ကတိၤဒိ ၃:၁-၃၅
၃ ဖိခွါဧၢ, တဘၣ်သးပ့ၤနီၣ် ယတၢ်သိၣ်လိ* တဂ့ၤ.
အိၣ်မူမၤထွဲ ယတၢ်မၤလိာ်တဖၣ် လၢနသးဒီဖျၢၣ်တက့ၢ်.
၂ နမ့ၢ်မၤဒ်န့ၣ်န့ၣ် နသးသမူကထီထီၣ်ဒီးနတၢ်အိၣ်မူကပှဲၤဒီး တၢ်ဃူတၢ်ဖိးလီၤ.+
၃ တဘၣ်ပျဲလၢ တၢ်အဲၣ် ဒီးတၢ်သးတီ ဟးဖးဒီးနၤတဂ့ၤ.+
စၢထီၣ်အီၤလၢ နကိာ်ဘိလိၤဒီးကွဲးလီၤအီၤလၢ နသးအဘ့ၣ်ဘၣ်အလိၤတက့ၢ်.+
၄ နမ့ၢ်မၤဒ်န့ၣ်န့ၣ် ကစၢ်ယွၤ ဒီးပှၤဟီၣ်ခိၣ်ဖိတဖၣ် ကထံၣ်လၢနမ့ၢ်ပှၤလၢ အအိၣ်ဒီး တၢ်နၢ်ပၢၢ်လီၤတံၢ်လီၤဆဲး ဒီးကဘၣ်သူၣ်ဘၣ်သးနၤလီၤ.+
၅ နာ်န့ၢ် ယဟိဝၤယွၤလၢ+ နသးဒီဖျၢၣ်ဒီးတဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ.+
၆ လၢနတၢ်အိၣ်မူ ကိးသနၢၣ်ဒဲးန့ၣ် ဆိကမိၣ်ထံ အတၢ်ထံၣ်တက့ၢ်.+
ဒီးအဝဲ ကဒုးနဲၣ်နၤ ကျဲလၢ အဘၣ်လီၤ.+
၇ တဘၣ် ဆိကမိၣ်လီၤနသးလၢ နမ့ၢ်ပှၤကူၣ်တၢ်သ့န့ၣ်တဂ့ၤ.+
ပျံၤယဟိဝၤယွၤ ဒီးဃၣ်ကွံာ်နသးလၢ တၢ်အၢတက့ၢ်.
၈ နမ့ၢ်မၤဒ်န့ၣ်န့ၣ် တၢ်ပျံၤယွၤကကဲ ဒ်သိးဒီး ကသံၣ်လၢ အမၤဘျါက့ၤ နနီၢ်ခိဒီးကမၤကျၢၤထီၣ် နဃံ နကွဲတဖၣ်လီၤ.
၉ မၤလၤကပီၤ ယဟိဝၤယွၤ ခီဖျိဟ့ၣ်အီၤ တၢ်လၢအဂ့ၤကတၢၢ် လၢအအိၣ်ဒီးနၤ+ဒီးတၤသၣ်ဆိတဖၣ်လၢ နဟီၣ်ခိၣ်အတၤသၣ်တဖၣ် ခဲလၢာ် အကျါတက့ၢ်.+
၁၀ နမ့ၢ်မၤဒ်န့ၣ်န့ၣ် နဘုဖီတဖၣ် ကပှဲၤဝဲဒီးဘု,+နတၢ်စံၢ်စပံးသၣ်အလီၢ် ကပှဲၤဝဲဒီး စပံးထံအသီ တုၤလၢ အပှဲၤလီၤလာ်ဝဲလီၤ.
၁၁ ဖိခွါဧၢ, တူၢ်လိာ် ယဟိဝၤယွၤ အတၢ်သိၣ်က့ၤသီက့ၤတက့ၢ်.+
ဒီးတဘၣ် သးဟ့ အတၢ်သိၣ်ဃီၣ်တဂ့ၤ.+
၁၂ ပှၤလၢ ယဟိဝၤယွၤအဲၣ်ဝဲန့ၣ် အဝဲသိၣ်ဃီၣ်ဝဲ+ဒ်သိးဒီး ပၢ်တဂၤလၢ အသိၣ်ဃီၣ်ဝဲ အဖိခွါ လၢအအဲၣ်ဝဲန့ၣ်လီၤ.+
၁၃ ပှၤလၢအထံၣ်န့ၢ် တၢ်ကူၣ်သ့+ဒီးပှၤလၢအမၤန့ၢ် တၢ်သ့ပဲာ်ထံနီၤဖးတၢ်န့ၣ် ကသးခုဝဲလီၤ.
၁၄ ပှၤမ့ၢ်န့ၢ်ဘၣ် တၢ်ကူၣ်သ့န့ၣ် ဂ့ၤဒိၣ်န့ၢ်ဒံး အန့ၢ်ဘၣ် စ့ညၣ်ဒီးပှၤမ့ၢ်အိၣ်ဒီး တၢ်ကူၣ်သ့န့ၣ် ဂ့ၤဒိၣ်န့ၢ်ဒံး အအိၣ်ဒီးထူလီၤ.+
၁၅ တၢ်ကူၣ်သ့န့ၣ် အလုၢ်ဒိၣ်ပှ့ၤဒိၣ် ဒိၣ်န့ၢ်ဒံး လၢၢ်ဖီတဖၣ်လီၤ.*
တၢ်ကူၣ်သ့န့ၣ် ပှၤထိၣ်သတြီၤအီၤဒီး တၢ်လၢပှၤလီကီဝဲ တသ့ နီတမံၤဘၣ်.
၁၆ တၢ်ကူၣ်သ့ အစုထွဲန့ၣ် ဖီၣ်ဃာ်ဝဲ တၢ်အိၣ်မူလၢအထီ,တၢ်ကူၣ်သ့ အစုစ့ၣ်န့ၣ် ဖီၣ်ဃာ်ဝဲ တၢ်ထူးတၢ်တီၤဒီး တၢ်လၤကပီၤလီၤ.
၁၇ ပှၤမ့ၢ်အိၣ်ဒီး တၢ်ကူၣ်သ့န့ၣ် ပှၤကသးခုဒီးပှၤတၢ်အိၣ်မူ ကမုာ် ကခုၣ်ဝဲလီၤ.+
၁၈ ပှၤမ့ၢ်ဟံးဃာ်တၢ်ကူၣ်သ့န့ၣ် တၢ်ကူၣ်သ့ ကကဲထီၣ် သ့ၣ်တၢ်မူတထူၣ် လၢအဂီၢ်ဒီးပှၤမ့ၢ်ဟံးဃာ်အီၤကျၢၤကျၢၤန့ၣ် ပှၤကသးခုလီၤ.+
၁၉ ယဟိဝၤယွၤ ဒုးအိၣ်ဂၢၢ်အိၣ်ကျၢၤ ဟီၣ်ခိၣ်လၢတၢ်ကူၣ်သ့+ဒီးလၢတၢ်နၢ်ပၢၢ်အပူၤန့ၣ် အဝဲပာ်လီၤမူခိၣ် လၢအလီၢ်ကျၢၤကျၢၤလီၤ.+
၂၀ ခီဖျိလၢ အတၢ်သ့ၣ်ညါအဃိ အဝဲမၤသ့ၣ်ဖးဝဲ ထံယိာ်တဖၣ်ဒီးတၢ်အၢၣ်ခံးသူတဖၣ် ဒုးလီၤဝဲ ပစီၤထံလီၤ.+
၂၁ ဖိခွါဧၢ, တဘၣ်သးပ့ၤနီၣ် တၢ်သ့ၣ်တဖၣ်န့ၣ်တဂ့ၤ,*
ပၢၤဃာ် တၢ်ကူၣ်သ့ ဒီးတၢ်သ့ဆိကမိၣ် ပဲာ်ထံနီၤဖးတၢ်တက့ၢ်.
၂၂ တၢ်သ့ၣ်တဖၣ်န့ၣ် ကဟ့ၣ်နၤတၢ်မူဒီးကကဲထီၣ် ဒ်ဖဲလၢအဃံလၤတဘိလၢ နကိာ်ဘိအလိၤလီၤ.
၂၃ ဒီးနမ့ၢ်မၤဒ်န့ၣ်န့ၣ် နကဟးဘၣ်လၢ နကျဲပူၤပူၤဖျဲးဖျဲးဒီးနခီၣ်တဘၣ်တိၢ် နီတဘျီဘၣ်.+
၂၄ ဖဲနမံနီၤအခါ နတလိၣ်ပျံၤတၢ်ဘၣ်,+နကမံနီၤ ဒီးနကမံဘၣ် မုာ်မုာ်လီၤ.+
၂၅ တၢ်လီၤပျံၤလီၤဖုး တမံၤဂ့ၤတမံၤဂ့ၤ မ့ၢ်ဟဲကဲထီၣ်အသး သတူၢ်ကလာ် သနာ်က့ နတပျံၤဘၣ်.+
ဒီးတၢ်နးတၢ်ဖှီၣ်လၢ အဟဲဘၣ်ပှၤအၢပှၤသီ ဒ်ကလံၤမုၢ်အသိးန့ၣ် နတပျံၤဘၣ်,+
၂၆ မ့ၢ်လၢ ယဟိဝၤယွၤ ကပာ်ဖျါထီၣ်လၢ အမ့ၢ်ဝဲ ပှၤလၢနနာ်န့ၢ်အီၤသ့ သပှၢ်တၢၢ် အဃိလီၤ.+
အတပျဲလၢ နခီၣ်ကဘၣ်ဘျးလၢ ပျံၤသကွီၤဘၣ်.+
၂၇ နမၤစၢၤမ့ၢ်သ့န့ၣ်*+တဘၣ်တြီနစုလၢ နကမၤဂ့ၤ ပှၤလၢအလိၣ်ဘၣ်* တၢ်မၤစၢၤတဖၣ်န့ၣ်တဂ့ၤ.+
၂၈ နဟ့ၣ်ပှၤလၢနဃၢၤ မ့ၢ်သ့ခဲအံၤန့ၣ်တဘၣ်တဲအီၤလၢ “က့ၤဆိဟီ, ခဲမုၢ်ဆ့ၣ်မး ဟဲက့ၤကဒါက့ၤ ဒီးယကဟ့ၣ်နၤ” န့ၣ်တဂ့ၤ.
၂၉ ပှၤလၢနဃၢၤလၢ အနာ်န့ၢ်နၤန့ၣ်+တဘၣ်ကူၣ်အၢအီၤတဂ့ၤ.
၃၀ ပှၤမ့ၢ်တမၤအၢနၤ နီတမံၤဘၣ်န့ၣ်+တဘၣ်အ့ၣ်လိာ်သးဒီးအီၤတဂ့ၤ.+
၃၁ တဘၣ်သူၣ်က့ၣ်သးကါ ပှၤလၢအမၤဆူၣ်မၤစိးတၢ်တဂ့ၤ+ဒီးတဘၣ်ဃုထၢ အကျဲနီတဘိတဂ့ၤ.
၃၂ ယဟိဝၤယွၤ သးဘၣ်အၢ ပှၤလၢအလံၣ်အီၣ်လီအီၣ်တၢ်တဖၣ်+ဘၣ်ဆၣ် ပှၤလၢအသူၣ်ဘျၢသးဘျၢန့ၣ် ကစၢ်ယွၤ ရ့ဒီးအီၤ ဘူးဘူးလီၤ.+
၃၃ ယဟိဝၤယွၤ အတၢ်ဆိၣ်အၢန့ၣ် အိၣ်ဝဲလၢ ပှၤအၢပှၤသီအဟံၣ်ပူၤ+မ့မ့ၢ် အတၢ်ဆိၣ်ဂ့ၤန့ၣ် အိၣ်ဝဲလၢ ပှၤတီပှၤလိၤအဟံၣ်ပူၤလီၤ.+
၃၄ ကစၢ်ယွၤ ကတဲဆဲးအဲး ပှၤလၢ အဒုၣ်ဒွဲၣ်တၢ်+မ့မ့ၢ် ပှၤလၢအဆီၣ်လီၤအသးန့ၣ် အဝဲဘၣ်သူၣ်ဘၣ်သးဝဲလီၤ.+
၃၅ ပှၤကူၣ်တၢ်သ့န့ၣ် ကန့ၢ်ဘၣ်တၢ်လၤကပီၤလီၤ.
မ့မ့ၢ် ပှၤဟးဂီၤဖိန့ၣ် ပာ်ဒိၣ်ပာ်ထီ တၢ်လၢတအိၣ်ဒီး အလၤ ကပီၤဘၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်သိၣ်တၢ်သီ.”
^ ကွၢ် တၢ်ကတိၤအခီပညီ.
^ ဖျါလၢအဲၣ်ဒိးတဲဝဲ ကစၢ်ယွၤ အတၢ်ဂ့ၤတၢ်ဝါတဖၣ် လၢအဘၣ် တၢ်ပာ်ဖျါထီၣ်တ့ၢ်အီၤလၢ အဆၢဖိလၢ အမဲာ်ညါတဖၣ်အပူၤ.
^ မ့ၢ်စ့ၢ်ကီး “တၢ်စိတၢ်ကမီၤ မ့ၢ်အိၣ်လၢနစုပူၤ.”
^ မ့ၢ်စ့ၢ်ကီး “ပှၤလၢအကြၢး န့ၢ်ဘၣ်.”
