စံးထီၣ်ပတြၢၤ ၆၄:၁-၁၀
-
တၢ်ဒီသဒၢလၢ တၢ်ထီဒါခူသူၣ်
-
“ကစၢ်ယွၤ ကခးအဝဲသ့ၣ်” (၇)
-
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ.
၆၄ အိ ကစၢ်ယွၤဧၢ, ဖဲယဃ့ကညးနၤအခါ ဒိကနၣ်ယၤတက့ၢ်.+
ဒီသဒၢ ယသးသမူလၢ ဒုၣ်ဒါအတၢ်ထီဒါလၢ အလီၤပျံၤလီၤဖုးန့ၣ်တက့ၢ်.
၂ ဒီသဒၢယၤလၢ ပှၤအၢပှၤသီ အတၢ်ကူၣ်ခူသူၣ်တဖၣ်+ဒီးလၢပှၤဂီၢ်မုၢ်လၢ အမၤတၢ်အၢတၢ်သီတဖၣ်န့ၣ်တက့ၢ်.
၃ အဝဲသ့ၣ် ကျ့အ့ၣ်ထီၣ် အပျ့ၤ ဒ်နးအသိးဒီးပညိၣ်ဝဲ အတၢ်ကတိၤလၢ အအၢအသီတဖၣ် ဒ်ပျၢ်တဖၣ်အသိးလီၤ.
၄ ဒီးအဝဲသ့ၣ် အိၣ်လၢအတၢ်အိၣ်ခူသူၣ်အလီၢ် ဒ်သိးကခးဝဲ ပှၤလၢအတၢ်ကမၣ်တအိၣ်ဘၣ်ဒီးအဝဲသ့ၣ်ခးအီၤ သတူၢ်ကလာ် ဒီးတပျံၤတၢ်ဘၣ်.
၅ အဝဲသ့ၣ် ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒ်သိးကမၤ တၢ်အၢတၢ်သီ,အဝဲသ့ၣ် တၢၣ်ပီၣ်တၢၣ်ပီသကိးဝဲလၢ အကဘၣ်ဒိးလီၤခူသူၣ် အပျံၤသကွီၤတဖၣ်ဒ်လဲၣ်ဒီးအဝဲသ့ၣ်တဲဝဲလၢ “ပှၤတထံၣ်ဝဲနီတဂၤဘၣ်.”+
၆ အဝဲသ့ၣ် ကူၣ်ထီၣ်ခူသူၣ်တၢ်+ဒီးဃုကျဲလၢအသီတဖၣ် ဒ်သိးကမၤတၢ်အၢတၢ်သီအဂီၢ်လီၤ.
အဝဲသ့ၣ်တဂၤစုာ်စုာ် အတၢ်ဆိကမိၣ်တဖၣ်န့ၣ် ပှၤနၢ်ပၢၢ်အီၤတသ့ဘၣ်.
၇ ဘၣ်ဆၣ် ကစၢ်ယွၤ ကခးအဝဲသ့ၣ်+ဒီးအဝဲသ့ၣ် ကဘၣ်ဒိဒီးပျၢ် သတူၢ်ကလာ်လီၤ.
၈ အဝဲသ့ၣ်အပျ့ၤန့ၣ် ကမၤဟးဂီၤက့ၤအဝဲသ့ၣ်+ အဃိပှၤကိးဂၤဒဲးလၢ အထံၣ်အဝဲသ့ၣ်န့ၣ် ကဂံၤဂုၤအခိၣ်လီၤ.
၉ ဖဲန့ၣ်အခါ ပှၤခဲလၢာ်ကပျံၤတၢ်လီၤ.
အဝဲသ့ၣ် ကတဲဖျါထီၣ် တၢ်လၢကစၢ်ယွၤ မၤတ့ၢ်ဝဲတဖၣ်ဒီးအဝဲသ့ၣ် ကနၢ်ပၢၢ်ထီၣ် ကစၢ်ယွၤအတၢ်မၤလီၤ.+
၁၀ ပှၤတီပှၤလိၤ ကသးခုလၢ ယဟိဝၤယွၤအပူၤ ဒီးကဃုတၢ်အိၣ်သဒၢအလီၢ်လၢ အအိၣ်လီၤ.+
ပှၤလၢအသူၣ်ဘျၢသးဘျၢခဲလၢာ် ကပာ်ကဖၢလၢသးလၢ ကစၢ်ယွၤအဃိလီၤ.
