စံးထီၣ်ပတြၢၤ ၂၁:၁-၁၃
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ.
၂၁ အိ ယဟိဝၤယွၤဧၢ, စီၤပၤသူၣ်ခုသးခု လၢနတၢ်ဂံၢ်တၢ်ဘါ အဃိလီၤ.+
ဒီးလၢနတၢ်အုၣ်က့ၤခီၣ်က့ၤအဃိ အဝဲသူၣ်ခုသးခု ဒိၣ်မးလီၤ.+
၂ နမၤလၢပှဲၤ တၢ်လၢအလီကီဝဲ+ဒီးတၢ်လၢအထးခိၣ်ဃ့ဝဲန့ၣ် နတဂ့ၢ်လိာ်ဘၣ်. (စ့လၤ)
၃ နသဂၢၢ်အီၤဒီး တၢ်ဆိၣ်ဂ့ၤလီၤဆီတဖၣ်ဒီးနဖျီၣ်ထီၣ် ခိၣ်သလုးထူစီလၢ အခိၣ်လိၤလီၤ.+
၄ အဝဲဃ့နၤလၢတၢ်မူ ဒီးနထုးထီထီၣ် အသးသမူ+တကးဒံးဘၣ် နဟ့ၣ်လီၤအီၤ တၢ်မူအထူအယိာ်လီၤ.
၅ နတၢ်အုၣ်က့ၤခီၣ်က့ၤန့ၣ် မၤလၤကပီၤအီၤ ဒိၣ်မးလီၤ.+
ဒီးနဟ့ၣ်အီၤလၢ တၢ်လၤကပီၤ ဒီးတၢ်ကဟုကညီၢ်လီၤ.
၆ လၢနဃိ အဝဲကဘၣ်ဆိၣ်ဂ့ၤ လီၤထူလီၤယိာ်+ဒီးနအိၣ်ဒီးအီၤအဃိ နမၤပှဲၤအသး ဒီးတၢ်သးခုလီၤ.+
၇ စီၤပၤ သန့ၤအသးလၢ ယဟိဝၤ ယွၤလီၤ.+
ဒီးခီဖျိလၢ တၢ်ထီကတၢၢ်တဂၤ အတၢ်အဲၣ်လၢအတီအဃိ အဝဲကဆၢထၢၣ် ဂၢၢ်ဂၢၢ်ကျၢၤကျၢၤ ထီဘိလီၤ.+
၈ နစုကဖီၣ်န့ၢ် နဒုၣ်နဒါခဲလၢာ်ဒီးပှၤလၢအသးဟ့နၤန့ၣ် နကဖီၣ်န့ၢ်အီၤလၢ နစုထွဲလီၤ.
၉ ဒီးအခါမ့ၢ်ဘၣ်လၢ နကလီၣ်ဖျါထီၣ်နသးန့ၣ် နကမၤဟးဂီၤကွံာ် အဝဲသ့ၣ် လီၤဂာ်ဒ်နကွံာ်လီၤ အဝဲသ့ၣ်လၢ ဖၣ်ကပူၤ လၢမ့ၣ်အူကဲၤဝဲအပူၤလီၤ.
ယဟိဝၤယွၤ ကယူၢ်လီၤကွံာ် အဝဲသ့ၣ်လၢ တၢ်သးဒိၣ်အပူၤ ဒီးမ့ၣ်အူကအီၣ်ကွံာ် အဝဲသ့ၣ်လီၤ.+
၁၀ အဝဲသ့ၣ် အစၢၤအသွဲၣ်န့ၣ် နကမၤဟးဂီၤကွံာ်လၢ ဟီၣ်ခိၣ်ချၢဒီးနကမၤဟးဂီၤကွံာ် အဝဲသ့ၣ် အချံအသၣ်လၢ ပှၤဟီၣ်ခိၣ်ဖိတဖၣ် အကျါလီၤ.
၁၁ အဝဲသ့ၣ် အဲၣ်ဒိးမၤအၢနၤ,+အဝဲသ့ၣ် ကူၣ်ထီၣ်ဖးလီၤတၢ် ဘၣ်ဆၣ် တကဲထီၣ်လိၣ်ထီၣ်ဝဲဘၣ်.+
၁၂ အဝဲသ့ၣ် ကဂုၤက့ၤလၢအလီၢ်ခံ+ခီဖျိလၢနပညိၣ်ချံၣ်လၢ အဝဲသ့ၣ်အအိၣ်အဃိလီၤ.
၁၃ အိ ယဟိဝၤယွၤဧၢ, ဂဲၤဆၢထၢၣ် ပာ်ဖျါထီၣ် နတၢ်စိတၢ်ကမီၤတက့ၢ်.
ပကသးဝံၣ် စံးထီၣ်ပတြၢၤနၤလၢ နတၢ်ဂံၢ်တၢ်ဘါအဃိလီၤ.
