. ဒီးပှၤပာ်လီၤ တၢ်သူၣ်ထီၣ်အခီၣ်ထံး လၢအဂုၤအဂၤ တသ့နီတမံၤဘၣ်.+
၁၂ ဒီးပှၤမ့ၢ်သူၣ်ထီၣ်တၢ်လၢ ထူ, စ့, လၢၢ်လၢ အလုၢ်ဒိၣ်ပှ့ၤဒိၣ်တဖၣ်, သ့ၣ်, နီၣ်ဃ့ မ့တမ့ၢ် လီၢ်ဘိလၢ တၢ်သူၣ်ထီၣ်အခီၣ်ထံး အဖီခိၣ်န့ၣ်
၁၃ ပှၤတဂၤစုာ်စုာ် အတၢ်မၤ မ့ၢ်ဒ်လဲၣ်န့ၣ် ကအိၣ်ဖျါထီၣ်ဝဲ ဖဲတၢ်မၤကွၢ်အမုၢ်နံၤလီၤ. ဖဲမုၢ်နံၤအဝဲန့ၣ် မ့ၣ်အူကပာ်ဖျါထီၣ်လၢ ပှၤတဂၤစုာ်စုာ် အတၢ်မၤ မ့ၢ်ဒ်လဲၣ်န့ၣ်လီၤ.+ ဒီးတၢ်သူၣ်ထီၣ်လၢ ပှၤတဂၤစုာ်စုာ် မၤတ့ၢ်ဝဲ မ့ၢ်အဂ့ၤထဲလဲၣ်န့ၣ် မ့ၣ်အူ ကပာ်ဖျါထီၣ်ဝဲလီၤ.
၁၄ တၢ်လၢ ပှၤတဂၤဂ့ၤတဂၤဂ့ၤ သူၣ်ထီၣ်ဝဲလၢ တၢ်သူၣ်ထီၣ်အခီၣ်ထံးအံၤ အဖီခိၣ် မ့ၢ်အိၣ်ဂၢၢ်ဆိးကျၢၤဝဲန့ၣ် အကဒိးန့ၢ်ဘၣ် ခိၣ်ဖးလီၤ.
၁၅ မ့ၣ်အူမ့ၢ်အီၣ်ကွံာ် ပှၤတဂၤဂ့ၤတဂၤဂ့ၤ အတၢ်မၤန့ၣ် အဝဲကၡူကွံာ်ဝဲလီၤ. ဘၣ်ဆၣ် အနီၢ်ကစၢ်န့ၣ် ကပူၤဖျဲးဝဲဒ် ပှၤလၢ အဘၣ်တၢ်မၤပူၤဖျဲးအီၤလၢ မ့ၣ်အူပူၤအသိးလီၤ.
၁၆ သုမ့ၢ် ကစၢ်ယွၤအတၢ်လုၢ်ဟံၣ်+ ဒီးကစၢ်ယွၤအသးစီဆှံ အိၣ်ဝဲလၢသုပူၤန့ၣ် မ့ၢ်သုတသ့ၣ်ညါဧီၤ.+
၁၇ ကစၢ်ယွၤ အတၢ်လုၢ်ဟံၣ်န့ၣ် စီဆှံဝဲအဃိ ပှၤတဂၤဂ့ၤတဂၤဂ့ၤ မ့ၢ်မၤဟးဂီၤကစၢ်ယွၤ အတၢ်လုၢ်ဟံၣ်န့ၣ် ကစၢ်ယွၤ ကမၤဟးဂီၤအီၤလီၤ. ဒီးသုဝဲသ့ၣ်အံၤ သုမ့ၢ်တၢ်လုၢ်ဟံၣ် အဝဲန့ၣ်လီၤ.+
၁၈ ပှၤတဘၣ်လံၣ်န့ၢ်လီန့ၢ်လီၤ အနီၢ်ကစၢ်အသး နီတဂၤဘၣ်. ပှၤလၢ သုကျါတဂၤဂၤ မ့ၢ်ဆိကမိၣ်လီၤ အသးလၢ အမ့ၢ်ပှၤကူၣ်တၢ်သ့ ဒ်ဟီၣ်ခိၣ် အတၢ်ထံၣ် အိၣ်ဝဲအသိးန့ၣ် ဒ်သိး အဝဲကကဲထီၣ် ပှၤကူၣ်တၢ်သ့နီၢ်ကီၢ်အဂီၢ် မ်အဝဲကဲထီၣ် ပှၤတကျၢတခီဘၣ်တက့ၢ်.
၁၉ ဟီၣ်ခိၣ်အံၤ အတၢ်ကူၣ်သ့န့ၣ် မ့ၢ်တၢ်ကလီကလီလၢ ကစၢ်ယွၤအမဲာ်ညါလီၤ. ဒ်တၢ်ကွဲးအသးအိၣ်ဝဲအသိး “ကစၢ်ယွၤမၤလီၤဃံၢ် ပှၤကူၣ်တၢ်သ့လၢ အဝဲသ့ၣ်အနီၢ်ကစၢ် အပျံၤသကွီၤအပူၤလီၤ.”+
၂၀ တကးဒံးဘၣ် “ယဟိဝၤယွၤ* သ့ၣ်ညါဝဲလၢ ပှၤကူၣ်တၢ်သ့တဖၣ် အတၢ်ကူၣ်ထီၣ်ဖးလီၤန့ၣ် မ့ၢ်တၢ်ကလီကလီလီၤ.”+
၂၁ အဃိ မ်ပှၤသု တပာ်ကဖၢလၢအသးလၢ ပှၤကညီအဃိတဂ့ၤ. နီၢ်ကီၢ်န့ၣ် တၢ်ခဲလၢာ်မ့ၢ်ဒၣ် သုတၢ်လီၤ.
၂၂ စီၤပီလူးမ့ၢ်ဂ့ၤ, စီၤအပီးလိၤမ့ၢ်ဂ့ၤ, စီၤက့ၤဖး* မ့ၢ်ဂ့ၤ,+ ဟီၣ်ခိၣ်မ့ၢ်ဂ့ၤ, တၢ်မူမ့ၢ်ဂ့ၤ, တၢ်သံမ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢ အကဟဲခါဆူညါမ့ၢ်ဂ့ၤ, တၢ်ခဲလၢာ်န့ၣ် မ့ၢ်သုတၢ်လီၤ.
၂၃ သု မ့ၢ်ခရံာ်အတၢ်+ ဒီးခရံာ် မ့ၢ်ဝဲ ကစၢ်ယွၤ အတၢ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်တိာ်ပာ်တမံၤဃီ.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ဘၣ်တၢ်ကိးစ့ၢ်ကီးအီၤလၢ စီၤပ့းတရူး.
