ဧ့ၤဘြံၤ ၈:၁-၁၃
၈ တၢ်လၢပတဲန့ၣ် အတၢ်ဂ့ၢ်မိၢ်ပှၢ်မ့ၢ်ဒ်အံၤလီၤ. ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ် ဒ်အံၤတဂၤလၢ+ အဆ့ၣ်နီၤဝဲလၢမူခိၣ် လၢတၢ်ကဟုကညီၢ်ကစၢ်တဂၤ အလီၢ်ပစိာ် အစုထွဲတခီလီၤ.+
၂ ဒီးအဝဲမ့ၢ်ဝဲ ဒဲနီၢ်ကီၢ် အတၢ်လီၢ်စီဆှံကတၢၢ်န့ၣ်+ အခ့အပှၤလီၤ. ဒဲအံၤ ယဟိဝၤယွၤ* သူၣ်ထီၣ်ဝဲဒီး တမ့ၢ်လၢ ပှၤဟီၣ်ခိၣ်ဖိ သူၣ်ထီၣ်ဝဲဘၣ်.
၃ ပှၤလုၢ်တၢ်ခိၣ်အဒိၣ်ကတၢၢ် ကိးဂၤဒဲးန့ၣ် ဘၣ်တၢ်ပာ်ထီၣ်အီၤ ဒ်သိး အကလုၢ်ထီၣ်တၢ်ဟ့ၣ် ဒီးတၢ်လုၢ်တၢ်ပာ်တဖၣ်လီၤ. လၢတၢ်န့ၣ်အဃိ ယ့ၣ်ၡူးစ့ၢ်ကီး လိၣ်လၢအကလုၢ်ထီၣ် တၢ်တမံၤမံၤလီၤ.+
၄ ဘၣ်ဆၣ် အဝဲမ့ၢ်အိၣ်လၢ ဟီၣ်ခိၣ်ချၢန့ၣ် အတကဲထီၣ်ဘၣ် ပှၤလုၢ်တၢ်ဒိၣ်ဘၣ်,+ မ့ၢ်လၢ ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး ပှၤလုၢ်တၢ်ဒိၣ်အဂၤတဖၣ်လၢ အလုၢ်ထီၣ်တၢ်န့ၣ် အိၣ်ပာ်စၢၤလံအဃိလီၤ.
၅ တၢ်မၤစီဆှံလၢ အဝဲသ့ၣ် မၤဝဲတဖၣ်န့ၣ် ကဲဝဲတၢ်အဒိ ဒီးတၢ်အကဒုလၢ+ အပာ်ဖျါထီၣ် တၢ်လၢအဘၣ်ဃးဒီးမူခိၣ်လီၤ.+ တၢ်အဝဲအံၤ ဘၣ်တၢ်ပာ်ဖျါထီၣ်အီၤ ဖဲစီၤမိၤၡ့ ကတ့ထီၣ်ဒဲအခါ အဒိးန့ၢ်ဘၣ် တၢ်မၤလိာ်လၢ ကစၢ်ယွၤအအိၣ်လၢ “တ့ထီၣ် တၢ်ခဲလၢာ် ဒ်တၢ်အဒိလၢ ယဒုးနဲၣ်နၤလၢ ကစၢၢ်လိၤအသိးတက့ၢ်.”+
၆ မ့မ့ၢ်ခဲအံၤန့ၣ် ယ့ၣ်ၡူးဒိးန့ၢ်ဘၣ် တၢ်မၤလၢအဂ့ၤဒိၣ်ဝဲ မ့ၢ်လၢ အဝဲမ့ၢ်စ့ၢ်ကီး ပှၤလၢအမၤစၢၤတၢ်လၢ ပှၤခံခီအဘၢၣ်စၢၤ+ လၢအဘၣ်ဃးဒီး တၢ်အၢၣ်လီၤအီလီၤလၢ အဂ့ၤဒိၣ်ဝဲအဃိလီၤ.+ တၢ်အၢၣ်လီၤအီလီၤအံၤ ဘၣ်တၢ်ဒုးအိၣ်ထီၣ်အီၤ ဒ်တၢ်သိၣ်တၢ်သီအိၣ်ဝဲအသိး ဒီးတၢ်သူၣ်ထီၣ်အီၤလၢ တၢ်စံးပာ်လၢ အဂ့ၤဒိၣ်ဝဲတဖၣ် အဖီခိၣ်လီၤ.+
၇ တၢ်အၢၣ်လီၤအီလီၤ အဆိကတၢၢ်တခါ အတၢ်လီၤတူာ်လီၤကာ် မ့ၢ်တအိၣ်ဘၣ်န့ၣ် တလိၣ်ဒုးအိၣ်ထီၣ် အဂၤတခါလၢၤဘၣ်.+
၈ ဘၣ်ဆၣ် ကစၢ်ယွၤပာ်တၢ်ကမၣ်လၢ ပှၤဂီၢ်မုၢ်အလိၤ ခီဖျိအတဲဝဲလၢ “ယၤ, ယဟိဝၤယွၤတဲဝဲလၢ ‘မုၢ်နံၤတဖၣ်ကဟဲဝဲ ဖဲယကမၤ တၢ်အၢၣ်လီၤအီလီၤအသီဒီး အံၣ်စရ့လးအပှၤဂီၢ်မုၢ် ဒီးယူဒၤအပှၤဂီၢ်မုၢ်လီၤ.’
၉ ဒီးယဟိဝၤယွၤ တဲဝဲလၢ ‘အတလီၤဂာ်ဒ်သိးဒီး တၢ်အၢၣ်လီၤအီလီၤလၢ ယမၤတ့ၢ်ဒီး အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဖဲမုၢ်နံၤလၢ ယဖီၣ်ဃာ် အဝဲသ့ၣ်အစု ဒီးထုးထီၣ်ကွံာ်အဝဲသ့ၣ်လၢ ကီၢ်အဲၤကူပတူးအပူၤဘၣ်.+ မ့ၢ်လၢ အဝဲသ့ၣ် ကွၢ်ကပာ်ကွံာ် ယတၢ်အၢၣ်လီၤအီလီၤအဃိ ယတသးအိၣ် အဝဲသ့ၣ်လၢၤဘၣ်.’
၁၀ “ယဟိဝၤယွၤ တဲဝဲလၢ ‘လၢမုၢ်နံၤတဖၣ်န့ၣ် ဝံၤအလီၢ်ခံ ယကမၤ တၢ်အၢၣ်လီၤအီလီၤအံၤ ဒီးအံၣ်စရ့လးအပှၤဂီၢ်မုၢ်လီၤ. ယကပၢနုာ်လီၤ ယတၢ်သိၣ်တၢ်သီတဖၣ်လၢ အဝဲသ့ၣ် အတၢ်ဆိကမိၣ်အပူၤ ဒီးယကကွဲးလီၤအီၤလၢ အဝဲသ့ၣ်အသးလိၤလီၤ.+ ယကကဲထီၣ် အဝဲသ့ၣ်အကစၢ်ယွၤ ဒီးအဝဲသ့ၣ် ကကဲထီၣ် ယပှၤဂီၢ်မုၢ်လီၤ.’”+
၁၁ “‘ဒီးအဝဲသ့ၣ်ကိးဂၤဒဲး စးထီၣ်လၢ ပှၤအဒိၣ်ကတၢၢ် တုၤလၢ ပှၤအဆံးကတၢၢ်န့ၣ် ကသ့ၣ်ညါယၤလီၤ. အဃိ အဝဲသ့ၣ်တလိၣ်သိၣ်လိ အပှၤထံဖိကီၢ်ဖိ ကဒဲကဒဲ ဒီးအဒီပုၢ်ဝဲၢ် ကဒဲကဒဲလၢ “သုကဘၣ် သ့ၣ်ညါ ယဟိဝၤယွၤ” န့ၣ်လၢၤဘၣ်.
၁၂ ဒီးလၢတၢ်သးကညီၤအပူၤ ယကပျၢ်ကွံာ် အဝဲသ့ၣ် အတၢ်ကမၣ် ဒီးယတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးလၢၤဘၣ်.’”+
၁၃ ခီဖျိ အတဲဝဲလၢ “တၢ်အၢၣ်လီၤအီလီၤအသီ” အဃိန့ၣ် မ့ၢ်ဒၣ်အဝဲဒုးကဲထီၣ် တၢ်အၢၣ်လီၤအီလီၤ လၢညါတခါလၢ တၢ်လၢအလီၢ်လံၤလီၤ.+ ဒီးတၢ်တမံၤမံၤ မ့ၢ်လီၢ်လံၤဝဲ ဒီးပှၢ်ထီၣ်ဝဲလံန့ၣ် တယံာ်ဘၣ်ဒီး အကလီၤမၢ်ကွံာ်ဝဲလီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
