ရိမ့ၤ ၄:၁-၂၅
၄ မ့မ့ၢ်ဒ်န့ၣ်န့ၣ် ဘၣ်ဃးဒီးပဖုဖးဒိၣ် စီၤအၤဘြၤဟၣ်လၢ ပဟဲလီၤစၢၤလီၤသွဲၣ်လၢအီၤတဂၤန့ၣ် ပကတဲဒ်လဲၣ်.
၂ အဒိ စီၤအၤဘြၤဟၣ် မ့ၢ်ဘၣ်တၢ်ပာ်တီပာ်လိၤအီၤ ခီဖျိလၢ အတၢ်မၤအဃိန့ၣ် အဝဲပာ်ကဖၢလၢအသး အလီၢ်ကအိၣ်ဝဲ ဘၣ်ဆၣ် တမ့ၢ်လၢ ကစၢ်ယွၤအမဲာ်ညါဘၣ်.
၃ တၢ်ကွဲးအသးအိၣ်ဝဲဒ်လဲၣ်. “စီၤအၤဘြၤဟၣ် နာ်ယဟိဝၤယွၤ* အဃိ အဝဲဘၣ်တၢ်ပာ်ပနီၣ်အီၤ ဒ်ပှၤတီပှၤလိၤ အသိးလီၤ.”+
၄ တၢ်အဘူးအလဲလၢ ပှၤမၤတၢ်ဖိတဂၤ ဒိးန့ၢ်ဘၣ်ဝဲန့ၣ် ပှၤတပာ်ပနီၣ်အီၤဒ် တၢ်ဟ့ၣ်တမံၤ* အသိးဘၣ်. ပှၤပာ်ပနီၣ်အီၤဒ်တၢ်လၢ အဝဲကြၢးဒိးန့ၢ်ဘၣ်ဝဲ* အသိးလီၤ.
၅ ဘၣ်ဆၣ် ပှၤလၢ အတမၤတၢ်ဘၣ်တဂၤ မ့ၢ်နာ်ဝဲ ကစၢ်ယွၤလၢ အပာ်တီပာ်လိၤ ပှၤအၢပှၤသီန့ၣ် လၢအတၢ်နာ်အံၤအဃိ အဝဲဘၣ်တၢ်ပာ်ပနီၣ်အီၤဒ် ပှၤတီပှၤလိၤ အသိးလီၤ.+
၆ စီၤဒၤဝံး တဲစ့ၢ်ကီးဝဲလၢ ကစၢ်ယွၤမ့ၢ်ပာ်ပနီၣ် ပှၤတဂၤဒ်ပှၤတီပှၤလိၤအသိး လၢအတမ့ၢ်ခီဖျိ တၢ်မၤအဃိဘၣ်န့ၣ် ပှၤတဂၤန့ၣ် ကသးခုဝဲလီၤ. စီၤဒၤဝံး တဲဝဲလၢ
၇ “ပှၤလၢအတၢ်ကမၣ် ဘၣ်တၢ်ပျၢ်ကွံာ်အီၤ ဒီးပှၤလၢအတၢ်ဒဲးဘး ဘၣ်တၢ်ကျၢၢ်ဘၢအီၤန့ၣ် ကသးခုဝဲလီၤ.
၈ ပှၤလၢ ယဟိဝၤယွၤ တဟံးန့ၢ်အရ့လၢ အတၢ်ဒဲးဘးအဃိဘၣ်န့ၣ် ကသးခုဝဲလီၤ.”+
၉ မ့မ့ၢ်ဒ်န့ၣ်န့ၣ် တၢ်သးခုအံၤ ထဲဒၣ်ပှၤလၢအဘၣ် တၢ်ကူးတရံးတဖၣ်အဂီၢ်လီၤဧါ. မ့တမ့ၢ် ပှၤလၢအတဘၣ် တၢ်ကူးတရံးဘၣ်တဖၣ် အဂီၢ်စ့ၢ်ကီးဧါ.+ ဒ်ပတဲအသိး “စီၤအၤဘြၤဟၣ် ဘၣ်တၢ်ပာ်ပနီၣ်အီၤဒ် ပှၤတီပှၤလိၤအသိး ခီဖျိလၢ အတၢ်နာ်အဃိလီၤ.”+
၁၀ မ့မ့ၢ်ဒ်န့ၣ်န့ၣ် အဝဲဘၣ်တၢ်ပာ်ပနီၣ်အီၤဒ် ပှၤတီပှၤလိၤအသိး လၢအခါဖဲလဲၣ်. ဖဲအဝဲ ဘၣ်တၢ်ကူးတရံး ဝံၤအခါဧါ မ့တမ့ၢ် ဖဲအဝဲတဘၣ် တၢ်ကူးတရံးဒံးဘၣ် အခါဧါ. ဘၣ်ဖဲအဝဲ တဘၣ်တၢ်ကူးတရံးဒံးဘၣ် အခါလီၤ.
၁၁ ဒီးကစၢ်ယွၤ မၢစီၤအၤဘြၤဟၣ် ဒိးတၢ်ကူးတရံးလီၤ. တၢ်ကူးတရံးအံၤ မ့ၢ်ဝဲတၢ်ပနီၣ်လၢ အပာ်ဖျါထီၣ်လၢ ကစၢ်ယွၤ ပာ်ပနီၣ်အီၤ+ ဒ်ပှၤတီပှၤလိၤအသိး လၢအတၢ်နာ်အဃိ ဖဲအဝဲတဒိးဘၣ် တၢ်ကူးတရံးဒံးဘၣ် အခါလီၤ. အဃိ အဝဲကဲထီၣ် ပှၤလၢ အအိၣ်ဒီးတၢ်နာ်လၢ+ အတဒိးတၢ်ကူးတရံးဘၣ် ကိးဂၤဒဲးအပၢ် ဒ်သိးကစၢ်ယွၤ ကပာ်ပနီၣ်အဝဲသ့ၣ် ဒ်ပှၤတီပှၤလိၤအသိး အဂီၢ်လီၤ.
၁၂ တကးဒံးဘၣ် အဝဲကဲထီၣ် ပှၤလၢ အဒိးတၢ်ကူးတရံးတဖၣ် အပၢ်စ့ၢ်ကီးလီၤ. ဘၣ်ဆၣ် အဝဲတကဲထီၣ်ထဲ ပှၤလၢအဒိးတၢ်ကူးတရံးတဖၣ် အပၢ်ဘၣ်. အဝဲကဲထီၣ်စ့ၢ်ကီး ပှၤလၢ အအိၣ်မူမၤထွဲဒ် အတၢ်နာ်အသိးတဖၣ်န့ၣ် အပၢ်လီၤ. ဖဲပပၢ်စီၤအၤဘြၤဟၣ်+ တချုးဒိးတၢ်ကူးတရံးဒံးဘၣ်အခါ အပာ်ဖျါထီၣ်တၢ်နာ်လီၤ.
၁၃ စီၤအၤဘြၤဟၣ်မ့ၢ်ဂ့ၤ, အချံအသၣ်မ့ၢ်ဂ့ၤ ဒိးန့ၢ်ဘၣ် တၢ်အၢၣ်လီၤလၢ အကန့ၢ်သါဘၣ်ဟီၣ်ခိၣ်န့ၣ် တမ့ၢ်ခီဖျိလၢ တၢ်သိၣ်တၢ်သီအဃိဘၣ်.+ မ့ၢ်ဝဲ ခီဖျိလၢ အဝဲအိၣ်ဒီးတၢ်နာ် ဒီးအဘၣ်တၢ်ပာ်ပနီၣ်အီၤ ဒ်ပှၤတီပှၤလိၤအသိး အဃိလီၤ.+
၁၄ ပှၤလၢအမၤထွဲ စီၤမိၤၡ့ အတၢ်သိၣ်တၢ်သီ မ့မ့ၢ်ပှၤန့ၢ်သါဘၣ်တၢ်န့ၣ် တၢ်စူၢ်တၢ်နာ် အဘျုးတအိၣ်လၢၤဘၣ် ဒီးတၢ်အၢၣ်လီၤန့ၣ် ဟးဂီၤဝဲလီၤ.
၁၅ နီၢ်ကီၢ်န့ၣ် စီၤမိၤၡ့ အတၢ်သိၣ်တၢ်သီ ဒုးအိၣ်ထီၣ်ဝဲ ကစၢ်ယွၤ အတၢ်သးထီၣ်+ ဘၣ်ဆၣ် တၢ်သိၣ်တၢ်သီ မ့ၢ်တအိၣ်ဘၣ်န့ၣ် တၢ်မၤကမၣ် တၢ်သိၣ်တၢ်သီ တအိၣ်စ့ၢ်ကီးဘၣ်.+
၁၆ စီၤအၤဘြၤဟၣ် ဒိးန့ၢ်ဘၣ် တၢ်အၢၣ်လီၤ ခီဖျိလၢ အတၢ်နာ်အဃိ ဒီးကစၢ်ယွၤဟ့ၣ်လီၤ တၢ်အၢၣ်လီၤအံၤန့ၣ် ဒိးသန့ၤထီၣ်အသးလၢ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ်+ အဖီခိၣ်လီၤ. အဃိ တၢ်အၢၣ်လီၤအံၤ ကဟဲလၢထီၣ်ပှဲၤထီၣ်ဝဲလၢ အချံအသၣ်ခဲလၢာ်အဂီၢ် သပှၢ်တၢၢ်လီၤ.+ ဒီးတမ့ၢ်ထဲ ပှၤလၢအမၤထွဲ စီၤမိၤၡ့ အတၢ်သိၣ်တၢ်သီတဖၣ် အဂီၢ်ဘၣ်. မ့ၢ်ဝဲလၢ ပှၤလၢအအိၣ်မူမၤထွဲဒ် စီၤအၤဘြၤဟၣ်အတၢ်နာ်အသိး အဂီၢ်စ့ၢ်ကီးလီၤ. စီၤအၤဘြၤဟၣ် မ့ၢ်ဝဲ ပဝဲခဲလၢာ် အပၢ်လီၤ.+
၁၇ (တၢ်ကွဲးအသး အိၣ်ဝဲလၢ “ယဒုးကဲထီၣ်နၤလၢ ပှၤအါကလုာ်အပၢ်လီၤ.”)+ စီၤအၤဘြၤဟၣ် ပာ်ဖျါထီၣ်အတၢ်နာ်အံၤလၢ ကစၢ်ယွၤ အမဲာ်ညါလီၤ. ကစၢ်ယွၤမ့ၢ်ပှၤလၢ အမၤသမူထီၣ်ပှၤသံ ဒီးအဝဲကိးဝဲ တၢ်လၢအတအိၣ်ဒံးဘၣ် ဒ်တၢ်လၢအအိၣ်ဝဲလံ အသိးလီၤ.
၁၈ တၢ်မုၢ်လၢ်လၢအကထီၣ်ဖိအဂီၢ် တအိၣ်လၢၤဘၣ် သနာ်က့ စီၤအၤဘြၤဟၣ် မုၢ်လၢ်တၢ် ဒီးအဝဲအိၣ်ဒီးတၢ်နာ်လၢ အကကဲထီၣ် ပှၤအါကလုာ်အပၢ် ဒ်တၢ်စံးပာ်အိၣ်ဝဲအသိးလၢ “နချံနသၣ် ကအါထီၣ်ဝဲ အါအါဂီၢ်ဂီၢ်လီၤ.”+
၁၉ ဒီးအတၢ်နာ်တလီၤစၢ်ဘၣ် သနာ်က့ မ့ၢ်လၢအသးနံၣ်အိၣ်ဝဲ ၁၀၀ ဃၣ်ဃၣ်+ အဃိ အဝဲနၢ်ပၢၢ်လၢ အထီၣ်ဖိတန့ၢ်လၢၤဘၣ် ဒီးနီၢ်စၤရါစ့ၢ်ကီး အဟုးတုာ်လံ.+
၂၀ ဘၣ်ဆၣ် လၢကစၢ်ယွၤ အတၢ်အၢၣ်လီၤအဖီခိၣ်န့ၣ် အသးတဒ့ဒီဘၣ် ဒီးအတၢ်နာ်တလီၤမၢ်ဘၣ်. လၢတၢ်န့ၣ်အလီၢ် ခီဖျိလၢ အတၢ်နာ်အဃိ အဝဲပှဲၤဒီးတၢ်ဂံၢ်တၢ်ဘါ ဒီးမၤလၤကပီၤဝဲ ကစၢ်ယွၤလီၤ.
၂၁ ဒီးကစၢ်ယွၤမၤလၢထီၣ်ပှဲၤထီၣ် အတၢ်အၢၣ်လီၤသ့ဝဲန့ၣ် အဝဲနာ်ဝဲလၢ အသးဒီဖျၢၣ်လီၤ.+
၂၂ အဃိ “အဝဲဘၣ် တၢ်ပာ်ပနီၣ်အီၤ ဒ်ပှၤတီပှၤလိၤအသိးလီၤ.”+
၂၃ ဘၣ်ဆၣ် တၢ်ကတိၤလၢ အမ့ၢ် “အဝဲဘၣ်တၢ်ပာ်ပနီၣ်အီၤ” န့ၣ် တဘၣ်တၢ်ကွဲးလီၤအီၤထဲလၢ စီၤအၤဘြၤဟၣ်အဂီၢ်ဘၣ်.+
၂၄ ဘၣ်တၢ်ကွဲးစ့ၢ်ကီးအီၤလၢ ပဂီၢ်လီၤ. ပဝဲစ့ၢ်ကီး ပကဘၣ်တၢ်ပာ်ပနီၣ်ပှၤ ဒ်ပှၤတီပှၤလိၤတဖၣ် အသိး, မ့ၢ်လၢပနာ် ပှၤတဂၤလၢ အဒုးဂဲၤဆၢထၢၣ်က့ၤ ပကစၢ်ယ့ၣ်ၡူးလၢ တၢ်သံအဃိလီၤ.+
၂၅ ကစၢ်ယွၤဟ့ၣ်လီၤကွံာ် ယ့ၣ်ၡူးလၢ ပတၢ်ဒဲးဘးအဂီၢ်+ ဒီးကစၢ်ယွၤ ဒုးဂဲၤဆၢထၢၣ်က့ၤအီၤ ဒ်သိးအကပာ်တီပာ်လိၤပှၤ အဂီၢ်လီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “တၢ်သးကညီၤ ဒိၣ်ဒိၣ်မုၢ်မုၢ်.”
^ မ့ၢ်စ့ၢ်ကီး “ဒ့ၣ်ကမၢ်.”
