မၤတၢ် ၂၈:၁-၃၁
၂၈ ပလဲၤတုၤလၢ ခိခိၣ်ဂ့ၤဂ့ၤဘၣ်ဘၣ် ဝံၤဒီး ပသ့ၣ်ညါဘၣ်လၢ ကီးတဖျၢၣ်အံၤ ပှၤကိးအီၤလၢ မ့းလံတ့ၤလီၤ.+
၂ ပှၤကီးဖိတဖၣ်* အသးဂ့ၤလၢ ပဖီခိၣ်ဒိၣ်မးလီၤ. တၢ်ဟဲစူၤ ဒီးတၢ်ဂိၢ်အဃိ အဝဲသ့ၣ် မၤကဲၤထီၣ်မ့ၣ်အူဒီး တူၢ်လိာ်ပဝဲကိးဂၤဒဲး ဂ့ၤဂ့ၤလီၤ.
၃ ဘၣ်ဆၣ် ဖဲစီၤပီလူး ထၢဖှိၣ်ထီၣ်သ့ၣ်ဒ့ ဒီးပာ်လီၤဝဲလၢ မ့ၣ်အူပူၤအခါ မ့ၢ်လၢ မ့ၣ်အူကိၢ်ဝဲအဃိ ဂုၢ်ဘၣ်အၢတဘိ ဟဲထီၣ်အ့ၣ်အီၤ ဒီးလီၤစဲၤလၢ အစုလိၤလီၤ.
၄ ဖဲပှၤကီးဖိတဖၣ် ထံၣ်ဝဲလၢ ဂုၢ်ဘၣ်အၢ လီၤစဲၤလၢ အစုလိၤအခါ အဝဲသ့ၣ် တဲလိာ်အသး ကဒဲကဒဲလၢ “ပှၤတဂၤအံၤ ကဘၣ်မ့ၢ်ပှၤလၢ အမၤသံပှၤကညီလီၤ. အဝဲပူၤဖျဲးလၢ ပီၣ်လဲၣ်ပူၤ ဘၣ်ဆၣ် တၢ်စံၣ်ညီၣ်တီ* တဟ့ၣ်အီၤအခွဲးလၢ အကဆဲးအိၣ်မူဘၣ်.”
၅ ဘၣ်ဆၣ် စီၤပီလူး တဆ့လီၤကွံာ်ဂုၢ်လၢ မ့ၣ်အူပူၤ ဒီးအဝဲတဘၣ် တၢ်နီတမံၤဘၣ်.
၆ ဘၣ်ဆၣ် အဝဲသ့ၣ် ဆိကမိၣ်ဝဲလၢ စီၤပီလူး အစုကညိးထီၣ် မ့တမ့ၢ် ကလီၤဃံၢ်သံ သတူၢ်ကလာ်လီၤ. အဝဲသ့ၣ် အိၣ်ခိးကွၢ်ဝဲ ဖးယံာ်ဝံၤဒီး ထံၣ်ဝဲလၢ စီၤပီလူး တဘၣ်နီတမံၤဘၣ်အဃိ အဝဲသ့ၣ် အတၢ်ထံၣ်ဆီတလဲဝဲ ဒီးတဲဝဲလၢ အဝဲမ့ၢ် ယွၤတဂၤလီၤ.
၇ ဒီးလၢ တၢ်လီၢ်တတီၤအံၤ အခိၣ်အဃၢၤန့ၣ် ကီးအခိၣ်အနၢ် လၢအမ့ၢ်စီၤပီးပျံၤ အဟီၣ်ခိၣ်အိၣ်ဝဲလီၤ. အဝဲတူၢ်လိာ်ပှၤ ဒီးလၢ သၢသီအတီၢ်ပူၤန့ၣ် အဝဲကွၢ်ထွဲဒီး ကဟုကယာ်ပှၤ ဂ့ၤမးလီၤ.
၈ ဒီးစီၤပီးပျံၤအပၢ်န့ၣ် တၢ်ကိၢ်ထီၣ်အီၤဒီး အဟၢဖၢ ဝံာ်တကံဝဲအဃိ အအိၣ်လၢလီၢ်မံခိၣ်လီၤ. အဃိ စီၤပီလူး လဲၤလၢအအိၣ်, ဃ့ထုကဖၣ်တၢ်, ပာ်ထီၣ် အစုလၢအလိၤ ဒီးမၤဘျါက့ၤအီၤလီၤ.+
၉ တၢ်မၤအသးအံၤ ဝံၤအလီၢ်ခံ ပှၤဆူးပှၤဆါ အဂၤတဖၣ်လၢ ကီးပူၤန့ၣ်လဲၤလၢ စီၤပီလူးအအိၣ် ဒီးဘျါက့ၤဝဲလီၤ.+
၁၀ ဒီးအဝဲသ့ၣ် ပာ်ဖျါထီၣ် တၢ်စံးဘျုးစံးဖှိၣ် ခီဖျိဟ့ၣ်ပှၤ တၢ်ဟ့ၣ်အါမးလီၤ. ဒီးလၢခံ ဖဲပဒိးထီၣ် ကဘီအခါ အဝဲသ့ၣ် တီၣ်ထီၣ်န့ၢ်ပှၤ တၢ်လၢပလိၣ်ဘၣ်အီၤ ကိးမံၤဒဲးလီၤ.
၁၁ ပအိၣ်လၢ ကီးတဘ့ၣ်န့ၣ် သၢလါဝံၤ ပဒိးထီၣ် ကဘီတဘ့ၣ်လၢ အအိၣ်ဒီး “ကစၢ်စူအဖိခွါတဖၣ်” အတၢ်ဂီၤဖးဒိၣ်လီၤ. ကဘီတဘ့ၣ်အံၤ ဟဲလၢ ဝ့ၢ်အလ့းစၣ်ဒြူး ဒီးအိၣ်တ့ၢ် ပာ်စၢၤဖဲကီးအံၤ လၢတၢ်ဂိၢ်ခါလံ.
၁၂ ပလဲၤတုၤလၢ ဝ့ၢ်စူၤရၤကူ အကဘီသန့ ဒီးပအိၣ်ဖဲန့ၣ် သၢသီလီၤ.
၁၃ ပဟးထီၣ်ဖဲန့ၣ် ဒီးလဲၤတုၤလၢ ဝ့ၢ်ရ့ကံၤလီၤ. လၢခံတနံၤန့ၣ် ကလံၤလၢ ကလံၤထံးတခီ ဟဲအူထီၣ်အဃိ ဖဲခံသီတသီန့ၣ် ပလဲၤတုၤလၢ ပီးတံၤလူးလီၤ.
၁၄ ဖဲန့ၣ် ပထံၣ်လိာ်သးဒီး ဒီပုၢ်ဝဲၢ်တဖၣ် ဒီးအဝဲသ့ၣ်မၢ ပအိၣ်တ့ၢ်ဒီး အဝဲသ့ၣ်တနွံ ဝံၤဒီး ပလဲၤဆူညါလၢ ဝ့ၢ်ရိမ့ၤလီၤ.
၁၅ ဒီးဖဲဒီပုၢ်ဝဲၢ်လၢ အအိၣ်ဖဲန့ၣ်တဖၣ် နၢ်ဟူလၢပဟဲအခါ အဝဲသ့ၣ် ဟဲအိၣ်ခိးပခိၣ်လၢ တၢ်လီၢ်တတီၤလၢ ပှၤကိးဝဲလၢ တၢ်အိၣ်ဘှံးအလီၢ်သၢဖျၢၣ် ဒီးအဝဲသ့ၣ်တနီၤန့ၣ် ဟဲအိၣ်ခိးပှၤ ပၢၢ်တုၤလၢ အးပံပရူး အတၢ်ဆါတၢ်ပှ့ၤအလီၢ်လီၤ. ဖဲစီၤပီလူး ထံၣ်အဝဲသ့ၣ်အခါ အဝဲစံးဘျုး ကစၢ်ယွၤဒီး ပာ်ဆူၣ်ထီၣ်အသးလီၤ.+
၁၆ လၢခံကတၢၢ် ဖဲပနုာ်လီၤလၢ ဝ့ၢ်ရိမ့ၤအခါ စီၤပီလူး န့ၢ်ဘၣ်အခွဲးလၢ ကအိၣ်ဝဲ ထဲတဂၤလၢ အနီၢ်ကစၢ်တၢ်လီၢ် ဒီးသုးဖိတဂၤ အိၣ်ခိးကွၢ်အီၤလီၤ.
၁၇ ဘၣ်ဆၣ် သၢသီဝံၤအလီၢ်ခံ အဝဲကိးဖှိၣ်ဝဲ ပှၤယူဒၤဖိ အခိၣ်အနၢ်တဖၣ်လီၤ. ဖဲအဝဲသ့ၣ် အိၣ်ဖှိၣ်အခါ အဝဲတဲဘၣ် အဝဲသ့ၣ်လၢ “ဒီပုၢ်ဝဲၢ်ခွါသ့ၣ်ဧၢ, ယတမၤတၢ်လၢ အထီဒါ ပပှၤကလုာ် ဒီးပမိၢ်ပၢ်ဖံဖု လၢပျၢၤတဖၣ် အလုၢ်လၢ် နီတမံၤဘၣ်.+ ဘၣ်ဆၣ် ပှၤစၢဃာ်ယၤ ဒ်ပှၤဃိာ်ဖိအသိးလၢ ဝ့ၢ်ယရူၤၡလ့ၣ်အပူၤ ဒီးပှၤဟ့ၣ်လီၤကွံာ်ယၤလၢ ပှၤရိမ့ၤဖိ အစုပူၤလီၤ.+
၁၈ ဖဲပှၤသံကွၢ်သံဒိးယၤ ဝံၤအလီၢ်ခံ+ အဝဲသ့ၣ် အဲၣ်ဒိးပျၢ်ကွံာ်ယၤ, မ့ၢ်လၢ အဝဲသ့ၣ် တထံၣ်န့ၢ် တၢ်ကမၣ်လၢ ပှၤကြၢးမၤသံယၤဘၣ် အဃိလီၤ.+
၁၉ ဘၣ်ဆၣ် ပှၤယူဒၤဖိတဖၣ် တတူၢ်လိာ်ဝဲဘၣ်အဃိ ယဘၣ်တီၣ်ထီၣ်တၢ်ဂ့ၢ် လၢကဲစၢ် အအိၣ်လီၤ.+ ဘၣ်ဆၣ် တမ့ၢ်လၢ ယတီၣ်ထီၣ်တၢ်ဂ့ၢ် ဒ်သိး ယကပာ်ဒ့ၣ် ပာ်ကမၣ် ယပှၤကလုာ် အဂီၢ်ဘၣ်.
၂၀ ယဘၣ် တၢ်စၢဃာ်ယၤလၢ ပျံၤထးန့ၣ် ခီဖျိလၢ ပှၤအံၣ်စရ့လးဖိတဖၣ် အတၢ်မုၢ်လၢ် အဃိလီၤ. ခီဖျိလၢ တၢ်ဂ့ၢ်တဖၣ်န့ၣ်အဃိ ယဃ့ထံၣ်လိာ်သးဒီးသု ဒီးတဲတၢ်ဒီးသုလီၤ.”+
၂၁ အဝဲသ့ၣ် တဲအီၤလၢ “ဘၣ်ဃးဒီးနၤန့ၣ် ပတဒိးန့ၢ်ဘၣ်လံာ်လၢ ယူဒၤအဟီၣ်ကဝီၤပူၤ နီတဘ့ၣ်ဘၣ်. ဒီးဒီပုၢ်ဝဲၢ်ခွါလၢ အဟဲလၢန့ၣ်တဖၣ် တဟဲစိာ်တၢ်ကစီၣ် ဘၣ်ဃးဒီးနၤဘၣ်, ဒီးတတဲနဂ့ၢ်လၢအတဂ့ၤဘၣ် နီတမံၤဘၣ်.
၂၂ ဘၣ်ဆၣ် ဘၣ်ဃးဒီး တၢ်ဘူၣ်တၢ်ဘါ တဒူၣ်အံၤ+ ပသ့ၣ်ညါလၢ ပှၤဒုၣ်ဒွဲၣ်အီၤလၢ တၢ်လီၢ်ကိးပူၤဒဲးအဃိ+ နတၢ်ထံၣ်အိၣ်ဒ်လဲၣ်န့ၣ် ပအဲၣ်ဒိးနၢ်ဟူလီၤ.”
၂၃ ဒီးအဝဲသ့ၣ် ရဲၣ်လီၤကျဲၤလီၤဝဲလၢ ကဟဲထံၣ်လိာ်သး ဒီးစီၤပီလူးတနံၤ ဒီးအဝဲသ့ၣ် ဟဲလၢ စီၤပီလူး အိၣ်တၢ်လီၢ် ဒီးဟဲဝဲအဂၤအါန့ၢ်ဒံး လၢညါတဘျီလီၤ. စးထီၣ်လၢ ဂီၤခီတုၤလီၤလၢ ဟါခီန့ၣ် စီၤပီလူး တဲနၢ်ပၢၢ်အဝဲသ့ၣ် တၢ်ဂ့ၢ်တခါအံၤ ခီဖျိ အဝဲအုၣ်အသး လီၤတံၢ်လီၤဆဲး ဘၣ်ဃးဒီး ယွၤအဘီမုၢ် အဂ့ၢ်လီၤ. ဒီးအဝဲသူ စီၤမိၤၡ့ အတၢ်သိၣ်တၢ်သီ+ ဒီးဝံအတၢ်ကွဲးအသး+ ဒ်သိး ကထုးန့ၢ် အဝဲသ့ၣ်အသး ဘၣ်ဃးဒီး ယ့ၣ်ၡူးလီၤ.+
၂၄ အဝဲသ့ၣ်တနီၤန့ၣ် နာ်ဝဲတၢ်လၢ စီၤပီလူးတဲဝဲတဖၣ် ဒီးတနီၤန့ၣ် တနာ်ဝဲဘၣ်.
၂၅ ဒီးမ့ၢ်လၢအဝဲသ့ၣ် အသးတလီၤပလိာ် လိာ်အသးဘၣ်အဃိ အဝဲသ့ၣ် ကက့ၤဝဲလီၤ. ဘၣ်ဆၣ် ဖဲန့ၣ်အခါ စီၤပီလူးတဲဝဲလၢ
“တၢ်လၢ သးစီဆှံတဲဘၣ် သုမိၢ်ပၢ်ဖံဖု လၢပျၢၤတဖၣ် ခီဖျိလၢ ဝံယၡါယၤန့ၣ် ဘၣ်ဝဲလီၤ.
၂၆ အတဲဝဲလၢ ‘လဲၤတဲဘၣ် ပှၤဂီၢ်မုၢ်တဖၣ်အံၤလၢ “သုကနၢ်ဟူတၢ် ဘၣ်ဆၣ်လ့ၤတက့ၤ သုတနၢ်ပၢၢ်တၢ်ဘၣ် ဒီးသုကကွၢ်တၢ် ဘၣ်ဆၣ် လ့ၤတက့ၤ သုတထံၣ်တၢ်ဘၣ်.+
၂၇ ဒီးပှၤတဖၣ်အံၤ အခိၣ်ကိၤဝဲဒိၣ်မးလီၤ. အဝဲသ့ၣ် နၢ်ဟူတၢ် ဘၣ်ဆၣ် တဒိကနၣ်ဝဲဘၣ် အဝဲသ့ၣ် ဘံၣ်ဃာ်အမဲာ် ဒ်သိး အသု တထံၣ်တၢ်တဂ့ၤ, ပံးအနၢ်ဒ်သိး အသု တနၢ်ဟူတၢ်တဂ့ၤ ဒီးအသု တနၢ်ပၢၢ်တၢ်တဂ့ၤအဂီၢ်လီၤ. ဒီးအဝဲသ့ၣ် တပီၢ်ယၢ်လီၤက့ၤအသးဘၣ်အဃိ ယမၤဘျါက့ၤ အဝဲသ့ၣ်တသ့ဘၣ်.”’+
၂၈ အဃိ ယဒုးသ့ၣ်ညါသုလၢ တၢ်အုၣ်က့ၤခီၣ်က့ၤလၢ အဟဲလၢ ကစၢ်ယွၤအအိၣ်န့ၣ် ဘၣ်တၢ်စံၣ်တဲၤတဲလီၤအီၤလၢ ပှၤကလုာ်တဖၣ် အအိၣ်လံ.+ ဒီးအဝဲသ့ၣ် ကဒိကနၣ်ဝဲ သပှၢ်ကတၢၢ်လီၤ.”+
၂၉ *—
၃၀ ဒီးစီၤပီလူးအိၣ်ဝဲလၢ ဟံၣ်လၢအငါအိၣ်ဝဲ အပူၤခံနံၣ်+ ဒီးအဝဲတူၢ်လိာ်ဝဲ ပှၤလၢ အဟဲလၢ အအိၣ်ကိးဂၤဒဲးလီၤ.
၃၁ ဒီးအဝဲစံၣ်တဲၤတဲလီၤ အဝဲသ့ၣ်လၢ ယွၤအဘီမုၢ်အဂ့ၢ် ဒီးသိၣ်လိအဝဲသ့ၣ် ဘၣ်ဃးဒီး ကစၢ်ယ့ၣ်ၡူးခရံာ်အဂ့ၢ် လၢတၢ်သူၣ်ဒူသးဒူအပူၤ+ ဒီးတၢ်တြီမၤတံာ်တာ် တအိၣ်နီတမံၤဘၣ်.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤလၢအတဲကျိာ်အဂၤတဖၣ်.”
^ ကြံးတၢ်ကတိၤ လၢအမ့ၢ် ဒ့(ခ်) Di′ke န့ၣ် ဘၣ်သ့ၣ်သ့ၣ် အဲၣ်ဒိးတဲဝဲ ကစၢ်မုၣ်တဂၤလၢ ကဟ့ၣ်ကၣ်က့ၤတၢ်လၢ တၢ်စံၣ်ညီၣ်တီအဂီၢ်.
^ ကွၢ် တၢ်ဂ့ၢ်ဘၣ်ထွဲလိာ်သး က၃.
