ယိၤဟၣ် ၁၁:၁-၅၇
၁၁ ဒီးပှၤတဂၤလၢ အမံၤမ့ၢ် စီၤလါစရူးန့ၣ် ဆိးက့ဝဲလီၤ. အဝဲအိၣ်လၢ ဘ့ၤသနံ လၢအမ့ၢ်စ့ၢ်ကီး နီၢ်မၤရံ ဒီးအဒီပုၢ်ဝဲၢ်မုၣ် နီၢ်မၢ်သၤ+ အသဝီလီၤ.
၂ နီၢ်မၤရံတဂၤအံၤ မ့ၢ်ဝဲပှၤလၢ အလူလီၤ သိနၢမူလၢ ကစၢ်အလိၤ ဒီးထွါသူထီၣ်န့ၢ်ဝဲ အခီၣ်လၢ အခိၣ်ဆူၣ်လီၤ.+ ဒီးပှၤလၢ အဆိးက့တဂၤန့ၣ် မ့ၢ်ဝဲ အဒီပုၢ်ဝဲၢ်ခွါ စီၤလါစရူးလီၤ.
၃ အဃိ အဒီပုၢ်ဝဲၢ်မုၣ်တဖၣ် ဆှၢလီၤတၢ်ကစီၣ်လၢ ယ့ၣ်ၡူးအအိၣ်လၢ “ကစၢ်ဧၢ, ပှၤလၢ နအဲၣ်အီၤတဂၤန့ၣ် ဆိးက့ဝဲလီၤ.”
၄ ဘၣ်ဆၣ် ဖဲယ့ၣ်ၡူးနၢ်ဟူဝဲအခါ အတဲဝဲလၢ “တၢ်ဆါအီၣ်အီၤန့ၣ် တမ့ၢ်လၢ အကသံအဂီၢ်ဘၣ်, မ့ၢ်ဝဲလၢ ကကဲထီၣ်တၢ်လၤကပီၤလၢ ကစၢ်ယွၤ အဂီၢ်လီၤ.+ ဒီးခီဖျိလၢ တၢ်ဆါအံၤအဃိ ကစၢ်ယွၤ အဖိခွါ ကဘၣ် တၢ်မၤလၤကပီၤအီၤစ့ၢ်ကီးလီၤ.”
၅ ယ့ၣ်ၡူးအဲၣ် နီၢ်မၢ်သၤ, နီၢ်မၤရံ ဒီးစီၤလါစရူးလီၤ.
၆ ဘၣ်ဆၣ် ဖဲယ့ၣ်ၡူး နၢ်ဟူဝဲလၢ စီၤလါစရူး ဆိးက့ဝဲအခါ အဝဲဆဲးအိၣ်ဒံး ဖဲတၢ်လီၢ်လၢ အအိၣ်ဝဲအလီၢ် ခံသီလီၤ.
၇ ဖဲန့ၣ်ဝံၤအလီၢ်ခံ အဝဲတဲဘၣ် အပျဲၢ်အဘီၣ်တဖၣ်လၢ “ပကလဲၤကဒီးလၢ ယူဒၤအဟီၣ်ကဝီၤ အပူၤလီၤ.”
၈ ဒီးအပျဲၢ်အဘီၣ်တဖၣ် တဲဘၣ်အီၤလၢ “သရၣ်ဧၢ,+ ပူၤကွံာ်တယံာ်ဒံးဘၣ်န့ၣ် ပှၤယူဒၤဖိတဖၣ် အဲၣ်ဒိးကွံာ်နၤ လၢလၢၢ်လီၤ.+ အဃိ နကလဲၤဖဲန့ၣ်ဒံးဧါ.”
၉ ယ့ၣ်ၡူး တဲဆၢဝဲလၢ “တနံၤန့ၣ် တၢ်ကပီၤအိၣ်ဝဲ ၁၂ နၣ်ရံၣ်တမ့ၢ်ဧီၤ.+ ပှၤတဂၤဂၤမ့ၢ်ဟးဖဲ တၢ်ကပီၤ အဆၢကတီၢ်န့ၣ် မ့ၢ်လၢအထံၣ်ဝဲ ဟီၣ်ခိၣ်အံၤ အတၢ်ကပီၤအဃိ အခီၣ်တဘၣ်တိၢ်လၢ တၢ်နီတမံၤဘၣ်.
၁၀ ဘၣ်ဆၣ် ပှၤတဂၤဂၤ မ့ၢ်ဟးလၢ မုၢ်နၤခီန့ၣ် အခီၣ်ကဘၣ်တိၢ်, မ့ၢ်လၢ တၢ်ကပီၤတအိၣ်လၢ အပူၤဘၣ်အဃိလီၤ.”
၁၁ ဖဲယ့ၣ်ၡူး တဲတၢ်ဂ့ၢ်တဖၣ်န့ၣ် ဝံၤအလီၢ်ခံ အတဲဝဲလၢ “ပသကိး စီၤလါစရူး မံဝဲလံ.+ ဘၣ်ဆၣ် ယကလဲၤ မၤပၢၢ်ထီၣ်အီၤလီၤ.”
၁၂ ဒီးအပျဲၢ်အဘီၣ် တဲအီၤလၢ “ကစၢ်ဧၢ, အမ့ၢ်မံဒု အကကိညၢ်ထီၣ်လီၤမီၤ.”
၁၃ နီၢ်ကီၢ်န့ၣ် ယ့ၣ်ၡူး အဲၣ်ဒိးတဲဝဲလၢ အသံလီၤ. ဘၣ်ဆၣ် အဝဲသ့ၣ် ဆိကမိၣ်လၢ ယ့ၣ်ၡူးတဲဝဲလၢ အမံအိၣ်ဘှံးလီၤ.
၁၄ အဃိ ယ့ၣ်ၡူး တဲအဝဲသ့ၣ် လိၤလိၤလၢ “စီၤလါစရူးသံလံ.+
၁၅ ဒီးယတအိၣ်ဖဲန့ၣ်ဘၣ် အဃိ ယသးခုလၢသုဂီၢ် မ့ၢ်လၢ သုတၢ်နာ်ကဒိၣ်ထီၣ် အဃိလီၤ. ဒ်လဲၣ်ဂ့ၤဒ်လဲၣ်ဂ့ၤ, ပကလဲၤလၢ အအိၣ်နီၤ.”
၁၆ စီၤသိၤမါလၢ ပှၤကိးအီၤလၢ ပှၤသဃံာ်န့ၣ် တဲဘၣ် ယ့ၣ်ၡူး အပျဲၢ်အဘီၣ် ကဒဲကဒဲ ဒ်သိးဒီးအီၤတဖၣ်လၢ “ပကလဲၤပိာ်အခံ ဒီးပမ့ၢ်ဘၣ်သံဃုာ်ဒီးအီၤန့ၣ် ပကသံဒၣ်ဝဲ.”+
၁၇ ဖဲယ့ၣ်ၡူး လဲၤတုၤဝဲအခါ အထံၣ်ဝဲလၢ စီၤလါစရူးအိၣ်လၢ တၢ်သွၣ်ခိၣ်အပူၤန့ၣ် အိၣ်ဝဲလွံၢ်သီလံ.
၁၈ ဘ့ၤသနံသဝီန့ၣ် အိၣ်စီၤစုၤဒီး ဝ့ၢ်ယရူၤၡလ့ၣ် ခံမံးလာ်* ဃၣ်ဃၣ်လီၤ.
၁၉ မ့ၢ်လၢ နီၢ်မၢ်သၤ ဒီးနီၢ်မၤရံ အဒီပုၢ်ဝဲၢ်ခွါ သံဝဲအဃိ ပှၤယူဒၤဖိအါဂၤ လဲၤလၢ အဝဲသ့ၣ်အအိၣ် ဒ်သိး ကမၤမုာ်ထီၣ်က့ၤ အဝဲသ့ၣ် အသးအဂီၢ်လီၤ.
၂၀ ဖဲနီၢ်မၢ်သၤ နၢ်ဟူလၢ ယ့ၣ်ၡူးဟဲအခါ အဝဲလဲၤဝဲ ဒ်သိး ကထံၣ်လိာ်သး ဒီးအီၤအဂီၢ်လီၤ. ဘၣ်ဆၣ် နီၢ်မၤရံ+ ဆ့ၣ်နီၤအိၣ်ဝဲလၢ ဟံၣ်ပူၤလီၤ.
၂၁ နီၢ်မၢ်သၤ တဲဘၣ်ယ့ၣ်ၡူးလၢ “ကစၢ်ဧၢ, နမ့ၢ်အိၣ်ဘၣ်ဖုး ဖဲအံၤန့ၣ် ယဒီပုၢ်ဝဲၢ်ခွါ တသံဘၣ်.
၂၂ ဘၣ်ဆၣ် ခဲအံၤဒၣ်လဲာ် ယသ့ၣ်ညါလၢ နမ့ၢ်ဃ့တၢ် တမံၤဂ့ၤတမံၤဂ့ၤလၢ ကစၢ်ယွၤအအိၣ်န့ၣ် ကစၢ်ယွၤ ကဟ့ၣ်နၤလီၤ.”
၂၃ ယ့ၣ်ၡူးတဲအီၤလၢ “နဒီပုၢ်ဝဲၢ်ခွါ ကဂဲၤဆၢထၢၣ်က့ၤလီၤ.”
၂၄ နီၢ်မၢ်သၤ တဲဘၣ်အီၤလၢ “ယသ့ၣ်ညါလၢ အဝဲကဂဲၤဆၢထၢၣ် လၢမုၢ်နံၤအကတၢၢ် တနံၤအတီၢ်ပူၤ ဖဲတၢ်မၤသမူထီၣ်က့ၤ ပှၤသံအခါလီၤ.”+
၂၅ ယ့ၣ်ၡူး တဲအီၤလၢ “ယမ့ၢ် တၢ်ဂဲၤဆၢထၢၣ် ဒီးတၢ်မူလီၤ.+ ပှၤလၢ အစူၢ်က့ၤနာ်က့ၤယၤန့ၣ် မ့ၢ်သံဘၣ်ဆၣ် ကသမူထီၣ်ဝဲလီၤ.
၂၆ ဒီးကယဲၢ် ပှၤလၢအမူဝဲ ဒီးစူၢ်က့ၤနာ်က့ၤယၤန့ၣ် တသံဘၣ် နီတဘျီဘၣ်.+ မ့ၢ်နနာ်ဒ်န့ၣ်ဧါ.”
၂၇ နီၢ်မၢ်သၤတဲအီၤလၢ “မ့ၢ် ကစၢ်ဧၢ, ယနာ်လၢ နမ့ၢ်ခရံာ်, နမ့ၢ် ကစၢ်ယွၤအဖိခွါ လၢအဟဲလီၤလၢ ဟီၣ်ခိၣ်ချၢလီၤ.”
၂၈ ဖဲအဝဲတဲဒ်န့ၣ် ဝံၤအလီၢ်ခံ အက့ၤကိးန့ၢ်ဝဲ အဒီပုၢ်ဝဲၢ်မုၣ် နီၢ်မၤရံ ဒီးတဲခူသူၣ်အီၤလၢ “သရၣ်+ ဟဲဖဲအံၤလံ ဒီးအဝဲကိးနၤလီၤ.”
၂၉ ဖဲနီၢ်မၤရံ နၢ်ဟူဒ်န့ၣ်အခါ အဝဲဂဲၤဆၢထၢၣ်ဝဲ ချ့ချ့ ဒီးလဲၤလၢ ယ့ၣ်ၡူးအအိၣ်လီၤ.
၃၀ ယ့ၣ်ၡူး တဟဲနုာ်လီၤလၢ သဝီပူၤဒံးဘၣ်, အအိၣ်ဝဲဖဲ တၢ်လီၢ်လၢ အထံၣ်လိာ်သးဒီး နီၢ်မၢ်သၤအလီၢ်လီၤ.
၃၁ ပှၤယူဒၤဖိလၢ အဟဲမၤမုာ်ထီၣ်က့ၤ နီၢ်မၤရံအသးန့ၣ် အိၣ်ဒီးနီၢ်မၤရံလၢ ဟံၣ်ပူၤလီၤ. ဘၣ်ဆၣ် ဖဲအဝဲသ့ၣ် ထံၣ်ဝဲလၢ နီၢ်မၤရံ ဂဲၤဆၢထၢၣ်ချ့ချ့ ဒီးဟးထီၣ်အခါ အဝဲသ့ၣ်ဆိကမိၣ်ဝဲလၢ အကလဲၤဟီၣ်ဝဲလၢ တၢ်သွၣ်ခိၣ်လီၤ.+ အဃိ အဝဲသ့ၣ် ပိာ်ထီၣ်အခံလီၤ.
၃၂ ဖဲနီၢ်မၤရံ လဲၤတုၤလၢ ယ့ၣ်ၡူးအိၣ်အလီၢ် ဒီးထံၣ်အီၤအခါ အဝဲ ထိၣ်လီၤပှီၤအသးလၢ ယ့ၣ်ၡူးအခီၣ်ထံး ဒီးတဲအီၤလၢ “ကစၢ်ဧၢ, နမ့ၢ်အိၣ်ဘၣ်ဖုးဖဲအံၤန့ၣ် ယဒီပုၢ်ဝဲၢ်ခွါ တသံဘၣ်.”
၃၃ ဖဲယ့ၣ်ၡူး ထံၣ်ဝဲလၢ နီၢ်မၤရံဟီၣ် ဒီးပှၤယူဒၤဖိလၢ အဟဲဒီးအီၤတဖၣ် ဟီၣ်ဝဲအခါ အသးဘၣ်ဒိ ဒီးအသးတမုာ်ဘၣ်.
၃၄ ယ့ၣ်ၡူး တဲဝဲလၢ “သုပာ်အီၤဖဲလဲၣ်.” အဝဲသ့ၣ်တဲအီၤလၢ “ကစၢ်ဧၢ, ဟဲကွၢ်မီၤ.”
၃၅ ဒီးယ့ၣ်ၡူး အမဲာ်ထံလီၤဝဲလီၤ.+
၃၆ ပှၤယူဒၤဖိတဖၣ် တဲဝဲလၢ “ကွၢ်မီၤ, အဝဲအဲၣ်အီၤ ဖးဒိၣ်ညါမၢၤ.”
၃၇ ဘၣ်ဆၣ် အဝဲသ့ၣ် တနီၤတဲဝဲလၢ “အဝဲ ဒုးထံၣ်ထီၣ်ပှၤလၢ အမဲာ်တထံၣ်တၢ်ဘၣ်သ့ဒၢး,+ ဒ်သိးပှၤတဂၤအံၤ သုတသံတဂ့ၤအဂီၢ် အဝဲမၤစၢၤဝဲတသ့ဧီၤ.”
၃၈ ယ့ၣ်ၡူးအသး ဘၣ်ဒိကဒီးတဘျီ ဒီးလဲၤဝဲလၢ တၢ်သွၣ်ခိၣ် လၢအမ့ၢ် လ့ပူၤလၢ ဘၣ်တၢ်ကးဘၢအီၤ လၢလၢၢ်လီၤ.
၃၉ ယ့ၣ်ၡူးတဲဝဲလၢ “သုးကွံာ်လၢၢ်တက့ၢ်.” ဒီးနီၢ်မၢ်သၤ လၢအမ့ၢ် ပှၤလၢအသံတဂၤ အဒီပုၢ်ဝဲၢ်မုၣ်န့ၣ် တဲအီၤလၢ “ကစၢ်ဧၢ, အဝဲသံ အိၣ်လွံၢ်သီလံ အဃိ ခဲအံၤ အဝဲကနၢအုၣ်လံဧါသၢၤ.”
၄၀ ယ့ၣ်ၡူးတဲအီၤလၢ “ယတဲနၤလၢ နမ့ၢ်နာ်တၢ်န့ၣ် နကထံၣ်ဘၣ် ကစၢ်ယွၤ အလၤကပီၤလီၤ.”+
၄၁ အဃိ အဝဲသ့ၣ် သုးကွံာ်ဝဲလၢၢ်လီၤ. ဒီးယ့ၣ်ၡူး ကွၢ်ထီၣ်တၢ် လၢမူခိၣ်+ ဒီးတဲဝဲလၢ “ပၢ်ဧၢ, ယစံးဘျုးနၤလၢ နဒိကနၣ်ယၤ အဃိလီၤ.
၄၂ မ့ၢ်လီၤ, ယသ့ၣ်ညါလၢ နဒိကနၣ်ယၤ ထီဘိလီၤ. ဘၣ်ဆၣ် ယတဲတၢ်ဒ်သိး ပှၤဂီၢ်မုၢ်လၢ အဆၢထၢၣ် ဖဲအံၤတဖၣ် ကနာ်ဝဲလၢ နဆှၢလီၤယၤ အဂီၢ်လီၤ.”+
၄၃ ဖဲအဝဲတဲဒ်န့ၣ် ဝံၤအလီၢ်ခံ အကိးထီၣ်ဝဲလၢ အကလုၢ်ဖးဒိၣ်လၢ “စီၤလါစရူးဧၢ, ဟဲက့ၤထီၣ်ဟီ.”+
၄၄ ဒီးပှၤလၢ အသံတ့ၢ်တဂၤန့ၣ် ဟဲက့ၤထီၣ်ဝဲ ဒီးအစုအခီၣ် ဘိၣ်ဘံဃာ်အသး ဒီးအမဲာ်သၣ် စ့ၢ်ကီး ဘိၣ်ဘံဃာ်အသးလၢ တၢ်ကံးညာ်လီၤ. ယ့ၣ်ၡူးတဲ အဝဲသ့ၣ်လၢ “ဒ်သိးအဝဲ ဟးကသ့အဂီၢ် ဃဲၣ်လီၤကွံာ်အီၤဟီ.”
၄၅ ဒီးပှၤယူဒၤဖိ အါဂၤလၢ အဟဲလၢ နီၢ်မၤရံအအိၣ်န့ၣ် ထံၣ်ဝဲတၢ်လၢ ယ့ၣ်ၡူးမၤဝဲအဃိ အဝဲသ့ၣ် စူၢ်က့ၤနာ်က့ၤအီၤလီၤ.+
၄၆ ဘၣ်ဆၣ် အဝဲသ့ၣ်တနီၤန့ၣ် လဲၤဝဲလၢ ပှၤဖၤရံၤၡဲတဖၣ်အအိၣ် ဒီးတဲဘၣ် အဝဲသ့ၣ် တၢ်လၢ ယ့ၣ်ၡူးမၤဝဲလီၤ.
၄၇ အဃိ ပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် ကိးဖှိၣ်ဝဲ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် ဒီးတဲဝဲလၢ “ပှၤတဂၤအံၤ မၤတၢ်ပနီၣ်လီၤလးအါမး, ပကဘၣ်မၤဒ်လဲၣ်.+
၄၈ ပမ့ၢ် ပျဲအီၤဒ်အံၤန့ၣ် အဝဲသ့ၣ်ခဲလၢာ် ကစူၢ်က့ၤနာ်က့ၤအီၤ ဒီးပှၤရိမ့ၤဖိကဟဲပၢဝဲ ပတၢ်ဘူၣ်ထီၣ်ဘါထီၣ်အလီၢ်* ဒီးပပှၤကလုာ်လီၤ.”
၄၉ ဒီးပှၤလၢ အဝဲသ့ၣ်အကျါတဂၤ လၢအမ့ၢ် စီၤကၤယါဖၤန့ၣ်+ မ့ၢ်ဝဲ ပှၤလုၢ်တၢ်ခိၣ် အဒိၣ်ကတၢၢ် ဖဲတၢ်တနံၣ်န့ၣ်လီၤ. စီၤကၤယါဖၤ တဲအဝဲသ့ၣ်လၢ “သုတသ့ၣ်ညါ တၢ်နီတမံၤဘၣ်,
၅၀ လၢပပှၤဒီတကလုာ် ကဘၣ် တၢ်မၤဟးဂီၤအီၤအလီၢ် ပှၤတဂၤ မ့ၢ်သံလၢ အဝဲသ့ၣ်အဂီၢ်န့ၣ် ကဂ့ၤဒိၣ်လၢ သုဂီၢ်န့ၣ် သုနၢ်တပၢၢ်ဧီၤ.”
၅၁ ဘၣ်ဆၣ် အတတဲဝဲဒ် အနီၢ်ကစၢ် အတၢ်ဆိကမိၣ် အသိးဘၣ်. မ့ၢ်လၢ အဝဲကဲ ပှၤလုၢ်တၢ်ခိၣ် အဒိၣ်ကတၢၢ် လၢနံၣ်အဝဲန့ၣ်အဃိ အဝဲတဲတၢ်ဒ် ဝံအသိးလၢ ယ့ၣ်ၡူး ကဘၣ်သံလၢ ပှၤတကလုာ်အံၤ အဂီၢ်လီၤ.
၅၂ ဒီးတမ့ၢ်ထဲလၢ ပှၤတကလုာ်အံၤ အဂီၢ်ဘၣ် မ့ၢ်ဒ်သိးကပာ်ဖှိၣ်ဝဲ ကစၢ်ယွၤ အဖိလၢ အလီၤပြံလီၤပြါတဖၣ် ဒ်ပှၤတဖုဃီအသိး အဂီၢ်စ့ၢ်ကီးလီၤ.
၅၃ အဃိ စးထီၣ်ဖဲ တၢ်တနံၤန့ၣ် အဝဲသ့ၣ် ကူၣ်ထီၣ်ဝဲလၢ ကမၤသံအီၤလီၤ.
၅၄ အဃိ ယ့ၣ်ၡူးတဟးလၢ ပှၤယူဒၤဖိအကျါ ပျီပျီလၢၤဘၣ်. အဝဲဟးထီၣ်ကွံာ်ဝဲ ဖဲန့ၣ် ဒီးလဲၤဝဲလၢ ဝ့ၢ်အ့ဖရဲၣ်+ လၢအမ့ၢ် တၢ်လီၢ်လၢ အဘူးဒီးပှၢ်မုၢ်ကနၢ ဒီးယ့ၣ်ၡူးအိၣ်ဝဲဒီး အပျဲၢ်အဘီၣ်တဖၣ် ဖဲန့ၣ်လီၤ.
၅၅ ဘၣ်လၢ ပှၤယူဒၤဖိ အဘူၣ်လဲၤကပာ်+ ဘူးထီၣ်ဝဲအဃိ တချုးလၢ ဘူၣ်လဲၤကပာ် ဘၣ်ဒံးဘၣ်အခါ ပှၤအါဂၤ လၢအအိၣ်လၢ ဒူသဝီတဖၣ် လဲၤထီၣ်လၢ ဝ့ၢ်ယရူၤၡလ့ၣ် ဒ်သိး ကမၤကဆှီအသး ဒ်တၢ်သိၣ်တၢ်သီ အိၣ်ဝဲအသိးလီၤ.
၅၆ ဒီးအဝဲသ့ၣ် ဃုဝဲယ့ၣ်ၡူးလီၤ. ဖဲအဝဲသ့ၣ် အိၣ်ဆၢထၢၣ်ဝဲလၢ တၢ်လုၢ်ဟံၣ်ပူၤအခါ အဝဲသ့ၣ် တဲလိာ်အသး တဂၤဒီးတဂၤလၢ “သုဆိကမိၣ်ဒ်လဲၣ်. အဝဲတဟဲလၢ ဘူၣ်အံၤဧီၤ.”
၅၇ ဒီးပှၤလုၢ်တၢ်ဒိၣ်အခိၣ်တဖၣ် ဒီးပှၤဖၤရံၤၡဲတဖၣ် ဟ့ၣ်လီၤတၢ်ကလုၢ်လၢ ပှၤတဂၤဂၤ မ့ၢ်သ့ၣ်ညါလၢ ယ့ၣ်ၡူး အိၣ်ဖဲလဲၣ်န့ၣ် အဝဲကဘၣ် ဒုးသ့ၣ်ညါအဝဲသ့ၣ် ဒ်သိးအဝဲသ့ၣ် ကလဲၤဖီၣ် ယ့ၣ်ၡူးအဂီၢ်လီၤ.
