မၢ်ကူး ၃:၁-၃၅
၃ ယ့ၣ်ၡူး လဲၤနုာ်လီၤကဒီးလၢ ဘူၣ်ဘျီၣ်အပူၤ ဒီးပှၤလၢ အစုတဂ့ၤဘၣ်တဂၤ အိၣ်ဝဲဖဲန့ၣ်လီၤ.+
၂ မ့ၢ်ယ့ၣ်ၡူး ကမၤဘျါအီၤ လၢမုၢ်အိၣ်ဘှံးနံၤဧါ တမၤဘျါအီၤဧါန့ၣ် ပှၤဖၤရံၤၡဲတဖၣ် ကွၢ်အီၤထံထံ ဒ်သိး ကပာ်ဒ့ၣ်ပာ်ကမၣ်အီၤ အဂီၢ်လီၤ.
၃ ယ့ၣ်ၡူးတဲဘၣ်ပှၤလၢ အစုတဂ့ၤဘၣ်တဂၤလၢ “ဂဲၤဆၢထၢၣ်ဒီး ဟဲလၢ တၢ်ခၢၣ်သးတက့ၢ်.”
၄ ဝံၤဒီး ယ့ၣ်ၡူး တဲဘၣ်အဝဲသ့ၣ်လၢ “လၢမုၢ်အိၣ်ဘှံးနံၤန့ၣ် မ့ၢ်ပကြၢးမၤဂ့ၤတၢ်ဧါ မ့တမ့ၢ် မၤအၢတၢ်ဧါ. မ့ၢ်ပကြၢးမၤပူၤဖျဲး တၢ်သးသမူဧါ မ့တမ့ၢ် မၤသံတၢ်ဧါ.”+ ဘၣ်ဆၣ် အဝဲသ့ၣ် တတဲတၢ်နီတမံၤဘၣ်.
၅ ယ့ၣ်ၡူး ကွၢ်တရံးအဝဲသ့ၣ်လၢ တၢ်သးဒိၣ်ထီၣ်အပူၤ ဒီးမ့ၢ်လၢအဝဲသ့ၣ် အတၢ်ဒိသူၣ်ဒိသး တအိၣ်ဘၣ်အဃိ ယ့ၣ်ၡူး သးဘၣ်ဒိ ဒိၣ်မးလီၤ.+ ဒီးယ့ၣ်ၡူးတဲဘၣ် ပှၤတဂၤန့ၣ်လၢ “မၤဘျၢထီၣ်နစု” ဒီးအဝဲမၤဘျၢထီၣ်ဝဲ ဒီးအစုဂ့ၤထီၣ်က့ၤဝဲလီၤ.
၆ ပှၤဖၤရံၤၡဲတဖၣ် ဟးထီၣ်ကွံာ်ဖဲန့ၣ် ဒီးတဘျီဃီန့ၣ် အဝဲသ့ၣ် အိၣ်ဖှိၣ်ဒီး စီၤဟ့ၤရိာ် အပျဲၢ်အဘီၣ်တဖၣ်+ ဒီးကူၣ်ထီၣ်ဖးလီၤတၢ် ဒ်သိးကမၤသံ ယ့ၣ်ၡူးအဂီၢ်လီၤ.
၇ ဘၣ်ဆၣ် ယ့ၣ်ၡူး ဒီးအပျဲၢ်အဘီၣ်တဖၣ် လဲၤဝဲလၢ ပီၣ်လဲၣ်နံၤ ဒီးပှၤဂီၢ်မုၢ်ဖးဒိၣ်လၢ အအိၣ်လၢ ကၤလံၤလါ ဒီးယူဒၤန့ၣ် ပိာ်ထီၣ်အခံလီၤ.+
၈ တကးဒံးဘၣ် ပှၤအါဂၤလၢ အအိၣ်လၢ ယရူၤၡလ့ၣ် ဒီးအဒူၤမံအၤ ဒီးလၢယၢ်ဒ့ၣ်ဝၢ်ဘးခီ ဒီးလၢစိၢ်ဒီးစံဒိၣ် အကပိာ်ကပၤန့ၣ် ဖဲအဝဲသ့ၣ် နၢ်ဟူဘၣ်ဝဲ တၢ်လၢ ယ့ၣ်ၡူးမၤဝဲတဖၣ် အဂ့ၢ်အခါ အဝဲသ့ၣ်လဲၤဝဲလၢ အအိၣ်လီၤ.
၉ ဒီးယ့ၣ်ၡူးမၢ အပျဲၢ်အဘီၣ်တဖၣ် ကတဲာ်ကတီၤန့ၢ်အီၤ ချံဖိတဘ့ၣ် ဒ်သိး ပှၤဂီၢ်မုၢ်တဖၣ် သုတဟဲ ဆီၣ်သနံးအီၤတဂ့ၤ အဂီၢ်လီၤ.
၁၀ မ့ၢ်လၢ အမၤဘျါ ပှၤအါဂၤအဃိ ပှၤခဲလၢာ်လၢအိၣ်ဒီး တၢ်ဆူးတၢ်ဆါ လၢအနးတဖၣ် ဟဲဘူးထီၣ်ဒီးအီၤ ဒ်သိး ကထိးအီၤအဂီၢ်လီၤ.+
၁၁ ဖဲပှၤလၢ တၢ်ဝံတၢ်နါဒိးအီၤတဖၣ်+ ထံၣ်ယ့ၣ်ၡူးအခါ အဝဲသ့ၣ် ထိၣ်လီၤပှီၤအသး လၢအမဲာ်ညါ ဒီးကိးပသူထီၣ်ဝဲလၢ “နမ့ၢ်ယွၤအဖိခွါလီၤ.”+
၁၂ ဘၣ်ဆၣ် ယ့ၣ်ၡူးမၤလိာ် တၢ်ဝံတၢ်နါတဖၣ်အံၤ လီၤတံၢ်လီၤဆဲး တဘျီဝံၤတဘျီ ဒ်သိး အသုတပာ်ဖျါထီၣ်ဝဲလၢ အမ့ၢ်မတဂၤလဲၣ် တဂ့ၤအဂီၢ်လီၤ.+
၁၃ ဒီးအဝဲ လဲၤထီၣ်လၢ ကစၢၢ်တဖျၢၣ်အလိၤ ဒီးအဝဲကိးပှၤလၢ အအဲၣ်ဒိးကိးဝဲတဖၣ်+ ဒီးအဝဲသ့ၣ် လဲၤလၢအအိၣ်လီၤ.+
၁၄ ဒီးအဝဲ ဃုထၢထီၣ်ဝဲပှၤ ၁၂ ဂၤ ဒီးကိးအဝဲသ့ၣ်လၢ တၢ်မၢဖိတဖၣ်လီၤ. အဝဲသ့ၣ် ကမ့ၢ်ပှၤလၢ အပိာ်ယ့ၣ်ၡူးအခံ ဒီးယ့ၣ်ၡူး ကဆှၢလီၤအဝဲသ့ၣ်လၢ ကစံၣ်တဲၤတဲလီၤတၢ်
၁၅ ဒီးကဟ့ၣ်အဝဲသ့ၣ် တၢ်စိတၢ်ကမီၤလၢ ကနီဟးထီၣ်ကွံာ် တၢ်ဝံတၢ်နါတဖၣ်လီၤ.+
၁၆ ဒီးပှၤ ၁၂ ဂၤလၢ+ ဘၣ်တၢ်ဃုထၢထီၣ်အီၤန့ၣ် မ့ၢ်ဝဲ စီၤၡံမိၣ်လၢ လၢခံ ယ့ၣ်ၡူးကိးစ့ၢ်ကီးအီၤလၢ စီၤပ့းတရူး,+
၁၇ စီၤစ့းဘ့းဒဲအဖိခွါ စီၤယၤကိာ် ဒီးစီၤယၤကိာ် အဒီပုၢ်ဝဲၢ်ခွါ စီၤယိၤဟၣ် (ယ့ၣ်ၡူးကိးစ့ၢ်ကီး အဝဲသ့ၣ်လၢ ဘအၤန့ၢ်က့း ဒီးအခီပညီမ့ၢ်ဝဲ “လီသီၣ်အဖိခွါတဖၣ်”),+
၁၈ စီၤအၣ်ဒရ့း, စီၤဖံလံးပူး, စီၤဘၢ်သလီးမဲ, စီၤမးသဲ, စီၤသိၤမါ, စီၤအၤလဖဲအဖိခွါ စီၤယၤကိာ်, စီၤသးဒဲ, ပှၤကနၤနံဖိ စီၤၡံမိၣ်*
၁၉ ဒီးစီၤယူဒၤအံၣ်စကၤရံၤအိာ် လၢအဆါလီၤကွံာ် ယ့ၣ်ၡူးလီၤ.
ဒီးယ့ၣ်ၡူး လဲၤနုာ်လီၤလၢ ဟံၣ်တဖျၢၣ်အပူၤလီၤ.
၂၀ ဒီးပှၤဂီၢ်မုၢ်တဖၣ် ဟဲအိၣ်ဖှိၣ်ကဒီးဝဲလီၤ. အဃိ အဝဲသ့ၣ် အီၣ်တၢ်မး တချုးလၢၤဘၣ်.
၂၁ ဘၣ်ဆၣ် ဖဲယ့ၣ်ၡူးအဘူးအတံၢ်တဖၣ် နၢ်ဟူဝဲ ဘၣ်ဃးဒီး တၢ်မၤအသးတဖၣ်အခါ အဝဲသ့ၣ်လဲၤဝဲ ဒ်သိး ကဖီၣ်အီၤအဂီၢ် မ့ၢ်လၢ အဝဲသ့ၣ်တဲဝဲလၢ “အပျုၢ်လံ”+ အဃိလီၤ.
၂၂ တကးဒံးဘၣ် ပှၤကွဲးလံာ်ဖိလၢ အအိၣ်ဟဲလၢ ဝ့ၢ်ယရူၤၡလ့ၣ်န့ၣ် တဲဝဲလၢ “အဝဲအိၣ်ဒီး ဘၤဧၤလစဘူာ်* ဒီးအဝဲနီဟးထီၣ် တၢ်ဝံတၢ်နါတဖၣ် ခီဖျိလၢ တၢ်ဝံတၢ်နါ အခိၣ်တဂၤ အစိအကမီၤလီၤ.”+
၂၃ အဃိ ယ့ၣ်ၡူးကိးဃီၤ အဝဲသ့ၣ် ဒီးဟ့ၣ်အဝဲသ့ၣ်တၢ်အဒိလၢ “မုၣ်ကီၤလံၢ်* နီဟးထီၣ်ကွံာ် မုၣ်ကီၤလံၢ် ကသ့ဒ်လဲၣ်.
၂၄ ဒီးလၢဘီမုၢ်တဘ့ၣ်အပူၤ ပှၤမ့ၢ်ထီဒါလိာ်က့ၤ အသးကဒဲကဒဲန့ၣ် ဘီမုၢ်အံၤ အိၣ်ဂၢၢ်ကျၢၤဝဲ တသ့ဘၣ်.+
၂၅ ဒီးလၢဟံၣ်တဖျၢၣ်အပူၤန့ၣ် ပှၤမ့ၢ် က့ၤထီဒါလိာ်က့ၤအသးန့ၣ် ဟံၣ်အံၤ ကလီၤပှီၢ်ဝဲလီၤ.
၂၆ ဒ်န့ၣ်အသိး မုၣ်ကီၤလံၢ် မ့ၢ်ထီဒါလိာ်က့ၤအသးဒီး ပှၤလၢအအိၣ်ဒီးအီၤတဖၣ် မ့ၢ်လီၤမုၢ်လီၤဖးန့ၣ် အဝဲအိၣ်ဂၢၢ်ကျၢၤဝဲ တသ့ဘၣ် ဒီးကကတၢၢ်ဝဲဖဲန့ၣ်လီၤ.
၂၇ နီၢ်ကီၢ်န့ၣ် ပှၤမ့ၢ်တစၢဃာ်ဆိ ပှၤလၢ အဂံၢ်ဆူၣ်တဂၤဘၣ်န့ၣ် ပှၤလဲၤနုာ်လီၤလၢ အဟံၣ်ဒီးဟုၣ်န့ၢ် အတၢ်ဖိတၢ်လံၤ တသ့နီတဂၤဘၣ်. ပှၤစၢဃာ်အီၤမ့ၢ်ဝံၤမး ပှၤဂုာ်န့ၢ် အတၢ်ဖိတၢ်လံၤ လၢအဟံၣ်ပူၤ ကသ့လီၤ.
၂၈ ယကတဲဘၣ်သု တီတီလၢ ကယဲၢ်တၢ်ကမၣ်လၢ ပှၤဟီၣ်ခိၣ်ဖိ မၤဝဲတဖၣ် ဒီးတၢ်ကတိၤအအၢအသီလၢ အဝဲသ့ၣ် တဲဝဲတဖၣ်န့ၣ် တၢ်ကပျၢ်အဝဲသ့ၣ် အတၢ်ကမၣ် ခဲလၢာ်လီၤ.
၂၉ ဘၣ်ဆၣ် ပှၤလၢအကတိၤထီဒါ သးစီဆှံန့ၣ် တၢ်တပျၢ် အတၢ်ကမၣ် နီတဘျီဘၣ်+ ဒီးအတၢ်ဒဲးဘး ကအိၣ်ဝဲ လီၤထူလီၤယိာ်လီၤ.”+
၃၀ ယ့ၣ်ၡူးတဲဝဲဒ်န့ၣ် မ့ၢ်လၢ အဝဲသ့ၣ်တဲအီၤလၢ “တၢ်ဝံတၢ်နါ အိၣ်လၢအလိၤ”+ အဃိလီၤ.
၃၁ ဒီးအမိၢ် ဒီးအဒီပုၢ်ဝဲၢ်ခွါတဖၣ်+ ဟဲဆၢထၢၣ်ဝဲလၢ တၢ်ချၢလီၤ. အဝဲသ့ၣ် မၢပှၤတဂၤ လဲၤကိးန့ၢ်အီၤ ယ့ၣ်ၡူးလီၤ.+
၃၂ ဖဲပှၤဂီၢ်မုၢ်တဖၣ် ဆ့ၣ်နီၤအိၣ်ဝးတရံး ယ့ၣ်ၡူးအခါ အဝဲသ့ၣ် တဲဘၣ်ယ့ၣ်ၡူးလၢ “နမိၢ်ဒီး နဒီပုၢ်ဝဲၢ်ခွါတဖၣ် အိၣ်လၢတၢ်ချၢ ဒီးကိးနၤလီၤ.”+
၃၃ ဘၣ်ဆၣ် အဝဲတဲဆၢက့ၤ အဝဲသ့ၣ်လၢ “ယမိၢ် ဒီးယဒီပုၢ်ဝဲၢ်ခွါတဖၣ် မ့ၢ်မတၤတဖၣ်လဲၣ်.”
၃၄ ဝံၤဒီး အဝဲကွၢ်ဃီၤဝဲ ပှၤလၢအဆ့ၣ်နီၤ ဝးတရံးအီၤတဖၣ် ဒီးတဲဝဲလၢ “ကွၢ်လၢအံၤ, အဝဲသ့ၣ် မ့ၢ်ဝဲယမိၢ် ဒီးယဒီပုၢ်ဝဲၢ်ခွါတဖၣ်လီၤ.+
၃၅ ပှၤလၢအမၤ ကစၢ်ယွၤ အတၢ်ဘၣ်သးန့ၣ် မ့ၢ်ဝဲ ယဒီပုၢ်ဝဲၢ်မုၣ်, ယဒီပုၢ်ဝဲၢ်ခွါ ဒီးယမိၢ်လီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤလၢ အသူၣ်ဆူၣ်သးဆူၣ်တဂၤ.”
^ မံၤအံၤ မ့ၢ်ဝဲ မုၣ်ကီၤလံၢ်အမံၤလၢအဂၤတဖျၢၣ်.
^ အခီပညီလိၤလိၤ “စၤတၣ်.” မံၤအံၤ အခီပညီမ့ၢ်ဝဲ “ပှၤလၢအထီဒါတၢ်.”
