မၢ်ကူး ၉:၁-၅၀
-
ယ့ၣ်ၡူး လဲလိာ်အသး (၁-၁၃)
-
ဖိသၣ်လၢ တၢ်ဝံတၢ်နါဒိးအီၤန့ၣ် ဘျါက့ၤဝဲ (၁၄-၂၉)
-
ပှၤလၢအိၣ်ဒီးတၢ်နာ်န့ၣ် တၢ်ခဲလၢာ် ကဲထီၣ်အသး လၢအဂီၢ်သ့ (၂၃)
-
-
တၢ်တဲဆိပာ်ကဒီး ယ့ၣ်ၡူးအတၢ်သံ (၃၀-၃၂)
-
တၢ်မၢဖိတဖၣ်တဲအါလိာ်အသး ဘၣ်ဃးဒီးမတဂၤ မ့ၢ်ပှၤအဒိၣ်ကတၢၢ်လဲၣ် (၃၃-၃၇)
-
ပှၤလၢအတထီဒါပှၤဘၣ်န့ၣ် မ့ၢ်ပှၤလၢ အအိၣ်လၢပအိၣ်တကပၤ (၃၈-၄၁)
-
တၢ်လၢအမၤလီၤဃံၢ်ပှၤ (၄၂-၄၈)
-
“သုကဘၣ် လီၤဂာ် ဒ်သိးဒီး အံသၣ်” (၄၉, ၅၀)
၉ တကးဒံးဘၣ် ယ့ၣ်ၡူး တဲဘၣ်အဝဲသ့ၣ်လၢ “ယကတဲဘၣ်သု တီတီလၢ ပှၤလၢ အဆၢထၢၣ်ဖဲအံၤ တနီၤနီၤ, တချုးလၢ အသံဒံးဘၣ်န့ၣ် အဝဲသ့ၣ် ကထံၣ်ဘၣ်ဆိ ကစၢ်ယွၤအဘီအမုၢ် ဟဲဒီးအစိအကမီၤလီၤ.”+
၂ ဃုသီဝံၤအလီၢ်ခံန့ၣ် ယ့ၣ်ၡူးကိးန့ၢ်ဝဲ စီၤပ့းတရူး, စီၤယၤကိာ် ဒီးစီၤယိၤဟၣ် ဒီးလဲၤထီၣ်ဝဲလၢ ကစၢၢ်ဖးထီတဖျၢၣ် အလိၤလီၤ. ဒီးယ့ၣ်ၡူး လဲလိာ်အသး လၢအဝဲသ့ၣ် အမဲာ်ညါလီၤ.+
၃ ဒီးအတၢ်ကူတၢ်ကၤ ကပြုၢ်ကပြီၤထီၣ် ဒီးဝါဝဲဒိၣ်န့ၢ်ဒံးကယဲၢ် တၢ်ကူတၢ်ကၤလၢ ပှၤဆှုၣ်တၢ်ဖိ ဆှုၣ်ဝဲလီၤ.
၄ တကးဒံးဘၣ် ဝံအ့ၤလံယၤ ဒီးစီၤမိၤၡ့ ဟဲဖျါထီၣ်လၢ အဝဲသ့ၣ်အမဲာ်ညါ ဒီးတဲသကိးတၢ်ဒီး ယ့ၣ်ၡူးလီၤ.
၅ စီၤပ့းတရူး တဲဘၣ်ယ့ၣ်ၡူးလၢ “သရၣ်ဧၢ,* ပမ့ၢ်အိၣ်ဖဲအံၤဒု ဂ့ၤမး. အဃိ ပျဲပသူၣ်ထီၣ် ဒဲသၢဖျၢၣ်တက့ၢ်. လၢနဂီၢ်တဖျၢၣ်, လၢစီၤမိၤၡ့အဂီၢ်တဖျၢၣ် ဒီးလၢ ဝံအ့ၤလံယၤအဂီၢ်တဖျၢၣ်.”
၆ နီၢ်ကီၢ်န့ၣ် မ့ၢ်လၢ အဝဲသ့ၣ် ပျံၤတၢ်ဒိၣ်မးအဃိ စီၤပ့းတရူး ကဘၣ်တဲ တၢ်မနုၤလဲၣ်န့ၣ် အတသ့ၣ်ညါဝဲဘၣ်.
၇ ဒီးတၢ်အၢၣ် ဟဲဖျါထီၣ် ဒီးအကဒုလီၤဘၣ်လၢ အဝဲသ့ၣ်အဖီခိၣ်လီၤ. ဒီးလၢတၢ်အၢၣ်အပူၤန့ၣ် တၢ်ကလုၢ်သီၣ်ထီၣ်ဝဲလၢ+ “အဝဲ မ့ၢ်ယဖိခွါလၢယအဲၣ်အီၤလီၤ.+ ဒိကနၣ် အကလုၢ်တက့ၢ်.”+
၈ ဖဲန့ၣ်အခါ အဝဲသ့ၣ် ကွၢ်တရံးတၢ်တဘျီဃီ ဒီးတထံၣ် ပှၤနီတဂၤလၢၤဘၣ်. ထံၣ်ဝဲထဲ ယ့ၣ်ၡူးတဂၤလီၤ.
၉ ဖဲအဝဲသ့ၣ် ဟဲက့ၤလီၤလၢ ကစၢၢ်လိၤအခါ ယ့ၣ်ၡူး မၤလိာ်အဝဲသ့ၣ် လီၤတံၢ်လီၤဆဲးလၢ တချုးလၢ ပှၤကညီဖိခွါအံၤ ဂဲၤဆၢထၢၣ်သမူထီၣ်က့ၤလၢ တၢ်သံဒံးဘၣ်န့ၣ်+ အဝဲသ့ၣ် တဘၣ်တဲဘၣ် တၢ်လၢအဝဲသ့ၣ် ထံၣ်ဘၣ်ဝဲတဖၣ် လၢပှၤနီတဂၤဘၣ်.+
၁၀ အဝဲသ့ၣ် တိၢ်နီၣ်ဃာ် တၢ်ကတိၤအံၤ လၢအသးပူၤ* ဘၣ်ဆၣ် တဲသကိးလိာ်အသး ကဒဲကဒဲလၢ ယ့ၣ်ၡူးကဂဲၤဆၢထၢၣ်သမူထီၣ်က့ၤန့ၣ် အခီပညီဒ်လဲၣ်န့ၣ်လီၤ.
၁၁ ဒီးအဝဲသ့ၣ် သံကွၢ်ယ့ၣ်ၡူးလၢ “ဘၣ်မနုၤအဃိ ပှၤကွဲးလံာ်ဖိတဖၣ် တဲဝဲလၢ ဝံအ့ၤလံယၤ+ ကဘၣ်ဟဲဆိလဲၣ်.”+
၁၂ ယ့ၣ်ၡူး တဲဆၢက့ၤ အဝဲသ့ၣ်လၢ “ဝံအ့ၤလံယၤ ကဟဲဆိဝဲသပှၢ်ကတၢၢ် ဒီးကမၤဂ့ၤထီၣ်က့ၤ တၢ်ခဲလၢာ်လီၤ.+ ဘၣ်ဆၣ် ဘၣ်မနုၤအဃိ တၢ်ကွဲးအသးအိၣ်ဝဲလၢ ပှၤကညီဖိခွါအံၤ ကဘၣ်တူၢ် တၢ်နးတၢ်ဖှီၣ်အါမံၤ+ ဒီးပှၤကရ့အီၤလၢ တၢ်တပာ်ကဲဘၣ်အပူၤလဲၣ်.+
၁၃ ယကတဲဘၣ်သုလၢ ဝံအ့ၤလံယၤ+ ဟဲဝံၤလံ. ဘၣ်ဆၣ် အဝဲသ့ၣ် မၤအီၤဖဲအဲၣ်ဒိးမၤဝဲ ဒ်တၢ်ကွဲးအသး ဘၣ်ဃးဒီးအီၤ အသိးလီၤ.”+
၁၄ ဖဲအဝဲသ့ၣ် ဟဲက့ၤလၢ အပျဲၢ်အဘီၣ် လၢအဂၤတဖၣ် အအိၣ်အခါ အဝဲသ့ၣ်ထံၣ်ဝဲ ပှၤဂီၢ်မုၢ်ဖးဒိၣ် အိၣ်ဝးတရံး အဝဲသ့ၣ် ဒီးပှၤကွဲးလံာ်ဖိတဖၣ် တဲအါတၢ်ဒီးအဝဲသ့ၣ်လီၤ.+
၁၅ ဘၣ်ဆၣ် ဖဲပှၤဂီၢ်မုၢ်တဖၣ် ထံၣ်ယ့ၣ်ၡူးအခါ အဝဲသ့ၣ် ကမၢကမၣ်ဝဲဒီး လဲၤဃ့ၢ်လၢအအိၣ် ဒ်သိး ကဆၢဂ့ၤဆၢဝါအီၤ အဂီၢ်လီၤ.
၁၆ ယ့ၣ်ၡူးသံကွၢ် ပှၤဂီၢ်မုၢ်လၢ “သုတဲအါတၢ်ဒီးအဝဲသ့ၣ် ဘၣ်ဃး တၢ်ဂ့ၢ်မနုၤလဲၣ်.”
၁၇ ပှၤလၢ ပှၤဂီၢ်မုၢ်အကျါတဂၤ တဲဆၢအီၤလၢ “သရၣ်ဧၢ, တၢ်ဝံတၢ်နါအိၣ်လၢ ယဖိခွါအလိၤ ဒီးအမၤအီၤဒ်သိး အဝဲတဲတၢ်တသ့ဘၣ်အဃိ+ ယဟဲကိးအီၤလၢ နအိၣ်မီၤ.
၁၈ ဖဲတၢ်ဝံတၢ်နါဒိးယဖိခွါ တဘျီဂ့ၤ တဘျီဂ့ၤအခါန့ၣ် အမၤလီၤဃံၢ်အီၤလၢ ဟီၣ်ခိၣ်လိၤ ဒီးယဖိခွါအကိာ်ပူၤသဘှဲထီၣ်, အ့ၣ်တဃံးအမဲ ဒီးအဂံၢ်အဘါ လၢာ်ဝဲလီၤ. ယမၢနပျဲၢ်နဘီၣ်တဖၣ် နီဟးထီၣ်ကွံာ် တၢ်ဝံတၢ်နါအံၤ ဘၣ်ဆၣ် အဝဲသ့ၣ် မၤဝဲတန့ၢ်ဘၣ်.”
၁၉ ယ့ၣ်ၡူး တဲဆၢအဝဲသ့ၣ်လၢ “ပှၤတစိၤလၢ အတၢ်နာ်တအိၣ်ဘၣ်သ့ၣ်ဧၢ,+ ယကဘၣ် ဆဲးအိၣ်ဒီးသု ယံာ်ဒံးထဲလဲၣ်. ဒီးယကဘၣ် ဆဲးဝံသးစူၤသု ယံာ်ဒံးထဲလဲၣ်. ဟဲကိးအီၤလၢယအိၣ်တက့ၢ်.”+
၂၀ အဃိ အဝဲသ့ၣ် ဟဲကိးဖိသၣ်တဂၤန့ၣ် လၢအအိၣ် ဘၣ်ဆၣ် ဖဲအထံၣ် ယ့ၣ်ၡူးအခါ တၢ်ဝံတၢ်နါ မၤဝဲဒ်သိး ဖိသၣ်ကလီၤဃံၢ်လၢ ဟီၣ်ခိၣ်လိၤ ဒီးကနိးကစုာ်ဝဲလီၤ. ဖဲအလီၤဃံၢ်လၢ ဟီၣ်ခိၣ်လိၤ ဝံၤအလီၢ်ခံ အထိၣ်တလ့ၣ်အသး ဒီးအကိာ်ပူၤ သဘှဲထီၣ်ဝဲလီၤ.
၂၁ ဒီးယ့ၣ်ၡူးသံကွၢ် ဖိသၣ်အပၢ်လၢ “တၢ်မၤအသးဒီးအီၤဒ်အံၤ အိၣ်ဆံးယံာ်လံလဲၣ်.” အဝဲတဲဝဲလၢ “စးထီၣ်လၢ အနီၢ်ဆံးခါလံ.
၂၂ ဒီးတၢ်ဝံတၢ်နါ ကွံာ်လီၤအီၤလၢ မ့ၣ်အူအပူၤအါဘျီ တကးဒံးဘၣ် ကွံာ်လီၤစ့ၢ်ကီးအီၤ လၢထံကျါ ဒ်သိး ကမၤသံအီၤလီၤ. အဃိ နမၤမ့ၢ်သ့ တမံၤမံၤန့ၣ် သးကညီၤပှၤဒီး မၤစၢၤပှၤမီၤ.”
၂၃ ယ့ၣ်ၡူး တဲဘၣ်အီၤလၢ “ဘၣ်မနုၤအဃိ နတဲယၤလၢ ‘နမၤမ့ၢ်သ့’ န့ၣ်လဲၣ်. ပှၤလၢ အိၣ်ဒီးတၢ်နာ်န့ၣ် တၢ်ခဲလၢာ် ကဲထီၣ်အသးလၢ အဂီၢ်သ့လီၤ.”+
၂၄ တဘျီဃီန့ၣ် ဖိသၣ်အပၢ် တဲထီၣ်ဝဲလၢ အကလုၢ်ဖးဒိၣ်လၢ “ယအိၣ်ဒီးတၢ်နာ်လီၤ. ဘၣ်ဆၣ် မၤစၢၤယၤဒ်သိး ယတၢ်နာ် ကအါထီၣ်အဂီၢ်မီၤ.”+
၂၅ ဖဲယ့ၣ်ၡူး ထံၣ်ဝဲလၢ ပှၤဂီၢ်မုၢ် ဟဲသဖှိလၢ အဝဲသ့ၣ်အိၣ်အခါ အဒူဝဲ တၢ်ဝံတၢ်နါ ဒီးတဲအီၤလၢ “တၢ်ဝံတၢ်နါလၢ အမၤဝဲဒ်သိး ပှၤတဲတၢ်တသ့ဘၣ် ဒီးမၤတအၢပှၤနၢ်ဧၢ, ယမၤလိာ်နၤလၢ ဟးထီၣ်ကွံာ်လၢ ပှၤတဂၤအံၤအလိၤ ဒီးတဘၣ် ဟဲက့ၤနုာ်လီၤလၢၤတဂ့ၤ.”+
၂၆ ဒီးတၢ်ဝံတၢ်နါ ကိးပသူထီၣ်လၢ အကလုၢ်ဖးဒိၣ် ဒီးမၤကနိး ဖိသၣ်တဂၤန့ၣ်နးမး ဝံၤဒီး ဟးထီၣ်ကွံာ်လၢ အလိၤလီၤ. ဒီးဖိသၣ်အံၤ ဖျါလီၤဂာ်လၢ အသံအဃိ ပှၤအါတက့ၢ်န့ၣ် တဲဝဲလၢ “အသံလံ.”
၂၇ ဘၣ်ဆၣ် ယ့ၣ်ၡူး ဖီၣ်ထီၣ်အစု ဒီးတွံၢ်ထီၣ်အီၤ ဒီးအဝဲဆၢထၢၣ်ဝဲလီၤ.
၂၈ ဖဲယ့ၣ်ၡူး လဲၤနုာ်လီၤလၢ ဟံၣ်ပူၤအခါ အပျဲၢ်အဘီၣ်တဖၣ် သံကွၢ်ခူသူၣ်အီၤလၢ “ပနီဟးထီၣ်အီၤ တန့ၢ်ဘၣ် ဘၣ်လဲၣ်.”+
၂၉ ယ့ၣ်ၡူးတဲဘၣ် အဝဲသ့ၣ်လၢ “တၢ်တကလုာ်အံၤန့ၣ် ဟးထီၣ်ဝဲ ထဲဒၣ်လၢ တၢ်ထုကဖၣ်အဃိလီၤ.”
၃၀ ဒီးအဝဲသ့ၣ် ဟးထီၣ်ဖဲန့ၣ် ဒီးလဲၤခီဂာ်ဝဲ ကၤလံၤလါ ဘၣ်ဆၣ် ယ့ၣ်ၡူးတအဲၣ်ဒိးလၢ ပှၤကသ့ၣ်ညါ နီတဂၤဘၣ်.
၃၁ ဒီးယ့ၣ်ၡူးသိၣ်လိ အပျဲၢ်အဘီၣ်တဖၣ် ဒီးတဲအဝဲသ့ၣ်လၢ “ပှၤကညီဖိခွါအံၤ ကဘၣ် တၢ်ဟ့ၣ်လီၤကွံာ်အီၤလၢ ပှၤဂၤအစုပူၤ ဒီးအဝဲသ့ၣ် ကမၤသံအီၤလီၤ.+ ပှၤကမၤသံအီၤဘၣ်ဆၣ် လၢသၢသီတသီန့ၣ်* အဝဲ ကဂဲၤဆၢထၢၣ်ဝဲလီၤ.”+
၃၂ တၢ်လၢ ယ့ၣ်ၡူးတဲဝဲန့ၣ် အဝဲသ့ၣ် တနၢ်ပၢၢ်ဝဲဘၣ် သနာ်က့ အဝဲသ့ၣ်သံကွၢ်အီၤတဘူၣ်ဘၣ်.
၃၃ ဒီးအဝဲသ့ၣ် လဲၤတုၤလၢ ဝ့ၢ်ကပ့းရနီၣ်လီၤ. ဖဲယ့ၣ်ၡူးအိၣ်လၢ ဟံၣ်ပူၤအခါ အသံကွၢ် အပျဲၢ်အဘီၣ်လၢ “လၢကျဲန့ၣ် သုတဲအါလိာ်သး ဘၣ်ဃးဒီး တၢ်ဂ့ၢ်မနုၤလဲၣ်.”+
၃၄ လၢကျဲန့ၣ် အဝဲသ့ၣ်တဲအါလိာ်အသး ဘၣ်ဃးဒီး မတဂၤမ့ၢ် ပှၤအဒိၣ်ကတၢၢ်လဲၣ် အဃိ အဝဲသ့ၣ် တတဲဆၢတၢ် နီတမံၤဘၣ်.
၃၅ ဒီးယ့ၣ်ၡူးဆ့ၣ်နီၤ ဒီးကိးဃီၤဝဲ ပှၤတဆံခံဂၤအံၤ ဒီးတဲအဝဲသ့ၣ်လၢ “ပှၤလၢ အအဲၣ်ဒိးကဲ ပှၤအဆိကတၢၢ်တဂၤန့ၣ် အကဘၣ်ကဲပှၤလၢ အလီၢ်ခံကတၢၢ်တဂၤ ဒီးကဘၣ်ကဲ ပှၤခဲလၢာ် အခ့အပှၤလီၤ.”+
၃၆ ဒီးယ့ၣ်ၡူးကိးန့ၢ်ဝဲ ဖိသၣ်တဂၤ ဒီးဒုးဆၢထၢၣ်အီၤလၢ အဝဲသ့ၣ်အခၢၣ်သး ဝံၤပာ်ထီၣ်အစုလၢ အဖံဘၣ်ခိၣ် ဒီးတဲဘၣ်အဝဲသ့ၣ်လၢ
၃၇ “ပှၤလၢ အတူၢ်လိာ် ဖိသၣ်ဒ်အံၤတဂၤ+ လၢယမံၤအဃိန့ၣ် မ့ၢ်အတူၢ်လိာ်ယၤစ့ၢ်ကီးလီၤ. ဒီးပှၤလၢ အတူၢ်လိာ်ယၤန့ၣ် တမ့ၢ်ထဲ အတူၢ်လိာ်ယၤဘၣ်. မ့ၢ်အတူၢ်လိာ်စ့ၢ်ကီး ပှၤလၢ အဆှၢလီၤယၤတဂၤလီၤ.”+
၃၈ စီၤယိၤဟၣ် တဲအီၤလၢ “သရၣ်ဧၢ, ပထံၣ်ပှၤတဂၤသူနမံၤ ဒ်သိး ကနီဟးထီၣ် တၢ်ဝံတၢ်နါတဖၣ် အဂီၢ်လီၤ. ဒီးအတမ့ၢ် ပှၤလၢ အပိာ်ပခံဘၣ်အဃိ ပဂုာ်ကျဲးစၢးတြီအီၤလီၤ.”+
၃၉ ဘၣ်ဆၣ် ယ့ၣ်ၡူးတဲဝဲလၢ “တဘၣ်တြီအီၤတဂ့ၤ. ပှၤလၢ အမၤတၢ်လီၤလး ခီဖျိလၢ ယမံၤအဃိ လၢအကက့ၤ တဲအၢတဲသီယၤ လၢအဆိအချ့န့ၣ် တအိၣ်နီတဂၤဘၣ်.
၄၀ ပှၤလၢ အတထီဒါပှၤဘၣ်န့ၣ် မ့ၢ်အအိၣ်လၢ ပအိၣ်တကပၤလီၤ.+
၄၁ ဒီးပှၤလၢ အဒုးအီသုထံတခွး ခီဖျိလၢ သုမ့ၢ် ခရံာ်အပျဲၢ်အဘီၣ်အဃိန့ၣ်+ ယကတဲဘၣ်သု တီတီလၢ အကဒိးန့ၢ်ဘၣ် ခိၣ်ဖးသပှၢ်ကတၢၢ်လီၤ.+
၄၂ ဘၣ်ဆၣ် ပှၤလၢအမၤလီၤဃံၢ် ပှၤအဆံးလၢ အနာ်တၢ်တဖၣ်အံၤ အကျါတဂၤန့ၣ် ပှၤမ့ၢ်ဘျးထီၣ်အကိာ်ဘိဒီး ဆၢၣ်ဂူာ်လၢၢ်လၢ ကသ့ၣ်ယီၤတွံၢ်အီၤဒီး ကွံာ်လီၤအီၤလၢ ပီၣ်လဲၣ်ပူၤန့ၣ် ကဂ့ၤဒိၣ်လၢအဂီၢ်လီၤ.+
၄၃ “နစုတခီ မ့ၢ်မၤလီၤဃံၢ်နၤန့ၣ် ဒီၣ်တဲာ်ကွံာ်အီၤတက့ၢ်. နန့ၢ်ဘၣ်တၢ်မူ အိၣ်ဒီးနစုထဲတခီန့ၣ် ဂ့ၤန့ၢ်ဒံး နအိၣ်ဒီး နစုခံခီ ဒီးနနုာ်လီၤဘၣ်လၢ ကဟဲနၢ်* လၢမ့ၣ်အူလီၤပံာ်တန့ၢ်ဘၣ်အပူၤလီၤ.+
၄၄ *—
၄၅ ဒီးနခီၣ်တခီ မ့ၢ်မၤလီၤဃံၢ်နၤန့ၣ် ဒီၣ်တဲာ်ကွံာ်အီၤတက့ၢ်. နန့ၢ်ဘၣ်တၢ်မူ အိၣ်ဒီးနခီၣ်ထဲတခီန့ၣ် ဂ့ၤန့ၢ်ဒံး နဘၣ်တၢ်ကွံာ်လီၤနၤ လၢကဟဲနၢ်* အပူၤ+ အိၣ်ဒီးနခီၣ်ခံခီလီၤ.
၄၆ *—
၄၇ နမဲာ်ချံတခီ မ့ၢ်မၤလီၤဃံၢ်နၤန့ၣ် ခွဲးထုးထီၣ်ကွံာ်အီၤတက့ၢ်.+ နလဲၤနုာ်လီၤလၢ ကစၢ်ယွၤ အဘီမုၢ်အပူၤ အိၣ်ဒီးနမဲာ်ချံထဲတခီန့ၣ် ဂ့ၤန့ၢ်ဒံး နအိၣ်ဒီးနမဲာ်ချံခံခီ ဒီးနဘၣ် တၢ်ကွံာ်လီၤနၤလၢ ကဟဲနၢ်* အပူၤ+
၄၈ လၢလၢၣ်တသံဘၣ် ဒီးမ့ၣ်အူတလီၤပံာ်ဘၣ် အလီၢ်လီၤ.+
၄၉ “မ့ၣ်အူကဘၣ် တၢ်ဖှံလီၤအီၤလၢ ပှၤဒ်အံၤတဖၣ်* အလိၤ ဒ်ပှၤဖှံလီၤ အံသၣ်အသိးလီၤ.+
၅၀ အံသၣ်န့ၣ် ဂ့ၤဝဲလီၤ. ဘၣ်ဆၣ် အံသၣ် မ့ၢ်တဟီလၢၤဘၣ်န့ၣ် သုကမၤဟီထီၣ်က့ၤအီၤ ဒ်လဲၣ်.+ သုကဘၣ် လီၤဂာ် ဒ်သိးဒီး အံသၣ်+ ဒီးအိၣ်ဃူအိၣ်ဖိးလိာ်သး တဂၤဒီးတဂၤ ထီဘိလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ရၤဘံဧၢ.”
^ ဘၣ်သ့ၣ်သ့ၣ် ကမ့ၢ် “တၢ်ဂ့ၢ်တခါအံၤန့ၣ် အဝဲသ့ၣ် တတဲဘၣ် ပှၤနီတဂၤဘၣ်.”
^ အခီပညီလိၤလိၤ “သၢသီဝံၤအလီၢ်ခံ.”
^ ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ ကွၢ် တၢ်ကတိၤအခီပညီ.
^ မ့ၢ်ဝဲ ပှၤလၢအဘၣ်တၢ်ကွံာ်လီၤအီၤလၢ ကဟဲနၢ်အပူၤ.
