မၢ်ကူး ၁၂:၁-၄၄
-
တၢ်ကတိၤဒိ ဘၣ်ဃးဒီး ပှၤမၤတၢ်ဖိလၢ အမၤသံတၢ် (၁-၁၂)
-
ကစၢ်ယွၤဒီးကဲစၢ် (၁၃-၁၇)
-
တၢ်သံကွၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤ (၁၈-၂၇)
-
တၢ်မၤလိာ်လၢ အဒိၣ်ကတၢၢ်ခံထံၣ် (၂၈-၃၄)
-
ခရံာ် မ့ၢ်စီၤဒၤဝံးအဖိခွါဧါ (၃၅-၃၇)
-
ပလီၢ်သးလၢ ပှၤကွဲးလံာ်ဖိသ့ၣ်တဖၣ်တက့ၢ် (၃၇-၄၀)
-
မုၣ်ကမဲလၢအဖှီၣ်တဂၤ အစ့ခံဘ့ၣ် (၄၁-၄၄)
၁၂ ဒီးယ့ၣ်ၡူး တဲတၢ်ဒီး အဝဲသ့ၣ်လၢ တၢ်ကတိၤဒိတဖၣ် ဒီးတဲဝဲလၢ “ပှၤတဂၤ သူၣ်လီၤဝဲ စပံးတကျီး+ ဒီးကရၢဃာ်ဝဲလီၤ. ဒီးလၢကရၢၢ်အပူၤန့ၣ် အတ့ထီၣ်ဝဲ တၢ်လီၢ်တခါ ဒ်သိး ကစံၢ်စပံးသၣ်အဂီၢ် ဒီးသူၣ်ထီၣ်ဝဲ တၢးတဖျၢၣ်+ ဒီးငါလီၤဝဲလၢ ပှၤမၤတၢ်ဖိတဖၣ်အအိၣ် ဝံၤဒီးအလဲၤဝဲလၢ ထံဂၤကီၢ်ဂၤလီၤ.+
၂ ဖဲတၢ်ဆၢကတီၢ် ဘၣ်အခါ အမၢလီၤဝဲ ကုၢ်တဂၤ ဒ်သိး ကလဲၤဟံးန့ၢ် တၤသူတၤသၣ်တနီၤလၢ စပံးကျီးအပူၤ လၢပှၤမၤတၢ်ဖိတဖၣ် အအိၣ်လီၤ.
၃ ဘၣ်ဆၣ် အဝဲသ့ၣ် ဖီၣ်ဝဲကုၢ်တဂၤန့ၣ် ဒီးတီၢ်အီၤ ဝံၤဒီးပျဲက့ၤအီၤ ခီလီလီလီၤ.
၄ အဃိ အဝဲဆှၢလီၤကဒီး ကုၢ်အဂၤတဂၤလၢ အဝဲသ့ၣ်အအိၣ် ဒီးအဝဲသ့ၣ် တီၢ်ဝဲအခိၣ်သၣ်ဃံ ဒီးမၤမဲာ်ဆှးအီၤလီၤ.+
၅ ဒီးအဝဲဆှၢလီၤဝဲ အဂၤတဂၤ ဒီးအဝဲသ့ၣ် မၤသံအီၤလီၤ. ဒီးအဆှၢလီၤ ပှၤအါဂၤ ဘၣ်ဆၣ် အဝဲသ့ၣ်တီၢ်ဝဲ တနီၤ ဒီးမၤသံဝဲတနီၤလီၤ.
၆ လၢခံကတၢၢ်န့ၣ် အဝဲဆှၢလီၤ အဖိခွါလၢ အအဲၣ်ဝဲ တဂၤလီၤ.+ ဒီးအတဲလီၤအသးလၢ ‘အဝဲသ့ၣ် ကပာ်ကဲ ယဖိခွါလီၤ.’
၇ ဘၣ်ဆၣ် ပှၤမၤတၢ်ဖိတဖၣ် တဲလိာ်အသး ကဒဲကဒဲလၢ ‘အဝဲမ့ၢ် ပှၤလၢ အကန့ၢ်သါဘၣ်တၢ်တဂၤလီၤ.+ ဟဲဟီ, ပကလဲၤမၤသံအီၤ ဒီးအတၢ်န့ၢ်သါန့ၣ် ကကဲထီၣ်ပတၢ်လီၤ.’
၈ အဝဲသ့ၣ်ဖီၣ်န့ၢ်အီၤ, မၤသံအီၤ ဒီးထုးထီၣ်ကွံာ်အီၤလၢ စပံးကျီး အချၢလီၤ.+
၉ အဃိ စပံးကျီးအကစၢ် ကမၤဝဲဒ်လဲၣ်. အကဟဲမၤသံကွံာ် ပှၤမၤတၢ်ဖိတဖၣ် ဒီးကဟ့ၣ်လီၤကွံာ် စပံးကျီးလၢ ပှၤအဂၤတဖၣ် အစုပူၤလီၤ.+
၁၀ သုတဖးဘၣ် တၢ်ကွဲးအသးအံၤ နီတဘျီဧီၤ. ‘လၢၢ်တဖျၢၣ်လၢ ပှၤသူၣ်ဟံၣ်ဖိ တၢၤကွံာ်ဝဲန့ၣ် ကဲထီၣ်ဝဲလၢၢ်လၢ အရ့ဒိၣ်ကတၢၢ် တဖျၢၣ်လီၤ.*+
၁၁ လၢၢ်အံၤဟဲလၢ ယဟိဝၤယွၤ* အအိၣ်အဃိ လီၤကမၢကမၣ် ဒိၣ်မးလီၤ.’”+
၁၂ ဖဲန့ၣ်န့ၣ် အဝဲသ့ၣ် သ့ၣ်ညါဝဲလၢ ယ့ၣ်ၡူး တဲတၢ်ကတိၤဒိအံၤ ဘၣ်ဃးဒီး အဝဲသ့ၣ်အဃိ အဝဲသ့ၣ်အဲၣ်ဒိးဖီၣ်အီၤလီၤ. ဘၣ်ဆၣ် မ့ၢ်လၢအဝဲသ့ၣ် ပျံၤပှၤဂီၢ်မုၢ်အဃိ အဝဲသ့ၣ်ဟးထီၣ်ကွံာ်ဖဲန့ၣ်လီၤ.+
၁၃ ဝံၤဒီး အဝဲသ့ၣ် ဆှၢလီၤဝဲ ပှၤဖၤရံၤၡဲ ဒီးစီၤဟ့ၤရိာ် အပျဲၢ်အဘီၣ်တဖၣ်လၢ ကမၤဝဲဒ်သိး ယ့ၣ်ၡူး ကတဲကမၣ်တၢ် အဂီၢ်လီၤ.+
၁၄ ဖဲအဝဲသ့ၣ် ဟဲတုၤအခါ အဝဲသ့ၣ်တဲယ့ၣ်ၡူးလၢ “သရၣ်ဧၢ, ပသ့ၣ်ညါလၢ နတဲတၢ်မ့ၢ်တၢ်တီ ဒီးနတမၤဒ်သိး နကဒိးန့ၢ်ဘၣ် ပှၤဂၤအတၢ်ဘၣ်သး အဂီၢ်ဘၣ်. ဒီးနတစံၣ်ညီၣ်ပှၤဂၤ ဒ်နထံၣ်တၢ်လၢ အအိၣ်ဖျါ လၢခိအသိးဘၣ်. ဒီးနသိၣ်လိ ယွၤအကျဲ တီတီလိၤလိၤလီၤ. အဃိ ပကြၢးဟ့ၣ် တၢ်ခိတၢ်သွဲလၢ ကဲစၢ်ဧါ ပတကြၢး ဟ့ၣ်ဘၣ်ဧါ.
၁၅ ပကြၢးဟ့ၣ်မ့ၢ် တဟ့ၣ်ဘၣ်လဲၣ်.” ယ့ၣ်ၡူး သ့ၣ်ညါ အဝဲသ့ၣ် အတၢ်ကူၣ်အၢအဃိ ယ့ၣ်ၡူးတဲအဝဲသ့ၣ်လၢ “သုမၤကွၢ်ယၤဘၣ်လဲၣ်. ဒုးနဲၣ်ယၤ စ့ဒန့ၤရံၤ* တဘ့ၣ်တက့ၢ်.”
၁၆ အဝဲသ့ၣ် ဟဲစိာ်န့ၢ်အီၤတဘ့ၣ် ဒီးယ့ၣ်ၡူး တဲအဝဲသ့ၣ်လၢ “ဖဲအံၤ မ့ၢ်မတဂၤ အဂီၤလဲၣ် ဒီးမ့ၢ်မတဂၤ အမံၤလဲၣ်.” အဝဲသ့ၣ်တဲအီၤလၢ “ကဲစၢ်လီၤ.”
၁၇ ယ့ၣ်ၡူး တဲအဝဲသ့ၣ်လၢ “တၢ်လၢ အဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်.+ ဘၣ်ဆၣ် တၢ်လၢ အဘၣ်ဃးဒီး ကစၢ်ယွၤန့ၣ် ဟ့ၣ်က့ၤလၢ ကစၢ်ယွၤတက့ၢ်.”+ ဒီးအဝဲသ့ၣ် ကမၢကမၣ်ဝဲလၢ အတၢ်စံးဆၢ အဃိလီၤ.
၁၈ ဒီးပှၤစးဒူၤကဲလၢ အတဲဝဲလၢ တၢ်ဂဲၤဆၢထၢၣ် သမူထီၣ်က့ၤ တအိၣ်ဘၣ်န့ၣ်+ ဟဲသံကွၢ်ယ့ၣ်ၡူးလၢ+
၁၉ “သရၣ်ဧၢ, စီၤမိၤၡ့ ကွဲးန့ၢ်ပှၤလၢ ပှၤတဂၤမ့ၢ်သံ ဒီးအမါ မ့ၢ်အိၣ်တ့ၢ်ဝဲ ဒီးအဖိမ့ၢ်တအိၣ် နီတဂၤဘၣ်န့ၣ် အဒီပုၢ်ဝဲၢ်ခွါ ဘၣ်ဟံးန့ၢ်အမါ ဒီးဒုးအိၣ်ထီၣ် အစၢၤအသွဲၣ်လၢ အဒီပုၢ်ဝဲၢ်ခွါ လၢအသံတဂၤ အဂီၢ်လီၤ.+
၂၀ ပှၤဒီပုၢ်ဝဲၢ်ခွါအိၣ်ဝဲ နွံဂၤလီၤ. အဒိၣ်ကတၢၢ်တဂၤန့ၣ် ဟံးန့ၢ်အမါ ဘၣ်ဆၣ် တချုးလၢ အစၢၤအသွဲၣ် အိၣ်ထီၣ်ဒံးဘၣ်န့ၣ် အသံဝဲလီၤ.
၂၁ ဒီးခံဂၤတဂၤန့ၣ် ဟံးန့ၢ် ပိာ်မုၣ်တဂၤအံၤလၢအမါ ဒီးအဝဲစ့ၢ်ကီး သံဝဲတချုးလၢ အစၢၤအသွဲၣ် အိၣ်ထီၣ်ဒံးဘၣ်လီၤ. သၢဂၤတဂၤစ့ၢ်ကီး ဒ်န့ၣ်လီၤ.
၂၂ ဒီးအဝဲသ့ၣ် နွံဂၤလၢာ်သံဝဲ ဘၣ်ဆၣ် အစၢၤအသွဲၣ် တအိၣ်နီတဂၤဘၣ်. လၢခံကတၢၢ်န့ၣ် ပိာ်မုၣ်တဂၤန့ၣ် သံဝဲစ့ၢ်ကီးလီၤ.
၂၃ မ့ၢ်လၢအဝဲ ကဲပှၤနွံဂၤလၢာ် အမါအဃိ ဖဲပှၤသံ ဂဲၤဆၢထၢၣ် သမူထီၣ်က့ၤအခါ အဝဲကမ့ၢ် မတဂၤအမါလဲၣ်.”
၂၄ ယ့ၣ်ၡူးတဲဆၢ အဝဲသ့ၣ်လၢ “မ့ၢ်လၢ သုတနၢ်ပၢၢ် တၢ်ကွဲးအသး ဒီးကစၢ်ယွၤ အတၢ်စိတၢ်ကမီၤဘၣ်အဃိ သုတၢ်နၢ်ပၢၢ်န့ၣ် ကမၣ်ဝဲလီၤ.+
၂၅ ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤလၢ တၢ်သံအခါ ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ တဆီဟံၣ်ဆီဃီလၢၤဘၣ်. အဝဲသ့ၣ် ကအိၣ်ဒ်သိးဒီး မူခိၣ်ကလူးတဖၣ်လၢ မူခိၣ်လီၤ.+
၂၆ ဘၣ်ဃးဒီး ပှၤသံ ဂဲၤဆၢထၢၣ်သမူထီၣ်က့ၤ အဂ့ၢ်န့ၣ် သုတဖးဘၣ်လၢ လံာ်မိၤၡ့ အပူၤဧီၤ. လၢတၢ်ကွဲးနီၣ် ဘၣ်ဃးဒီး သပှီာ်တၤဆှုၣ်တခိၣ် အပူၤန့ၣ် ကစၢ်ယွၤတဲဘၣ် စီၤမိၤၡ့လၢ ‘ယမ့ၢ် စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤလီၤ.’+
၂၇ အဃိ ကစၢ်ယွၤ တမ့ၢ် ပှၤသံတဖၣ်အယွၤဘၣ်, မ့ၢ်ဝဲ ပှၤမူတဖၣ် အယွၤလီၤ. သုတၢ်ဆိကမိၣ်န့ၣ် ကမၣ်ဖးဒိၣ်လံ.”+
၂၈ ပှၤကွဲးလံာ်ဖိတဂၤ ဟဲနၢ်ဟူ အဝဲသ့ၣ်တဲအါလိာ်သး ဒီးသ့ၣ်ညါဝဲလၢ ယ့ၣ်ၡူးတဲဆၢက့ၤ အဝဲသ့ၣ် သ့ဂ့ၤမးအဃိ အဝဲသံကွၢ် ယ့ၣ်ၡူးလၢ “တၢ်မၤလိာ် အဒိၣ်ကတၢၢ်န့ၣ် မ့ၢ်ဖဲလဲၣ်တထံၣ်လဲၣ်.”+
၂၉ ယ့ၣ်ၡူး တဲဆၢက့ၤဝဲလၢ “တၢ်မၤလိာ် အဒိၣ်ကတၢၢ်န့ၣ်မ့ၢ်ဝဲ ‘အံၣ်စရ့လးဧၢ, ဒိကနၣ်တက့ၢ်. ပကစၢ် ယဟိဝၤယွၤန့ၣ် မ့ၢ်ဝဲ ယဟိဝၤယွၤ ထဲတဂၤဧိၤလီၤ.
၃၀ ဒီးနကဘၣ်အဲၣ် နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ, လၢနတၢ်ကူၣ်တၢ်ဆး ခဲလၢာ် ဒီးလၢနဂံၢ်နဘါ ခဲလၢာ်လီၤ.’+
၃၁ ဒီးခံထံၣ်တထံၣ်န့ၣ် မ့ၢ်ဝဲ ‘နကဘၣ် အဲၣ်ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.’+ တၢ်မၤလိာ်အဂၤလၢ အဒိၣ်န့ၢ် တၢ်သ့ၣ်တဖၣ်အံၤ တအိၣ်နီတမံၤလၢၤဘၣ်.”
၃၂ ပှၤကွဲးလံာ်ဖိတဂၤန့ၣ် တဲအီၤလၢ “သရၣ်ဧၢ, နတဲတၢ်န့ၣ် အဘၣ်ဂ့ၤမး ဒီးအလီၤပလိာ်ဒီး တၢ်မ့ၢ်တၢ်တီလီၤ. ‘အဝဲမ့ၢ် ယွၤထဲတဂၤ ဒီးယွၤလၢအဂၤ တအိၣ်နီတဂၤဘၣ်.’+
၃၃ ဒီးပှၤတဂၤဂၤ မ့ၢ်အဲၣ်အီၤလၢ အသးဒီဖျၢၣ် ဒီးအတၢ်သ့ၣ်ညါနၢ်ပၢၢ် ခဲလၢာ် ဒီးအဂံၢ်အဘါခဲလၢာ် ဒီးမ့ၢ်အဲၣ်ပှၤလၢအဃၢၤ ဒ်အအဲၣ်လီၤ အနီၢ်ကစၢ်အသး အသိးန့ၣ် အလုၢ်အပှ့ၤဒိၣ်န့ၢ်ဒံး ကယဲၢ် တၢ်လုၢ်ဒွဲၣ်အူ ဒီးတၢ်လုၢ်တၢ်ပာ်အဂၤ စၢၢ်တလၢၢ်လီၤ.”+
၃၄ ယ့ၣ်ၡူးသ့ၣ်ညါဝဲလၢ ပှၤတဂၤအံၤ စံးဆၢတၢ်ပှဲၤဒီး တၢ်ကူၣ်သ့အဃိ အတဲအီၤလၢ “နတယံၤဒီး ကစၢ်ယွၤ အဘီအမုၢ်ဘၣ်.” ဖဲန့ၣ်ဝံၤအလီၢ်ခံ ပှၤသံကွၢ်ယ့ၣ်ၡူးတၢ် တဘူၣ်နီတဂၤလၢၤဘၣ်.+
၃၅ ဘၣ်ဆၣ် ယ့ၣ်ၡူးဆဲး သိၣ်လိတၢ်လၢ တၢ်လုၢ်ဟံၣ်ပူၤ ဒီးတဲဝဲလၢ “ဘၣ်မနုၤအဃိ ပှၤကွဲးလံာ်ဖိတဖၣ် တဲဝဲလၢ ခရံာ်န့ၣ် မ့ၢ်စီၤဒၤဝံးအဖိခွါလဲၣ်.+
၃၆ သးစီဆှံ ထိၣ်ဟူးထိၣ်ဂဲၤထီၣ်+ စီၤဒၤဝံးလၢ အကတဲဝဲလၢ ‘ယဟိဝၤယွၤ တဲဘၣ်ယကစၢ်လၢ “ဆ့ၣ်နီၤလၢ ယစုထွဲ တုၤလီၤလၢ ယပာ်နဒုၣ်နဒါလၢ နခီၣ်အဖီလာ်တက့ၢ်.”’+
၃၇ စီၤဒၤဝံး မ့ၢ်ကိးခရံာ်လၢကစၢ်န့ၣ် အဝဲကဲ စီၤဒၤဝံးအဖိခွါ ကသ့ဒ်လဲၣ်.”+
ဒီးပှၤဂီၢ်မုၢ်ဖးဒိၣ်အံၤ ဒိကနၣ်အီၤ မုာ်ဝဲလီၤ.
၃၈ ဖဲယ့ၣ်ၡူးသိၣ်လိတၢ်အခါ အဆဲးတဲဝဲလၢ “ပလီၢ်သုသးလၢ ပှၤကွဲးလံာ်ဖိတဖၣ်တက့ၢ်. အဝဲသ့ၣ်န့ၣ်ဟးသိးဝဲ ဆ့ဖးထီမုာ်မး ဒီးအဲၣ်ဒိးလၢ ပှၤကဆၢဂ့ၤဆၢဝါအဝဲသ့ၣ်လၢ တၢ်ဆါတၢ်ပှ့ၤအလီၢ်လီၤ.+
၃၉ အဝဲသ့ၣ် အဲၣ်ဒိးဆ့ၣ်နီၤလၢ တၢ်မဲာ်ညါကတၢၢ် လၢဘူၣ်ဘျီၣ်ပူၤ ဒီးအဲၣ်ဒိးဆ့ၣ်နီၤလၢ လီၢ်ဆ့ၣ်နီၤအဂ့ၤကတၢၢ် ဖဲဟါတၢ်အီၣ်အခါလီၤ.+
၄၀ အဝဲသ့ၣ်ဟံးန့ၢ်ကွံာ်* မုၣ်ကမဲတဖၣ်အတၢ်စုလီၢ်ခီၣ်ခိၣ် ဒီးအဝဲသ့ၣ်ဃ့ထုကဖၣ်ဖးထီဒ်သိး ပှၤကပတြၢၤ အဝဲသ့ၣ်အဂီၢ်လီၤ. ပှၤတဖၣ်အံၤ ကဘၣ်တၢ်စံၣ်ညီၣ်အီၤ နးမးလီၤ.”
၄၁ ဒီးယ့ၣ်ၡူးဆ့ၣ်နီၤဝဲဖဲ တၢ်လီၢ်လၢ အထံၣ်စိဝဲ တိၢ်မၤဘူၣ် အတလါတဖၣ်လီၤ.+ ဒီးအဝဲကွၢ်ဝဲ ပှၤဂီၢ်မုၢ်တဖၣ် ဟဲထၢနုာ်လီၤစ့လၢ တိၢ်မၤဘူၣ် အတလါတဖၣ်အပူၤလီၤ. ဖဲန့ၣ် ပှၤထူးပှၤတီၤအါဂၤ ဟဲထၢနုာ်ဝဲ စ့အါမးလီၤ.+
၄၂ ဘၣ်ဆၣ် ပှၤမုၣ်ကမဲလၢအဖှီၣ်တဂၤ ဟဲဒီးထၢနုာ်လီၤဝဲ စ့ခံဘ့ၣ်လၢ အလုၢ်အပှ့ၤ အိၣ်ထဲတစဲးဖိလီၤ.*+
၄၃ အဃိ ယ့ၣ်ၡူးကိးဃီၤ အပျဲၢ်အဘီၣ်လၢအအိၣ် ဒီးတဲအဝဲသ့ၣ်လၢ “ယကတဲဘၣ်သု တီတီလၢ မုၣ်ကမဲလၢ အဖှီၣ်တဂၤအံၤ ထၢနုာ်ဝဲစ့လၢ တိၢ်မၤဘူၣ် အတလါအပူၤ အါန့ၢ်ဒံး ပှၤအဂၤခဲလၢာ်လီၤ.+
၄၄ အဝဲသ့ၣ် ကိးဂၤဒဲးထၢနုာ်ဝဲ တၢ်အဘျဲၣ်အစဲၢ်တဖၣ် ဘၣ်ဆၣ် မ့မ့ၢ် မုၣ်ကမဲတဂၤအံၤ ဖှီၣ်ဒိၣ်မးသနာ်က့ အထၢနုာ်ဝဲကယဲၢ် တၢ်လၢအိၣ်ဒီးအီၤခဲလၢာ်လၢ အကလုၢ်အီၣ်လုၢ်အီ အသးသမူအဂီၢ်လီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လၢၢ်အသနၢၣ်အခိၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အခီပညီလိၤလိၤ “အီၣ်ကွံာ်.”
^ အခီပညီလိၤလိၤ “လဲးတၤခံဘ့ၣ်န့ၣ် ပှဲၤသိးဝဲဒီး ခွါဒြ့ၤ တဘ့ၣ်.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
