ယဃ့းစက့လး ၁၉:၁-၁၄
-
ထါဟီၣ်လၢ အံၣ်စရ့လး အခိၣ်အနၢ်တဖၣ်အဂီၢ် (၁-၁၄)
၁၉ “နကဘၣ် သးဝံၣ် ထါဟီၣ်တယုၢ်လၢ ဘၣ်ဃးဒီး ပှၤအံၣ်စရ့လးဖိ အခိၣ်အနၢ်တဖၣ်လီၤ.
၂ နကဘၣ်သးဝံၣ်ဒ်အံၤ‘နမိၢ်န့ၣ် လီၤဂာ်ဒီး တၢ်မနုၤလဲၣ်. အလီၤဂာ်ဒီး ခ့ယုၢ်မိၢ်လၢ ခ့ယုၢ်တဖၣ် အကျါလီၤ.
အဝဲမံနီၤလၢ ခ့ယုၢ်ဖိလၢ အဂံၢ်ဆူၣ်ဘါဆူၣ်တဖၣ်အကျါ ဒီးကွၢ်လုၢ်ဒိၣ်ထီၣ် အဖိတဖၣ်လီၤ.
၃ အဖိလၢ အကွၢ်လုၢ်ဒိၣ်ထီၣ်ဝဲအကျါ တဒုန့ၣ် ကဲထီၣ်ဝဲ ခ့ယုၢ်ဖိလၢ အဂံၢ်ဆူၣ်ဘါဆူၣ် တဒုလီၤ.+
ခ့ယုၢ်ဖိ တဒုအံၤ မၤလိသ့ထီၣ်အသး လၢကအ့ၣ်ဖှီတၢ်ဒီးအအီၣ်ယူၢ်လီၤ ပှၤကညီ စ့ၢ်ကီးလီၤ.
၄ ပှၤကလုာ်တဖၣ် နၢ်ဟူအဂ့ၢ် ဒီးဖီၣ်န့ၢ်အီၤလၢတၢ်ပူၤဒီးအဝဲသ့ၣ် က့ၤတွံၢ်အီၤလၢ ကီၢ်အဲၤကူပတူး လၢနီၣ်ဘျးလီၤ.+
၅ ဒီးအမိၢ်န့ၣ် အိၣ်ခိးအီၤ ဘၣ်ဆၣ် လၢခံန့ၣ် အသ့ၣ်ညါဘၣ်ဝဲလၢ အဖိတဟဲက့ၤလၢၤဘၣ်.
အဃိအဝဲ ကိးန့ၢ် အဖိအဂၤတဒု ဒီးဒုးကဲထီၣ်အီၤ ဒ်ခ့ယုၢ်ဖိ လၢအဂံၢ်ဆူၣ်ဘါဆူၣ် တဒုလီၤ.
၆ ခ့ယုၢ်ဖိတဒုအံၤ ဟးလၢခ့ယုၢ်တဖၣ်အကျါ ဒီးကဲထီၣ်ဝဲ ခ့ယုၢ်ဖိလၢ အဂံၢ်ဆူၣ်ဘါဆူၣ် တဒုလီၤ.
ဒီးအဝဲ မၤလိသ့ပာ်စၢၤအသးလၢ ကအ့ၣ်ဖှီတၢ် ဒီးအအီၣ်ယူၢ်လီၤ ပှၤကညီစ့ၢ်ကီးလီၤ.+
၇ အဝဲ ဃုအီၣ်တၢ်လၢ တၢးလၢအကျၢၤတဖၣ်အကျါ ဒီးမၤဟးဂီၤကွံာ် ဝ့ၢ်တဖၣ်လီၤ.
အဃိ တၢ်လီၢ်လၢ အအိၣ်သယုၢ်န့ၣ် အိၣ်ပှဲၤထဲ အကညီၤတၢ် အသီၣ်လီၤ.+
၈ ကီၢ်ရ့ၣ်လၢအအိၣ်ဝးတရံးအီၤတဖၣ် အပှၤကလုာ်န့ၣ် ဟဲထီဒါအီၤ ဒီးပာ်လီၤပျံၤသကွီၤလၢ အဂီၢ်လီၤ.
ဒီးအဝဲသ့ၣ် ဖီၣ်န့ၢ်အီၤလၢ တၢ်ပူၤလီၤ.
၉ အဝဲသ့ၣ် ဘျးထီၣ်အီၤလၢနီၣ်ဘျး ဒီးထၢနုာ်အီၤလၢ ကပိၤပူၤ ဒီးက့ၤကိးအီၤလၢ ဘၤဘူၤလိၣ် အစီၤပၤအအိၣ်လီၤ.
အဝဲသ့ၣ် ဒုးဃာ်အီၤ ဖဲန့ၣ်အဃိ အကလုၢ် တသီၣ်ထီၣ်လၢ အံၣ်စရ့လး အကစၢၢ်တဖၣ်အလိၤ နီတဘျီလၢၤဘၣ်.
၁၀ နမိၢ်န့ၣ် လီၤဂာ်ဒီး စပံးမုၢ်*+ လၢအအိၣ်သူၣ်လီၤအသးလၢ ထံကျိနံၤလီၤ.
မ့ၢ်လၢ အအီဘၣ်ထံ လၢလၢပှဲၤပှဲၤအဃိ အသၣ်ထီၣ် ဒီးအဒ့တဖၣ် ထီၣ်ဝဲပှဲၤပှဲၤလီၤ.
၁၁ ဒီးအဒ့တဖၣ်န့ၣ် ကျၢၤထီၣ်ဝဲ တုၤလၢ အကြၢးကဲထီၣ် ပှၤပၢတၢ်တဖၣ် အနီၣ်ထိးဘိတဖၣ်လီၤ.
ဒီးစပံးမုၢ်အံၤ ဒိၣ်ထီၣ်ထီထီၣ်ဝဲ ထီန့ၢ်ဒံး သ့ၣ်အဂၤတဖၣ်ဒီးမ့ၢ်လၢ အထီဝဲ ဒီးအလၣ်သ့ၣ်တဖၣ် အါဝဲအဃိ ပှၤကွၢ်စိအီၤ ဖျါလီၤ.
၁၂ ဘၣ်ဆၣ် စပံးမုၢ်အံၤ ဘၣ်တၢ်ထဲးထီၣ်အီၤ လၢတၢ်သးဒိၣ်ထီၣ်အပူၤ+ ဒီးဘၣ်တၢ်ကွံာ်လီၤအီၤလၢ ဟီၣ်ခိၣ်လိၤလီၤ.
ဒီးကလံၤလၢ မုၢ်ထီၣ်တခီန့ၣ် မၤဃ့ထီကွံာ် အသၣ်တဖၣ်လီၤ.
ဒီးအဒ့လၢ အကျၢၤတဖၣ် ဘၣ်တၢ်ဘိးကၢ်ကွံာ်အီၤ ဒီးဃ့ထီဝဲ+ ဒီးမ့ၣ်အူအီၣ်ကွံာ်အီၤလီၤ.+
၁၃ ဘၣ်ဆၣ် ခဲအံၤန့ၣ် စပံးမုၢ်အံၤ ဘၣ်တၢ်သူၣ်လီၤအီၤလၢ ပှၢ်မုၢ်ကနၢလၢအမ့ၢ် တၢ်လီၢ်လၢ ထံတအိၣ်ဘၣ် ဒီးအဃ့ထီလီၤ.+
၁၄ မ့ၣ်အူဟးအီၣ်ဝဲ အဒ့တဖၣ် ဒီးအီၣ်ကွံာ်ဝဲ အစိးတဖၣ် ဒီးအသၣ် တဖၣ်လီၤ.
ဒီးအဒ့လၢ အကျၢၤလၢ အကကဲထီၣ် ပှၤပၢတၢ် အနီၣ်ထိးဘိန့ၣ် တအိၣ်တ့ၢ် နီတဒ့လၢၤဘၣ်.+
“‘အဝဲအံၤမ့ၢ်ဝဲ ထါဟီၣ် ဒီးအကမ့ၢ်ဝဲထါဟီၣ်လၢ ခါဆူညါအဂီၢ်လီၤ.’”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “စပံးမုၢ်တမုၢ်လၢ အအိၣ်လၢ နသွံၣ်ကျါ.”
