စံးထီၣ်ပတြၢၤ ၈၅:၁-၁၃
လၢတၢ်သူၣ်ဝံၣ်သးဆၢအခိၣ်အဂီၢ်. စီၤကိၤရး အဖိခွါတဖၣ်+ အထါသးဝံၣ်.
၈၅ အိ ယဟိဝၤယွၤဧၢ, နပာ်ဖျါထီၣ်လၢ နဘၣ်သူၣ်ဘၣ်သး နထံကီၢ်လံ.+
ဒီးစီၤယၤကိာ် အစၢၤအသွဲၣ်လၢ အဘၣ်တၢ်က့ၤဖီၣ်အီၤတဖၣ်န့ၣ် နကိးက့ၤအဝဲသ့ၣ်လံ.+
၂ နပျၢ်ကွံာ် နပှၤဂီၢ်မုၢ်တဖၣ် အတၢ်ကမၣ်ဒီးနပျၢ်ကွံာ် အဝဲသ့ၣ် အတၢ်ဒဲးဘး ခဲလၢာ်လံ.+ (စ့လၤ)
၃ နပၢၤဃာ် နတၢ်သးထီၣ်ဒီးနပာ်တ့ၢ်ကွံာ် နတၢ်သးဒိၣ်ထီၣ်လံ.+
၄ ပတၢ်အုၣ်က့ၤခီၣ်က့ၤ ကစၢ်ဧၢ,ဒုးဟဲက့ၤကဒါက့ၤပှၤ ဒီးသးထီၣ်ပှၤလၢၤတဂ့ၤ.+
၅ နကသးထီၣ်ပှၤ လီၤထူလီၤယိာ်လီၤဧါ.+
ဒီးနကဆဲးသးဒိၣ်ထီၣ်ပှၤ အစိၤစိၤအဃၣ်ဃၣ်လီၤဧါ.
၆ ဒ်သိးပဝဲ နပှၤဂီၢ်မုၢ်တဖၣ် ကသူၣ်ဖှံသးညီလၢ နပူၤအဂီၢ်+နတမၤဆူၣ်ထီၣ် ကဒါက့ၤပဂံၢ်ပဘါဧီၤ.
၇ အိ ယဟိဝၤယွၤဧၢ, ပာ်ဖျါထီၣ် နတၢ်အဲၣ်လၢအတီ လၢပဖီခိၣ်+ဒီးအုၣ်က့ၤခီၣ်က့ၤပှၤတက့ၢ်.
၈ ယွၤလၢအမ့ၢ်အတီ လၢအမ့ၢ် ယဟိဝၤယွၤ ကတဲဝဲဒ်လဲၣ်ဒ်လဲၣ်န့ၣ် ယကဒိကနၣ်လီၤ.
ဒီးအဝဲကတဲတၢ်ဒီး အပှၤဂီၢ်မုၢ်+ လၢအမ့ၢ် ပှၤလၢအသးတီဒီးအီၤတဖၣ် ဘၣ်ဃးဒီး တၢ်မုာ်တၢ်ခုၣ်လီၤ.
ဘၣ်ဆၣ် မ်အဝဲသ့ၣ် သုတနာ်န့ၢ်လီၤအသး အါတလၢ ဒ်သိးဒီးလၢညါလၢၤတဂ့ၤ.+
၉ ဒ်သိး ကစၢ်ယွၤအလၤကပီၤ ကအိၣ်လၢ ပကီၢ်ပူၤအဂီၢ်အဝဲကမၤပူၤဖျဲး ပှၤလၢအပျံၤအီၤတဖၣ် သပှၢ်တၢၢ်လီၤ.+
၁၀ တၢ်အဲၣ် ဒီးတၢ်သးတီ ကထံၣ်လိာ်အသးတၢ်တီတၢ်လိၤ ဒီးတၢ်ဃူတၢ်ဖိး ကနၢမူလိာ်အသးလီၤ.+
၁၁ တၢ်သးတီ ကမဲထီၣ်လၢ ဟီၣ်ခိၣ်ဒီးတၢ်တီတၢ်လိၤ ကကပီၤလီၤလၢ မူခိၣ်လီၤ.+
၁၂ မ့ၢ်လီၤ, ယဟိဝၤယွၤ ကဟ့ၣ်လီၤ တၢ်လၢအဂ့ၤတဖၣ်+ဒီးပဟီၣ်ခိၣ် ကမဲထီၣ်သၣ်ထီၣ် တၢ်လၢပှၤကဘၣ်ကူးအီၤတဖၣ်လီၤ.+
၁၃ တၢ်တီတၢ်လိၤ ကဟးလၢ ကစၢ်ယွၤအမဲာ်ညါ+ဒီးကအိးဟိထီၣ်ကျဲလၢ ကစၢ်ယွၤအခီၣ်လီၢ် အဂီၢ်လီၤ.
