မံကၤ ၇:၁-၂၀
၇ ယဘၣ်ကီဘၣ်ခဲလံ.
ယလီၤဂာ်ဒ်သိးဒီး ပှၤလၢအဟးဃုအီၣ်စပံးသၣ် ဘၣ်ဆၣ် ဃုဝဲ တဘၣ်ဘၣ်.
ဒီးယလီၤဂာ်ဒ်သိးဒီး ပှၤလၢအအဲၣ်ဒိးအီၣ် ချၢၣ်ဒၢသၣ်လၢအဝံၣ် ဘၣ်ဆၣ် တထံၣ်န့ၢ် တၢ်နီတမံၤဘၣ်,မ့ၢ်လၢ ပှၤပာ်ဖှိၣ်ထီၣ် တၢ်ကိၢ်ခါ အတၢ်သၣ်ဝံၤလံဒီးစပံးသၣ် ဝဲၢ်လံအဃိန့ၣ်လီၤ.
၂ ပှၤအိၣ်ဒီး တၢ်သးတီန့ၣ် ဟါမၢ်ကွံာ်လၢ ဟီၣ်ခိၣ်ချၢလံ.
လၢပှၤဟီၣ်ခိၣ်ဖိအကျါန့ၣ် ပှၤလၢ အသူၣ်ဘျၢသးဘျၢ တအိၣ်နီတဂၤလၢၤဘၣ်.+
အဝဲသ့ၣ်ခဲလၢာ်န့ၣ် အိၣ်ခိးခူသူၣ်တၢ်လၢ ကမၤသံတၢ်အဂီၢ်လီၤ.+
အဝဲသ့ၣ် တဂၤဒီးတဂၤ ဒိးဝဲအဒီပုၢ်ဝဲၢ်လၢ ထုလီၤ.*
၃ အဝဲသ့ၣ် မၤတၢ်အၢဖၠဲးဒိၣ်မး.+
ပှၤခိၣ်ပှၤနၢ်န့ၣ် ဃ့န့ၢ်ဆူၣ်တၢ်,စံၣ်ညီၣ်ကွီၢ်န့ၣ် ဃ့ဝဲခိၣ်ဖး+ဒီးပှၤဒိၣ်ပှၤပှၢ်န့ၣ် တဲဖျါထီၣ် တၢ်လၢအလီကီဝဲလီၤ.+
ဒီးအဝဲသ့ၣ်တဖၣ်န့ၣ် ဖီၣ်လိာ်စုမၤသကိးတၢ်လီၤ.
၄ ဒီးပှၤလၢအဂ့ၤကတၢၢ် လၢအဝဲသ့ၣ်အကျါန့ၣ် လီၤဂာ်ဒ်သိးဒီး တၤဆှုၣ်တၤမဲဒီးပှၤလၢအသးဘျၢကတၢၢ်လၢ အဝဲသ့ၣ်အကျါန့ၣ် အၢန့ၢ်ဒံး တၤဆှုၣ်အကရၢလီၤ.
မုၢ်နံၤလၢ သုပှၤခိးတၢ်ဖိတဖၣ် တဲတ့ၢ်ဝဲ ဒီးတၢ်စံၣ်ညီၣ်သု အမုၢ်နံၤန့ၣ် ကဟဲတုၤဝဲလီၤ.+
ဒီးသုကပျံၤတၢ်ဖုးတၢ် ဒိၣ်မးလီၤ.+
၅ တဘၣ်နာ်န့ၢ် သုသကိးတဂ့ၤဒီးတဘၣ် သန့ၤသုသးလၢ သုသကိးလၢ အဘူးဒီးသုတဂ့ၤ.+
တဘၣ်တဲဘၣ် သုမါလၢ အမံနီၤလၢ သုသးနါပှၢ်အလိၤ လၢသုတၢ်ဂ့ၢ်ခူသူၣ်တဂ့ၤ.
၆ ဖိခွါ တပာ်ကဲ အပၢ်ဘၣ်.
ဖိမုၣ် ထီဒါ အမိၢ်+ဒီးဒဲၣ်မုၣ် ထီဒါ အမံၤပှၢ်ပိာ်မုၣ်+ဒီးပှၤတဂၤ အဒုၣ်အဒါန့ၣ် မ့ၢ်အပှၤဟံၣ်ဖိဃီဖိလီၤ.+
၇ မ့မ့ၢ်ယၤန့ၣ် ယကခိးကွၢ်လၢ် ယဟိဝၤယွၤ အကျဲလၢ တၢ်သူၣ်ဆူၣ်သးဆူၣ်အပူၤ+ဒီးယကအိၣ်ခိး ယတၢ်အုၣ်က့ၤခီၣ်က့ၤ ကစၢ်ယွၤလၢ တၢ်သးစူၤ အပူၤလီၤ.+
ယကစၢ်ယွၤန့ၣ် ကဒိကနၣ် ယကလုၢ်လီၤ.+
၈ အိ ယဒုၣ်ယဒါဧၢ, တဘၣ်သးခုလၢ ယဘၣ်ကီဘၣ်ခဲ အဃိတဂ့ၤ.
ယလီၤဃံၢ်သနာ်က့ ယကဂဲၤဆၢထၢၣ်က့ၤဒီးယအိၣ်လၢ တၢ်ခံးကျါ သနာ်က့ ယဟိဝၤယွၤ ကကဲထီၣ် ယတၢ်ကပီၤလီၤ.
၉ မ့ၢ်လၢယမၤကမၣ်ဘၣ် ယဟိဝၤယွၤအဃိယကတူၢ် အတၢ်သးဒိၣ်+တုၤလၢအဘှါဆှဲန့ၢ် ယတၢ်မူးတၢ်ရၢ် ဒီးအစံၣ်ညီၣ်န့ၢ်ယၤတၢ် တီတီ လိၤလိၤလီၤ.
ဒီးအဝဲ ကဆှၢယၤလၢ တၢ်ကပီၤအအိၣ်ဒီးယကထံၣ်ဘၣ် အတၢ်တီတၢ်လိၤလီၤ.
၁၀ ဒီးယဒုၣ်ယဒါတဖၣ်စ့ၢ်ကီး ကထံၣ်ဘၣ်ဝဲဒီးအဝဲသ့ၣ် ကတူၢ်ဘၣ် တၢ်မဲာ်ဆှးလီၤ.
လၢညါ အဝဲသ့ၣ်တဲယၤလၢ “နကစၢ် ယဟိဝၤယွၤ အိၣ်ဖဲလဲၣ်.”+
အဝဲသ့ၣ် ကဘၣ်တၢ်ယီၢ်တံၢ်အီၤ ဒ်သိးဒီး ကပံာ်လၢကျဲပူၤလီၤ.
ဒီးယကကွၢ်ကီအဝဲသ့ၣ် ဒ်န့ၣ်လီၤ.
၁၁ ဖဲတၢ်တနံၤန့ၣ် ပှၤကတ့ထီၣ် န* တၢ်ဒူၣ်တဖၣ်လၢ လၢၢ်ဒီးဖဲတၢ်တနံၤန့ၣ် တၢ်လီၢ်အဆၢတဖၣ် ကဘၣ်တၢ်မၤလဲၢ်ထီၣ်အီၤလီၤ.
၁၂ ဖဲတၢ်တနံၤန့ၣ်ပှၤလၢအအိၣ်ဟဲလၢ ကီၢ်အၤၡူၢ် ဒီးကီၢ်အဲၤကူပတူး အဝ့ၢ်တဖၣ်ဒီးပှၤလၢအအိၣ်ဟဲလၢ ကီၢ်အဲၤကူပတူး တုၤလၢ ထံကျိ*ဒီးပှၤလၢ အအိၣ်ဟဲလၢ ပီၣ်လဲၣ်တဘ့ၣ်ဘၣ်တဘ့ၣ် ဒီးကစၢၢ်တဖျၢၣ်ဘၣ်တဖျၢၣ်န့ၣ် ကလဲၤလၢ နအိၣ်လီၤ.+
၁၃ ခီဖျိလၢ ပှၤအိၣ်လၢကီၢ်ပူၤဒီးတၢ်လၢအဝဲသ့ၣ် မၤဝဲတဖၣ်အဃိ ကီၢ်န့ၣ် ကဘၣ်အိၣ်သယုၢ်လီၤ.
၁၄ ကစၢ်ယွၤဧၢ, ဒ်ပှၤကွၢ်သိအသိး ကွၢ်ထွဲ နပှၤဂီၢ်မုၢ်လၢ နနီၣ်ထိးဘိတက့ၢ်. အဝဲသ့ၣ် မ့ၢ်သိတဖုလၢ အမ့ၢ်နတၢ်န့ၢ်သါလီၤ.+
လၢညါန့ၣ် အဝဲသ့ၣ် အိၣ်ဘၣ် လီၤလီၤဆီဆီလၢ ပှၢ်လၢ်ကျါလၢ တၤသူတၤသၣ် အကရၢပူၤလီၤ.
မ်အဝဲသ့ၣ် အီၣ်ဘၣ်တၢ်လၢ ဘၤၡၣ်အတၢ်လီၢ် ဒီးလၢကံးလဧး ဟီၣ်ကဝီၤအပူၤ+ ဒ်လၢညါ အသိးတက့ၢ်.
၁၅ “ယကဒုးနဲၣ်သု တၢ်လီၤလိၢ်လီၤလးတဖၣ်+ဒ်ဆၢကတီၢ်ဖဲ သုဟးထီၣ်လၢ ကီၢ်အဲၤကူပတူးအပူၤ အသိးလီၤ.
၁၆ ပှၤကလုာ်တဖၣ်န့ၣ် အဂံၢ်ဆူၣ် သနာ်က့ အဝဲသ့ၣ် ကထံၣ်ဘၣ် တၢ်သ့ၣ်တဖၣ်န့ၣ် ဒီးကမဲာ်ဆှးလီၤ.+
ဒီးအဝဲသ့ၣ် ကကးဘၢအထးခိၣ် လၢအစုဒီးအဝဲသ့ၣ် တနၢ်ဟူ တၢ် နီတမံၤလၢၤဘၣ်.
၁၇ အဝဲသ့ၣ် ကလ့ၣ်ဝဲ ဟီၣ်ခိၣ်ကမူၣ် ဒ်ဂုၢ်တဖၣ်အသိးလီၤ.+
ဒီးဒ်ဆၣ်ဖိကီၢ်ဖိလၢ အဘျိၣ်လၢ ဟီၣ်ခိၣ်လိၤအသိး အဝဲသ့ၣ် ကဟးထီၣ်ကွံာ်လၢ အတၢ်အိၣ်သဒၢ အလီၢ်တဖၣ် လၢတၢ်ကနိးကစုာ် အပူၤလီၤ.
ဒီးအဝဲသ့ၣ် ကဟဲလၢ ပကစၢ် ယဟိဝၤယွၤ အအိၣ်လၢ တၢ်ပျံၤတၢ်ဖုးဖးဒိၣ် အပူၤလီၤ.
ဒီးအဝဲသ့ၣ် ကပျံၤအီၤ* စ့ၢ်ကီးလီၤ.”+
၁၈ ကစၢ်ယွၤဧၢ, ယွၤလၢအလီၤဂာ်ဒီးနၤ တအိၣ်နီတဂၤဘၣ်.
နပှၤဂီၢ်မုၢ်လၢ အအိၣ်တ့ၢ်ဒံးတဖၣ်န့ၣ်+ နပျၢ်ကွံာ် အဝဲသ့ၣ် အတၢ်ကမၣ် ဒီးနတသ့ၣ်နီၣ်ထီၣ် အဝဲသ့ၣ် အတၢ်ဒဲးဘးဘၣ်.+
နပာ်ဖျါထီၣ် တၢ်အဲၣ်လၢအတီလၢ ပှၤဂၤအဖီခိၣ် မုာ်ဒိၣ်မးအဃိနတသးထီၣ်တၢ် လီၤထူ လီၤယိာ်ဘၣ်.+
၁၉ နကပာ်ဖျါထီၣ်ကဒီး တၢ်သးကညီၤ လၢပဖီခိၣ်လီၤ.+ ဒီးနကမၤနၢၤကွံာ်* ပတၢ်ကမၣ် တဖၣ်လီၤ.
ဒီးနကကွံာ်လီၤ ပတၢ်ဒဲးဘး ခဲလၢာ်လၢ ပီၣ်လဲၣ်ဖးယိာ် အပူၤလီၤ.+
၂၀ နကပာ်ဖျါထီၣ် တၢ်သးတီ လၢစီၤယၤကိာ် အဖီခိၣ်ဒီးနကပာ်ဖျါထီၣ် တၢ်အဲၣ်လၢအတီ လၢစီၤအၤဘြၤဟၣ်အဖီခိၣ်ဒ်လၢညါ နအၢၣ်လီၤတ့ၢ် ပမိၢ်ပၢ်ဖံဖု လၢပျၢၤတဖၣ် အသိးလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ပှာ်ဧိၤစၤဧိၤ.”
^ ဖျါလၢအဲၣ်ဒိးတဲဝဲ စံယိၣ် လၢအမ့ၢ် ဝ့ၢ်ယရူၤၡလ့ၣ်.
^ မ့ၢ်ဝဲ ထံကျိဖရၤသး.
^ အခီပညီလိၤလိၤ “နၤ.”
^ မ့ၢ်စ့ၢ်ကီး “ကယီၢ်တံၢ်လီၤ.”
