မၢ်ကူး ၂:၁-၂၈
၂ ဘၣ်ဆၣ် မုၢ်နံၤတဖၣ် ပူၤကွံာ်အလီၢ်ခံ ယ့ၣ်ၡူးက့ၤဝဲလၢ ဝ့ၢ်ကပ့းရနီၣ်အပူၤ ဒီးတၢ်ကစီၣ် ရၤလီၤအသးလၢ ယ့ၣ်ၡူးအိၣ်လၢ ဟံၣ်ပူၤလီၤ.+
၂ အဃိ ပှၤဟဲအိၣ်ဖှိၣ်ဝဲအါမး တုၤလၢ တၢ်လီၢ်တတြီၢ်လၢၤဘၣ်. ဒီးလၢတြဲၤ အခီၣ်ထံးဒၣ်လဲာ် တၢ်လီၢ်တအိၣ်လၢၤဘၣ်. ဒီးယ့ၣ်ၡူးစးထီၣ် စံၣ်တဲၤတဲလီၤ အဝဲသ့ၣ်လၢ ယွၤအကလုၢ်ကထါလီၤ.+
၃ ဒီးပှၤလွံၢ်ဂၤ ဟဲစိာ်ဝဲ ပှၤလၢ အစုလီၤဘျ့ ခီၣ်လီၤဘျ့တဂၤလၢ ယ့ၣ်ၡူးအအိၣ်လီၤ.+
၄ ဘၣ်ဆၣ် ခီဖျိလၢ ပှၤအိၣ်အါအဃိ အဝဲသ့ၣ် လဲၤစိာ်အီၤလၢ ယ့ၣ်ၡူးအအိၣ် တသ့ဘၣ်. အဃိ အဝဲသ့ၣ် မၤဖျိကွံာ် ဟံၣ်ခိၣ်လိၤလိၤ ဖဲယ့ၣ်ၡူးအဖီခိၣ် ဝံၤဒီးစဲၤလီၤဝဲ ပှၤလၢ အစုလီၤဘျ့ခီၣ်လီၤဘျ့တဂၤအံၤ လၢအအိၣ်လၢလီၢ်မံအလိၤလီၤ.
၅ ဖဲယ့ၣ်ၡူး ထံၣ်ဘၣ်ဝဲလၢ အဝဲသ့ၣ် အိၣ်ဒီးတၢ်နာ်အခါ+ အဝဲတဲဘၣ်ပှၤလၢ အစုလီၤဘျ့ ခီၣ်လီၤဘျ့တဂၤအံၤလၢ “ဖိဧၢ, နတၢ်ဒဲးဘးပျၢ်လံ.”+
၆ ဒီးပှၤကွဲးလံာ်ဖိတနီၤ အိၣ်ဝဲဖဲန့ၣ် ဒီးအဝဲသ့ၣ်ဆ့ၣ်နီၤဝဲ ဒီးဆိကမိၣ်ထီၣ်ဝဲလၢ အသးပူၤဒ်အံၤလီၤ.+
၇ “ပှၤတဂၤအံၤ တဲတၢ်ဒ်အံၤဘၣ်လဲၣ်. အဝဲကတိၤထီဒါ ကစၢ်ယွၤလံ. ပှၤပျၢ်တၢ်ဒဲးဘး တသ့နီတဂၤဘၣ် သ့ဒၣ်ထဲ ကစၢ်ယွၤတဂၤလီၤ, တမ့ၢ်ဧီၤ.”+
၈ ဘၣ်ဆၣ် ယ့ၣ်ၡူးသ့ၣ်ညါဝဲ* တဘျီဃီလၢ အဝဲသ့ၣ် ဆိကမိၣ်တၢ်ဒ်န့ၣ်အဃိ အတဲဘၣ်အဝဲသ့ၣ်လၢ “ဘၣ်မနုၤအဃိ သုဆိကမိၣ် တၢ်သ့ၣ်တဖၣ်အံၤလၢ သုသးပူၤလဲၣ်.+
၉ နမ့ၢ်တဲဘၣ်ပှၤလၢ အစုလီၤဘျ့ခီၣ်လီၤဘျ့တဂၤလၢ ‘နတၢ်ဒဲးဘးပျၢ်လံ’ မ့တမ့ၢ် ‘ဂဲၤဆၢထၢၣ်, စိာ်ထီၣ်နလီၢ်မံ ဒီးဟးတက့ၢ်’ န့ၣ် ကညီဒိၣ် ဖဲလဲၣ်တခါလဲၣ်.
၁၀ ဘၣ်ဆၣ် ဒ်သိး သုကသ့ၣ်ညါလၢ ပှၤကညီဖိခွါအံၤ+ အိၣ်ဒီးတၢ်စိတၢ်ကမီၤ လၢကပျၢ် တၢ်ဒဲးဘးလၢ ဟီၣ်ခိၣ်ချၢအဂီၢ်—”+ ဒီးအဝဲတဲဘၣ်ပှၤလၢ အစုလီၤဘျ့ခီၣ်လီၤဘျ့ တဂၤန့ၣ်လၢ
၁၁ “ယကတဲနၤ, ဂဲၤဆၢထၢၣ်, စိာ်ထီၣ်နလီၢ်မံ ဒီးက့ၤလၢ နဟံၣ်နီၤ.”
၁၂ ဒီးအဝဲ ဂဲၤဆၢထၢၣ် ဒီးစိာ်ထီၣ်အလီၢ်မံ တဘျီဃီ ဒီးဟးထီၣ်လၢ အဝဲသ့ၣ်ခဲလၢာ် အမဲာ်ညါလီၤ. အဃိ အဝဲသ့ၣ်ခဲလၢာ် ကမၢကမၣ် ဒီးမၤလၤကပီၤ ကစၢ်ယွၤ ဒီးတဲဝဲလၢ “ပတထံၣ်ဘၣ် တၢ်ကဲထီၣ်အသးဒ်အံၤ နီတဘျီဘၣ်.”+
၁၃ ယ့ၣ်ၡူး လဲၤကဒီးလၢ ပီၣ်လဲၣ်နံၤဒီး ပှၤဂီၢ်မုၢ်ခဲလၢာ် လဲၤလၢအအိၣ် ဒီးအဝဲ သိၣ်လိအဝဲသ့ၣ်လီၤ.
၁၄ ဖဲယ့ၣ်ၡူး လဲၤဝဲဆူညါအခါ အဝဲထံၣ်စိဝဲ စီၤအၤလဖဲအဖိခွါ စီၤလ့ၤဝံ ဆ့ၣ်နီၤလၢ တၢ်ခိတၢ်သွဲအရူ ဒီးယ့ၣ်ၡူး တဲအီၤလၢ “ဟဲပိာ်ယခံတက့ၢ်.” ဒီးအဝဲဂဲၤဆၢထၢၣ် ပိာ်ထီၣ်အခံလီၤ.+
၁၅ လၢခံ ဖဲယ့ၣ်ၡူးအီၣ်တၢ်* လၢစီၤလ့ၤဝံ အဟံၣ်ပူၤအခါ ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိအါဂၤ ဟဲအီၣ်တၢ်ဒီးယ့ၣ်ၡူး ဒီးအပျဲၢ်အဘီၣ်တဖၣ်လီၤ. ဒီးအဝဲသ့ၣ် အါဂၤန့ၣ် ကဲထီၣ် ပှၤလၢအပိာ် ယ့ၣ်ၡူးအခံလီၤ.+
၁၆ ဘၣ်ဆၣ် ဖဲပှၤဖၤရံၤၡဲ အပှၤကွဲးလံာ်ဖိတဖၣ် ထံၣ်ဝဲလၢ ယ့ၣ်ၡူးအီၣ်တၢ်ဒီး ပှၤတၢ်ဒဲးဘးဖိ ဒီးပှၤထၢတၢ်ခိတၢ်သွဲဖိတဖၣ်အခါ အဝဲသ့ၣ်တဲဘၣ် ယ့ၣ်ၡူး အပျဲၢ်အဘီၣ်တဖၣ်လၢ “ဘၣ်မနုၤအဃိ အဝဲအီၣ်တၢ်ဒီး ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိတဖၣ်လဲၣ်.”
၁၇ ဖဲယ့ၣ်ၡူး နၢ်ဟူဝဲအခါ အဝဲတဲဆၢက့ၤ အဝဲသ့ၣ်လၢ “ပှၤလၢ အအိၣ်ဆူၣ်အိၣ်ချ့န့ၣ် တလိၣ်ဘၣ် ကသံၣ်သရၣ်ဘၣ်. ဘၣ်ဆၣ်ပှၤလၢ အဆိးက့တဖၣ် လိၣ်ဘၣ်ဝဲလီၤ. ယဟဲကိးက့ၤ ပှၤတၢ်ဒဲးဘးဖိ,+ တမ့ၢ် ပှၤတီပှၤလိၤဘၣ်.”
၁၈ စီၤယိၤဟၣ် အပျဲၢ်အဘီၣ်တဖၣ် ဒီးပှၤဖၤရံၤၡဲတဖၣ် ဒုၣ်တၢ်အီၣ်လီၤ. အဃိ အဝဲသ့ၣ် ဟဲလၢ ယ့ၣ်ၡူးအအိၣ် ဒီးတဲအီၤလၢ “စီၤယိၤဟၣ် အပျဲၢ်အဘီၣ် ဒီးပှၤဖၤရံၤၡဲ အပျဲၢ်အဘီၣ်တဖၣ် ဒုၣ်တၢ်အီၣ် တလီၢ်လီၢ် ဘၣ်ဆၣ် ဘၣ်မနုၤအဃိ နပျဲၢ်နဘီၣ်တဖၣ် တမၤဝဲဒ်န့ၣ်ဘၣ်လဲၣ်.”+
၁၉ ယ့ၣ်ၡူး တဲအဝဲသ့ၣ်လၢ “ဖဲတလးမူးပိာ်ခွါ+ အိၣ်ဒံးဒီး အသကိးတဖၣ်အခါ လၢအဝဲသ့ၣ် ကဒုၣ်တၢ်အီၣ်အဂီၢ် တၢ်ဂ့ၢ်တအိၣ် နီတမံၤဘၣ်. ဖဲတလးမူးပိာ်ခွါ အိၣ်ဒီးအဝဲသ့ၣ် အဆၢကတီၢ်န့ၣ် အဝဲသ့ၣ်တကြၢး ဒုၣ်တၢ်အီၣ်ဘၣ်.
၂၀ ဘၣ်ဆၣ် တၢ်ဆၢကတီၢ်လၢ တၢ်ကဟံးထီၣ်ကွံာ် တလးမူးပိာ်ခွါလၢ အဝဲသ့ၣ်အအိၣ်န့ၣ် ကဟဲဝဲလီၤ.+ ဖဲန့ၣ်အခါ အဝဲသ့ၣ် ကဒုၣ်တၢ်အီၣ်လီၤ.
၂၁ တၢ်ကံးညာ် အသီတက့န့ၣ် ပှၤတဆးကျးထီၣ်အီၤလၢ ဆ့ကၤအလီၢ်လံၤတဘ့ၣ် အလိၤနီတဂၤဘၣ်. အမ့ၢ်မၤဝဲဒ်န့ၣ်န့ၣ် တၢ်ကံးညာ်အသီ ကထုးညာ်အီၤ ဒီးဆ့ကၤအလီၢ်လံၤ ကညာ်ဒိၣ်ထီၣ်ဝဲလီၤ.+
၂၂ ဒီးပှၤတထၢနုာ် စပံးထံအသီလၢ ထၢၣ်တၢ်ဖံးအလီၢ်လံၤအပူၤ နီတဂၤဘၣ်. ပှၤမ့ၢ်မၤဒ်န့ၣ်န့ၣ် စပံးထံအသီ ကမၤပိၢ်ဖးဝဲ ထၢၣ်တၢ်ဖံးဒီး စပံးထံကလီၤဆံၣ် ဒီးထၢၣ်န့ၣ် ကဟးဂီၤဝဲလီၤ. စပံးထံအသီန့ၣ် ပှၤထၢနုာ်ဝဲလၢ ထၢၣ်တၢ်ဖံးအသီအပူၤလီၤ.”
၂၃ ဖဲမုၢ်အိၣ်ဘှံးနံၤန့ၣ် ယ့ၣ်ၡူး လဲၤခီဂာ်ဝဲ စံာ်ပျီတဖၣ် ဒီးဖဲအပျဲၢ်အဘီၣ်တဖၣ် လဲၤတၢ်အခါ အဝဲသ့ၣ် ဒဲးဝဲဘုလီၤ.+
၂၄ အဃိ ပှၤဖၤရံၤၡဲတဖၣ် တဲယ့ၣ်ၡူးလၢ “ကွၢ်တထံၣ်, ဘၣ်မနုၤအဃိ အဝဲသ့ၣ် မၤတၢ်လၢ ပှၤတကြၢးမၤဝဲလၢ မုၢ်အိၣ်ဘှံးနံၤဘၣ်လဲၣ်.”
၂၅ ဘၣ်ဆၣ် ယ့ၣ်ၡူး တဲအဝဲသ့ၣ်လၢ “ဖဲစီၤဒၤဝံး အတၢ်အီၣ် တအိၣ်လၢၤဘၣ်ဒီး အဝဲဒီးပှၤလၢ အအိၣ်ဒီးအီၤတဖၣ် လီၤဘဲအခါ စီၤဒၤဝံးမၤတၢ်မနုၤလဲၣ်န့ၣ် သုတဖးဘၣ် နီတဘျီဧီၤ.+
၂၆ တၢ်ကွဲးအသး ဘၣ်ဃးဒီး စီၤအ့ဘယၤသၢ်+ လၢအမ့ၢ် ပှၤလုၢ်တၢ်ဒိၣ်အခိၣ်အဂ့ၢ်န့ၣ် ပာ်ဖျါဝဲလၢ စီၤဒၤဝံး လဲၤနုာ်လီၤလၢ ကစၢ်ယွၤအဟံၣ်ပူၤ ဒီးအီၣ်ဝဲကိၣ်လၢ တၢ်လုၢ်ထီၣ်တၢ်အဂီၢ် ဒီးဟ့ၣ်လီၤအီၣ်စ့ၢ်ကီးဝဲ ပှၤတနီၤလၢ အအိၣ်ဒီးအီၤလီၤ. နီၢ်ကီၢ်န့ၣ် ပှၤတကြၢးအီၣ်ဝဲ နီတဂၤဘၣ်, ပှၤအီၣ်န့ၢ်ဒၣ်ထဲ ပှၤလုၢ်တၢ်ဒိၣ်တဖၣ်လီၤ.”+
၂၇ ဝံၤဒီး ယ့ၣ်ၡူးတဲဘၣ် အဝဲသ့ၣ်လၢ “တၢ်လၢ မုၢ်အိၣ်ဘှံးနံၤန့ၣ် တၢ်ဒုးအိၣ်ထီၣ်အီၤလၢ ပှၤဟီၣ်ခိၣ်ဖိအဂီၢ်လီၤ.+ တမ့ၢ်လၢ ပှၤဟီၣ်ခိၣ်ဖိ အိၣ်ထီၣ်ဝဲလၢ မုၢ်အိၣ်ဘှံးနံၤအဂီၢ်ဘၣ်.
၂၈ ပှၤကညီဖိခွါအံၤ မ့ၢ်ဝဲ မုၢ်အိၣ်ဘှံးနံၤ အကစၢ်လီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “သ့ၣ်ညါဝဲလၢ အသးပူၤ.”
^ မ့ၢ်စ့ၢ်ကီး “သန့ၤအသးလၢ စီၢ်နီၤခိၣ်.”
