ရိမ့ၤ ၂:၁-၂၉
၂ လၢတၢ်န့ၣ်အဃိ ဒီပုၢ်ဝဲၢ်ဧၢ, နစံၣ်ညီၣ်ပှၤဂၤဘၣ်ဆၣ် တၢ်လၢ အဝဲသ့ၣ်မၤဝဲန့ၣ် နမၤတလီၢ်လီၢ်အဃိ+ နမ့ၢ်ပှၤဒ်လဲၣ်ဂ့ၤ ဒ်လဲၣ်ဂ့ၤ+ သနာ်က့ နတဲပူၤဖျဲးနသး တသ့ဘၣ်. ဖဲနစံၣ်ညီၣ်ပှၤဂၤအခါ မ့ၢ်ဒၣ်နစံၣ်ညီၣ်လီၤက့ၤ နနီၢ်ကစၢ်အသးလီၤ.
၂ ပသ့ၣ်ညါလၢ ကစၢ်ယွၤစံၣ်ညီၣ်ဝဲ ပှၤလၢအမၤဝဲ ဒ်အံၤတဖၣ် ဒီးကစၢ်ယွၤစံၣ်ညီၣ်တၢ် တီတီလိၤလိၤလီၤ.*
၃ ဒီပုၢ်ဝဲၢ်ဧၢ, နစံၣ်ညီၣ်ပှၤဂၤလၢ အမၤတၢ်သ့ၣ်တဖၣ်အံၤ ဘၣ်ဆၣ် နနီၢ်ကစၢ်စ့ၢ်ကီး နမၤဒ်အဝဲသ့ၣ် အသိးအဃိ မ့ၢ်နဆိကမိၣ်လၢ နကပူၤဖျဲးဒီး ကစၢ်ယွၤ အတၢ်စံၣ်ညီၣ်ဧါ.
၄ မ့တမ့ၢ်ဘၣ်န့ၣ် မ့ၢ်နသးဘၣ်အၢ ကစၢ်ယွၤ အတၢ်သူၣ်ဂ့ၤသးဝါ,+ အတၢ်ပၢၤသူၣ်ပၢၤသး+ ဒီးအတၢ်ဝံသးစူၤလၢ+ အဒိၣ်ဝဲအါဝဲန့ၣ်ဧါ. ကစၢ်ယွၤန့ၣ် အသူၣ်ဂ့ၤသးဝါ ဒီးအဲၣ်ဒိးမၤစၢၤနၤ ဒ်သိးနကပီၢ်ယၢ်လီၤက့ၤသးန့ၣ် မ့ၢ်နတသ့ၣ်ညါဘၣ်ဧါ.+
၅ ဘၣ်ဆၣ် မ့ၢ်လၢနခိၣ်ကိၤဒီး နတအဲၣ်ဒိး ပီၢ်ယၢ်လီၤက့ၤနသးဘၣ်အဃိ မ့ၢ်ဒၣ် နပာ်ဖှိၣ်အါထီၣ် တၢ်သးဒိၣ်လၢနဂီၢ် လၢတၢ်သးဒိၣ် အမုၢ်နံၤအတီၢ်ပူၤ ဖဲကစၢ်ယွၤ အတၢ်စံၣ်ညီၣ်လၢအတီ ကဘၣ် တၢ်လီၣ်ဖျါထီၣ်အီၤအခါလီၤ.+
၆ ဒီးအဝဲ ကဟ့ၣ်ကၣ်က့ၤ ပှၤတဂၤစုာ်စုာ်ဒ် တၢ်လၢအဝဲသ့ၣ် မၤတ့ၢ်ဝဲအသိးလီၤ.+
၇ ပှၤလၢ အဆဲးမၤတၢ်ဂ့ၤန့ၣ် အဝဲကဟ့ၣ်ဝဲ တၢ်မူအထူအယိာ်လီၤ. ပှၤဒ်အံၤတဖၣ်န့ၣ် ဃုတၢ်လၤတၢ်ကပီၤ ဒီးတၢ်ယူးယီၣ် ဒီးဃုစ့ၢ်ကီး သးသမူလၢ အအုၣ်သံကျၣ်သံ တသ့ဘၣ်လီၤ.+
၈ မ့မ့ၢ် ပှၤလၢအဃု တၢ်အ့ၣ်လိာ်ဆိးက့, တဒိကနၣ် တၢ်မ့ၢ်တၢ်တီဘၣ် ဒီးမၤတၢ်လၢ အတတီတလိၤဘၣ်တဖၣ်န့ၣ် ကစၢ်ယွၤ အတၢ်သးဒိၣ်ထီၣ် ဒီးတၢ်သးကဲၤထီၣ် ကလီၤဘၣ်လၢ အဝဲသ့ၣ်အလိၤလီၤ.+
၉ ပှၤကိးဂၤဒဲးလၢ အမၤတၢ်အၢတၢ်သီန့ၣ် ကတူၢ်ဘၣ် တၢ်နးတၢ်ဖှီၣ်ဒီး တၢ်ကိၢ်တၢ်ဂီၤလီၤ. အဆိကတၢၢ် ပှၤယူဒၤဖိ ကတူၢ်ဘၣ်ဝဲ ဝံၤဒီး ပှၤကြံးဖိစ့ၢ်ကီး ကတူၢ်ဘၣ်ဝဲလီၤ.
၁၀ မ့မ့ၢ် ပှၤလၢအမၤတၢ်ဂ့ၤန့ၣ် အဝဲသ့ၣ်ကိးဂၤဒဲး ကဒိးန့ၢ်ဘၣ် တၢ်လၤကပီၤ, တၢ်ယူးယီၣ်ပာ်ကဲ ဒီးတၢ်ဃူတၢ်ဖိးလီၤ. အဆိကတၢၢ် ပှၤယူဒၤဖိ+ ကဒိးန့ၢ်ဘၣ်ဝဲ ဝံၤဒီး ပှၤကြံးဖိစ့ၢ်ကီး+ ကဒိးန့ၢ်ဘၣ်ဝဲလီၤ.
၁၁ ကစၢ်ယွၤန့ၣ် တကွၢ်ဒိၣ်ဆံးအါစှၤတၢ်ဘၣ်.+
၁၂ ဒီးပှၤလၢ အတအိၣ်လၢ တၢ်သိၣ်တၢ်သီ အဖီလာ်လၢ အမၤတၢ်ဒဲးဘး ကိးဂၤဒဲးန့ၣ် အတအိၣ်လၢ တၢ်သိၣ်တၢ်သီ အဖီလာ်ဘၣ် သနာ်က့ ကသံဝဲလီၤ.+ မ့မ့ၢ် ပှၤလၢအအိၣ်လၢ တၢ်သိၣ်တၢ်သီ အဖီလာ်လၢ အမၤတၢ်ဒဲးဘး ကိးဂၤဒဲးန့ၣ် ကဘၣ်တၢ်စံၣ်ညီၣ်အီၤဒ် တၢ်သိၣ်တၢ်သီ အိၣ်ဝဲအသိးလီၤ.+
၁၃ ပှၤလၢအနၢ်ဟူ တၢ်သိၣ်တၢ်သီန့ၣ် တကဲပှၤတီပှၤလိၤလၢ ကစၢ်ယွၤအမဲာ်ညါဘၣ်. မ့မ့ၢ် ပှၤလၢ အမၤထွဲ တၢ်သိၣ်တၢ်သီန့ၣ် ကစၢ်ယွၤကပာ်တီပာ်လိၤ အဝဲသ့ၣ်လီၤ.+
၁၄ ပှၤကလုာ်အဂၤတဖၣ်န့ၣ် တအိၣ်ဒီး တၢ်သိၣ်တၢ်သီဘၣ်.+ ဘၣ်ဆၣ် ဖဲအဝဲသ့ၣ်မၤတၢ်လၢ အနီၢ်ကစၢ် အကျိာ်အကျာ်အခါ အဝဲသ့ၣ်မၤဝဲ ဒ်တၢ်သိၣ်တၢ်သီ အိၣ်ဝဲအသိးအဃိ အဝဲသ့ၣ် ပာ်ဖျါထီၣ်ဝဲလၢ တၢ်သိၣ်တၢ်သီ အိၣ်လၢအဝဲသ့ၣ်အပူၤလီၤ.
၁၅ ပှၤသ့ၣ်တဖၣ်အံၤ ပာ်ဖျါထီၣ်လၢ တၢ်လၢတၢ်သိၣ်တၢ်သီ တဲဝဲတဖၣ်န့ၣ် အိၣ်ကွဲးလီၤအသးလၢ အဝဲသ့ၣ် အသးပူၤလီၤ. ဒီးအဝဲသ့ၣ်အသးလၢ အသ့ၣ်ညါဒၣ်တၢ်န့ၣ် အုၣ်အသးစ့ၢ်ကီးလီၤ. တကးဒံးဘၣ် အဝဲသ့ၣ်အနီၢ်ကစၢ် အတၢ်ဆိကမိၣ်တဖၣ်န့ၣ် ဒုးသ့ၣ်ညါ အဝဲသ့ၣ်လၢ အတၢ်ကမၣ်အိၣ်ဧါ မ့တမ့ၢ် တအိၣ်ဘၣ်ဧါန့ၣ်လီၤ.
၁၆ ဒီးတၢ်ကမၤအသးဒ်အံၤ ဖဲမုၢ်နံၤလၢ ကစၢ်ယွၤကစံၣ်ညီၣ် ပှၤဟီၣ်ခိၣ်ဖိ အတၢ်ခူသူၣ်တဖၣ် ခီဖျိလၢ ယ့ၣ်ၡူးခရံာ်လီၤ.+ မ့ၢ်လီၤ, တၢ်ကမၤအသးဒ်န့ၣ် ဒ်တၢ်သးခုကစီၣ်လၢ ယစံၣ်တဲၤတဲလီၤအီၤ အသိးလီၤ.
၁၇ သုဝဲတနီၤန့ၣ် သုကိးလီၤသုသးလၢ ပှၤယူဒၤဖိ,+ သုသန့ၤသုသးလၢ တၢ်သိၣ်တၢ်သီ ဒီးသုပာ်ကဖၢလၢ သုသးလၢ သုတၢ်ရ့လိာ်သးဒီး ကစၢ်ယွၤ အဃိလီၤ.
၁၈ သုသ့ၣ်ညါ ကစၢ်ယွၤ အတၢ်ဘၣ်သး ဒီးသုတူၢ်လိာ် တၢ်လၢအလုၢ်ဒိၣ်ပှ့ၤဒိၣ်တဖၣ် ခီဖျိလၢ သုဘၣ် တၢ်သိၣ်လိသုလၢ စီၤမိၤၡ့ အတၢ်သိၣ်တၢ်သီအဃိလီၤ.+
၁၉ သုနာ် သပှၢ်တၢၢ်လၢ သုဟံးစုနဲၣ်ကျဲ ပှၤလၢအမဲာ်တထံၣ်တၢ်ဘၣ်တဖၣ် သ့လီၤ. ဒီးပှၤလၢအအိၣ်လၢ တၢ်ခံးကျါတဖၣ်န့ၣ် သုနာ်လၢ သုဟ့ၣ်အဝဲသ့ၣ် တၢ်ကပီၤသ့လီၤ.
၂၀ ဒီးခီဖျိလၢ သုနၢ်ပၢၢ် တၢ်မ့ၢ်တၢ်တီ ဒီးတၢ်သိၣ်လိ အခီၣ်ထံးခီၣ်ဘိတဖၣ်လၢ အအိၣ်လၢ စီၤမိၤၡ့ အတၢ်သိၣ်တၢ်သီအပူၤအဃိ သုဆိကမိၣ်လၢ သုဘှီဘၣ်ထီၣ်က့ၤ ပှၤဟးဂီၤဖိတဖၣ် ဒီးသုသိၣ်လိ ဖိသၣ်တဖၣ်သ့လီၤ.
၂၁ သုမ့ၢ်ပှၤလၢ အသိၣ်လိပှၤဂၤ ဘၣ်ဆၣ် ဘၣ်မနုၤအဃိ သုတသိၣ်လိလီၤက့ၤ သုနီၢ်ကစၢ်ဘၣ်လဲၣ်.+ သုစံၣ်တဲၤတဲလီၤလၢ “ဟုၣ်တၢ်တဂ့ၤ”+ ဘၣ်ဆၣ် မ့ၢ်သုဟုၣ်တၢ် စ့ၢ်ကီးဧါ.
၂၂ သုတဲလၢ “အဲၣ်ဘၢမါအဲၣ်ဘၢဝၤတဂ့ၤ”+ ဘၣ်ဆၣ် မ့ၢ်သု အဲၣ်ဘၢမါအဲၣ်ဘၢဝၤ စ့ၢ်ကီးဧါ. သုသးဘၣ်အၢ တၢ်ဂီၤတၢ်ဖှီၣ် ဘၣ်ဆၣ် မ့ၢ်သုဟုၣ်တၢ်လၢ တၢ်လုၢ်ဟံၣ်တဖၣ်အပူၤ စ့ၢ်ကီးဧါ.
၂၃ သုပာ်ကဖၢလၢသုသးလၢ သုသ့ၣ်ညါ ကစၢ်ယွၤ အတၢ်သိၣ်တၢ်သီအဃိ ဘၣ်ဆၣ် သုမၤဘၣ်ဒိ ကစၢ်ယွၤအလၤကပီၤ ခီဖျိလၢ သုမၤကမၣ် စီၤမိၤၡ့ အတၢ်သိၣ်တၢ်သီ အဃိ တမ့ၢ်ဧီၤ.
၂၄ ဒ်တၢ်ကွဲးအသး တဲဝဲအသိး “ခီဖျိလၢသုအဃိ ကစၢ်ယွၤအမံၤဘၣ်တၢ် ကတိၤထီဒါအီၤလၢ ပှၤကလုာ်တဖၣ် အကျါလီၤ.”+
၂၅ သုမ့ၢ်မၤထွဲ တၢ်သိၣ်တၢ်သီမး+ သုတၢ်ကူးတရံးန့ၣ်+ ကကဲဘျုးဝဲလီၤ. ဘၣ်ဆၣ် သုမ့မ့ၢ် ပှၤလၢအမၤကမၣ် တၢ်သိၣ်တၢ်သီန့ၣ် သုတၢ်ကူးတရံး ကကဲဝဲဒ် တၢ်တကူးတရံးဘၣ် အသိးလီၤ.
၂၆ အဃိ ပှၤလၢအတဘၣ် တၢ်ကူးတရံးတဂၤ+ မ့ၢ်မၤထွဲ စီၤမိၤၡ့ အတၢ်သိၣ်တၢ်သီန့ၣ် အဝဲမ့ၢ်တဘၣ်တၢ်ကူးတရံးဘၣ် သနာ်က့ တၢ်ကပာ်ပနီၣ်အီၤဒ် ပှၤလၢအဘၣ် တၢ်ကူးတရံးတဂၤအသိး တမ့ၢ်ဘၣ်ဧါ.+
၂၇ သုဒိးတၢ်ကူးတရံး ဒီးသုဒိးန့ၢ်ဘၣ်တၢ်သိၣ်လိ ဘၣ်ဃးဒီး တၢ်သိၣ်တၢ်သီလၢ အအိၣ်ကွဲးအသး ဘၣ်ဆၣ် သုတမၤထွဲအီၤဘၣ်. အဃိ ပှၤလၢအတဘၣ် တၢ်ကူးတရံးဘၣ်တဂၤ မ့ၢ်မၤထွဲစီၤမိၤၡ့ အတၢ်သိၣ်တၢ်သီန့ၣ် မ့ၢ်ဒၣ် အဝဲစံၣ်ညီၣ်သုလီၤ.
၂၈ ပှၤယူဒၤဖိလၢ နီၢ်ခိန့ၣ် တမ့ၢ်ပှၤယူဒၤဖိ အနီၢ်ကီၢ်ဘၣ်.+ ဒီးတၢ်ကူးတရံး အနီၢ်ကီၢ်န့ၣ်+ တမ့ၢ်တၢ်ကူးတရံးလၢ နီၢ်ခိဘၣ်.
၂၉ ဘၣ်ဆၣ် ပှၤယူဒၤဖိအနီၢ်ကီၢ်န့ၣ်+ မ့ၢ်ပှၤတဂၤလၢ အမ့ၢ်ပှၤယူဒၤဖိလၢ သူၣ်ကံၢ်သးလဲ+ ဒီးအဝဲဘၣ်တၢ်ကူးတရံးလၢသး ခီဖျိလၢသးစီဆှံ ဒီးတမ့ၢ်ခီဖျိလၢ တၢ်သိၣ်တၢ်သီလၢ အအိၣ်ကွဲးအသးအဃိဘၣ်.+ ပှၤတဂၤအံၤ ဒိးန့ၢ်ဘၣ် တၢ်စံးပတြၢၤလၢ ကစၢ်ယွၤအအိၣ် ဒီးတမ့ၢ်လၢ ပှၤဟီၣ်ခိၣ်ဖိ အအိၣ်ဘၣ်.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဒ်တၢ်မ့ၢ်တၢ်တီအိၣ်ဝဲအသိး.”
