တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | နနၢ်ပၢၢ် လံာ်စီဆှံသ့
ဘၣ်မနုၤအဃိ ပဘၣ်နၢ်ပၢၢ်လံာ်စီဆှံလဲၣ်
လံန် အိၣ်လၢ တရူးကီၢ် စံးဝဲ– “လံာ်စီဆှံန့ၣ်ပှၤအါဂၤသ့ၣ်ညါလၢ အမ့ၢ် တၢ်ဘူၣ်တၢ်ဘါအလံာ်တဘ့ၣ်လီၤ. ဘၣ်ဆၣ်လံာ်အံၤမ့ၢ်ဝဲ ပှၤတခီထံတခီကီၢ်အလံာ် ဒီးတဘၣ်ဃးလိာ်သးဒီးပှၤတရူးဖိဘၣ်.”
အမ့ၣ်လၢ အိၣ်လၢကီၢ်အ့ဒယါ တဲဝဲလၢ– “ဟ့ၣ်ဒူၢ်ဖိ အတၢ်ဘူၣ်တၢ်ဘါအလံာ်လဲၢ်မး ယတနၢ်ပၢၢ်ဘၣ်န့ၣ် ယနၢ်ပၢၢ်လံာ်စီဆှံကသ့ဒ်လဲၣ်.”
ယိမံကိး အိၣ်လၢ ကီၢ်ယပၣ် စံးစ့ၢ်ကီးဝဲ– “ယပာ်ကဲလံာ်စီဆှံခီဖျိလၢ အမ့ၢ်လံာ်လၢပျၢၤတဘ့ၣ်ဒီး ယနၢ်ဟူလၢပှၤဆါဘၣ်အီၤ အါမးအဃိလီၤ. ဘၣ်ဆၣ် ယတထံၣ်ဘၣ် လံာ်စီဆှံနီတဘျီဘၣ်.”
ပှၤအါဂၤလၢဟီၣ်ခိၣ်ဒီဘ့ၣ်ညါန့ၣ် ပာ်ကဲဝဲလံာ်စီဆှံဒိၣ်မးလီၤ. ဘၣ်ဆၣ်သနာ်က့ အဝဲသ့ၣ်အါဂၤန့ၣ် တနၢ်ပၢၢ်လံာ်စီဆှံအဂ့ၢ်ဂ့ၤဂ့ၤဘၣ်. အဒိ ပှၤအကကွဲၢ်တဖၣ်လၢ ကီၢ်အ့ၡၢၣ်အပူၤ တကးဒံးဘၣ် ပှၤအါဂၤအိၣ်လၢ ထံကီၢ်အဂၤသ့ၣ်တဖၣ်လၢ ပှၤထုးထီၣ်ရၤလီၤလံာ်စီဆှံအါအါအပူၤသနာ်က့ တနၢ်ပၢၢ်ဝဲလံာ်စီဆှံအဂ့ၢ်ဂ့ၤဂ့ၤဘၣ်.
ဘၣ်သ့ၣ်သ့ၣ် နကသံကွၢ်ဘၣ်ဒ်အံၤ, ‘ဘၣ်မနုၤအဃိ ယဘၣ်သးအိၣ်မၤလိ လံာ်စီဆှံလဲၣ်.’ နမ့ၢ်နၢ်ပၢၢ်လံာ်စီဆှံန့ၣ် ကမၤစၢၤနၤလၢ နတၢ်အိၣ်မူအပူၤဒ်လာ်အံၤ ပာ်ဖျါဝဲအသိးလီၤ–
-
နကအိၣ်ဒီးတၢ်သူၣ်မံသးမုာ် ဒီးတၢ်သူၣ်ဖှံသးညီ
-
နကလဲၤခီဖျိ ဟံၣ်ဖိဃီဖိတၢ်ကီတၢ်ခဲတဖၣ်
-
နကမၤနၢၤတၢ်သူၣ်ကိၢ်သးဂီၤတဖၣ်
-
နကမၤဂ့ၤထီၣ်တၢ်ရ့လိာ်သးဒီးပှၤဂၤ
-
နကသူစ့လၢတၢ်ကူၣ်သ့အပူၤ
အဒိ ယိၡံကိး အိၣ်လၢကီၢ်ယပၣ်န့ၣ် ဆိကမိၣ်ဝဲလၢ လံာ်စီဆှံအံၤ အိၣ်ဒီးတၢ်ဂ့ၢ်မနုၤတဖၣ်လဲၣ် ဒီးအဝဲဆၢတဲာ်လီၤအသးလၢ ကဖးလံာ်စီဆှံလီၤ. တၢ်အံၤကဲဘျုးလၢ အဂီၢ်ဒ်လဲၣ်. အဝဲစံးဝဲလၢ “လံာ်စီဆှံမၤစၢၤယၤလၢ ယကအိၣ်ဒီး ယတၢ်တိာ်ပာ်ဒီးယတၢ်မုၢ်လၢ်လၢ ခါဆူညါအဂီၢ်လီၤ. ဒီးယတတူၢ်ဘၣ်လၢ ယအိၣ်သယုၢ်သညိလၢၤဘၣ်.” ဒ်အမ့ၣ် တဲဖျါထီၣ်ဝဲလၢထးအသိး အဝဲဆၢတဲာ်လီၤအသးလၢ အကသမံသမိးကွၢ်လံာ်စီဆှံလၢ အနီၢ်ကစၢ်ဒၣ်ဝဲလီၤ. လၢတၢ်န့ၣ်အဃိ အဝဲစံးဝဲလၢ, “ယကမၢကမၣ် မ့ၢ်လၢ လံာ်စီဆှံန့ၣ် အိၣ်ဒီးတၢ်ဂ့ၢ်တၢ်ကျိၤလၢ အကဲဘျုးကဲဖှိၣ်လၢ ပှၤကိးဂၤဒဲးအဂီၢ်အဃိလီၤ”
လံာ်စီဆှံ မၤစၢၤပှၤဟီၣ်ခိၣ်ဖိလၢ အကကွဲၢ်တဖၣ်လီၤ. နမ့ၢ်အဲၣ်ဒိးသ့ၣ်ညါလၢ လံာ်စီဆှံကဲဘျုးကဲဖှိၣ်လၢနဂီၢ်သ့ဒ်လဲၣ်အဂ့ၢ်န့ၣ် သမံသမိးကွၢ်လၢနနီၢ်ကစၢ်တက့ၢ်.
