တၢ်ဂ့ၢ်လၢအဘၣ်ထွဲလိာ်သးဒီးလံာ်ကုခိၣ် | ပလဲၤခီဖျိ တၢ်သူၣ်ကိၢ်သးဂီၤ ကသ့ဒ်လဲၣ်
တၢ်သူၣ်ကိၢ်သးဂီၤလၢ ဟံၣ်ဖိဃီဖိ အဃိ
ကၠဲနဲးစံးဝဲလၢ “ယပါသံဝံၤအလီၢ်ခံတယံာ်ဘၣ်ဒီး ယဝၤတဲယၤလၢ သါထံၣ်ပိာ်မုၣ်လၢအသီလံ. တယံာ်ဘၣ် လၢတၢ်တပာ်သူၣ်ပာ်သးအပူၤ အဝဲဝံထီၣ်အထၢၣ်ဒီး ဟးသဒၣ်ယၤဒီးအဖိခံဂၤလီၤ.” ကၠဲနဲးဃုတၢ်မၤန့ၢ်ဘၣ်ဆၣ် အစ့ဟဲနုာ် တလၢလၢအဟံၣ်လဲအဂီၢ်ဘၣ်. အဝဲကွၢ်ဆၢၣ်မဲာ်ဘၣ် တၢ်ကီတၢ်ခဲတမ့ၢ်ထဲလၢ ကျိာ်စ့ဘၣ်, တၢ်ကီတၢ်ခဲဒိၣ်န့ၢ်အန့ၣ်စ့ၢ်ကီး ကွၢ်ဆၢၣ်မဲာ်ဘၣ်ဝဲလီၤ. အဝဲစံးဝဲ “မ့ၢ်လၢယဘၣ် ဟံးထီၣ်မူဒါအသီတဖၣ် ထဲတဂၤဧိၤအဃိ ယပှဲၤဒီးတၢ်ဘၣ်ယိၣ်လီၤ. ဒ်မိၢ်ပၢ်အဂၤတဖၣ်အသိး ယလုၢ်အီၣ်ယဖိတန့ၢ်ဘၣ်အဃိ ယသးအုးလီၤ. ခဲကနံၣ်အံၤ ယဘၣ်ယိၣ်လၢ ပှၤဂၤကထံၣ်ယၤဒီး ယဖိဒ်လဲၣ်န့ၣ်လီၤ. မ့ၢ်ပှၤကဆိကမိၣ်လၢ တၢ်လၢယကြၢးမၤန့ၣ် ယတမၤဘၣ်အဃိ ယဝၤပာ်တ့ၢ်ကွံာ်ယၤန့ၣ်ဧါ.”
ကၠဲနဲး
တၢ်ထုကဖၣ်မၤစၢၤ ကၠဲနဲးလၢအသးတၢ်တူၢ်ဘၣ် ကကိညၢ်ထီၣ်အဂီၢ်ဒီး အတၢ်ရ့လိာ်သးဒီး ကစၢ်ယွၤကဂၢၢ်ကျၢၤထီၣ်အဂီၢ်န့ၣ်လီၤ. အဝဲစံးလၢ “မုၢ်နၤခီန့ၣ် မ့ၢ်တၢ်ဆၢကတီၢ်လၢ အကီအခဲကတၢၢ်လီၤ. ဖဲမုၢ်နၤတၢ်ဘှ့ၣ်တၢ်ဘှီၣ်အခါ ယတၢ်သူၣ်ကိၢ်သးဂီၤ အိၣ်ဝးတရံးယၤလီၤ. တၢ်ဃ့ဘါထုကဖၣ်ဒီး တၢ်ဖးလံာ်စီဆှံန့ၣ် မၤစၢၤယၤဒ်သိး ယမံကန့ၢ်အဂီၢ်လီၤ. လံာ်စီဆှံအဆၢလၢ ယဘၣ်သူၣ်ဘၣ်သးကတၢၢ်န့ၣ်မ့ၢ်ဝဲ ဖံလံးပံၤ ၄:၆, ၇ လၢအစံးဝဲ– ‘သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤလၢ သုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သူသးဒီး သုဆိကမိၣ်တၢ်လၢ ယ့ၣ်ၡူးခရံာ်အပူၤလီၤ.’ အါဘျီန့ၣ်ယဘါထုကဖၣ်တၢ်ဒီနၤညါ ဒီးယတူၢ်ဘၣ်လၢ ယဟိဝၤယွၤ အတၢ်ဃူတၢ်ဖိးန့ၣ် မၤမုာ်ထီၣ်ယသးလီၤ.”
ယ့ၣ်ၡူးအတၢ်ကတိၤတဖၣ်လၢ ဘၣ်ဃးဒီးတၢ်ထုကဖၣ်န့ၣ် ဘၣ်ထွဲလိာ်သးဒီး ကယဲၢ်တၢ်သူၣ်ကိၢ်သးဂီၤခဲလၢာ်လီၤ– “သုတချုးဃ့ဒံးဘၣ်ဒီး တၢ်လၢသုန့ၢ်ဘၣ်အီၤအလီၢ်အိၣ်တဖၣ်န့ၣ် သုပၢ်သ့ၣ်ညါဝဲလီၤ.” (မးသဲ ၆:၈) ဘၣ်ဆၣ် ပကဘၣ်ဃ့တၢ်လၢအီၤလီၤ. တၢ်ဃ့ဘါထုကဖၣ်န့ၣ်မ့ၢ်ကျဲတဘိလၢသုက “သုးဘူးသုသးဆူယွၤအအိၣ်’ လီၤ. နမ့ၢ်မၤဒ်န့ၣ်န့ၣ် နကဒိးန့ၢ်ဘၣ်အဘျုးအဖှိၣ်ဒ်လဲၣ်. ကစၢ်ယွၤ “ကသုးဘူးအသးဆူသုအိၣ်လီၤ.”—ယၤကိာ် ၄:၈.
မ့ၢ်လီၤ, တၢ်ထုကဖၣ်န့ၣ် တမ့ၢ်ထဲကျဲလၢ ပတဲဖျါထီၣ် ပတၢ်သူၣ်ကိၢ်သးဂီၤ ဒီးပဒိးန့ၢ်ဘၣ် တၢ်သူၣ်မံသးမံန့ၣ်ဘၣ်. ယဟိဝၤယွၤလၢအမ့ၢ် “ပှၤလၢအနၢ်ဟူတၢ်ဘါထုကဖၣ်တဂၤ” မၤစၢၤပှၤလၢအဃ့တၢ်လၢ တၢ်နာ်အပူၤန့ၣ်လီၤ. (စံးထီၣ်ပတြၢၤ ၆၅:၂) လၢတၢ်န့ၣ်အဃိ ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ “ဘါထုကဖၣ်တၢ်တဘိယူၢ်ဃီ, ဒီးသုတလီၤဘှါတဂ့ၤ” (လူၤကၣ် ၁၈:၁) ပကဘၣ်ဃ့ ကစၢ်ယွၤအတၢ်ဟံးစုနဲၣ်ကျဲ ဒီးအတၢ်မၤစၢၤထီဘိဒီး နာ်သပှၢ်တၢၢ်လၢ အဝဲကဆိၣ်ဂ့ၤပတၢ်နာ်န့ၣ်လီၤ. ပတဘၣ်သးဒ့ဒီ လၢအဝဲအတၢ်သးအိၣ် ဒီးအတၢ်စိတၢ်ကမီၤလၢကမၤစၢၤပှၤ နီတဘျီဘၣ်. ပာ်ဖျါထီၣ်နတၢ်နာ်နီၢ်နီၢ် ခီဖျိလၢန “ဘါထုကဖၣ်တၢ်တထံၣ်ဃီ တက့ၢ်.”—၁ သ့းစၤလနံ ၅:၁၇.
တၢ်အိၣ်ဒီးတၢ်နာ်နီၢ်နီၢ် စံးတၢ်န့ၣ်
တၢ်နာ်နီၢ်နီၢ်န့ၣ် မ့ၢ်မနုၤလဲၣ်. တၢ်နာ်န့ၣ် ပၣ်ဃုာ်ဒီး “တၢ်သ့ၣ်ညါ” ကစၢ်ယွၤ ဒ်ပှၤနီၢ်နီၢ်တဂၤအသိးန့ၣ်လီၤ. (ယိၤဟၣ် ၁၇:၃) အဆိကတၢၢ် ပကဘၣ်ဃုသ့ၣ်ညါ ယွၤအတၢ်ဆိကမိၣ်တဖၣ် ခီဖျိတၢ်မၤလိလံာ်စီဆှံန့ၣ်လီၤ. ဖဲန့ၣ်အခါ ပကသ့ၣ်ညါဘၣ်လၢ အဝဲကွၢ်ဝဲပှၤတဂၤစုာ်စုာ်ဒီး အဲၣ်ဒိးမၤစၢၤပှၤလီၤ. ဘၣ်ဆၣ် တၢ်နာ်နီၢ်နီၢ်န့ၣ် တမ့ၢ်ထဲတၢ်သ့ၣ်ညါ ယွၤအဂ့ၢ်န့ၣ်ဘၣ်. ပကဘၣ်အိၣ်ဒီးတၢ်ရ့လိာ်သးဒီးအီၤ ဘူးဘူးတံၢ်တံၢ်န့ၣ်လီၤ. ပှၤဟီၣ်ခိၣ်ဖိ ကဒဲကဒဲဒၣ်လဲာ် တၢ်ရ့လိာ်သးဘူးဘူးတံၢ်တံၢ် တအိၣ်ထီၣ်ဝဲလၢ တနံၤအတီၢ်ပူၤဘၣ်. ဒ်တၢ်ဆၢကတီၢ်လဲၤပူၤကွံာ်ဝဲအသိး ပမၤလိအါထီၣ် ကစၢ်ယွၤအဂ့ၢ်, “တၢ်လၢအဘၣ်အသး” ဒီးထံၣ်ဘၣ်အတၢ်မၤစၢၤထီဘိအဃိ ပတၢ်စူၢ်တၢ်နာ် “အါထီၣ်” ဝဲလီၤ. (၂ ကရံၣ်သူး ၁၀:၁၅; ယိၤဟၣ် ၈:၂၉) တၢ်စူၢ်တၢ်နာ် ဒ်အံၤန့ၣ် မၤစၢၤကၠဲနဲးလၢ အကလဲၤခီဖျိ တၢ်သူၣ်ကိၢ်သးဂီၤတဖၣ်အဂီၢ်န့ၣ်လီၤ.
ကၠဲနဲးစံးဝဲ “တၢ်လၢအမၤစၢၤယၤဒ်သိး ယတၢ်စူၢ်တၢ်နာ် ကဂၢၢ်ကျၢၤထီၣ်အဂီၢ်န့ၣ် မ့ၢ်ဒၣ်ယဟိဝၤယွၤ အစုတဖုၣ်လၢယတၢ်အိၣ်မူ ကိးသနၢၣ်အပူၤန့ၣ်လီၤ. အါဘျီပကွၢ်ဆၢၣ်မဲာ်ဘၣ် တၢ်တတီတလိၤတဖၣ်လၢ လီၤဂာ်ပလဲၤခီဖျိအီၤတန့ၢ်ဘၣ်န့ၣ်လီၤ. မ့မ့ၢ်လၢယနီၢ်ကစၢ်အတၢ်ကူၣ်တၢ်ဖးန့ၣ် ယမၤဘၣ်ဂီၢ်တၢ်သ့ၣ်တဖၣ်အံၤ တသ့ဘၣ်, ဘၣ်ဆၣ် ခီဖျိလၢ ယဃ့ဘါထုကဖၣ်ထီဘိအဃိ ယဟိဝၤယွၤ ဒုးအိၣ်ထီၣ်ကျဲလၢယကပူၤဖျဲးအဂီၢ်လီၤ. ဖဲယစံးဘျုးစံးဖှိၣ်အီၤအခါ ယသ့ၣ်နီၣ်ထီၣ်က့ၤတၢ်လၢ ကစၢ်ယွၤမၤတ့ၢ်တၢ်လၢယဂီၢ်န့ၣ်လီၤ. ဖဲပလိၣ်ဘၣ်တၢ်အဆၢကတီၢ်န့ၣ် အဝဲမၤစၢၤပှၤတထံၣ်ဃီလီၤ. ကစၢ်ဟ့ၣ်စ့ၢ်ကီးယၤ တံၤသကိးနီၢ်နီၢ်တဖၣ်လၢအမ့ၢ်ခရံာ်ဖိနီၢ်နီၢ်တဖၣ်န့ၣ်လီၤ. အဝဲသ့ၣ်အိၣ်ကတဲာ်ကတီၤအသးလၢ ယဂီၢ်ထီဘိဒီး မ့ၢ်စ့ၢ်ကီးဒိဂ့ၤတဲာ်ဘၣ်လၢ ယဖိတဖၣ်အဂီၢ်န့ၣ်လီၤ.” *
“ဘၣ်မနုၤအဃိ မၤလကံ ၂:၁၆ အပူၤန့ၣ် ယဟိဝၤယွၤစံးဝဲ ‘ပှၤပာ်မၢ်ကွံာ်အမါန့ၣ် ယသးဟ့’ လီၤန့ၣ် ယနၢ်ပၢၢ်လံ. ဖဲသးသမူတံၤသကိးလၢ အတၢ်ကမၣ်တအိၣ်ဘၣ်တဂၤ ဘၣ်တၢ်ပာ်တ့ၢ်ကွံာ်အီၤအဆၢကတီၢ်န့ၣ် လီၤသးအုးဒိၣ်မးလီၤ. တၢ်ဆၢကတီၢ်ပူၤကွံာ်လံဘၣ်ဆၣ် တဘျီတခီၣ်ယတူၢ်ဘၣ်လၢ တၢ်လီၤဟိအိၣ်ဒံးဝဲလီၤ. ဖဲယတူၢ်ဘၣ်ဒ်န့ၣ်အခါ ယဂုာ်ကျဲးစၢးမၤစၢၤပှၤအဂၤလီၤ. မ့ၢ်လၢယမၤဒ်န့ၣ်အဃိ ကဲထီၣ်တၢ်မၤစၢၤလၢယဂီၢ်စ့ၢ်ကီးလီၤ.” ခီဖျိလၢကၠဲနဲးမၤထွဲဝဲ လံာ်စီဆှံအတၢ်ဟ့ၣ်ကူၣ် ဒီးတဟးဆှဲးတၢ်ရ့လိာ်သးဒီးပှၤအဂၤဘၣ်အဃိ အတၢ်သူၣ်ကိၢ်သးဂီၤစှၤလီၤဝဲလီၤ. *—ကတိၤဒိ ၁၈:၁.
ယွၤမ့ၢ် “ပှၤဖိၣ်ဃဲအပၢ်ဒီး ပှၤလၢအစံၣ်ညီၣ်န့ၢ် ပှၤမုၣ်ကမဲအကွီၢ်လီၤ.”—စံးထီၣ်ပတြၢၤ ၆၈:၅
ကၠဲနဲးစံးဝဲလၢ “တၢ်လၢအမၤမုာ်ယသး အဒိၣ်ကတၢၢ်န့ၣ် မ့ၢ်ဝဲယတၢ်သ့ၣ်ညါယွၤလၢအမ့ၢ်ဝဲ ‘ပှၤဖိၣ်ဃဲအပၢ်ဒီး ပှၤလၢအစံၣ်ညီၣ်န့ၢ်ပှၤမုၣ်ကမဲအကွီၢ်လီၤ.’ ကစၢ်ယွၤတပာ်တ့ၢ်ကွံာ်ယဟံၣ်ဖိဃီဖိဒ် ယဝၤပာ်တ့ၢ်ပှၤအသိးနီတဘျီဘၣ်.” (စံးထီၣ်ပတြၢၤ ၆၈:၅) ကၠဲနဲးသ့ၣ်ညါဝဲလၢ ယွၤတမၤကွၢ်ပှၤဒီး “တၢ်အၢတၢ်သီ” ဘၣ်. လၢတၢ်န့ၣ်အလီၢ် ကစၢ်ယွၤဟ့ၣ်လီၤဝဲ တၢ်ကူၣ်သ့လၢ “ပှၤခဲလၢာ်” ဒီးဟ့ၣ်လီၤစ့ၢ်ကီးပှၤတၢ် “အစိအကမီၤဒိၣ်ကဲၣ်ဆိး” လၢကမၤစၢၤပှၤဒ်သိး ပလဲၤခီဖျိ ပတၢ်သူၣ်ကိၢ်သးဂီၤကန့ၢ်အဂီၢ်န့ၣ်လီၤ.—ယၤကိာ် ၁:၅, ၁၃; ၂ ကရံၣ်သူး ၄:၇
ဘၣ်ဆၣ် ပမ့ၢ်အိၣ်ဒီးတၢ်သူၣ်ကိၢ်သးဂီၤလၢ ပသးသမူအတၢ်လီၤဘၣ်ယိၣ်အဃိ ပကမၤဒ်လဲၣ်.
^ လံာ်အဆၢ. 9 ကွၢ် ၁ ကရံၣ်သူး ၁၀:၁၃; ဧ့ၤဘြံၤ ၄:၁၆ တက့ၢ်.
^ လံာ်အဆၢ. 10 ဒ်သိးနကထံၣ်ဘၣ် ကျဲအဂၤလၢနကလဲၤခီဖျိ တၢ်သူၣ်ကိၢ်သးဂီၤကန့ၢ်အဂီၢ် ကွၢ်လၢ “Are You in Control of Your Life?” in the July 2015 issue of Awake! available online at www.jw.org တက့ၢ်.
တၢ်ဂ့ၤအဂၤလၢ နကဘၣ်သး
တၢ်သိၣ်လိလၢ အရ့ဒိၣ်တဖၣ်
ပကဲထီၣ် ယွၤအသကိး ကသ့ဒ်လဲၣ်
ပှၤဟီၣ်ခိၣ်ဖိ သ့ၣ်ညါလီၤအသးလၢ အကဘၣ်သ့ၣ်ညါဝဲ ပှၤလၢအတ့လီၤအဝဲသ့ၣ်တဂၤအဂ့ၢ်န့ၣ် အိၣ်အနံၣ်အါမးလံ. ဒ်သိးပကကဲထီၣ် ကစၢ်ယွၤအသကိးအဂီၢ် လံာ်စီဆှံ မၤစၢၤပှၤသ့. ပကကဲထီၣ် ကစၢ်ယွၤအသကိးအဂီၢ် ပကဘၣ်သ့ၣ်ညါဆိယွၤအမံၤ.
