ယၡါယၤ ၄၃:၁-၂၈
၄၃ စီၤယၤကိာ် အစၢၤအသွဲၣ် ပှၤအံၣ်စရ့လးဖိသ့ၣ်ဧၢ,+ယဟိဝၤယွၤ လၢအမ့ၢ် ပှၤလၢအတ့လီၤသုန့ၣ် တဲဝဲလၢ“ယပှ့ၤက့ၤသု အဃိ ပျံၤတၢ်တဂ့ၤ.+
ယကိးသုလၢ သုမံၤဒီးသုမ့ၢ်ယတၢ်လီၤ.
၂ ဖဲသုလဲၤခီဂာ်ထံအခါ ယကအိၣ်ဒီးသု+ဒီးဖဲသုလဲၤခီ ထံကျိအခါ ထံတလုၢ်ဘၢသုဘၣ်.+
ဖဲသုလဲၤခီဂာ် မ့ၣ်အူအခါ မ့ၣ်အူ တအီၣ်သုဘၣ်ဒီးမ့ၣ်အူလၣ် တလဲးအီၣ်သုဘၣ်.
၃ ယမ့ၢ် သုကစၢ် ယဟိဝၤယွၤ လၢအမ့ၢ်အံၣ်စရ့လး အကစၢ်ယွၤလၢ အစီဆှံတဂၤ ဒီးပှၤလၢ အအုၣ်က့ၤခီၣ်က့ၤသုလီၤ.
ယဟ့ၣ်လီၤ ပှၤအဲၤကူပတူးဖိ ဒ်တၢ်ပှ့ၤက့ၤ လၢသုဂီၢ်ဒီးယဟ့ၣ်လီၤကွံာ် ပှၤအဲၤသံအီးပးဖိ ဒီးပှၤစဘၤဖိ ဒ်သိးကမၤပူၤဖျဲးသု အဂီၢ်လီၤ.
၄ သုကဲထီၣ် ပှၤလၢ အလုၢ်ဒိၣ်ပှ့ၤဒိၣ် လၢယဂီၢ်,+ယဟ့ၣ်သု တၢ်လၤကပီၤ ဒီးယအဲၣ်သုလီၤ.+
အဃိ ယကဟ့ၣ်လီၤကွံာ် ပှၤဂီၢ်မုၢ်တဖၣ်ဒီးပှၤကလုာ်တဖၣ် ဒ်သိး ကမၤပူၤဖျဲး သုသးသမူအဂီၢ်လီၤ.
၅ ယအိၣ်ဒီးသုအဃိ တဘၣ်ပျံၤတၢ်တဂ့ၤ.+
ယကဒုးဟဲက့ၤ သုဖိသုလံၤ* လၢအအိၣ်လၢ မုၢ်ထီၣ်ဒီးယကကိးဖှိၣ်က့ၤ သုဝဲလၢအအိၣ်လၢ မုၢ်နုာ်န့ၣ် တပူၤဃီလီၤ.+
၆ ယကတဲဘၣ် ကလံၤစိးလၢ ‘ပျၢ်လီၤကွံာ် အဝဲသ့ၣ်ဟီ.’+
ဒီးယကတဲဘၣ် ကလံၤထံးလၢ ‘တဘၣ်ဟံးဃာ် အဝဲသ့ၣ်လၢၤတဂ့ၤ.
ယဖိခွါလၢ အအိၣ်လၢ တၢ်လီၢ်ယံၤ ဒီးယဖိမုၣ်လၢ အအိၣ်လၢ ဟီၣ်ခိၣ်အနၢၣ် အကတၢၢ်တဖၣ်န့ၣ် ဒုးဟဲက့ၤ အဝဲသ့ၣ်တက့ၢ်.+
၇ ပှၤတဖၣ်န့ၣ် ဘၣ်တၢ်ကိးအီၤလၢ ယမံၤ ကိးဂၤဒဲးလီၤ.+
ဒီးယတ့လီၤ ဒီးယမၤကဲထီၣ် အဝဲသ့ၣ်လၢ+ယနီၢ်ကစၢ် အလၤကပီၤ အဂီၢ်လီၤ.’
၈ ပှၤဂီၢ်မုၢ်လၢ အမဲာ်ချံအိၣ်ဘၣ်ဆၣ် တထံၣ်တၢ်ဘၣ်ဒီးပှၤဂီၢ်မုၢ်လၢ အနၢ်အိၣ်ဘၣ်ဆၣ် တနၢ်ဟူတၢ်ဘၣ်န့ၣ် ဟဲကိးထီၣ် အဝဲသ့ၣ်တက့ၢ်.+
၉ မ်ပှၤကလုာ်ခဲလၢာ် ပာ်ဖှိၣ်ထီၣ်အသးလၢ တၢ်လီၢ်တပူၤဃီဒီးမ်ပှၤဂီၢ်မုၢ်တဖၣ် အိၣ်ဖှိၣ်ရိဖှိၣ် ဒ်သိးသိးတက့ၢ်.+
လၢအဝဲသ့ၣ် အယွၤတဖၣ် အကျါန့ၣ် မတဂၤ တဲဆိဝဲ ခါဆူညါ အဂ့ၢ် ကသ့လဲၣ်.
ယွၤတဖၣ်အံၤ တဲပှၤ တၢ်အခီၣ်ထံးတဖၣ်* ကသ့ဧါ.+
မၢယွၤတဖၣ်အံၤ ကိးဃုာ်ဒီး အပှၤအုၣ်အသးတဖၣ် ဒ်သိး ကပာ်ဖျါထီၣ်လၢ အဝဲသ့ၣ် တဲတၢ်ဘၣ် အဂီၢ်သၢၤ.
မ့တမ့ၢ်ဘၣ်န့ၣ် မၢပှၤဂၤဒိကနၣ် ဒီးတဲလၢ ‘အမ့ၢ်တၢ်မ့ၢ်တၢ်တီ’ န့ၣ်သၢၤ.”+
၁၀ ယဟိဝၤယွၤ တဲဝဲလၢ “သုမ့ၢ် ယပှၤအုၣ်အသးတဖၣ်လီၤ.”+
“သုမ့ၢ် ယခ့ယပှၤလၢ ယဃုထၢထီၣ်အီၤ+ဒ်သိး သုကသ့ၣ်ညါယၤ ဒီးစူၢ်က့ၤနာ်က့ၤယၤ*ဒီးဒ်သိး သုကနၢ်ပၢၢ်လၢ ယမ့ၢ် ပှၤအလီၢ်လီၢ်တဂၤလီၤ.+
ယွၤလၢ အဟဲအိၣ်ထီၣ်လၢ ယမဲာ်ညါန့ၣ် တအိၣ်နီတဂၤဘၣ်ဒီးယွၤအဂၤလၢ ကဟဲပၢၢ်ထီၣ်လၢ ယလီၢ်ခံစ့ၢ်ကီး တအိၣ်နီတဂၤဘၣ်.+
၁၁ ယၤအံၤ ယမ့ၢ် ယဟိဝၤလီၤ.+ ဒီးမ့တမ့ၢ် ယၤဘၣ်န့ၣ် ပှၤမၤပူၤဖျဲးတၢ် တအိၣ်နီတဂၤဘၣ်.”+
၁၂ ယဟိဝၤယွၤ တဲဝဲလၢ “ဖဲယွၤလၢအဂၤတဖၣ် တအိၣ်လၢ သုကျါဒံးဘၣ် အခါဒၣ်လဲာ်+ယမ့ၢ်ပှၤတဂၤလၢ အတဲဖျါထီၣ်တၢ်, အုၣ်က့ၤခီၣ်က့ၤတၢ် ဒီးဒုးသ့ၣ်ညါတၢ်လီၤ.
အဃိ သုမ့ၢ်ယပှၤအုၣ်အသးတဖၣ် ဒီးယမ့ၢ် ကစၢ်ယွၤလီၤ.”+
၁၃ ယမ့ၢ် ပှၤအလီၢ်လီၢ်တဂၤ ထီဘိလီၤ.+
ဒီးပှၤပျ့ၢ်န့ၢ်တၢ်လၢ ယစုပူၤ တသ့နီတမံၤဘၣ်.+
ဖဲယမၤတၢ်အခါ မတဂၤတြီဝဲ ကသ့လဲၣ်.+
၁၄ ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤလၢ အစီဆှံတဂၤ+ လၢအပှ့ၤက့ၤသုန့ၣ်+ တဲဝဲလၢ“လၢသုဂီၢ်န့ၣ် ယကဆှၢလီၤ သုးမုၢ်တဖုလၢ ဝ့ၢ်ဘၤဘူၤလိၣ် ဒီးမၤလီၤကူၢ်ကွံာ် တြဲၤအနီၣ်ဘိ ခဲလၢာ်လီၤ.+
ဒီးပှၤက့ၤစ့းဖိ လၢအအိၣ်လၢ အနီၢ်ကစၢ် ကဘီတဖၣ်အပူၤန့ၣ် ကကိးပသူထီၣ်လၢ တၢ်ကိၢ်တၢ်ဂီၤ အပူၤလီၤ.+
၁၅ ယမ့ၢ် ယဟိဝၤ, သုကစၢ်ယွၤလၢ အစီဆှံတဂၤ+ ဒီးယမ့ၢ် အံၣ်စရ့လး အတၢ်ဘၣ်တ့ကစၢ်+ ဒီးသု စီၤပၤလီၤ.”+
၁၆ ယဟိဝၤယွၤ မ့ၢ်ဝဲပှၤလၢ အအိးဟိထီၣ်ကျဲလၢ ပီၣ်လဲၣ်ပူၤဒီးမၤဟိထီၣ်ကျဲဖိ လၢထံယွၤလီၤဆူၣ်ဆူၣ် အကျါလီၤ.+
၁၇ အဝဲမ့ၢ်ပှၤလၢ အဒုးဟဲထီၣ် လ့ၣ်ကဟၣ်သုး, ကသ့ၣ်,+သုးမုၢ်ဃုာ်ဒီး ပှၤဒူပှၤဃိၤတဖၣ်လီၤ. ဒီးအဝဲတဲဝဲလၢ“ပှၤတဖၣ်အံၤ ကမံနီၤ ဒီးတဂဲၤဆၢထၢၣ်လၢၤဘၣ်.+
အဝဲသ့ၣ် ကဘၣ်တၢ်မၤပံာ်ကွံာ်အီၤ ဒ်မ့ၣ်အူဒၢ အပှံာ်လၢ အကဲၤဝဲ အသိးလီၤ.”
၁၈ “တဘၣ်သ့ၣ်နီၣ်ထီၣ်က့ၤ တၢ်မၤအသးလၢ အပူၤကွံာ်တဖၣ်တဂ့ၤ.
ဒီးတဘၣ်ဆိမိၣ်ထီၣ်က့ၤ တၢ်လၢ အပူၤကွံာ်တဖၣ်တဂ့ၤ.
၁၉ ယမၤတၢ်အသီတမံၤ+ဒီးခဲအံၤန့ၣ် အကမၤအသးလီၤ.
သုတသ့ၣ်ညါဧီၤ.
ယကမၤထီၣ် ကျဲတဘိလၢ ပှၢ်မုၢ်ကနၢပူၤ+ဒီးယကဒုးယွၤလီၤ ထံကျိတဖၣ်လၢ မဲးမုၢ်ခိၣ်လီၤ.+
၂၀ ဆၣ်ဖိကီၢ်ဖိအမံၤ လၢပျီပူၤ,ထွံၣ်မံၤ ဒီးထိၣ်ကီၤလၤအူး ကမၤလၤကပီၤယၤလီၤ.
ယကကတဲာ်ကတီၤ ထံလၢ ပှၢ်မုၢ်ကနၢဒီးထံကျိတဖၣ်လၢ မဲးမုၢ်ခိၣ်+ဒ်သိး ယပှၤဂီၢ်မုၢ်လၢ ယဃုထၢအီၤ+ ကအီဘၣ်ဝဲ အဂီၢ်လီၤ.
၂၁ ပှၤတဖၣ်န့ၣ် ယတ့လီၤအီၤ လၢယနီၢ်ကစၢ်အဂီၢ်ဒ်သိးအဝဲသ့ၣ် ကစံးထီၣ်ပတြၢၤ ယၤလီၤ.+
၂၂ အိ စီၤယၤကိာ် အစၢၤအသွဲၣ် ပှၤအံၣ်စရ့လးဖိဧၢ, သုသးလၢာ်ယၤလံအဃိ+သုတကိးထီၣ်ယၤလၢၤဘၣ်.+
၂၃ သုတဟဲစိာ်န့ၢ်ယၤ သိတဖၣ်လၢ သုကလုၢ်ထီၣ်အီၤ ဒ်တၢ်လုၢ်ဒွဲအူ တဖၣ် အသိးဘၣ်.
သုတမၤလၤကပီၤယၤလၢ သုတၢ်လုၢ်တၢ်ပာ်တဖၣ်ဘၣ်.
သုဘၣ်ဟဲစိာ်န့ၢ်ယၤတၢ်ဟ့ၣ်န့ၣ် တမ့ၢ်လၢ ယပာ်ထီၣ် တၢ်ဝံတၢ်ယိးဃၢလၢ သုလိၤဘၣ်.
ယဃ့တၢ်နၢမူလၢ သုအိၣ်န့ၣ် တမ့ၢ်တၢ်ဝံဃၢလၢ အမၤလီၤဘှံး သုဘၣ်.+
၂၄ သုတပှ့ၤန့ၢ်ယၤ ဂ့ၢ်နၢမူ လၢသုစ့ဘၣ်.
သုတလုၢ်ထီၣ် တၢ်လုၢ်အသိအချါတဖၣ် လၢယကသးမံအဂီၢ်ဘၣ်.+
လၢတၢ်န့ၣ်အလီၢ် သုတၢ်ဒဲးဘးတဖၣ် ကဲထီၣ်ဒ်သိးဒီး တၢ်ဝံဃၢ လၢယဂီၢ်ဒီးသုမၤလီၤဘှံးယၤလၢ သုတၢ်ကမၣ်တဖၣ်လီၤ.+
၂၅ ယမ့ၢ်ပှၤတဂၤလၢ အထူးသံကွံာ် သုတၢ်ကမၣ်တဖၣ်+ လၢယမံၤ အဃိလီၤ.+
ဒီးယတသ့ၣ်နီၣ်ထီၣ်က့ၤ သုတၢ်ဒဲးဘးတဖၣ်လၢၤဘၣ်.+
၂၆ ပကထီၣ်သကိး တၢ်မူးတၢ်ရၢ် ဒီးပကတီၣ်ဖျါထီၣ် ပတၢ်ဂ့ၢ်လၢ အထီဒါလိာ်သးလီၤ.
ဒုးသ့ၣ်နီၣ်ထီၣ်ယၤလၢ သုတၢ်ဂ့ၢ်သၢၤ. တဲဖျါထီၣ်သုတၢ်ဂ့ၢ် ဒ်သိး သုကပာ်ဖျါထီၣ်လၢ သုတၢ်ဘၣ် အဂီၢ်သၢၤ.
၂၇ သုဖုဖးဒိၣ် အဆိကတၢၢ်တဂၤန့ၣ် မၤတ့ၢ်တၢ်ဒဲးဘးဒီးသုပှၤခိၣ်ပှၤနၢ်တဖၣ်* ထီဒါက့ၤယၤလီၤ.+
၂၈ အဃိ ယကပာ် တၢ်လီၢ်စီဆှံ အခိၣ်အနၢ်တဖၣ် ဒ်ပှၤလၢအတကဆှီဘၣ်အသိးဒီးယကပျဲပှၤမၤဟးဂီၤ စီၤယၤကိာ် အစၢၤအသွဲၣ်တဖၣ်ဒီးယကပျဲလၢ ပှၤကတဲဆါ ပှၤအံၣ်စရ့လးဖိတဖၣ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “သုချံသုသၣ်.”
^ ဘၣ်သ့ၣ်သ့ၣ် အဲၣ်ဒိးတဲဝဲ တၢ်အဆိကတၢၢ်တဖၣ် လၢကဟဲကဲထီၣ်အသး လၢခါဆူညါ.
^ မ့ၢ်စ့ၢ်ကီး “နာ်န့ၢ်ယၤ.”
^ ဘၣ်သ့ၣ်သ့ၣ် အဲၣ်ဒိးတဲဝဲ ပှၤလၢအသိၣ်လိ စီၤမိၤၡ့ အတၢ်သိၣ်တၢ်သီ.
