တၢ်မၤလိ ၁၃
တၢ်ဘူၣ်ထီၣ်ဘါထီၣ်လၢ အမ့ၢ်အတီန့ၣ် ကမၤအါထီၣ်နတၢ်သးခု
“နကြၢးဒိးန့ၢ်ဘၣ် တၢ်လၤတၢ်ကပီၤ ဒီးတၢ်ယူးယီၣ် ဒီးတၢ်စိတၢ်ကမီၤလီၤ.”—လီၣ်ဖျါ ၄:၁၁.
တၢ်သးဝံၣ် ၃၁ လဲၤတၢ်ဒီးယွၤ
တၢ်မၤလိအံၤ အတၢ်တိာ်ပာ် *
၁-၂. ဒ်သိး ကစၢ်ယွၤ ကဘၣ်သူၣ်ဘၣ်သး ပတၢ်ဘူၣ်ထီၣ်ဘါထီၣ်အီၤအဂီၢ် ပကဘၣ်မၤဒ်လဲၣ်.
ဖဲနနၢ်ဟူဘၣ် တၢ်ကတိၤလၢအမ့ၢ် “တၢ်ဘူၣ်ထီၣ်ဘါထီၣ်” အခါ နထံၣ်တမှံဘၣ် တၢ်မနုၤလဲၣ်. ဘၣ်သ့ၣ်သ့ၣ် နကထံၣ်တမှံဘၣ် ဒီပုၢ်ဝဲၢ်ခွါတဂၤ လၢတၢ်ဆီၣ်လီၤသးအပူၤ အချံးလီၤအခီၣ်လၢ အလီၢ်မံခီၣ်ထံး ဒီးဃ့ဘါထုကဖၣ်လၢ အသူၣ်ဒီဖျၢၣ်သးဒီဖျၢၣ်. မ့တမ့ၢ် နကထံၣ်တမှံဘၣ် ဟံၣ်ဖိဃီဖိတဒူၣ် မၤလိသကိး လံာ်စီဆှံလၢ တၢ်သူၣ်ခုသးခုအပူၤ.
၂ ဖဲအဝဲသ့ၣ် မၤဝဲဒ်န့ၣ်အခါ မ့ၢ်ဒၣ်အဝဲသ့ၣ် ဘူၣ်ထီၣ်ဘါထီၣ်တၢ်စ့ၢ်ကီး. ဘၣ်ဆၣ် မ့ၢ်ယဟိဝၤယွၤ ကတူၢ်လိာ်အဝဲသ့ၣ် အတၢ်ဘူၣ်ထီၣ်ဘါထီၣ် စ့ၢ်ကီးဧါ. အဝဲသ့ၣ် မ့ၢ်ဂုာ်ကျဲးစၢး မၤကစၢ်ယွၤအတၢ်ဘၣ်သး, မ့ၢ်အဲၣ်ကစၢ်ယွၤဒီး ပာ်ဒိၣ်ပာ်ကဲအီၤန့ၣ် ကစၢ်ယွၤကတူၢ်လိာ် အတၢ်ဘူၣ်ထီၣ်ဘါထီၣ်အီၤ. ပအဲၣ်ယဟိဝၤယွၤဒိၣ်မး ဒီးပသ့ၣ်ညါလၢ အကြၢးဒိးန့ၢ်ဘၣ် ပတၢ်ဘူၣ်ထီၣ်ဘါထီၣ်အီၤ ဒီးပအဲၣ်ဒိးဘူၣ်ထီၣ်ဘါထီၣ်အီၤလၢ ကျဲလၢအဂ့ၤကတၢၢ်.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ လၢတၢ်မၤလိအံၤအပူၤ ပကတဲသကိး လၢပျၢၤ တၢ်ဘူၣ်ထီၣ်ဘါထီၣ်လၢ ယဟိဝၤယွၤ တူၢ်လိာ်အီၤ ဒီးလၢပစိၤခဲအံၤ တၢ်မၤဃိးခါ လၢယဟိဝၤယွၤအဲၣ်ဒိး လၢပကမၤအီၤ ဖဲပဘူၣ်ထီၣ်ဘါထီၣ်အီၤအခါ. ဒီးဖဲပမၤလိ တၢ်ဂ့ၢ်သ့ၣ်တဖၣ်အံၤအခါ ပဆိကမိၣ်ထံဘၣ်ဃးဒီး ပမၤတၢ်သ့ၣ်တဖၣ်အံၤလၢ အဂ့ၤကတၢၢ် ကသ့ဒ်လဲၣ်. တကးဒံးဘၣ် ပကတဲသကိး ဘၣ်မနုၤအဃိ တၢ်ဘူၣ်ထီၣ်ဘါထီၣ် အမ့ၢ်အတီန့ၣ် မၤသးခုပှၤလဲၣ်.
လၢပျၢၤ တၢ်ဘူၣ်ထီၣ်ဘါထီၣ်လၢ ယဟိဝၤယွၤတူၢ်လိာ်ဝဲ
၄. ပှၤလၢအဘူၣ်ထီၣ်ဘါထီၣ် ယဟိဝၤယွၤ တချုးလၢခရံာ်ဖိအစိၤဒံးဘၣ်န့ၣ် အဝဲသ့ၣ်ပာ်ဖျါထီၣ်လၢ အယူးယီၣ်ပာ်ကဲ ဒီးအဲၣ်ယဟိဝၤယွၤဒ်လဲၣ်.
၄ တချုးလၢ ခရံာ်ဖိအစိၤ ပိာ်ခွါလၢအအိၣ်ဒီး တၢ်သးတီတဖၣ် ဒ်သိးဒီး စီၤဟ့းဘ့းလး, စီၤနိအၤ, စီၤအၤဘြၤဟၣ် ဒီးစီၤယိၤဘးန့ၣ် အဝဲသ့ၣ်ပာ်ဖျါထီၣ်လၢ ယူးယီၣ်ပာ်ကဲ ဒီးအအဲၣ်ယဟိဝၤယွၤ ခီဖျိ အဝဲသ့ၣ်အိၣ်ဒီး တၢ်နာ်, တၢ်ဒိကနၣ် ဒီးတူၢ်ဆါအသးလၢ ယဟိဝၤယွၤအဂီၢ်. အဝဲသ့ၣ်ဘူၣ်ထီၣ်ဘါထီၣ် တၢ်ဒ်လဲၣ်န့ၣ် လံာ်စီဆှံတပာ်ဖျါထီၣ်န့ၢ်ပှၤ တၢ်ဂ့ၢ်တၢ်ကျိၤ လီၤတံၢ်လီၤဆဲး ခဲလၢာ်ဘၣ်. ဘၣ်ဆၣ်အဝဲသ့ၣ်မၤဝဲ အဂ့ၤကတၢၢ် လၢကမၤလၤကပီၤ ယဟိဝၤယွၤအဂီၢ် ဒီးယဟိဝၤယွၤ တူၢ်လိာ်အဝဲသ့ၣ် တၢ်ဘူၣ်ထီၣ်ဘါထီၣ်. လၢခံယဟိဝၤယွၤ ဟ့ၣ်လီၤပှၤအံၣ်စရ့လးဖိတဖၣ်လၢ စီၤမိၤၡ့အတၢ်သိၣ်တၢ်သီ. စီၤမိၤၡ့အတၢ်သိၣ်တၢ်သီန့ၣ် ပၣ်ဃုာ်ဒီး တၢ်မၤလိာ်လီၤတံၢ်လီၤဆဲးလၢ ပှၤအံၣ်စရ့လးဖိတဖၣ် ကဘၣ်ဘူၣ်ထီၣ်ဘါထီၣ် ယဟိဝၤယွၤလၢ ကျဲလၢယဟိဝၤယွၤ ဘၣ်သူၣ်ဘၣ်သးဝဲဒ်လဲၣ်လီၤ.
၅. ဖဲယ့ၣ်ၡူးသံဒီး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ဘၣ်ဃးဒီး တၢ်ဘူၣ်ထီၣ်ဘါထီၣ်လၢ အမ့ၢ်အတီန့ၣ် တၢ်ဆီတလဲအိၣ်ဝဲဒ်လဲၣ်.
၅ ဖဲယ့ၣ်ၡူးသံဒီး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ယဟိဝၤယွၤ တမၢပမၤထွဲ စီၤမိၤၡ့အတၢ်သိၣ်တၢ်သီလၢၤဘၣ်. (ရိမ့ၤ ၁၀:၄) ခရံာ်ဖိတဖၣ် ကဘၣ်မၤထွဲ တၢ်သိၣ်တၢ်သီလၢ အသီတခါလၢအမ့ၢ် “ခရံာ်အတၢ်သိၣ်တၢ်သီ.” (ကလၤတံ ၆:၂) အဝဲသ့ၣ် မၤထွဲဝဲ “တၢ်သိၣ်တၢ်သီ” တခါအံၤသ့ ခီဖျိ ကွၢ်လိမၤဒိး ယ့ၣ်ၡူးအဒိအတဲာ် ဒီးအတၢ်သိၣ်လိသီလိတဖၣ်. တမ့ၢ်လၢ အဝဲသ့ၣ် ကဘၣ်တိၢ်နီၣ်သံဃာ် တၢ်သိၣ်တၢ်သီ ဒီဒူၣ်ဒီထၢ လၢကမၤထွဲဝဲ ဒီးဟံးသံဃာ်ဝဲန့ၣ်ဘၣ်. မုၢ်မဆါတနံၤအံၤ ဒ်သိးခရံာ်ဖိတဖၣ် ကမၤတၢ်ဘၣ် ယဟိဝၤယွၤအသးဒီး “ကဒိးန့ၢ်ဘၣ် တၢ်မၤမုာ်ထီၣ်” အသးအဂီၢ် အဝဲသ့ၣ်ဂုာ်ကျဲးစၢး ကွၢ်လိမၤဒိး ယ့ၣ်ၡူးလၢအဂ့ၤ ကတၢၢ်.—မးသဲ ၁၁:၂၉.
၆. တၢ်မၤလိတခါအံၤ ကမၤစၢၤပှၤဒ်လဲၣ်.
၆ ဖဲပတဲသကိးတၢ်မၤလၢ ပတၢ်ဘူၣ်ထီၣ်ဘါထီၣ်အပူၤ တခါဘၣ်တခါ အခါန့ၣ် သံကွၢ်လီၤနသးလၢ ‘ဘၣ်ဃးဒီးတၢ်ဂ့ၢ်အံၤ မ့ၢ်ယဂုာ်ကျဲးစၢးမၤအီၤလၢ အဂ့ၤကတၢၢ်လံဧါ.’ မ့တမ့ၢ် ‘ယမၤဂ့ၤထီၣ်အီၤကသ့ဧါ.’ နမ့ၢ်သ့ၣ်ညါလီၤနသးလၢနလဲၤထီၣ်လဲၤထီဒု နကသးခု. ဘၣ်ဆၣ် နကဘၣ်ဃ့ ယဟိဝၤယွၤအတၢ်မၤစၢၤ ဒ်သိးနကသ့ၣ်ညါလီၤနသးလၢ နကဘၣ်မၤဂ့ၤထီၣ်နသး ဖဲလဲၣ်.
ပဘူၣ်ထီၣ်ဘါထီၣ် ယဟိဝၤယွၤလၢ ကျဲဒ်လဲၣ်
၇. ဖဲပဃ့ဘါထုကဖၣ်လၢ ပသးဒီဖျၢၣ်အခါ ယဟိဝၤယွၤ ထံၣ်ဝဲလၢ အလီၤဂာ်ဒ်သိးဒီး တၢ်မနုၤလဲၣ်.
၇ ဖဲပဃ့ဘါထုကဖၣ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. လံာ်စီဆှံထိၣ်သတြီၤဝဲ ပတၢ်ဃ့ဘါထုကဖၣ် ဒ်တၢ်နၢမူလၢ ပှၤကတဲာ်ကတီၤအီၤ မူာ်မူာ်နီၢ်နီၢ် လၢပှၤကလုၢ်ထီၣ်အီၤလၢ ဒဲစီဆှံဒီးတၢ်လုၢ်ဟံၣ်. (စံးထီၣ်ပတြၢၤ ၁၄၁:၂) အဃိ တၢ်နၢမူအစိတခါအံၤန့ၣ် ကစၢ်ယွၤ ဘၣ်သူၣ်ဘၣ်သးဝဲဒိၣ်မး. ဖဲပဃ့ဘါထုကဖၣ်လၢ ပသးဒီဖျၢၣ်အခါ ပမ့ၢ်တဲ တၢ်ကတိၤယိယိဖိနာ်က့ ကစၢ်ယွၤ “ဘၣ်အသး” လီၤ. (ကတိၤဒိ ၁၅:၈; ၅ မိၤၡ့ ၃၃:၁၀) ဒီးပနာ်သ့လၢ ကစၢ်ယွၤဘၣ်သးနၢ်ဟူဝဲ ပတဲဖျါထီၣ် ပတၢ်အဲၣ်အီၤဒီး ပတၢ်စံးဘျုးစံးဖှိၣ်အီၤ. အဝဲအဲၣ်ဒိးလၢ ပကတဲဘၣ်အီၤ ပတၢ်ကိၢ်တၢ်ဂီၤ, ပတၢ်မုၢ်လၢ် ဒီးတၢ်လၢပလီကီအီၤတဖၣ်. အဃိတချုးလၢ နဃ့ဘါထုကဖၣ်တၢ်ဒံးဘၣ် အခါ နမ့ၢ်ဆိကမိၣ်ထံအီၤန့ၣ် ကဂ့ၤဝဲဒိၣ်မး. နမ့ၢ်မၤဒ်န့ၣ်န့ၣ် လီၤဂာ်ဒ် နဟ့ၣ်လုၢ်ထီၣ် နပၢ်အိၣ်လၢမူခိၣ်လၢ “တၢ်ဆိၣ်ကဲၤနၢမူ” လၢအဂ့ၤကတၢၢ်.
၈. ပစံးထီၣ်ပတြၢၤ ကစၢ်ယွၤကသ့လၢ ကျဲဒ်လဲၣ်.
၈ ဖဲပစံးထီၣ်ပတြၢၤ ယဟိဝၤယွၤအခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ်အီၤ. (စံးထီၣ်ပတြၢၤ ၃၄:၁) ဖဲပတဲဘၣ်ပှၤဂၤလၢ ပဘၣ်သူၣ်ဘၣ်သး ယဟိဝၤယွၤ အတၢ်ဂ့ၤတၢ်ဝါတဖၣ် ဒီးအတၢ်မၤတဖၣ်ထဲလဲၣ်အခါ မ့ၢ်ဝဲပစံးထီၣ်ပတြၢၤအီၤ. ပမ့ၢ်ပာ်လုၢ်ပာ်ပှ့ၤ တၢ်လၢယဟိဝၤယွၤ မၤန့ၢ်ပှၤန့ၣ် ပကအိၣ်ဒီးတၢ်ဂ့ၢ်အဂ့ၤအါမးလၢ ပကစံးဘျုးစံးဖှိၣ်အီၤအဂီၢ်. ပမ့ၢ်ဟံးန့ၢ်တၢ်ဆၢကတီၢ်လၢ ပကဆိကမိၣ်ထံတၢ်လၢ ယဟိဝၤယွၤမၤန့ၢ်ပှၤန့ၣ် ပစံးဘျုးစံးဖှိၣ်အီၤလၢာ် တသ့နီတဘျီဘၣ်. ဖဲပစံၣ်တဲၤတဲလီၤတၢ်အခါ ပအိၣ်ဒီးတၢ်ခွဲးတၢ်ယာ်ဂ့ၤမးလၢ ပက “လုၢ်ထီၣ်” “ပထးခိၣ်အတၤသၣ်” လၢအမ့ၢ်ဝဲ “တၢ်စံးထီၣ်ပတြၢၤလၢ ကစၢ်ယွၤအအိၣ်.” (ဧ့ၤဘြံၤ ၁၃:၁၅) တချုးလၢ ပဃ့ဘါထုကဖၣ်အခါ ပဆိကမိၣ်ထံအီၤလီၤတံၢ်လီၤဆဲးအသိး တချုးလၢ ပလဲၤစံၣ်တဲၤတဲလီၤတၢ်ဒံးဘၣ်အခါ ပကြၢးအိၣ်ကတဲာ်ကတီၤပသး ဘၣ်ဃးဒီး တၢ်လၢပကတဲအီၤတဖၣ် လီၤတံၢ်လီၤဆဲးစ့ၢ်ကီး. ပအဲၣ်ဒိး “လုၢ်ထီၣ် တၢ်စံးထီၣ်ပတြၢၤ” လၢအဂ့ၤကတၢၢ်. အဃိ ပစံၣ်တဲၤတဲလီၤပှၤဂၤ တၢ်မ့ၢ်တၢ်တီလၢ တၢ်သူၣ်အိၣ်သးအိၣ်အပူၤလီၤ.
၉. ဒ်ပှၤအံၣ်စရ့လးဖိလၢပျၢၤအသိး ဖဲပထီၣ်တၢ်အိၣ်ဖှိၣ်အခါ ပဒိးန့ၢ်ဘၣ်အဘျုးဒ်လဲၣ်. တဲဖျါထီၣ်နတၢ်လဲၤခီဖျိတက့ၢ်.
၉ ဖဲပထီၣ်တၢ်အိၣ်ဖှိၣ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. ယဟိဝၤယွၤ မၤလိာ်ပှၤအံၣ်စရ့လးဖိတဖၣ်လၢ “တနံၣ်အတီၢ်ပူၤန့ၣ် ကယဲၢ်နဖိခွါဘၣ် အိၣ်ဖျါထီၣ်သၢဘျီလၢ ယွၤနကစၢ်အမဲာ်ညါ, ဖဲအလီၢ်လၢအကဃုထၢအီၤ.” (၅ မိၤၡ့ ၁၆:၁၆) အဃိ ဖဲန့ၣ်အဆၢကတီၢ် အဝဲသ့ၣ် ကဘၣ်ပာ်တ့ၢ် အဟံၣ်အဃီ ဒီးအစံာ်ဧိၤပှဲၤဧိၤတဖၣ်လီၤ. ဘၣ်ဆၣ် ယဟိဝၤယွၤ အၢၣ်လီၤအဝဲသ့ၣ်လၢ “တုၤနလဲၤပာ်ဖျါနသးလၢ ယွၤနကစၢ်အမဲာ်ညါ တနံၣ်သၢဘျီဒီး, ပှၤတဆၢန့ၢ်ဘၣ် နဟီၣ်ခိၣ်နီတဂၤဘၣ်.” (၂ မိၤၡ့ ၃၄:၂၄) ပှၤအံၣ်စရ့လးဖိလၢအနာ်န့ၢ် ယဟိဝၤယွၤလၢလၢပှဲၤပှဲၤတဖၣ်န့ၣ် လဲၤမၤဝဲဘူၣ်တဖၣ်အံၤ ကိးနံၣ်ဒဲး. အဃိ အဝဲသ့ၣ်ဒိးန့ၢ်ဘၣ် တၢ်ဆိၣ်ဂ့ၤအါမး. အဝဲသ့ၣ်နၢ်ပၢၢ်အါထီၣ် ကစၢ်ယွၤအတၢ်သိၣ်တၢ်သီ ဒီးဆိကမိၣ်ထံဘၣ်ဝဲ ကစၢ်ယွၤအတၢ်ဂ့ၤတၢ်ဝါတဖၣ် ဒီးရ့လိာ်ဘၣ်အသးဒီး ပှၤလၢအစူၢ်က့ၤနာ်က့ၤတၢ် ကဒဲကဒဲ. (၅ မိၤၡ့ ၁၆:၁၅) ပဝဲသ့ၣ်တဖၣ်စ့ၢ်ကီး ဖဲပဂုာ်ကျဲးစၢးထီၣ် ခရံာ်ဖိတၢ်အိၣ်ဖှိၣ်တဖၣ်အခါ ပဒိးန့ၢ်ဘၣ်တၢ်ဆိၣ်ဂ့ၤ ဒ်အဝဲသ့ၣ်အသိး ဒီးအဂၤတခါန့ၣ် ဖဲပဟ့ၣ်ထီၣ်တၢ်စံးဆၢ ဖုၣ်ဖုၣ်လၢ ပကတဲာ်ကတီၤ ပာ်အီၤဂ့ၤဂ့ၤအခါန့ၣ် ယဟိဝၤယွၤ ဘၣ်သူၣ်ဘၣ်သးဝဲဒိၣ်မး.
၁၀. ဘၣ်မနုၤအဃိ တၢ်သူၣ်ဝံၣ်သးဆၢန့ၣ် ကဲဝဲတၢ်အရ့ဒိၣ်တခါလၢ တၢ်ဘူၣ်ထီၣ်ဘါထီၣ် အပူၤလဲၣ်.
၁၀ ဖဲပသးဝံၣ်တၢ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. (စံးထီၣ်ပတြၢၤ ၂၈:၇) ပှၤအံၣ်စရ့လးဖိတဖၣ် ထံၣ်ဝဲတၢ်သူၣ်ဝံၣ်သးဆၢဒ် တၢ်အရ့ဒိၣ်တခါလၢ တၢ်ဘူၣ်ထီၣ်ဘါထီၣ်အပူၤ. စီၤပၤဒၤဝံး ဟ့ၣ်လီၤဝဲ ပှၤလ့ၤဝံဖိ ၂၈၈ ဂၤမူဒါ လၢကသးဝံၣ်တၢ်လၢ တၢ်လုၢ်ဟံၣ်ပူၤ. (၁ ကွဲးနီၣ်တၢ် ၂၅:၁, ၆-၈) ဆၢကတီၢ်ခဲအံၤစ့ၢ်ကီး ပပာ်ဖျါထီၣ်လၢ ပအဲၣ်ကစၢ်ယွၤ ခီဖျိလၢ ပသးဝံၣ်စံးထီၣ်ပတြၢၤအီၤ. ပကလုၢ်မုာ်တမုာ် လိၤတလိၤန့ၣ် တမ့ၢ်တၢ်လၢအရ့ဒိၣ်ဘၣ်. ပကဆိကမိၣ်ကွၢ် တၢ်အဒိတခါ. ပကဲပှၤကညီန့ၣ်ပတဲ “ကမၣ်တၢ်အါဘျီ” ဘၣ်ဆၣ် ခီဖျိလၢ ပတဲကမၣ်တၢ်အဃိ ပတတဲတၢ်လၢၤဘၣ်န့ၣ် တအိၣ်ဘၣ်, ဖဲပထီၣ်တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်အခါ ပတဲတၢ်ဒံး. (ယၤကိာ် ၃:၂) ဒ်န့ၣ်အသိး ပမ့ၢ်ဆိကမိၣ်လၢ ပသးဝံၣ်တၢ် ပကလုၢ်တမုာ်ဘၣ်ဒီး ပကလုၢ်တလိၤဘၣ် သနာ်က့ တၢ်ဂ့ၢ်သ့ၣ်တဖၣ်အံၤန့ၣ် တကြၢးတြီပှၤလၢ ပကသးဝံၣ် စံးထီၣ်ပတြၢၤ ယဟိဝၤယွၤဘၣ်.
၁၁. ဒ် စံးထီၣ်ပတြၢၤ ၄၈:၁၃ ပာ်ဖျါထီၣ်ဝဲအသိး ဘၣ်မနုၤအဃိ ပကြၢးပာ်လီၤ တၢ်ဆၢကတီၢ်လၢ ပကမၤဟံၣ်ဖိဃီဖိ တၢ်မၤလိလံာ်စီဆှံအဂီၢ်လဲၣ်.
၁၁ ဖဲပမၤလိ ကစၢ်ယွၤအကလုၢ်ကထါ ဒီးသိၣ်လိပဖိလၢ ကစၢ်ယွၤအဂ့ၢ်အခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. ဖဲမုၢ်အိၣ်ဘှံးနံၤန့ၣ် ပှၤအံၣ်စရ့လးဖိတဖၣ် တမၤတၢ်ဘၣ် ဒီးဖဲတၢ်တနံၤန့ၣ် အဝဲသ့ၣ်ဟံးန့ၢ် တၢ်ဆၢကတီၢ်လၢ ကမၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤ. (၂ မိၤၡ့ ၃၁:၁၆, ၁၇) ပှၤလၢအအိၣ်ဒီးတၢ်သးတီ ဒ်အံၤတဖၣ်န့ၣ် အဝဲသ့ၣ်သိၣ်လိအဖိလၢ ယဟိဝၤယွၤအဂ့ၢ် ဒီးအတၢ်ဂ့ၤတၢ်ဝါတဖၣ်အဂ့ၢ်. ဆၢကတီၢ်ခဲအံၤစ့ၢ်ကီး ပကြၢးဟံးန့ၢ် တၢ်ဆၢကတီၢ်လၢ ပကဖးကစၢ်ယွၤအကလုၢ်ကထါ ဒီးမၤလိအီၤ. ပမ့ၢ်မၤဒ်အံၤန့ၣ် မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ ဒီးကမၤစၢၤပှၤဒ်သိး ပကဘူးထီၣ်ဒီးအီၤ. (စံးထီၣ်ပတြၢၤ ၇၃:၂၈) ဒီးပမ့ၢ်မၤလိသကိး ဟံၣ်ဖိဃီဖိ တၢ်မၤလိလံာ်စီဆှံဒီး ပဖိတဖၣ်န့ၣ် မ့ၢ်ဒၣ်ပမၤစၢၤအဝဲသ့ၣ် ဒ်သိးအဝဲသ့ၣ် ကမၤဂၢၢ်ကျၢၤထီၣ် အတၢ်ရ့လိာ်သးဒီး ပပၢ်အိၣ်လၢမူခိၣ်လၢ အပှဲၤဒီးတၢ်အဲၣ်တၢ်ကွံတဂၤလီၤ.—ဖး စံးထီၣ်ပတြၢၤ ၄၈:၁၃.
၁၂. ယဟိဝၤယွၤထံၣ်ဝဲ တၢ်သူၣ်ထီၣ်ဒဲစီဆှံ ဒီးအတၢ်ပီးတၢ်လီတဖၣ် ဒ်လဲၣ်န့ၣ် ပဒိးန့ၢ်ဘၣ် တၢ်မၤလိမနုၤလဲၣ်.
၁၂ ဖဲပတ့ထီၣ် တၢ်ဘူၣ်ထီၣ်ဘါထီၣ်အလီၢ် ဒီးကွၢ်ထွဲကတဲာ်ကတီၤအီၤအခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. လံာ်စီဆှံတဲဝဲလၢ ပှၤတ့ထီၣ် ဒဲစီဆှံဒီးအတၢ်ပီးတၢ်လီတဖၣ်န့ၣ် မ့ၢ်ဝဲ “တၢ်မၤ” လၢအ “စီဆှံ.” (၂ မိၤၡ့ ၃၆:၁, ၄) မုၢ်မဆါတနံၤအံၤ တၢ်သူၣ်ထီၣ်ဘီမုၢ်ဘျီၣ်ဒိၣ် ဒီးတၢ်သူၣ်ထီၣ်အဂၤတဖၣ်လၢ တၢ်ဘူၣ်ထီၣ်ဘါထီၣ်အဂီၢ်န့ၣ် ယဟိဝၤယွၤထံၣ်ဝဲဒ် တၢ်မၤလၢအစီဆှံ. ဒီပုၢ်ဝဲၢ်မုၣ်ခွါတနီၤန့ၣ် ဟ့ၣ်လီၤအတၢ်ဆၢကတီၢ်အါမးလၢ ကပၣ်ဃုာ်လၢ တၢ်သူၣ်ထီၣ်ဘှီထီၣ် တၢ်မၤအံၤအကျါ. အဃိ ပပာ်လုၢ်ပာ်ပှ့ၤ အဝဲသ့ၣ် အတၢ်ဟ့ၣ်လီၤသးလၢ ဘီမုၢ်အတၢ်မၤတခါအံၤဒိၣ်မး. တကးဒံးဘၣ် အဝဲသ့ၣ် ပၣ်ဃုာ်လၢ တၢ်စံၣ်တဲၤတဲလီၤ တၢ်မၤအပူၤမုာ်မး. ဒီးအဝဲသ့ၣ်တနီၤန့ၣ် အဲၣ်ဒိးမၤ ပှၤလဲၤလၢညါ. အဃိ ဒီပုၢ်ဝဲၢ်သ့ၣ်တဖၣ်အံၤ မ့ၢ်တုၤထီၣ်ထီၣ်ဘးလၢ ကမၤပှၤလဲၤလၢညါန့ၣ် တၢ်အိၣ်ဖှိၣ်သးပှၢ်တဖၣ် တကြၢးထုးယံာ်ထုးနီၣ်အသးလၢ ကတူၢ်လိာ်အဝဲသ့ၣ်ဒ် ပှၤလဲၤလၢညါအသိးဘၣ်. တၢ်အိၣ်ဖှိၣ်သးပှၢ်တဖၣ် မ့ၢ်မၤဝဲဒ်န့ၣ်န့ၣ် မ့ၢ်စ့ၢ်ကီး ကျဲတဘိလၢ ဆီၣ်ထွဲဝဲ တၢ်သူၣ်ထီၣ်ဘှီထီၣ် တၢ်မၤလီၤ. ပဝဲသ့ၣ်တဖၣ်န့ၣ် ပမ့ၢ်တအိၣ်ဒီး တၢ်သ့တၢ်ဘၣ်လၢ တၢ်သူၣ်ထီၣ်ဘှီထီၣ် တကပၤနာ်က့ ပပၣ်ဃုာ်လၢ တၢ်ကွၢ်ထွဲ မၤကဆှဲကဆှီ တၢ်သူၣ်ထီၣ်တဖၣ်အံၤသ့.
၁၃. ပဟ့ၣ်လီၤတၢ်မၤဘူၣ်လၢ ကမၤစၢၤ ဘီမုၢ်တၢ်မၤအဂီၢ်န့ၣ် ပကြၢးထံၣ်အီၤဒ်လဲၣ်.
၁၃ ဖဲပဟ့ၣ်လီၤတၢ်မၤဘူၣ်လၢ ပကဆီၣ်ထွဲ ဘီမုၢ်အတၢ်မၤအခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. ပှၤအံၣ်စရ့လးဖိတဖၣ်န့ၣ် ဖဲအဟဲလၢ ဘူၣ်အခါ အဝဲသ့ၣ်ဘၣ်ဟဲစိာ်ဃုာ်ဒီး တၢ်တမံၤမံၤလီၤ. (၅ မိၤၡ့ ၁၆:၁၆) အဝဲသ့ၣ် ကဘၣ်ဟဲစိာ်တၢ်ဟ့ၣ် လၢအဟ့ၣ်ဝဲန့ၢ် ဒ်တၢ်အိၣ်ဒီးအဝဲသ့ၣ်အသိး. အဝဲသ့ၣ် လဲၤစိာ်တၢ်ဟ့ၣ်ဒ်အံၤန့ၣ် မ့ၢ်ဒ်သိး အကပာ်ဖျါထီၣ် တၢ်စံးဘျုးစံးဖှိၣ် ယဟိဝၤယွၤ ခီဖျိတၢ်လၢအမၤန့ၢ် အဝဲသ့ၣ်တဖၣ်အဃိ. မ့မ့ၢ်ပှၤမီၤ, ပပာ်ဖျါထီၣ်လၢ ပအဲၣ်ယဟိဝၤယွၤ ဒီးပစံးဘျုးစံးဖှိၣ်အီၤခီဖျိ တၢ်လၢအမၤန့ၢ်ပှၤ ကိးမံၤဒဲးကသ့ဒ်လဲၣ်. ပမၤအီၤသ့ခီဖျိ ပဟ့ၣ်လီၤတၢ်မၤဘူၣ်လၢ ပတၢ်အိၣ်ဖှိၣ်အဂီၢ် ဒီးဟ့ၣ်လီၤတၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၢ် ဒ်ပဟ့ၣ်အီၤန့ၢ်ဝဲအသိး. တၢ်မၢဖိပီလူးတဲဝဲလၢ “တၢ်သူၣ်အိၣ်သးအိၣ် မ့ၢ်အိၣ်ပာ်စၢၤန့ၣ် တၢ်ဟ့ၣ်အံၤ မ့ၢ်တၢ်လၢ အလီၤဘၣ်သူၣ်ဘၣ်သး သပှၢ်ကတၢၢ်, မ့ၢ်လၢ ပှၤဟ့ၣ်လီၤတၢ် ဒ်အတၢ်အိၣ်ဝဲအသိး ဒီးတမ့ၢ်အါန့ၢ်ဒံး တၢ်လၢအအိၣ်ဒီးအီၤ အသိးဘၣ်.” (၂ ကရံၣ်သူး ၈:၄, ၁၂) ပဟ့ၣ်တၢ်မၤဘူၣ် မ့ၢ်တန့ၢ်အါအါဘၣ် သနာ်က့ ပမ့ၢ်ဟ့ၣ်အီၤလၢ တၢ်သူၣ်အိၣ်သးအိၣ်အပူၤန့ၣ် ယဟိဝၤယွၤ ဘၣ်သူၣ်ဘၣ်သးဝဲ ခဲလၢာ်.—မၢ်ကူး ၁၂:၄၂-၄၄; ၂ ကရံၣ်သူး ၉:၇.
၁၄. ဒ် ကတိၤဒိ ၁၉:၁၇ ပာ်ဖျါထီၣ်ဝဲအသိး ဖဲပမၤစၢၤ ပဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤတဖၣ်အခါ ယဟိဝၤယွၤ ထံၣ်ဝဲဒ်လဲၣ်.
၁၄ ဖဲပမၤစၢၤ ပဒီပုၢ်ဝဲၢ်လၢ အလိၣ်ဘၣ်တၢ်မၤစၢၤအခါ မ့ၢ်ဝဲကျဲတဘိလၢ ပဘူၣ်ထီၣ်ဘါထီၣ် ယဟိဝၤယွၤ. ယဟိဝၤယွၤ အၢၣ်လီၤဝဲလၢ ပှၤအံၣ်စရ့လးဖိလၢ အမၤစၢၤ ပှၤဖှီၣ်ဖိယာ်ဖိန့ၣ် ယဟိဝၤယွၤ ကဟ့ၣ်ကဒါက့ၤအဝဲသ့ၣ်တၢ်. (၅ မိၤၡ့ ၁၅:၇, ၁၀) ဖဲပဟ့ၣ်မၤစၢၤ ပဒီပုၢ်ဝဲၢ်လၢ အလိၣ်ဘၣ်တၢ်မၤစၢၤ တဘျီဂ့ၤတဘျီဂ့ၤအခါ ယဟိဝၤယွၤထံၣ်ဝဲဒ် ပဟ့ၣ်အီၤတၢ်ဟ့ၣ်. (ဖး ကတိၤဒိ ၁၉:၁၇.) ဖဲစီၤပီလူး လီၤဘၣ်လၢဃိာ်ပူၤအခါ ခရံာ်ဖိလၢ ဖံလံးပံၤတဖၣ် ဟ့ၣ်မၤစၢၤစီၤပီလူး ဒီးစီၤပီလူးတဲဝဲလၢ တၢ်ဟ့ၣ်တခါအံၤမ့ၢ် “တၢ်လုၢ်တၢ်ပာ်လၢ ကစၢ်ယွၤ ဘၣ်သူၣ်ဘၣ်သးဝဲ ဒီးနၢမူနၢဆှီလၢ အမဲာ်ညါလီၤ.” (ဖံလံးပံၤ ၄:၁၈) ဆိကမိၣ်ကွၢ် ပှၤလၢနတၢ်အိၣ်ဖှိၣ်ပူၤတဖၣ် အတၢ်အိၣ်သး ဒီးသံကွၢ်လီၤနသးလၢ ‘ပှၤလၢအလိၣ်ဘၣ် တၢ်မၤစၢၤန့ၣ်အိၣ်ဧါ.’ ဖဲယဟိဝၤယွၤထံၣ်ဝဲလၢ ပဟ့ၣ်လီၤ ပတၢ်ဆၢကတီၢ်, တၢ်ဂံၢ်တၢ်ဘါ, တၢ်သ့တၢ်ဘၣ် ဒီးကျိၣ်စ့ လၢပကမၤစၢၤ ပှၤလၢအလိၣ်ဘၣ် တၢ်မၤစၢၤတဖၣ်အခါ ယဟိဝၤယွၤ သးခုဝဲဒိၣ်မး. ဖဲပမၤတၢ်သ့ၣ်တဖၣ်န့ၣ်အခါ ယဟိဝၤယွၤ ထံၣ်ဝဲဒ် ပဘူၣ်ထီၣ်ဘါထီၣ်အီၤအသိးလီၤ.—ယၤကိာ် ၁:၂၇.
ပအိၣ်ဒီးတၢ်သးခုလၢ တၢ်ဘူၣ်တၢ်ဘါ အမ့ၢ်အတီ
၁၅. ဒ်သိး ပကဘူၣ်ထီၣ်ဘါထီၣ် ယဟိဝၤယွၤအဂီၢ် ပဘၣ်ဟ့ၣ်တၢ်ဆၢကတီၢ် ဒီးတၢ်ဂံၢ်တၢ်ဘါ အါမးသနာ်က့ ဘၣ်မနုၤအဃိ တကဲထီၣ် တၢ်ဝံတၢ်ယိး လၢပဂီၢ်ဘၣ်လဲၣ်.
၁၅ မ့ၢ်လၢပအဲၣ်ယဟိဝၤယွၤအဃိ ပဘူၣ်ထီၣ်ဘါထီၣ်အီၤန့ၣ် ပဘၣ်ဟ့ၣ်တၢ်ဆၢကတီၢ် ဒီးပတၢ်ဂံၢ်တၢ်ဘါအါမး သနာ်က့ တကဲထီၣ်တၢ်ဝံတၢ်ယိး လၢပဂီၢ်ဘၣ်. (၁ ယိၤဟၣ် ၅:၃) အဒိ, ဖိသၣ်တဂၤန့ၣ် အဲၣ်ဒိးဟ့ၣ်အပၢ်တၢ်ဟ့ၣ် အဃိဆွဲန့ၢ်အပၢ်တၢ်ဂီၤတဘ့ၣ်. ဒီးအတၢ်ဆၢကတီၢ် လၢာ်အါမးသနာ်က့ အသးမံဝဲ. မ့ၢ်လၢအအဲၣ်အပၢ်အဃိ အဟ့ၣ်ဘၣ်ဝဲ အပၢ်တၢ်ဟ့ၣ်တခါအံၤန့ၣ် အသးခုဒိၣ်မး. ဒ်န့ၣ်အသိး ဖဲပဘူၣ်ထီၣ်ဘါထီၣ် ယဟိဝၤယွၤအခါ ပဘၣ်ဟ့ၣ်တၢ်ဆၢကတီၢ် ဒီးတၢ်ဂံၢ်တၢ်ဘါ အါမးသနာ်က့ မ့ၢ်လၢပအဲၣ်ယဟိဝၤယွၤအဃိ ပသးခုလီၤ.
၁၆. ဒ် ဧ့ၤဘြံၤ ၆:၁၀ ပာ်ဖျါထီၣ်ဝဲအသိး ဖဲပဂုာ်ကျဲးစၢး မၤတၢ်တမံၤမံၤ ဒ်သိး ကမၤသးခု ယဟိဝၤယွၤအသးအခါ ယဟိဝၤယွၤ ကတူၢ်ဘၣ်ဝဲဒ်လဲၣ်.
၁၆ မိၢ်ပၢ်လၢအပှဲၤဒီး တၢ်အဲၣ်တၢ်ကွံန့ၣ် တမုၢ်လၢ်တၢ်လၢ အဖိတဂၤဒီးတဂၤအအိၣ် ဒ်သိးသိးဘၣ်. အဝဲသ့ၣ်သ့ၣ်ညါလၢ အဖိတဂၤဒီးတဂၤန့ၣ် လီၤဆီလိာ်သး ဒီးအတၢ်သ့တၢ်ဘၣ် တဒ်သိးဘၣ်. ဒ်န့ၣ်အသိး ပပၢ်အိၣ်လၢမူခိၣ်န့ၣ် သ့ၣ်ညါ ပဝဲတဂၤဘၣ်တဂၤ အတၢ်အိၣ်သး. ဘၣ်သ့ၣ်သ့ၣ် နမၤတၢ် ကန့ၢ်အါဒိၣ်န့ၢ်ဒံး ပှၤလၢနသ့ၣ်ညါအီၤ ဒီးနအဲၣ်အီၤတဖၣ်ဒံး. မ့တမ့ၢ် ဘၣ်သ့ၣ်သ့ၣ် မ့ၢ်လၢနသးပှၢ်ထီၣ်, နတၢ်အိၣ်ဆူၣ်အိၣ်ချ့တဂ့ၤဘၣ် ဒီးနအိၣ်ဒီးဟံၣ်ဖိဃီဖိမူဒါအါအဃိ နမၤတၢ်တန့ၢ် ထဲသိးဒီးပှၤဂၤဘၣ်. ဘၣ်ဆၣ် တဘၣ်သးဟးဂီၤတဂ့ၤ. (ကလၤတံ ၆:၄) ယဟိဝၤယွၤ တသးပ့ၤနီၣ် နတၢ်မၤဘၣ်. နမ့ၢ်ဟ့ၣ်ယဟိဝၤယွၤ တၢ်လၢအဂ့ၤကတၢၢ် ဒီးမၤအီၤလၢ တၢ်သူၣ်ဘျၢသးဘျၢအပူၤထီဘိန့ၣ် ယဟိဝၤယွၤ ကဘၣ်သူၣ်ဘၣ်သးဝဲဒိၣ်မး. (ဖး ဧ့ၤဘြံၤ ၆:၁၀.) တၢ်အိၣ်လၢပသးပူၤ ဒ်လဲၣ်န့ၣ် ယဟိဝၤယွၤထံၣ်ဝဲ. ယဟိဝၤယွၤ အဲၣ်ဒိးလၢ ပကသးခု ဒီးပကအိၣ်ဒီး တၢ်သူၣ်မံသးမုာ် လၢပတၢ်ဘူၣ်ထီၣ်ဘါထီၣ်အပူၤ.
၁၇. (က) လၢတၢ်ဘူၣ်ထီၣ်ဘါထီၣ်တဖၣ်အကျါ ပမ့ၢ်သ့ၣ်ညါလၢ ပမၤအီၤတမုာ်ဘၣ် မ့တမ့ၢ် အမ့ၢ်ကီလၢပကမၤအီၤတခါခါန့ၣ် ပကဘၣ်မၤဒ်လဲၣ်. (ခ) တၢ်လၢအမၤသးခုနသးန့ၣ် အိၣ်တမံၤမံၤဧါ. ကွၢ်တၢ်ဂီၤလၢအခိၣ်တီမ့ၢ်ဝဲ “ တၢ်လၢကမၤအါထီၣ် နတၢ်သးခု.”
၁၇ ဘၣ်ဃးဒီး တၢ်ဘူၣ်ထီၣ်ဘါထီၣ်အဂ့ၢ်လၢ ပမၤလိတ့ၢ်အီၤတဖၣ်အံၤအကျါ ပမ့ၢ်သ့ၣ်ညါလီၤပသးလၢ ပမၤအီၤတမုာ်ဘၣ်တခါခါန့ၣ် ပကဘၣ်မၤဒ်လဲၣ်. အဒိ, ပမ့ၢ်သ့ၣ်ညါလီၤပသးလၢ ပမၤနီၢ်ကစၢ် တၢ်မၤလိလံာ်စီဆှံ မ့တမ့ၢ် ဟးစံၣ်တဲၤတဲလီၤတၢ် တမုာ်အါအါဘၣ် ဒီးကီလၢပဂီၢ်န့ၣ် ပကဘၣ်မၤဒ်လဲၣ်. ပမ့ၢ်ဆဲးဂုာ်ကျဲးစၢးမၤ တၢ်လၢပမၤအီၤတမုာ်ဘၣ်န့ၣ် ကယီကယီ ပမၤအီၤ ကမုာ်ထီၣ် ဒီးပကဒိးန့ၢ်အါထီၣ်ဘၣ် အဘျုး. ပတၢ်ဘူၣ်ထီၣ်ဘါထီၣ်န့ၣ် ပထိၣ်သတြီၤအီၤဒီး ပှၤလိာ်ကွဲ တၢ်ဟူးတၢ်ဂဲၤ မ့တမ့ၢ် ပှၤဒ့လိထီၣ်သးလၢ တၢ်ဒ့တၢ်အူသ့. နမ့ၢ်လိာ်ကွဲ တၢ်ဟူးတၢ်ဂဲၤ မ့တမ့ၢ် ဒ့လိထီၣ်တၢ်ဒ့တၢ်အူ ထဲဒၣ်တဘျီတခီၣ်န့ၣ် တမ့ၢ်လၢ နကလဲၤထီၣ်လဲၤထီအါအါဘၣ်. ဘၣ်ဆၣ် နမ့ၢ်ပာ်လီၤနသးလၢ နကမၤအီၤကိးနံၤဒဲးန့ၣ် လၢအခီၣ်ထံးန့ၣ် နကစးထီၣ်မၤအီၤ ထဲတစဲးတမွဲး ဒီးကယီကယီန့ၣ် နကဆဲးမၤအါထီၣ်အီၤ တစဲးတစဲး. ဒီးဖဲနထံၣ်လၢ နလဲၤထီၣ်လဲၤထီ ဒီးနဒိးန့ၢ်ဘၣ်အဘျုးအခါ နကအဲၣ်ဒိး ဆဲးမၤအါထီၣ် ဒီးနမၤအီၤ ကမုာ်လီၤ. ဘၣ်ဃးဒီး တၢ်ဘူၣ်ထီၣ်ဘါထီၣ်စ့ၢ်ကီး ပမၤအီၤဒ်န့ၣ်သ့လီၤ.
၁၈. လၢပတၢ်အိၣ်မူအပူၤ တၢ်အရ့ဒိၣ်ကတၢၢ် လၢပမၤအီၤသ့န့ၣ် မ့ၢ်မနုၤလဲၣ် ဒီးပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ်အဘျုးဒ်လဲၣ်.
၁၈ လၢပတၢ်အိၣ်မူအပူၤ တၢ်အရ့ဒိၣ်ကတၢၢ်လၢ ပကဘၣ်မၤအီၤန့ၣ် မ့ၢ်ဝဲပကဘၣ်ဘူၣ်ထီၣ်ဘါထီၣ် ယဟိဝၤယွၤ လၢပသူၣ်ဒီဖျၢၣ်သးဒီဖျၢၣ်. ပမ့ၢ်မၤဒ်န့ၣ်န့ၣ် ပကအိၣ်ဒီး တၢ်သးခု ဒီးတၢ်သူၣ်မံသးမုာ် လၢပတၢ်အိၣ်မူပူၤ. တကးဒံးဘၣ် ပကအိၣ်ဒီး တၢ်ခွဲးတၢ်ယာ်လၢ ပကဘူၣ်ထီၣ်ဘါထီၣ်ဘၣ် ယဟိဝၤယွၤ လီၤထူလီၤယိာ်. (ကတိၤဒိ ၁၀:၂၂) ဖဲပထံၣ်ဘၣ်ဒီး တၢ်ကီတၢ်ခဲအခါ ပသ့ၣ်ညါလၢ ယဟိဝၤယွၤ ကမၤစၢၤပှၤအဃိ ခဲအံၤန့ၣ် ပတဘၣ်ယိၣ်တၢ်ဘၣ် ဒီးပပာ်ပသး မုာ်မုာ်ခုၣ်ခုၣ်သ့. (ယၡါယၤ ၄၁:၉, ၁၀) ယဟိဝၤယွၤန့ၣ်ကြၢး “ဒိးန့ၢ်ဘၣ် တၢ်လၤတၢ်ကပီၤ ဒီးတၢ်ယူးယီၣ်” လၢအတၢ်ဘၣ်တ့ခဲလၢာ်အအိၣ်. ဒီးမ့ၢ်လၢ ပဘူၣ်ထီၣ်ဘါထီၣ်ဘၣ် ပပၢ်လၢအပှဲၤဒီး တၢ်အဲၣ်တၢ်ကွံတဂၤအံၤအဃိ ပအိၣ်ဒီး တၢ်ဂ့ၢ်အါမံၤလၢ ပကသးခု.—လီၣ်ဖျါ ၄:၁၁.
တၢ်သးဝံၣ် ၂၄ ဟဲဆူယဟိဝၤယွၤအကစၢၢ်
^ လံာ်အဆၢ. 5 မ့ၢ်လၢ ယဟိဝၤယွၤတ့လီၤ တၢ်ခဲလၢာ်အဃိ ပကြၢးဘူၣ်ထီၣ်ဘါထီၣ်အီၤ. ဖဲပဒိကနၣ် ယဟိဝၤယွၤ အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲအခါန့ၣ် ယဟိဝၤယွၤတူၢ်လိာ် ပတၢ်ဘူၣ်ထီၣ်ဘါထီၣ်အီၤလီၤ. လၢတၢ်မၤလိအံၤအပူၤ ပကတဲသကိး တၢ်မၤဃိးခါလၢ အပၣ်ဃုာ်လၢ ပတၢ်ဘူၣ်ထီၣ်ဘါထီၣ်အပူၤ. ဒီးပကသ့ၣ်ညါဘၣ်လၢ ဖဲပဂုာ်ကျဲးစၢးမၤ တၢ်သ့ၣ်တဖၣ်အံၤ လၢအဂ့ၤကတၢၢ်အခါ ပတၢ်သးခုကဟဲအါထီၣ်လီၤ.
