တၢ်မၤလိ ၃၅
ဆဲး “မၤမုာ်ထီၣ်လိာ်သး တဂၤဒီးတဂၤ”
“ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးမၤမုာ်ထီၣ်လိာ်သး တဂၤဒီးတဂၤ ဒ်သုမၤခဲအံၤအသိးတက့ၢ်.”—၁ သ့းစၤလနံ ၅:၁၁.
တၢ်သးဝံၣ် ၉၀ ဟ့ၣ်ဂံၢ်ဟ့ၣ်ဘါလိာ်သး
တၢ်မၤလိအံၤ အတၢ်တိာ်ပာ် a
၁. ဒ် ၁ သ့းစၤလနံ ၅:၁၁ ပာ်ဖျါထီၣ်ဝဲအသိး ပပၣ်ဃုာ်လၢ တၢ်မၤမနုၤတခါသ့လဲၣ်.
ပှၤဘှီဂ့ၤထီၣ်က့ၤ နတၢ်အိၣ်ဖှိၣ်လီၢ် အိၣ်တဘျီဘျီဧါ. မ့ၢ်အိၣ်န့ၣ် ဖဲပှၤဘှီဂ့ၤထီၣ်တၢ်အိၣ်ဖှိၣ်လီၢ်ဝံၤ နက့ၤထီၣ်ဘၣ် တၢ်အိၣ်ဖှိၣ်လၢ တၢ်အိၣ်ဖှိၣ်လီၢ် အဆိကတၢၢ်တဘျီအခါ နကစံးဘျုးဘၣ် ယဟိဝၤယွၤဒိၣ်မး. ဒီးဖဲနသးဝံၣ် တၢ်သးဝံၣ်လၢ တၢ်အိၣ်ဖှိၣ်လီၢ်အခါ ဘၣ်သ့ၣ်သ့ၣ် နကသးခု တုၤလၢနမဲာ်ထံဘူးကလီၤညါ. တၢ်သူၣ်ထီၣ်ဘှီထီၣ် တၢ်အိၣ်ဖှိၣ်လီၢ်န့ၣ် ကဲထီၣ်တၢ်လၤကပီၤလၢ ယဟိဝၤယွၤအဂီၢ်ဒိၣ်မး. ဘၣ်ဆၣ် ပမ့ၢ်ဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ်ပှၤလၢ အဟဲဘူၣ်ထီၣ်ဘါထီၣ် ယဟိဝၤယွၤလၢ တၢ်အိၣ်ဖှိၣ်လီၢ်တဖၣ်န့ၣ် ကကဲထီၣ်တၢ်မၤလၤကပီၤ ယဟိဝၤယွၤဒိၣ်န့ၢ်အန့ၣ်ဒံး. ဖဲတၢ်မၢဖိပီလူး ကွဲးဝဲ ၁ သ့းစၤလနံ ၅:၁၁ အခါ အဝဲအဲၣ်ဒိးတဲဝဲ တၢ်ဂ့ၢ်တခါအံၤစ့ၢ်ကီး.—ဖး.
၂. လၢတၢ်မၤလိအံၤအပူၤ ပကတဲသကီး တၢ်ဂ့ၢ်မနုၤလဲၣ်.
၂ စီၤပီလူးအိၣ်ဒီး တၢ်ဒိသူၣ်ဒိသး လၢဒီပုၢ်ဝဲၢ်မုၣ်ခွါတဖၣ် အဖီခိၣ်. တၢ်မၢဖိပီလူး အဒိအတဲာ်န့ၣ် မၤစၢၤဒီပုၢ်ဝဲၢ်မုၣ်ခွါတဖၣ် လၢကဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ. လၢတၢ်မၤလိအံၤအပူၤ ပကတဲသကီး စီၤပီလူးအဒိအတဲာ် သၢခါ. (၁) အဝဲမၤစၢၤ ဒီပုၢ်ဝဲၢ်မုၣ်ခွါတဖၣ် ဒ်သိး လဲၤခီဖျိတၢ်ကီတၢ်ခဲကန့ၢ်အဂီၢ်, (၂) မၤစၢၤအဝဲသ့ၣ်ဒ်သိး ကအိၣ်ဃူဃူဖိးဖိး ဒီး (၃) မၤစၢၤအဝဲသ့ၣ်ဒ်သိး အတၢ်နာ် ကဂၢၢ်ကျၢၤထီၣ်လၢ ယဟိဝၤယွၤ အဖီခိၣ်. တကးဒံးဘၣ် ပကတဲသကီး ဘၣ်ဃးဒီး ပကွၢ်လိမၤဒိး စီၤပီလူး ကသ့ဒ်လဲၣ် ဒီးပမၤမုာ်ထီၣ် ပဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်.—၁ ကရံၣ်သူး ၁၁:၁.
စီၤပီလူးမၤစၢၤ ဒီပုၢ်ဝဲၢ်မုၣ်ခွါတဖၣ် ဒ်သိး လဲၤခီဖျိတၢ်ကီတၢ်ခဲကန့ၢ်အဂီၢ်
၃. ဘၣ်ဃးဒီး တၢ်ဖံးအီၣ်မၤအီၣ် ဒီးတၢ်မၤကစၢ်ယွၤ အတၢ်မၤန့ၣ် စီၤပီလူး ပာ်လီၤအဒိအတဲာ် လၢအဂ့ၤဒ်လဲၣ်.
၃ စီၤပီလူးအဲၣ် ဒီပုၢ်ဝဲၢ်မုၣ်ခွါတဖၣ်ဒိၣ်မး. အနီၢ်ကစၢ်ဒၣ်ဝဲ ထံၣ်ဘၣ်တၢ်ကီတၢ်ခဲအဃိ ဖဲဒီပုၢ်ဝဲၢ်မုၣ်ခွါတဖၣ် ထံၣ်ဘၣ်တၢ်ကီတၢ်ခဲအခါ အနၢ်ပၢၢ်စၢၤဝဲ ဒီးဒိသူၣ်ဒိသးဝဲသ့. ဘၣ်တဘျီန့ၣ် စီၤပီလူး အစ့တအိၣ်လၢၤဘၣ်အဃိ အဝဲဘၣ်မၤတၢ်လၢ အနီၢ်ကစၢ် ဒီးအသကီးအဂီၢ်. (မၤတၢ် ၂၀:၃၄) စီၤပီလူးန့ၣ် ဆးဒဲသ့မး. အဃိ ဖဲအဝဲလဲၤတုၤလၢ ဝ့ၢ်ကရံၣ်သူးအခါ အဝဲမၤပှၤဆးဒဲအတၢ်မၤဒီး နီၢ်ပြံစကံးလၤ ဒီးစီၤအကူလၤ. ဘၣ်ဆၣ် ဖဲ “မုၢ်အိၣ်ဘှံးနံၤ ကိးဘျီဒဲး” န့ၣ်အဝဲ စံၣ်တဲၤတဲလီၤဝဲ ပှၤယူဒၤဖိ ဒီးပှၤကြံးဖိတဖၣ်. ဒီးဖဲစီၤစံလၤ ဒီးစီၤတံၤမသ့း လဲၤတုၤလၢအအိၣ်အခါ “စီၤပီလူး ဟ့ၣ်တၢ်ဆၢကတီၢ် ခဲလၢာ်ခဲဆ့ လၢအက စံၣ်တဲၤတဲလီၤ ကစၢ်ယွၤအကလုၢ်ကထါ အဂီၢ်.” (မၤတၢ် ၁၈:၂-၅) စီၤပီလူးတသးပ့ၤနီၣ် တၢ်မၤလၢအရ့ဒိၣ် လၢအမ့ၢ် ယဟိဝၤယွၤ အတၢ်မၤန့ၣ် နီတဘျီဘၣ်. စီၤပီလူးမၤတၢ်မၤဆူၣ်ဆူၣ် လၢကလုၢ်အီၣ်အသးသမူအဂီၢ် သနာ်က့ အဝဲမၤစ့ၢ်ကီး ကစၢ်ယွၤအတၢ်မၤဆူၣ်မး. အဃိ အဝဲအဒိအတဲာ်န့ၣ် ကဲထီၣ်တၢ်ဂံၢ်တၢ်ဘါ လၢဒီပုၢ်ဝဲၢ်မုၣ်ခွါတဖၣ်အဂီၢ်. စီၤပီလူး အဒိအတဲာ်န့ၣ် ကဒုးသ့ၣ်နီၣ်ထီၣ် ဒီပုၢ်ဝဲၢ်မုၣ်ခွါတဖၣ်လၢ အဝဲသ့ၣ် မ့ၢ်ဘၣ်ဖံးအီၣ်မၤအီၣ်တၢ် ဒီးလုၢ်အီၣ်လုၢ်အီ အဟံၣ်ဖိဃီဖိ သနာ်က့ အတဘၣ်သးပ့ၤနီၣ် “တၢ်လၢအရ့ဒိၣ်ကတၢၢ်တဖၣ်” လၢအမ့ၢ် တၢ်မၤခဲလၢာ်လၢ အဘၣ်ဃးဒီး တၢ်ဘူၣ်ထီၣ်ဘါထီၣ် ယဟိဝၤယွၤန့ၣ်ဘၣ်.—ဖံလံးပံၤ ၁:၁၀.
၄. စီၤပီလူးဒီး စီၤတံၤမသ့း မၤစၢၤ ဒီပုၢ်ဝဲၢ်မုၣ်ခွါလၢ အထံၣ်ဘၣ် တၢ်ထီဒုၣ်ထီဒါတဖၣ်ဒ်လဲၣ်.
၄ ဖဲတၢ်အိၣ်ဖှိၣ်အိၣ်ထီၣ်လၢ ဝ့ၢ်သ့းစၤလနံအပူၤ တယံာ်ဘၣ်န့ၣ် ပှၤလၢအကဲထီၣ် ခရံာ်ဖိသီသီတဖၣ် ထံၣ်ဘၣ်ဒီး တၢ်ထီဒုၣ်ထီဒါနးမး. ပှၤလၢအထီဒါတၢ်တဖၣ်န့ၣ် ဟးဃုဝဲ စီၤပီလူး ဒီးစီၤစံလၤတဘၣ်ဘၣ်အဃိ အဝဲသ့ၣ် တွံၢ်ထီၣ်ဝဲ “ဒီပုၢ်ဝဲၢ်ခွါတနီၤ လၢဝ့ၢ်အပှၤခိၣ်ပှၤနၢ်တဖၣ် အမဲာ်ညါ” ဒီးကီးပသူထီၣ်ဝဲလၢ “ပှၤတဖၣ်အံၤခဲလၢာ် ထီဒါကဲစၢ် အတၢ်သိၣ်တၢ်သီတဖၣ်.” (မၤတၢ် ၁၇:၆, ၇) ထံၣ်တမှံကွၢ်လၢ ပှၤဝ့ၢ်ဖိတဖၣ် ထီဒါအဝဲသ့ၣ်အဃိ ပှၤလၢအကဲထီၣ် ခရံာ်ဖိအသီတဖၣ် ကပျံၤတၢ်ထဲလဲၣ်. တၢ်ကဲထီၣ်အသးဒ်န့ၣ်အဃိ စီၤပီလူးဒီးစီၤစံလၤ ကဘၣ်ဟးထီၣ်ဖဲန့ၣ်. ဘၣ်ဆၣ် အဝဲတအဲၣ်ဒိးလၢ ဒီပုၢ်ဝဲၢ်မုၣ်ခွါတဖၣ် အသးကလီၤစၢ်လၢ ကစၢ်ယွၤအတၢ်မၤပူၤဘၣ်အဃိ အဝဲသ့ၣ် ကတဲာ်ကတီၤဝဲဒ်သိး ပှၤကကွၢ်ထွဲ တၢ်အိၣ်ဖှိၣ်ဂ့ၤဂ့ၤအဂီၢ်. စီၤပီလူး ကွဲးလီၤလံာ်လၢ ဒီပုၢ်ဝဲၢ်မုၣ်ခွါလၢ ဝ့ၢ်သ့းစၤလနံတဖၣ်အအိၣ်လၢ ပ “ဆှၢလီၤ ပဒီပုၢ်ဝဲၢ်စီၤတံၤမသ့း . . . လၢ အကဟ့ၣ်ဂံၢ်ဟ့ၣ်ဘါသု, ကမၤမုာ်ထီၣ်သု ဒ်သိးကကဲဘျုးလၢ သုတၢ်နာ်အဂီၢ် ဒီးဒ်သိးသုသု တဒံဝ့ၤဒံဝီၤလၢ တၢ်နးတၢ်ဖှီၣ်တဖၣ်အံၤ အဃိ နီတဂၤတဂ့ၤ အဂီၢ်.” (၁ သ့းစၤလနံ ၃:၂, ၃) ဖဲစီၤတံၤမသ့းအိၣ်လၢ အနီၢ်ကစၢ်တၢ်လီၢ် လၢဝ့ၢ်လူစတြၤ အခါ လီၤဂာ်လၢ အဝဲထံၣ်ဘၣ် တၢ်မၤအၢမၤနး ဒီးအထံၣ်ဘၣ်ဝဲ စီၤပီလူး ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါ ဖဲန့ၣ်တဖၣ်. မ့ၢ်လၢ အထံၣ်ဘၣ်ဝဲလၢ ယဟိဝၤယွၤ မၤစၢၤတ့ၢ်အဝဲသ့ၣ်အဃိ ဖဲစီၤတံၤမသ့းလဲၤတုၤလၢ ဝ့ၢ်သ့းစၤလနံအခါ အကဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါအသီတဖၣ်လၢ အဝဲသ့ၣ် အတၢ်အိၣ်သးကလဲၤအသး ဂ့ၤဂ့ၤဘၣ်ဘၣ်.—မၤတၢ် ၁၄:၈, ၁၉-၂၂; ဧ့ၤဘြံၤ ၁၂:၂.
၅. ဒီပုၢ်ဝဲၢ်ခွါ ဘြါယဲၣ်န့ၣ် တၢ်အိၣ်ဖှိၣ်သးပှၢ် မၤစၢၤအီၤအဃိ ကဲဘျုးလၢအဂီၢ်ဒ်လဲၣ်.
၅ စီၤပီလူးမၤစၢၤ ဒီပုၢ်ဝဲၢ်မုၣ်ခွါ လၢအဂၤတဖၣ်န့ၣ်အိၣ်ဒံး. ဖဲစီၤပီလူး ဒီးစီၤဘၢ်နါဘၤ က့ၤဟးအိၣ်သကီး ဝ့ၢ်လူစတြၤ, ဝ့ၢ်အံၤကနံၤ ဒီးဝ့ၢ်အၣ်တံၤအီာ်အခါ အဝဲသ့ၣ် “ပာ်ထီၣ် တၢ်အိၣ်ဖှိၣ်သးပှၢ်တဖၣ် လၢတၢ်အိၣ်ဖှိၣ် ကိးဖျၢၣ်ဒဲးအပူၤ.” (မၤတၢ် ၁၄:၂၁-၂၃) တၢ်အိၣ်ဖှိၣ်သးပှၢ်တဖၣ်အံၤန့ၣ် ကကဲထီၣ် တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ်အဂီၢ် ဒ်တၢ်အိၣ်ဖှိၣ်သးပှၢ်လၢ ပစိၤခဲအံၤအသိး. ပကဆိကမိၣ်ကွၢ် ဒီပုၢ်ဝဲၢ်ခွါဘြါယဲၣ် အဂ့ၢ်. အတဲဝဲလၢ “ဖဲယသးအိၣ် ၁၅ နံၣ်အခါ ယပါပာ်တ့ၢ်ပှၤ ဒီးယမိန့ၣ် ပှၤနီဟးထီၣ်ကွံာ်အီၤလၢ တၢ်အိၣ်ဖှိၣ်အပူၤ. ယတူၢ်ဘၣ်လၢ ပှၤပာ်တ့ၢ်ယၤ ဒီးယသးဟးဂီၤဒိၣ်မး.” တၢ်မနုၤမၤစၢၤ ဘြါယဲၣ် ဒ်သိးအလဲၤခီဖျိဝဲ တၢ်ကီတၢ်ခဲကန့ၢ်အဂီၢ်လဲၣ်. အတဲဝဲလၢ “ထိနံၤ လၢအကဲတၢ်အိၣ်ဖှိၣ်သးပှၢ်တဂၤန့ၣ် တဲတၢ်ဒီးယၤ လၢတၢ်အိၣ်ဖှိၣ်အပူၤ ဒီးတဲတၢ်ဒီးယၤ လၢဆၢကတီၢ်အဂၤစ့ၢ်ကီး. ဒီးအဝဲတဲပၠးယၤ ပှၤလၢအထံၣ်ဘၣ် တၢ်မၤကွၢ်သနာ်က့ အအိၣ်ဒီး တၢ်သးခုတဖၣ်အဂ့ၢ်. အဝဲဖးပၠးယၤ စံးထီၣ်ပတြၢၤ ၂၇:၁၀. ဒီးအတဲပၠးယၤ စီၤဃံးစကံယၤအဂ့ၢ်ဆူၣ်မး. စီၤဃံးစကံယၤန့ၣ် အပါအဒိအတဲာ်တဂ့ၤသနာ်က့ အဝဲမၤကစၢ်ယွၤ အတၢ်မၤလၢ တၢ်သးတီအပူၤ.” ခီဖျိလၢ တၢ်အိၣ်ဖှိၣ်သးပှၢ်မၤစၢၤ ဘြါယဲၣ် အဃိ အကဲဘျုးလၢ ဘြါယဲၣ် အဂီၢ်ဒ်လဲၣ်. ဘြါယဲၣ် တဲဝဲလၢ “ဒီပုၢ်ဝဲၢ်ခွါထိနံၤ မၤစၢၤယၤအါမး. အဃိ လၢခံန့ၣ် ယမၤကစၢ်ယွၤ အတၢ်မၤလၢ ဆၢကတီၢ်လၢပှဲၤ ဒီးယမၤအီၤမုာ်မး.” နမ့ၢ်ကဲတၢ်အိၣ်ဖှိၣ်သးပှၢ်န့ၣ် ပာ်သူၣ်ပာ်သး ပှၤလၢအလီၤဂာ်ဒ်သိးဒီး ဘြါယဲၣ်. အဝဲသ့ၣ်န့ၣ် လိၣ်ဘၣ်ဝဲဒၣ် “တၢ်ကတိၤလၢ အမုာ်” လၢကဟ့ၣ်ဂံၢ်ဟ့ၣ်ဘါ အဝဲသ့ၣ်.—ကတိၤဒိ ၁၂:၂၅.
၆. စီၤပီလူးသူဝဲ ကစၢ်ယွၤ အခ့အပှၤတဖၣ် အတၢ်လဲၤခီဖျိ လၢကမၤစၢၤ ဒီပုၢ်ဝဲၢ်မုၣ်ခွါတဖၣ်အဂီၢ်န့ၣ် ပသ့ၣ်ညါဘၣ်ဒ်လဲၣ်.
၆ စီၤပီလူး ဒုးသ့ၣ်နီၣ်ထီၣ် ဒီပုၢ်ဝဲၢ်မုၣ်ခွါတဖၣ်လၢ ကစၢ်ယွၤအခ့အပှၤ လၢပျၢၤတဖၣ် လၢအကဲ “ပှၤအုၣ်အသးအါအါဂီၢ်ဂီၢ်” န့ၣ်အဝဲသ့ၣ်ထံၣ်ဘၣ် တၢ်ကီတၢ်ခဲသနာ်က့ ခီဖျိလၢ ကစၢ်ယွၤ ဟ့ၣ်အဝဲသ့ၣ် တၢ်ဂံၢ်တၢ်ဘါအဃိ အဝဲသ့ၣ် လဲၤခီဖျိဝဲန့ၢ်. (ဧ့ၤဘြံၤ ၁၂:၁) စီၤပီလူး သ့ၣ်ညါဝဲလၢ ပှၤသ့ၣ်တဖၣ်အံၤ အတၢ်လဲၤခီဖျိန့ၣ် ကမၤစၢၤဝဲ ဒီပုၢ်ဝဲၢ်မုၣ်ခွါတဖၣ် ဒ်သိးကအိၣ်ဒီး တၢ်သူၣ်ဒူသးဒူ ဒီးကသးစၢၢ်ဆၢဝဲ “ကစၢ်ယွၤ လၢအမူဝဲတဂၤအဝ့ၢ်.” (ဧ့ၤဘြံၤ ၁၂:၂၂) လၢပစိၤခဲအံၤစ့ၢ်ကီး ဒ်န့ၣ်အသိးလီၤ, ဖဲပဖးဘၣ် ကစၢ်ယွၤမၤစၢၤဝဲ စီၤကံးဒဧိၣ်, စီၤဘါရး, စီၤဒၤဝံး, စီၤၡမူၤအ့လး ဒီးပှၤအဂၤတဖၣ် အဂ့ၢ်အခါ ပဂံၢ်ပဘါထီၣ်ဒိၣ်မး. (ဧ့ၤဘြံၤ ၁၁:၃၂-၃၅) ပဒီပုၢ်ဝဲၢ်မုၣ်ခွါလၢ ပစိၤခဲအံၤတဖၣ် အတၢ်လဲၤခီဖျိစ့ၢ်ကီး ကဲထီၣ်တၢ်ဂံၢ်တၢ်ဘါ လၢပဂီၢ်. အဃိ ပဒီပုၢ်ဝဲၢ်မုၣ်ခွါတနီၤန့ၣ် ဆှၢလီၤန့ၢ်ဝဲ လံာ်ပရၢလၢ ဝဲၤလီၢ်ခိၣ်သ့ၣ် ဒီးအဝဲသ့ၣ် ကွဲးဝဲဘၣ်ဃးဒီး ဖဲအဝဲသ့ၣ်ဖးဝဲ ပဒီပုၢ်ဝဲၢ်မုၣ်ခွါ တဂၤဂၤ အတၢ်လဲၤခီဖျိဝံၤအခါ အဝဲသ့ၣ်အတၢ်နာ် ဂၢၢ်ကျၢၤထီၣ်.
စီၤပီလူးမၤစၢၤ ဒီပုၢ်ဝဲၢ်မုၣ်ခွါတဖၣ်လၢ ကအိၣ်ဃူဃူဖိးဖိး
၇. စီၤပီလူး အတၢ်ဟ့ၣ်ကူၣ်ဖဲ ရိမ့ၤ ၁၄:၁၉-၂၁ န့ၣ်နမၤလိန့ၢ်ဘၣ် တၢ်မနုၤလဲၣ်.
၇ ပမ့ၢ်ဂုာ်ကျဲးစၢး မၤဒ်သိး တၢ်အိၣ်ဖှိၣ် အတၢ်ဃူတၢ်ဖိး ကအိၣ်အါထီၣ်အဂီၢ်န့ၣ် ကကဲထီၣ် တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ်အဂီၢ်. အဃိ ပတၢ်ထံၣ် မ့ၢ်လီၤဆီလိာ်အသးနာ်က့ ပတကြၢး ဟးဆှဲးလိာ်ပသးဘၣ်. ပဒီပုၢ်ဝဲၢ်အဂၤတဖၣ် အတၢ်ထံၣ် မ့ၢ်တထီဒါလိာ်အသးဒီး လံာ်စီဆှံ အတၢ်ဟံးစုနဲၣ်ကျဲဘၣ်န့ၣ် ပတကြၢး ဆိကမိၣ်ထဲလၢ ပတၢ်ထံၣ်န့ၣ်ဘၣ်ဘၣ်. ပကြၢးဆိကမိၣ်န့ၢ်တၢ်လၢ အဝဲသ့ၣ်အဂီၢ်စ့ၢ်ကီး. အဒိ လၢရိမ့ၤတၢ်အိၣ်ဖှိၣ်အပူၤန့ၣ် အိၣ်ဝဲဒီး ခရံာ်ဖိလၢ အကဲပှၤယူဒၤဖိ ဒီးအတကဲ ပှၤယူဒၤဖိတဖၣ်. မ့ၢ်လၢ ပှၤတလိၣ်မၤထွဲ စီၤမိၤၡ့အတၢ်သိၣ်တၢ်သီလၢၤဘၣ်အဃိ ပှၤလၢအဘူၣ်ထီၣ်ဘါထီၣ် ယဟိဝၤယွၤတဖၣ်န့ၣ် တလိၣ်မၤထွဲ စီၤမိၤၡ့အတၢ်သိၣ်တၢ်သီ လၢဘၣ်ဃးဒီး တၢ်အီၣ်တၢ်အီလၢၤဘၣ်. (မၢ်ကူး ၇:၁၉) မ့မ့ၢ် ခရံာ်ဖိလၢ အကဲပှၤယူဒၤဖိတနီၤန့ၣ် ထံၣ်ဝဲလၢ ပှၤအီၣ်တၢ်န့ၢ်ခဲလၢာ်. ဘၣ်ဆၣ် မ့မ့ၢ်အဂၤတနီၤန့ၣ် တထံၣ်ဝဲဒ်န့ၣ်ဘၣ်. ခီဖျိလၢ တၢ်ဂ့ၢ်အံၤအဃိ တၢ်လီၤမုၢ်လီၤဖး အိၣ်ထီၣ်လၢ တၢ်အိၣ်ဖှိၣ်အပူၤ. အဃိ စီၤပီလူး မၤစၢၤအဝဲသ့ၣ်ဒ်သိး ကဆဲးအိၣ်ဃူဃူဖိးဖိး. စီၤပီလူးတဲအဝဲသ့ၣ်လၢ “နမ့ၢ်တအီၣ် တၢ်ဖံးတၢ်ညၣ် ဒီးတအီ စပံးထံဘၣ် ဒီးနမ့ၢ်တမၤတၢ်အဂၤလၢ အကကဲထီၣ် တၢ်လီၤဃံၢ်အလီၢ်လၢ နဒီပုၢ်ဝဲၢ်အဂီၢ် နီတမံၤဘၣ်န့ၣ် မ့ၢ်တၢ်လၢ အဂ့ၤကတၢၢ်.” (ဖး ရိမ့ၤ ၁၄:၁၉-၂၁.) စီၤပီလူးမၤစၢၤ ဒီပုၢ်ဝဲၢ်မုၣ်ခွါတဖၣ် ဒ်သိး အဝဲသ့ၣ် ကသ့ၣ်ညါထီၣ်ဝဲလၢ အဝဲသ့ၣ် အသးမ့ၢ်တလီၤပလိာ်လိာ်သး ဒ်န့ၣ်န့ၣ် ကမၤဘၣ်ဒိ အဝဲသ့ၣ်တဂၤဘၣ်တဂၤ အတၢ်ဃူတၢ်ဖိး ဒီးတၢ်အိၣ်ဖှိၣ်အတၢ်ဃူတၢ်ဖိး. (၁ ကရံၣ်သူး ၉:၁၉-၂၂) ပဝဲတဂၤဘၣ်တဂၤန့ၣ် တၢ်လၢပဘၣ်သူၣ်ဘၣ်သးအီၤန့ၣ် တဒ်သိးလိာ်သးဘၣ်အဃိ ပမ့ၢ်တတဲအါလိာ်ပသး ဘၣ်ဃးဒီး တၢ်ဂ့ၢ်တဖၣ်အံၤန့ၣ် ပဆဲးအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါတဖၣ်သ့.
၈. ဒ်သိး တၢ်အိၣ်ဖှိၣ်ကဆဲးအိၣ်ဒီး တၢ်ဃူတၢ်ဖိးအဂီၢ် စီၤပီလူးမၤဝဲဒ်လဲၣ်.
၈ ဘၣ်ဃးဒီး တၢ်ဂ့ၢ်လၢအရ့ဒိၣ်တဖၣ်န့ၣ် ဖဲဒီပုၢ်ဝဲၢ်မုၣ်ခွါတဖၣ် သးတလီၤပလိာ်လိာ်အသးဘၣ်အခါ စီၤပီလူးမၤစၢၤ အဝဲသ့ၣ်ဒ်သိး အကဆဲးအိၣ်ဃူဃူဖိးဖိးအဂီၢ်. အဒိ လၢတၢ်မၢဖိအစိၤန့ၣ် ပှၤတနီၤအဲၣ်ဒိးလၢ ခရံာ်ဖိလၢ အတကဲပှၤယူဒၤဖိတဖၣ် ကဒိးတၢ်ကူးတရံး ဒ်သိးပှၤယူဒၤဖိလၢ အတကဲခရံာ်ဖိတဖၣ် တပာ်ဒ့ၣ်ပာ်ကမၣ် အဝဲသ့ၣ်တဂ့ၤအဂီၢ်. (ကလၤတံ ၆:၁၂) စီၤပီလူး တတူၢ်လိာ်အဝဲသ့ၣ် အတၢ်ထံၣ်နီတစဲးဘၣ် သနာ်က့ အဝဲတမၢဆူၣ်ပှၤဂၤလၢ ကအိၣ်ဒီးတၢ်ထံၣ် ဒ်သိးဒီးအီၤဘၣ်. အဝဲပာ်ဖျါထီၣ် တၢ်ဆီၣ်လီၤသး ဒီးပာ်ဖျါထီၣ်ဝဲ တၢ်ဂ့ၢ်အံၤလၢ တၢ်မၢဖိဒီးတၢ်အိၣ်ဖှိၣ်သးပှၢ်လၢ ဝ့ၢ်ယရူၤၡလ့ၣ်တဖၣ်အအိၣ်. (မၤတၢ် ၁၅:၁, ၂) စီၤပီလူးမၤဝဲဒ်န့ၣ်အဃိ တၢ်အိၣ်ဖှိၣ်ဆဲးအိၣ်ဒီး တၢ်ဃူတၢ်ဖိး ဒီးတၢ်သးခု.—မၤတၢ် ၁၅:၃၀, ၃၁.
၉. ပကွၢ်လိ စီၤပီလူး ကသ့ဒ်လဲၣ်.
၉ တၢ်သးတလီၤပလိာ် မ့ၢ်အိၣ်ထီၣ်န့ၣ် ဒ်သိးတၢ်ဃူတၢ်ဖိး ကဆဲးအိၣ်အဂီၢ် ပဃ့တၢ်ဟံးစုနဲၣ်ကျဲလၢ ပှၤလၢယဟိဝၤယွၤ ဃုထၢထီၣ်အီၤလၢ ကကွၢ်ထွဲ တၢ်အိၣ်ဖှိၣ်အအိၣ်သ့. တကးဒံးဘၣ် ပဃုလံာ်စီဆှံ အတၢ်ဟံးစုနဲၣ်ကျဲလၢ ပလံာ်လဲၢ်တဖၣ်အပူၤ ဒီးတၢ်ရၢကရိ အတၢ်ဟံးစုနဲၣ်ကျဲသ့. ဖဲတၢ်သးတလီၤပလိာ် အိၣ်ထီၣ်အခါ ပမ့ၢ်တမၤဖဲပသးဘၣ် ဒီးပမ့ၢ်မၤထွဲဒ် တၢ်ဟံးစုနဲၣ်ကျဲတဖၣ်အံၤအသိးန့ၣ် တၢ်အိၣ်ဖှိၣ် ကဆဲးအိၣ်ဒီး တၢ်ဃူတၢ်ဖိး.
၁၀. တၢ်အိၣ်ဖှိၣ် အတၢ်ဃူတၢ်ဖိး ကအါထီၣ်အဂီၢ် စီၤပီလူး မၤဒံးတၢ်မနုၤလဲၣ်.
၁၀ စီၤပီလူး မၤအါထီၣ် တၢ်ဃူတၢ်ဖိး ခီဖျိ ပာ်ဖျါထီၣ်ဝဲ ဒီပုၢ်ဝဲၢ်မုၣ်ခွါတဖၣ် အတၢ်ဂ့ၤတၢ်ဝါ ဒီးအတကွၢ်ဝဲ ဒီပုၢ်ဝဲၢ်မုၣ်ခွါတဖၣ် အတၢ်ဂံၢ်စၢ်ဘါစၢ်ဘၣ်. အဒိ အဝဲကွဲးလံာ်ဆူ တၢ်အိၣ်ဖှိၣ်လၢ ရိမ့ၤအခါ အဝဲပာ်ဖျါထီၣ်စ့ၢ်ကီးဝဲ ဒီပုၢ်ဝဲၢ်မုၣ်ခွါတဖၣ်အမံၤ, အတၢ်ဂ့ၤတၢ်ဝါ ဒီးအဝဲသ့ၣ်အဂ့ၢ်တနီၤ. ပကွၢ်လိစီၤပီလူးသ့ခီဖျိ ပပာ်ဖျါထီၣ် ဒီပုၢ်ဝဲၢ်မုၣ်ခွါတဖၣ် အတၢ်ဂ့ၤတၢ်ဝါ ဒီးပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီး ပဒီပုၢ်ဝဲၢ်မုၣ်ခွါတဖၣ် ကဂ့ၤဒိၣ်ထီၣ်. ဒီးလၢတၢ်အိၣ်ဖှိၣ်ပူၤန့ၣ် တၢ်အဲၣ်တၢ်ကွံ ကအါထီၣ်.
၁၁. တၢ်သးတလီၤပလိာ် မ့ၢ်အိၣ်ထီၣ်န့ၣ် ဒ်သိးတၢ်ဃူတၢ်ဖိး ကအိၣ်ထီၣ်အဂီၢ် ပကဘၣ်မၤဒ်လဲၣ်.
၁၁ ခရံာ်ဖိလၢ အဒိၣ်တုာ်ခိၣ်ပှဲၤတဖၣ်နာ်က့ တဘျီတခီၣ်န့ၣ် တၢ်သးတလီၤပလိာ် ကအိၣ်ထီၣ်ဝဲ မ့တမ့ၢ် ကတဲအါလိာ်အသး. ပမ့ၢ်ကွၢ် စီၤပီလူး ဒီးအသကီး စီၤဘၢ်နါဘၤန့ၣ် တၢ်ကဲထီၣ်အသးဒီး အဝဲသ့ၣ်ဒ်န့ၣ်. စီၤဘၢ်နါဘၤ အဲၣ်ဒိးလဲၤကိးဝဲ စီၤမၢ်ကူး လၢမံၤၡၢၤနရံၤ အတၢ်လဲၤဘၣ်ဆၣ် စီၤပီလူး တအဲၣ်ဒိးလၢ စီၤမၢ်ကူး ကလဲၤပိာ် အဝဲသ့ၣ်အခံဘၣ်. အဃိ စီၤပီလူး ဒီးစီၤဘၢ်နါဘၤ “သးပှံၢ်ထီၣ်လိာ်သး ဒိၣ်မး” ဒီးလဲၤကျဲတဂၤတဘိ. (မၤတၢ် ၁၅:၃၇-၃၉) ဘၣ်ဆၣ် လၢခံန့ၣ် စီၤပီလူး, စီၤဘၢ်နါဘၤ ဒီးစီၤမၢ်ကူးန့ၣ် က့ၤအိၣ်ဃူဃူဖိးဖိး အဃိ ပာ်ဖျါထီၣ်ဝဲလၢ အဝဲသ့ၣ် အဲၣ်ဒိးလၢ တၢ်အိၣ်ဖှိၣ်ကအိၣ်ဒီး တၢ်ဃူတၢ်ဖိး. ဒီးလၢခံဖဲစီၤပီလူးတဲဝဲ စီၤမၢ်ကူး ဒီးစီၤဘၢ်နါဘၤ အဂ့ၢ်အခါ အစံးပတြၢၤအဝဲသ့ၣ်. (၁ ကရံၣ်သူး ၉:၆; ကလီးစဲ ၄:၁၀) ပဝဲစ့ၢ်ကီး ဖဲပှၤဒီးဒီပုၢ်ဝဲၢ်တဂၤဂၤ တၢ်သးတလီၤပလိာ်သး မ့ၢ်အိၣ်ထီၣ်န့ၣ် ပကဘၣ် မၤဘၣ်ဂီၢ်ထီၣ်က့ၤအီၤ ဒီးဃုထံၣ်လၢ ပဒီပုၢ်ဝဲၢ် အတၢ်ဂ့ၤတခီ. ပမ့ၢ်မၤဒ်န့ၣ်န့ၣ် တၢ်ဃူတၢ်ဖိးကအါထီၣ်.—အ့းဖ့းစူး ၄:၃.
စီၤပီလူး မၤစၢၤဒီပုၢ်ဝဲၢ်မုၣ်ခွါတဖၣ် ဒ်သိးအတၢ်နာ် ကဆူၣ်ထီၣ်အဂီၢ်
၁၂. ဒီပုၢ်ဝဲၢ်မုၣ်ခွါတဖၣ် ထံၣ်ဘၣ်ဒီး တၢ်မၤကွၢ်မနုၤတဖၣ်လဲၣ်.
၁၂ ပမ့ၢ်မၤစၢၤ ပဒီပုၢ်ဝဲၢ်မုၣ်ခွါတဖၣ် ဒ်သိးဒီး အတၢ်နာ်ယဟိဝၤယွၤ ကဂၢၢ်ကျၢၤထီၣ်န့ၣ် လီၤဂာ်ဒ် ပဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ်အဝဲသ့ၣ်. ပဒီပုၢ်ဝဲၢ်မုၣ်ခွါတနီၤန့ၣ် အဟံၣ်ဖိဃီဖိ မ့တမ့ၢ် အသကီးလၢကၠိ ဒီးလၢတၢ်မၤလီၢ်တဖၣ် မၤမဲာ်ဆှးအဝဲသ့ၣ်. ဒီးအဂၤတနီၤန့ၣ် တူၢ်ဘၣ်တၢ်ဆူးတၢ်ဆါနးမး ဒီးမ့မ့ၢ်အဂၤတနီၤန့ၣ် အသူၣ်ဘၣ်ဒိသးဘၣ်ဒိ. ဒီးပဒီပုၢ်ဝဲၢ်မုၣ်ခွါအဂၤတနီၤန့ၣ် ဒိးဘျၢထံ အိၣ်လံဖးယံာ်လံအဃိ အဝဲသ့ၣ် အိၣ်ခိးကွၢ်လၢ်ဝဲ တၢ်အကတၢၢ်ဆၢကတီၢ်န့ၣ် ဖးယံာ်လံ. တၢ်အိၣ်သးတဖၣ်အံၤန့ၣ် ကကဲထီၣ် တၢ်မၤကွၢ်လၢ ပဒီပုၢ်ဝဲၢ်မုၣ်ခွါတဖၣ်အဂီၢ်ဒိၣ်မး. ပဒီပုၢ်ဝဲၢ်မုၣ်ခွါ လၢတၢ်မၢဖိအစိၤစ့ၢ်ကီး ထံၣ်ဘၣ်ဒီး တၢ်မၤကွၢ်ဒ်န့ၣ်တဖၣ်. ဖဲန့ၣ်အဆၢကတီၢ် စီၤပီလူး မၤစၢၤအဝဲသ့ၣ်ဒ်လဲၣ်.
ဒ်စီၤပီလူးအသိး ပဟ့ၣ်ဂံၢ်ဟ့ၣ်ဘါပှၤဂၤတဖၣ် ကသ့ဒ်လဲၣ် (ကွၢ်လံာ်ဆၢ ၁၃) b
၁၃. ဖဲပှၤမၤမဲာ်ဆှး ဒီပုၢ်ဝဲၢ်မုၣ်ခွါတဖၣ် ခီဖျိလၢ အတၢ်စူၢ်တၢ်နာ်အဃိအခါ စီၤပီလူး မၤစၢၤအဝဲသ့ၣ်ဒ်လဲၣ်.
၁၃ စီၤပီလူး သူဝဲလံာ်စီဆှံအဆၢ လၢကမၤစၢၤ ဒီပုၢ်ဝဲၢ်မုၣ်ခွါတဖၣ် ဒ်သိးအတၢ်နာ် ကဂၢၢ်ကျၢၤထီၣ်အဂီၢ်. အဒိ ပှၤယူဒၤဖိတနီၤန့ၣ် အတဲဝဲလၢ အဝဲသ့ၣ်န့ၣ် ဂ့ၤဒိၣ်န့ၢ်ဒံး ခရံာ်ဖိတဖၣ်. အဃိ ပှၤယူဒၤဖိတနီၤလၢ အကဲခရံာ်ဖိ လၢအအိၣ်လၢ ဟံၣ်ဖိဃီဖိဒ်အံၤတဖၣ်အကျါန့ၣ် အကဘၣ်တဲဆၢ အဟံၣ်ဖိဃီဖိဒ်လဲၣ်န့ၣ် ဘၣ်သ့ၣ်သ့ၣ် အဝဲသ့ၣ်တသ့ၣ်ညါဝဲဘၣ်. အဃိ စီၤပီလူး အလံာ်ပရၢလၢ အကွဲးဝဲဆူ ပှၤဧ့ၤဘြံၤဖိလၢ အကဲခရံာ်ဖိတဖၣ်အအိၣ်န့ၣ် ကကဲထီၣ် တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒိၣ်မး. (ဧ့ၤဘြံၤ ၁:၅, ၆; ၂:၂, ၃; ၉:၂၄, ၂၅) တၢ်လၢစီၤပီလူး တဲဘၣ်အဝဲသ့ၣ်န့ၣ် ကမၤစၢၤအဝဲသ့ၣ် ဒ်သိးအတဲဆၢက့ၤ အဟံၣ်ဖိဃီဖိ ကဘၣ်အဂီၢ်. ဆၢကတီၢ်ခဲအံၤ ပဒီပုၢ်ဝဲၢ်မုၣ်ခွါတနီၤန့ၣ် ပှၤမၤမဲာ်ဆှးအဝဲသ့ၣ် အဃိ ပမၤစၢၤအဝဲသ့ၣ်ဒ်သိး ကသူပလံာ်လဲၢ်တဖၣ် ဒီးတဲပၠးက့ၤပှၤဂၤ လၢအတၢ်စူၢ်တၢ်နာ် ကသ့အဂီၢ်. မ့မ့ၢ် ပဒီပုၢ်ဝဲၢ်သးစၢ်တနီၤန့ၣ် တမၤဝဲမူးပွဲဒီး နံၤအိၣ်ဖျဲၣ်အမူးဘၣ်အဃိ ပှၤတဲဆါဒီးမၤမဲာ်ဆှးအဝဲသ့ၣ်. အဃိ ဒ်သိး အဝဲသ့ၣ်တဲပၠးက့ၤပှၤဂၤလၢ ဘၣ်မနုၤအဃိ အဝဲသ့ၣ်တမၤမူးပွဲတနီၤဒီး တၢ်အိၣ်ဖျဲၣ်ဆၢက့ၤ အမုၢ်နံၤဘၣ်လဲၣ်န့ၣ် ကသ့အဂီၢ် ပမၤစၢၤအဝဲသ့ၣ်လၢ ကဃုဝဲ တၢ်ဂ့ၢ်တၢ်ကျိၤလၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု, တၢ်မၤလိ ၄၄ အပူၤသ့.
ဒ်စီၤပီလူးအသိး ပဟ့ၣ်ဂံၢ်ဟ့ၣ်ဘါပှၤဂၤတဖၣ် ကသ့ဒ်လဲၣ် (ကွၢ်လံာ်ဆၢ ၁၄) c
၁၄. စီၤပီလူး စံၣ်တဲၤတဲလီၤတၢ်ဆူၣ်မး သနာ်က့ အဝဲမၤဒံးတၢ်မနုၤလဲၣ်.
၁၄ စီၤပီလူး ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်လၢ ကပာ်ဖျါထီၣ်တၢ်အဲၣ် ခီဖျိမၤ “တၢ်မၤလၢအဂ့ၤတဖၣ်.” (ဧ့ၤဘြံၤ ၁၀:၂၄) တမ့ၢ်ထဲ စီၤပီလူးတဲဝဲလၢ အတၢ်ကတိၤဘၣ်. အနီၢ်ကစၢ်ဒၣ်ဝဲ ပာ်ဖျါထီၣ်ဝဲလၢ အတၢ်မၤစ့ၢ်ကီး. အဒိ ဖဲပဒီပုၢ်ဝဲၢ်မုၣ်ခွါလၢ အအိၣ်လၢယူဒၤတဖၣ် ထံၣ်ဘၣ်ဒီး တၢ်သၣ်ဝံၤလီၤဒိအခါ စီၤပီလူးလဲၤစိာ်န့ၢ်အဝဲသ့ၣ် တၢ်လၢအဝဲသ့ၣ်လိၣ်ဘၣ်ဝဲတဖၣ်. (မၤတၢ် ၁၁:၂၇-၃၀) စီၤပီလူးန့ၣ် စံၣ်တဲၤတဲလီၤတၢ် ဒီးသိၣ်လိတၢ်ဆူၣ်မး သနာ်က့ အဝဲဃုကျဲထီဘိလၢ ကမၤစၢၤပှၤလၢ အလိၣ်ဘၣ်တၢ်မၤစၢၤလၢ နီၢ်ခိတကပၤအဂီၢ်စ့ၢ်ကီး. (ကလၤတံ ၂:၁၀) စီၤပီလူးမၤဝဲဒ်န့ၣ်အဃိ ကမၤစၢၤ ဒီပုၢ်ဝဲၢ်မုၣ်ခွါတဖၣ်လၢ ကနာ်ဝဲလၢ ယဟိဝၤယွၤကကွၢ်ထွဲ အဝဲသ့ၣ်ထီဘိ. ဆၢကတီၢ်ခဲအံၤ ပမ့ၢ်သူပတၢ်ဆၢကတီၢ် ဒီးပတၢ်ဂံၢ်တၢ်ဘါ ဒီးပတၢ်သ့တၢ်ဘၣ်လၢ ကမၤစၢၤ ပဒီပုၢ်ဝဲၢ်မုၣ်ခွါတဖၣ်လၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် ပဒီပုၢ်ဝဲၢ်မုၣ်ခွါတဖၣ်အံၤ အတၢ်နာ်ကဟဲဂၢၢ်ကျၢၤထီၣ်. ဒီးပမၤစၢၤအဝဲသ့ၣ်သ့ ခီဖျိလၢပထၢနုာ်တၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၢ် ထီဘိသ့. ပမ့ၢ်မၤစၢၤ ပဒီပုၢ်ဝဲၢ်မုၣ်ခွါတဖၣ်လၢ ကျဲဒ်အံၤ ဒီးကျဲလၢအဂၤတဖၣ်န့ၣ် ကမၤစၢၤအဝဲသ့ၣ်ဒ်သိး အကနာ်ဝဲလၢ ယဟိဝၤယွၤ တပာ်တ့ၢ်အဝဲသ့ၣ် နီတဘျီဘၣ်.
ဒ်စီၤပီလူးအသိး ပဟ့ၣ်ဂံၢ်ဟ့ၣ်ဘါပှၤဂၤတဖၣ် ကသ့ဒ်လဲၣ် (ကွၢ်လံာ်ဆၢ ၁၅-၁၆) d
၁၅-၁၆. ပဒီပုၢ်ဝဲၢ်မုၣ်ခွါလၢ အတၢ်နာ်လီၤစၢ်တဖၣ်န့ၣ် ပကြၢးရ့ဒီးအဝဲသ့ၣ်ဒ်လဲၣ်.
၁၅ စီၤပီလူး ဆဲးဟ့ၣ်ဂံၢ်ဟ့ၣ်ဘါ ပှၤလၢအတၢ်နာ်လီၤစၢ်တဖၣ်. အဝဲပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ် ဒီးတဲတၢ်ဒီးအဝဲသ့ၣ် မုာ်မုာ်ဒီးလၢတၢ်အဲၣ်တၢ်ကွံအပူၤ. (ဧ့ၤဘြံၤ ၆:၉; ၁၀:၃၉) အဒိ ဖဲအဝဲကွဲးလံာ်ပရၢဆူ ပှၤဧ့ၤဘြံၤဖိလၢ အကဲခရံာ်ဖိတဖၣ်အအိၣ်အခါ အသူဝဲ တၢ်ကတိၤလၢ “ပ” ဒီး “ပှၤ” အဃိ အဝဲ ပာ်ဖျါထီၣ်ဝဲလၢ အနီၢ်ကစၢ်ဒၣ်ဝဲ ကဘၣ်မၤထွဲဝဲ တၢ်ဟ့ၣ်ကူၣ်လၢ အတဲဝဲတဖၣ်. (ဧ့ၤဘြံၤ ၂:၁, ၃) ဒ်စီၤပီလူးမၤဝဲအသိး ပဝဲနာ်က့ ပဘၣ်ဆဲးဟ့ၣ်ဂံၢ်ဟ့ၣ်ဘါ ပှၤလၢအတၢ်နာ်လီၤစၢ်တဖၣ် ဒီးပတဘၣ်ပာ်တ့ၢ်အဝဲသ့ၣ်ဘၣ်. ဒီးပကဘၣ်ပာ်ဖျါထီၣ်လၢ ပသူၣ်အိၣ်သးအိၣ်အဝဲသ့ၣ်နီၢ်ကီၢ်. ပမ့ၢ်မၤဒ်န့ၣ်န့ၣ် အဝဲသ့ၣ်ကတူၢ်ဘၣ်ဝဲလၢ ပအဲၣ်အဝဲသ့ၣ်. ဒီးပမ့ၢ်တဲတၢ်ဒီးအဝဲသ့ၣ်မုာ်မုာ်, ကပုာ်လုးကဖီလီဖိန့ၣ် ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒိၣ်မး.
၁၆ စီၤပီလူးဒုးသ့ၣ်နီၣ်ထီၣ် ဒီပုၢ်ဝဲၢ်မုၣ်ခွါတဖၣ်လၢ ယဟိဝၤယွၤထံၣ်ဝဲ တၢ်အဂ့ၤလၢအဝဲသ့ၣ်မၤဝဲတဖၣ်. (ဧ့ၤဘြံၤ ၁၀:၃၂-၃၄) ပမ့ၢ်မၤစၢၤ ပဒီပုၢ်ဝဲၢ်မုၣ်ခွါလၢ အတၢ်နာ်လီၤစၢ်တဖၣ်န့ၣ် ပမၤဒ်စီၤပီလူးမၤဝဲအသိးသ့. ပတဲဘၣ်က့ၤအဝဲသ့ၣ်လၢ အဝဲသ့ၣ်သ့ၣ်ညါထီၣ် တၢ်မ့ၢ်တၢ်တီဒ်လဲၣ် မ့တမ့ၢ် ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဆိကမိၣ်ထံက့ၤ လၢညါတၢ်လၢယဟိဝၤယွၤ မၤစၢၤတ့ၢ်အီၤ. တကးဒံးဘၣ် ပဒုးသ့ၣ်နီၣ်ထီၣ်အဝဲသ့ၣ်လၢ ယဟိဝၤယွၤတသးပ့ၤနီၣ် တၢ်လၢအဝဲသ့ၣ်မၤတ့ၢ်ဝဲလၢ ယဟိဝၤယွၤအဂီၢ်ဘၣ်. တကးဒံးဘၣ် ပမၤစၢၤအဝဲသ့ၣ်သ့ခီဖျိ ပဒုးသ့ၣ်နီၣ်ထီၣ်အဝဲသ့ၣ်လၢ ခါဆူညါစ့ၢ်ကီး ယဟိဝၤယွၤတပာ်တ့ၢ် အဝဲသ့ၣ်နီတဘျီဘၣ်. (ဧ့ၤဘြံၤ ၆:၁၀; ၁၃:၅, ၆) ပမ့ၢ်တဲသကီးက့ၤ တၢ်ဂ့ၢ်တဖၣ်အံၤဒီးအဝဲသ့ၣ်န့ၣ် အဝဲသ့ၣ် အသးကဆူၣ်ထီၣ်လၢ ကဆဲးမၤ ယဟိဝၤယွၤ အတၢ်မၤအဂီၢ်.
“ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ”
၁၇. ပကဘၣ်ဂုာ်ကျဲးစၢး မၤဂ့ၤထီၣ်တၢ်မနုၤလဲၣ်.
၁၇ ပှၤတ့ထီၣ်ဘှီထီၣ်တၢ်တဂၤ အဝဲတ့တၢ်မ့ၢ်ယံာ်ထီၣ်န့ၣ် အတ့တၢ်ကသ့ဂ့ၤဒိၣ်ထီၣ်. ဒ်န့ၣ်အသိး ပဝဲစ့ၢ်ကီး ပဂုာ်ကျဲးစၢး ဒ်သိးပဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ် ပဒီပုၢ်ဝဲၢ်မုၣ်ခွါတဖၣ်အသး ကသ့ဒိၣ်ထီၣ်အဂီၢ်သ့. ပမၤစၢၤပှၤဂၤဒ်သိးဒီး ကအိၣ်ဒီးတၢ်ဂံၢ်တၢ်ဘါလၢ ကလဲၤခီဖျိဝဲ တၢ်ကီတၢ်ခဲတဖၣ်အဂီၢ်သ့ ခီဖျိပတဲဘၣ်အဝဲသ့ၣ်လၢ ပှၤလၢညါတဖၣ်အတၢ်လဲၤခီဖျိ. ပမၤအါထီၣ်တၢ်ဃူတၢ်ဖိးသ့ခီဖျိ ပဃုထံၣ်န့ၢ်ပှၤဂၤ အတၢ်ဂ့ၤတၢ်ဝါ ဒီးဖဲတၢ်လီၤမုၢ်လီၤဖး ကအိၣ်ထီၣ်အခါ ပကဘၣ်ဂုာ်ကျဲးစၢး ပၢၤဃာ်တၢ်ဃူတၢ်ဖိး. ဒီးတၢ်လီၤမုၢ်လီၤဖး မ့ၢ်အိၣ်ထီၣ်နာ်က့ ပကဘၣ်ဂုာ်ကျဲးစၢးဒ်သိး တၢ်ဃူတၢ်ဖိး ကအိၣ်ထီၣ်က့ၤအဂီၢ်. ပမၤစၢၤပဒီပုၢ်ဝဲၢ်မုၣ်ခွါတဖၣ် ဒ်သိးဒီးအတၢ်နာ် ကဂၢၢ်ကျၢၤထီၣ်သ့ ခီဖျိလၢ ပတဲပၠးအဝဲသ့ၣ် လံာ်စီဆှံတၢ်မ့ၢ်တၢ်တီ, မၤစၢၤအဝဲသ့ၣ်လၢ တၢ်လၢအဝဲသ့ၣ် လိၣ်ဘၣ်ဝဲတဖၣ် ဒီးဟ့ၣ်ဂံၢ်ဟ့ၣ်ဘါပှၤလၢ အတၢ်နာ်လီၤစှၤတဖၣ်.
၁၈. နပာ်လီၤသးလၢ နကမၤမနုၤလဲၣ်.
၁၈ ပှၤလၢအပၣ်ဃုာ်လၢ တၢ်သူၣ်ထီၣ်ဘှီထီၣ်တၢ်မၤ တကပၤလၢ ပတၢ်ကရၢကရိပူၤန့ၣ် အဒိးန့ၢ်ဘၣ်တၢ်သးခု ဒီးတၢ်သူၣ်မံသးမုာ်. ပမ့ၢ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်န့ၣ် ပကဒိးန့ၢ်ဘၣ် တၢ်သးခု ဒီးတၢ်သူၣ်မံသးမုာ်စ့ၢ်ကီး. တၢ်သူၣ်ထီၣ်ဘှီထီၣ်တၢ်မၤန့ၣ် အကဲဘျုးဝဲ ဘၣ်ဆၣ် တၢ်သူၣ်ထီၣ်တဖၣ်အံၤန့ၣ် အဟးဂီၤသ့, မ့မ့ၢ် တၢ်ဟ့ၣ်ဂံၢ်ဟ့ၣ်ဘါပှၤဂၤန့ၣ် အကဲဘျုးဝဲထီဘိ အဃိ ပကပာ်လီၤပသးလၢ ပက “ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးမၤမုာ်ထီၣ်လိာ်သး တဂၤဒီးတဂၤ.”—၁ သ့းစၤလနံ ၅:၁၁.
တၢ်သးဝံၣ် ၁၀၀ တူၢ်လိာ်ခီၣ်ဆၢအဝဲသ့ၣ်
a ပအိၣ်မူဘၣ်လၢ ဆၢကတီၢ်လၢအကီအခဲဒိၣ်မး အဃိ ပဒီပုၢ်ဝဲၢ်မုၣ်ခွါတဖၣ်န့ၣ် ထံၣ်ဘၣ်ဒီး တၢ်ကီတၢ်ခဲအါမး. ပမ့ၢ်ဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါတဖၣ်န့ၣ် ကကဲထီၣ် တၢ်မၤစၢၤလၢအဝဲသ့ၣ်အဂီၢ်ဖးဒိၣ်. အဃိ ဒ်သိးပဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါတဖၣ် ကသ့အဂီၢ်. ခဲအံၤ ပကမၤလိသကီး စီၤပီလူးအဒိအတဲာ်.
b တၢ်ဂီၤအခီပညီ– ဖိသၣ်မုၣ်ဖိတဂၤန့ၣ် ပှၤမၢဆူၣ်အီၤလၢ ကမၤခရံာ်အိၣ်ဖျဲၣ်အဃိ အပါမၤစၢၤအီၤလၢ ကဃုဝဲတၢ်ဟ့ၣ်ကူၣ်လၢ ပလံာ်လဲၢ်တဖၣ်အပူၤ ဒ်သိးအတဲဆၢက့ၤပှၤဂၤ ကသ့အဂီၢ်.
c တၢ်ဂီၤအခီပညီ– ပှၤဒီမိၢ်ဝၤခံဂၤ လဲၤမၤစၢၤဝဲ ပှၤလၢအထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး လၢတၢ်လီၢ်အဂၤ.
d တၢ်ဂီၤအခီပညီ– တၢ်အိၣ်ဖှိၣ်သးပှၢ်တဂၤ လဲၤဟးအိၣ်သကီးဝဲ ဒီပုၢ်ဝဲၢ်ခွါလၢ အတၢ်နာ်လီၤစၢ်တဂၤ. ဒီးအဝဲဒုးနဲၣ်ပၠးဝဲ တၢ်ဂီၤလၢ အဝဲသ့ၣ်ထီၣ်ဝဲ ပှၤလဲၤလၢညါကၠိ ဒ်သီးသီး. အဃိ ဒီပုၢ်ဝဲၢ်ခွါတဂၤအံၤ က့ၤသ့ၣ်နီၣ်ထီၣ်က့ၤဝဲ တၢ်ဆၢကတီၢ်လၢညါခါအဃိ အသးခုထီၣ်က့ၤဝဲ. ဒီးဒီပုၢ်ဝဲၢ်ခွါအံၤ အသးဆူၣ်ထီၣ်လၢ အကက့ၤမၤကစၢ်ယွၤတၢ်မၤ လၢတၢ်သးခုအပူၤ. တကးဒံးဘၣ် အဝဲဟဲက့ၤထီၣ်ကဒါက့ၤ တၢ်အိၣ်ဖှိၣ်.
