ပ​အိၣ်မူ​ဘၣ်​လၢ ဟီၣ်ခိၣ်​လၢ​အပှဲၤ​ဒီး တၢ်ကီ​တၢ်ခဲ​အဃိ ပ​ကအိၣ်​ဒီး​တၢ်ဃူ​တၢ်ဖိး​အဂီၢ် တမ့ၢ်​တၢ်​လၢ​အညီ​ဘၣ်. ပ​မ့ၢ်​အိၣ်ဒီး​တၢ်ဃူ​တၢ်ဖိး သနာ်က့ ပ​တၢ်ဃူ​တၢ်ဖိး လီၤမၢ်​ကွံာ်ဝဲ​ညီ​ညီ​ဖိ သ့​စ့ၢ်ကီး​လီၤ. ဒ်သိး​ပ​ကအိၣ်​ဒီး တၢ်ဃူ​တၢ်ဖိး​နီၢ်ကီၢ်​အဂီၢ် လံာ်စီဆှံ​ဟ့ၣ်ကူၣ်​ပှၤ​ဒ်လဲၣ်. တကးဒံးဘၣ်​ ဒ်သိး​ပှၤအဂၤ​တဖၣ်​ ကအိၣ်​ဒီး​တၢ်ဃူ​တၢ်ဖိး​နီၢ်ကီၢ်​အဂီၢ် ပ​မၤစၢၤ​အဝဲသ့ၣ်​ က​သ့​ဒ်လဲၣ်. * (ကွၢ်​တၢ်ဂ့ၢ်​အဘျဲၣ်​တက့ၢ်.)

ပ​မ့ၢ်​အိၣ်ဘၣ်​ ဘံၣ်ဘံၣ်​ဘၢဘၢ ဒီး​တၢ်​ဘၣ်ယိၣ်​အလီၢ် မ့ၢ်​တအိၣ်​ဘၣ်​န့ၣ်​ ပ​အိၣ်ဒီး​တၢ်ဃူ​တၢ်ဖိး​နီၢ်ကီၢ်​သ့​လီၤ. တကးဒံးဘၣ်​ ပ​လိၣ်ဘၣ်​တံၤသကိး​လၢ​အဂ့ၤ ဒီး​တၢ်​လၢ​အရ့ဒိၣ်​ကတၢၢ်​န့ၣ်​ ပ​တၢ်​ရ့လိာ်သး​ဒီး ယဟိဝၤ​ယွၤ က​ဘၣ်​ဂ့ၤ​လီၤ. မ့မ့ၢ်​ဒ်​န့ၣ်​န့ၣ်​ ပ​မၤ​အီၤ​က​သ့​ဒ်လဲၣ်.

ယဟိဝၤ​ယွၤ အ​တၢ်သိၣ်​တၢ်သီ ဒီး​အ​တၢ်​ဟံးစု​နဲၣ်ကျဲ​န့ၣ်​ ကဲဘျုး​လၢ​ပဂီၢ်​ထီဘိ​လီၤ. ပ​မ့ၢ်​ဒိကနၣ်​ ယဟိဝၤ​ယွၤ အ​တၢ်​ဟံးစု​နဲၣ်ကျဲ​တဖၣ်​န့ၣ်​ မ့ၢ်ဒၣ်​ပ​ပာ်ဖျါ​ထီၣ်​လၢ ပ​နာ်​အီၤ​ဒီး​ပ​အဲၣ်ဒိး အိၣ်ဃူ​အိၣ်ဖိး​ဒီး​အီၤ​လီၤ. (ယံးရမံယၤ ၁၇:၇, ၈; ယၤကိာ် ၂:၂၂, ၂၃) ပ​မ့ၢ်​မၤ​ဒ်​န့ၣ်​န့ၣ်​ ပ​တၢ်​ရ့လိာ်​ပ​သး​ဒီး ယဟိဝၤ​ယွၤ​က​ဂ့ၤထီၣ်​ တကးဒံးဘၣ်​ ပ​ကအိၣ်​ဒီး တၢ်​သူၣ်မံ​သးမုာ်​စ့ၢ်ကီး​လီၤ. ယၡါယၤ ၃၂:၁၇ တဲဝဲ​လၢ “တၢ်တီ​တၢ်လိၤ​အ​မၤတၢ်​န့ၣ်​ က​မ့ၢ်​တၢ်မုာ်​တၢ်ဖိး, ဒီး​တၢ်တီ​တၢ်လိၤ အ​တၢ်​ကဲထီၣ်​န့ၣ်​ က​မ့ၢ်​တၢ်​အိၣ်ဘှံး ဒီး​တၢ်​သူၣ်မံ​သးမံ လီၤထူ​လီၤယိာ်​လီၤ.” ပ​မ့ၢ်​ဒိကနၣ်​ ယဟိဝၤ​ယွၤ​အ​တၢ်​ဟံးစု​နဲၣ်ကျဲ လၢ​တၢ်​သူၣ်အိၣ်​သးအိၣ်​အ​ပူၤ​န့ၣ်​ ပ​ကအိၣ်​ဒီး တၢ်​သူၣ်မံ​သးမုာ်​နီၢ်ကီၢ်​လီၤ.—ယၡါယၤ ၄၈:၁၈, ၁၉.

ယဟိဝၤ​ယွၤ​ဟ့ၣ်​ပှၤ တၢ်ဟ့ၣ်​လၢ အလုၢ်​ဒိၣ်​ပှ့ၤဒိၣ်​တခါ လၢ​က​မၤစၢၤ​ပှၤ​ဒ်သိး ပ​ကအိၣ်​ဒီး​တၢ်ဃူ​တၢ်ဖိး ဒီး​တၢ်​သူၣ်မံ​သးမုာ်​အဂီၢ်​လီၤ. တၢ်ဟ့ၣ်​အံၤ​မ့ၢ်ဝဲ အသး​စီဆှံ​လီၤ.—မၤတၢ် ၉:၃၁.

တၢ်မၢဖိ​ပီလူး​တဲဝဲ​လၢ တၢ်ဃူ​တၢ်ဖိး​န့ၣ်​ မ့ၢ်ဝဲ “သး​အ​တၤသၣ်” လီၤ. (ကလၤတံ ၅:၂၂, ၂၃) ယွၤ​အသး​စီဆှံ​န့ၣ်​ ဒုးအိၣ်​ထီၣ်ဝဲ  တၢ်ဃူ​တၢ်ဖိး​အဃိ ဒ်သိး​ပ​ကအိၣ်​ဒီး တၢ်ဃူ​တၢ်ဖိး​အဂီၢ် ပ​က​ဘၣ်​ပျဲ​ယွၤ​အသး​စီဆှံ ဟံးစု​နဲၣ်ကျဲ​ပှၤလီၤ. မ့မ့ၢ်​ဒ်​န့ၣ်​န့ၣ်​ ပ​မၤ​အီၤ​က​သ့​ဒ်လဲၣ်.

အဆိ​ကတၢၢ် ပ​က​ဘၣ်​ဖး ယွၤ​အ​ကလုၢ်​ကထါ ထီဘိ​လီၤ. (စံးထီၣ်​ပတြၢၤ ၁:၂, ၃) ဖဲ​ပ​ဖး​လံာ်စီဆှံ​အခါ ပ​မ့ၢ်​ဆိကမိၣ်​ထံ​တၢ်​လၢ ပ​ဖး​အီၤ​တဖၣ်​န့ၣ်​ ပ​က​နၢ်ပၢၢ်ထီၣ်​ ယဟိဝၤ​ယွၤ အ​တၢ်ဘၣ်သး​အိၣ်​ဒ်လဲၣ်​န့ၣ်​လီၤ. အဒိ ပ​က​သ့ၣ်ညါ​ထီၣ်​လၢ ကစၢ်​ယွၤ​န့ၣ်​ ပၢၤဃာ်​အ​တၢ်​သူၣ်မံ​သးမုာ်​ဒ်လဲၣ်​ ဒီး​ဘၣ်​မနုၤ​အဃိ တၢ်ဃူ​တၢ်ဖိး​န့ၣ်​ မ့ၢ်​တၢ်​လၢ​အရ့ဒိၣ်​လၢ​အဂီၢ်​လဲၣ်. ပ​မ့ၢ်​အိၣ်မူ​မၤထွဲ​ဒ် လံာ်စီဆှံ​အ​တၢ်​ဟံးစု​နဲၣ်ကျဲ​အသိး​န့ၣ်​ ပ​ကအိၣ်​ဒီး​တၢ်ဃူ​တၢ်ဖိး ဒီး​တၢ်​သူၣ်မံ​သးမုာ် လၢ​ပ​တၢ်အိၣ်မူ​အ​ပူၤ​လီၤ.—ကတိၤဒိ ၃:၁, ၂.

ခံ​ထံၣ်​တထံၣ်​န့ၣ်​ ပ​က​ဘၣ်​ဃ့​ဘါ​ထုကဖၣ်​ ဒ်သိး​ပ​က​န့ၢ်ဘၣ်​ ယွၤ​အသး​စီဆှံ​အဂီၢ်​လီၤ. (လူၤကၣ်​ ၁၁:၁၃) ယဟိဝၤ​ယွၤ​အၢၣ်လီၤ​ဝဲ​လၢ ပှၤလၢ​အ​ဃ့​တၢ်မၤစၢၤ​န့ၣ်​ က​ဒိးန့ၢ်​ဘၣ်​ “ယွၤ​အ​တၢ်ဃူ​တၢ်ဖိး​လၢ အ​ဒိၣ်န့ၢ်​ယိာ်​န့ၢ် ကယဲၢ်​ပ​သ့ၣ်ညါ​နၢ်ပၢၢ်​တၢ်​န့ၣ်​ က​ပၢၤ​သု​သူၣ်​သု​သး​ဒီး သု​ဆိကမိၣ်​တၢ်​လၢ ယ့ၣ်ၡူး​ခရံာ်​အ​ပူၤ​လီၤ.” (ဖံလံးပံၤ ၄:၆, ၇) ပ​မ့ၢ်​အိၣ်ဘူး​ဒီး​ယဟိဝၤ​ယွၤ ဒီး​ဃ့​အသး​စီဆှံ အ​တၢ်မၤစၢၤ​န့ၣ်​ အဝဲ​က​ဟ့ၣ်​ပှၤ တၢ်​သူၣ်မံ​သးမုာ်​နီၢ်ကီၢ်​လီၤ.—ရိမ့ၤ ၁၅:၁၃.

လံာ်စီဆှံ အ​တၢ်မၤစၢၤ​အဃိ ပှၤ​အါဂၤ​န့ၣ်​အ​တၢ်အိၣ်မူ​ဆီတလဲ ဒီး​ခဲအံၤ​အဝဲသ့ၣ်​ အ​တၢ်​ရ့လိာ်သး​ဒီး ယဟိဝၤ​ယွၤ​ဂ့ၤထီၣ်, ဒိးန့ၢ်​ဘၣ်​တၢ်​သူၣ်မံ​သးမုာ် ဒီး​အိၣ်ဃူ​အိၣ်ဖိး​ဒီး ပှၤအဂၤ​တဖၣ်​န့ၣ်​လီၤ. အဝဲသ့ၣ်​ဆီတလဲ အ​တၢ်အိၣ်မူ​ဒ်လဲၣ်.

ဒီပုၢ်ဝဲၢ်​တနီၤနီၤ တချုး​လၢ​အ​သ့ၣ်ညါ တၢ်မ့ၢ်​တၢ်တီ​ဒံး​ဘၣ်​န့ၣ်​ အဝဲသ့ၣ်​တဖၣ်​ မ့ၢ်​ပှၤလၢ​အ​သူၣ်ဒိၣ်​သးဖျိး ဒီး​အ​ဒူ​အ​ကိၤ​လီၤ. အဝဲသ့ၣ်​ဂုာ်ကျဲးစၢး ဆီတလဲ​အ​တၢ်အိၣ်မူ ဒီး​ခဲအံၤ​ကဲထီၣ်​ ပှၤလၢ​အ​သူၣ်ဂ့ၤ​သးဝါ, အ​တၢ်​သူၣ်စူၤ​သးစူၤ​အါထီၣ်​ ဒီး​အိၣ်ဃူ​အိၣ်ဖိး​ဒီး​ပှၤဂၤ​လီၤ. * (ကွၢ်​တၢ်ဂ့ၢ်​အဘျဲၣ်​တက့ၢ်.) (ကတိၤဒိ ၂၉:၂၂) ခဲအံၤ​ပ​ကကွၢ်​သကိး ဒီပုၢ်ဝဲၢ်​ခွါ​ဒ့ဘ့း ဒီး​ဒီပုၢ်ဝဲၢ်​မုၣ်​ရ့​ခၠိၤ ဆီတလဲ အ​တၢ်အိၣ်မူ​ဒ်လဲၣ်​အဂ့ၢ်​န့ၣ်​လီၤ.

တချုး​လၢ ဒ့ဘ့း သ့ၣ်ညါ​တၢ်မ့ၢ်​တၢ်တီ​ဒံး​ဘၣ်​န့ၣ်​ အဝဲ​ပာ်ဒ့ၣ်​ပာ်ကမၣ်​ပှၤဂၤ ဒီး​တ​ရ့​ဒီး​အဟံၣ်​ဖိ​ဃီဖိ ဂ့ၤဂ့ၤ​ဘၣ်. ဘၣ်ဆၣ်​လၢခံ အဝဲ​သ့ၣ်ညါ​ဝဲ​လၢ က​ဘၣ်​ဆီတလဲ အ​တၢ်​ပာ်သူၣ်​ပာ်သး​လီၤ. အဝဲ​မၤဃူမၤဖိး​တၢ် ဒီး​ပှၤဂၤ​ဒ်လဲၣ်. ဒ့ဘ့း​တဲဝဲ​လၢ “ယ​စးထီၣ်​မၤထွဲ လံာ်စီဆှံ​အ​တၢ် ဟံးစု​နဲၣ်ကျဲ​အဃိ လၢ​ယ​ဟံၣ်ဖိ​ဃီဖိ​အကျါ တၢ်​ယူးယီၣ်​ပာ်ကဲ​လိာ်သး တဂၤ​ဒီး​တဂၤ​အါထီၣ်​လီၤ.”

ဒီပုၢ်ဝဲၢ်​မုၣ်​ရ့​ခၠိၤ န့ၣ်​ဒိၣ်ထီၣ်​ဘၣ်​လၢ တၢ်အိၣ်သး​လၢ​အကီ​အခဲ​အကျါ​လီၤ. အဝဲ​တဲဝဲ​လၢ “တဘျီတခီၣ်​ ယ​အိၣ်ဒီး​တၢ်​သူၣ်ဒိၣ်​သးဖျိး​ဒံး မ့ၢ်​လၢ​ယ​ဒိၣ်ထီၣ်​ဘၣ်​လၢ ဟံၣ်ဖိ​ဃီဖိ​လၢ အပှဲၤ​ဒီး​တၢ်​သူၣ်ဒိၣ်​သးဖျိး​အကျါ​အဃိ​လီၤ.” တၢ်မနုၤ​မၤစၢၤ ရ့​ခၠိၤ​လၢ ကအိၣ်​ဒီး​တၢ်ဃူ​တၢ်ဖိး​လဲၣ်. အဝဲ​တဲဝဲ​လၢ “ယသန့ၤယသး​လၢ ယဟိဝၤ​ယွၤ​အ​အိၣ်​ ခီဖျိ​တၢ်​ဃ့​ဘါ​ထုကဖၣ်​လီၤ.”

ဒ့ဘ့း​ဒီး​ရ့​ခၠိၤ​န့ၣ်​ မၤထွဲ​ဝဲ​လံာ်စီဆှံ အ​တၢ်​ဟံးစု​နဲၣ်ကျဲ ဒီး​ဃ့​ယွၤ​အသး​စီဆှံ အ​တၢ်မၤစၢၤ​အဃိ ခဲအံၤ​အဝဲသ့ၣ်​အိၣ်ဒီး တၢ်ဃူ​တၢ်ဖိး ဒီး​တၢ်​သူၣ်မံ​သးမုာ်​လီၤ. ပ​အိၣ်မူ​ဘၣ်​လၢ​ဟီၣ်ခိၣ်​လၢ အပှဲၤ​ဒီး​တၢ်​သဘံၣ်​သဘုၣ်​သနာ်က့ ပ​အိၣ်ဒီး​တၢ်​သူၣ်မံ​သးမုာ်​သ့ဝဲ​လီၤ. တၢ်​သူၣ်မံ​သးမုာ်​န့ၣ်​ က​မၤစၢၤ​ပှၤလၢ ပ​က​အိၣ်ဃူ​အိၣ်ဖိး ဒီး​ပ​ဟံၣ်ဖိ​ဃီဖိ တကးဒံးဘၣ်​ က​အိၣ်ဃူ​အိၣ်ဖိး​ဒီး ပ​ဒီပုၢ်ဝဲၢ်​တဖၣ်​လၢ တၢ်​အိၣ်ဖှိၣ်​အ​ပူၤ​လီၤ. ယဟိဝၤ​ယွၤ တဲဝဲ​လၢ “အိၣ်ဃူ​လိာ်​ဖိးလိာ်​သု​သး​ဒီး ပှၤ​ကိးဂၤ​ဒဲး​တက့ၢ်.” (ရိမ့ၤ ၁၂:၁၈) ပ​မၤ​ဒ်အံၤ​က​န့ၢ်​အဂီၢ် ကညီ​ဧါ. ဒီး​ဘၣ်​မနုၤ​အဃိ ပ​က​ဘၣ်​အိၣ်ဃူ​အိၣ်ဖိး​ဒီး ပှၤအဂၤ​တဖၣ်​လဲၣ်.

ဖဲ​ပ​စံၣ်တဲၤ​တဲလီၤ ယွၤ​အဘီ​အမုၢ်​အဂ့ၢ်​အခါ​န့ၣ်​ မ့ၢ်ဒၣ်​ပ​စံၣ်တဲၤ​တဲလီၤ တၢ်ကစီၣ်​ဘၣ်ဃး​ဒီး တၢ်ဃူ​တၢ်ဖိး​အဂီၢ်​လီၤ. (ယၡါယၤ ၉:၆, ၇; မးသဲ ၂၄:၁၄) ပှၤ​တနီၤနီၤ ဘၣ်သူၣ်​ဘၣ်သး​ဝဲ​အဃိ တူၢ်လိာ်ဝဲ​တၢ်မ့ၢ်​တၢ်တီ​လီၤ. လၢတၢ်န့ၣ်​အဃိ တၢ်မ့ၢ်​ကဲထီၣ်​အသး​လၢ ဟီၣ်ခိၣ်​ချၢ​ဒ်လဲၣ်​ဂ့ၤ ဒ်လဲၣ်​ဂ့ၤ အဝဲသ့ၣ်​တဖၣ်​ တ​သူၣ်ကိၢ်​သးဂီၤ​တၢ်​ဒိၣ်​တလၢ​ဘၣ်​ ဒီး​တ​သူၣ်ဒိၣ်​သးဖျိး​တၢ်​စ့ၢ်ကီး​ဘၣ်. ခဲအံၤ​အဝဲသ့ၣ်​အိၣ်ဒီး တၢ်​မုၢ်လၢ်​နီၢ်ကီၢ်​လၢ ခါဆူညါ​အဂီၢ် ဒီး​အဝဲသ့ၣ်​အဲၣ်ဒိး “ဃု​တၢ်ဃူ​တၢ်ဖိး” လီၤ.—စံးထီၣ်​ပတြၢၤ ၃၄:၁၄.

ဘၣ်ဆၣ်​ ပှၤ​တနီၤနီၤ​န့ၣ်​ တ​အဲၣ်ဒိး​ဒိကနၣ်​ တၢ်သးခု​ကစီၣ်​လၢ ပ​စံၣ်တဲၤ​တဲလီၤ​အီၤ​တဖၣ်​ဘၣ်. (ယိၤဟၣ်​ ၃:၁၉) ပှၤ​မ့ၢ်​တ​ဒိကနၣ်​သနာ်က့ ယွၤ​ဟ့ၣ်​ပှၤ​အသး​စီဆှံ ဒ်သိး​ပ​သး​သု​တ​ဟးဂီၤ တဂ့ၤ​အဂီၢ်​လီၤ. ဖဲ​ပ​လဲၤ​စံၣ်တဲၤ​တဲလီၤ​တၢ်​အခါ​န့ၣ်​ ယွၤ​အသး​စီဆှံ က​မၤစၢၤ​ပှၤ​ဒ်သိး ပ​က​ဆဲး​အိၣ်ဒီး​တၢ်ဃူ​တၢ်ဖိး ဒီး​တၢ်​ယူးယီၣ်​ပာ်ကဲ​န့ၣ်​လီၤ. ပ​မ့ၢ်​မၤ​ဒ်​န့ၣ်​န့ၣ်​ မ့ၢ်ဒၣ်​ပ​မၤထွဲ ယ့ၣ်ၡူး​အ​တၢ်ကတိၤ​လၢ​အမ့ၢ် “တုၤ​သု​လဲၤနုာ်​လၢ​ဟံၣ်​ပူၤ​ဒီး, ဆိၣ်ဂ့ၤ​အီၤ​တက့ၢ်. ဒီး​တၢ်​လၢ​ဟံၣ်​တဖျၢၣ်​န့ၣ်, မ့ၢ်​ကြၢး​ဒီး, မ်​သု​တၢ်ဃူ​တၢ်ဖိး က​ဘၣ်​အီၤ​တက့ၢ်, မ့မ့ၢ်, မ့ၢ်​တ​ကြၢး​ဘၣ်​ဒီး, မ်​သု​တၢ်ဃူ​တၢ်ဖိး ဟဲက့ၤ​ကဒါက့ၤ​ဆူ​သု​အိၣ်​တက့ၢ်.” (မးသဲ ၁၀:၁၁-၁၃) ပ​မ့ၢ်​အိၣ်ဒီး တၢ်​ပာ်သူၣ်​ပာ်သး​ဒ်အံၤ​န့ၣ်​ ပှၤဂၤ​မ့ၢ်​တဲ​ပှၤ​ဒ်လဲၣ်​ဒ်လဲၣ်​ဂ့ၤ, မ့ၢ်​မၤ​ပှၤ​ဒ်လဲၣ်​ဒ်လဲၣ်​ဂ့ၤ ပ​က​ဂုာ်ကျဲးစၢး အိၣ်ဃူ​အိၣ်ဖိး​ဒီး​ပှၤဂၤ​လီၤ. ပ​က​ဘၣ်​သ့ၣ်နီၣ်​ထီၣ်​လၢ တချုး​တၢ်​အ​ကတၢၢ်​ဟဲ​ဒံး​ဘၣ်​န့ၣ်​ ပ​အိၣ်ဒီး​တၢ်ခွဲး​တၢ်ယာ်​လၢ ပ​က​ဆဲး​မၤစၢၤ ပှၤဂၤ​န့ၣ်​လီၤ.

ပဒိၣ်​ပပှၢ်​တဖၣ်​မ့ၢ်​ထီဒါ ပ​တၢ်​စံၣ်တဲၤ​တဲလီၤ တၢ်မၤ​သနာ်က့ ပ​ဂုာ်ကျဲးစၢး မၤဃူမၤဖိး​တၢ်​ဒီး​အဝဲသ့ၣ်​ ခီဖျိ​ပ​တဲတၢ်​ဒီး​အဝဲသ့ၣ်​လၢ တၢ်​ယူးယီၣ်​ပာ်ကဲ​အ​ပူၤ​လီၤ. အဒိ လၢ​ကီၢ်အၤဖြံၤကၤ​အ​ပူၤ​န့ၣ်​ ပဒိၣ်​ပပှၢ်​တဖၣ်​ တ​အဲၣ်ဒိး​လၢ​ပ​သူၣ်ထီၣ်​ ဘီမုၢ်ဘျီၣ်ဒိၣ်​ဘၣ်. ဘၣ်ဆၣ်​ ပ​ဒီပုၢ်ဝဲၢ်​တဖၣ်​ သ့ၣ်ညါ​ဝဲ​လၢ အဝဲသ့ၣ်​က​ဘၣ်​ဂုာ်ကျဲးစၢး မၤ​ဘၣ်ဂီၢ်က့ၤ​တၢ်ကီ​တၢ်ခဲ​တခါ​အံၤ လၢ​တၢ်ဃူ​တၢ်ဖိး​အ​ပူၤ​လီၤ. အဝဲသ့ၣ်​ဆှၢလီၤ​ဝဲ ဒီပုၢ်ဝဲၢ်​ခွါ​တဂၤ​လၢ အ​မ့ၢ်တ့ၢ်​မံးၡ့ၣ်နရ့ၣ်​လၢ ထံကီၢ်​တဘ့ၣ်​အံၤ​အ​ပူၤ လၢ​က​လဲၤဝဲ​ဆူ ကီၢ်အၤဖြံၤကၤ အ​ပဒိၣ်​တဂၤ​လၢ​အ​အိၣ်​လၢ ဝ့ၢ်​လိ​ဒိၣ်​ ကီၢ်အဲကလံး​အ​ပူၤ​လီၤ. ဒီး​အဝဲ​က​ဘၣ်​ တဲ​နၢ်ပၢၢ်​အီၤ​လၢ​ဘၣ်ဃး​ဒီး ယဟိဝၤ​ပှၤအုၣ်​အသး​တဖၣ်​ အ​တၢ်မၤ​န့ၣ်​ တ​ကဲထီၣ်​တၢ်​လီၤဘၣ်ယိၣ်​ လၢ​ထံကီၢ်​အဂီၢ်​ဘၣ်.

ဒီပုၢ်ဝဲၢ်​တဂၤ​အံၤ​တဲဝဲ​လၢ “ဖဲ​ယ​လဲၤ​တုၤလၢ​ရူ​အခါ ယ​ထံၣ်​ပိာ်မုၣ်​တဂၤ​လၢ အ​မၤတၢ်​ဖဲ​န့ၣ်. အဝဲ​သိး​ဝဲ​တၢ်ကူ​တၢ်ကၤ​လၢ ကလုာ်ဒူၣ်​တဒူၣ်​လၢ ယ​မၤလိ​အကျိာ်​န့ၣ်​လီၤ. လၢတၢ်န့ၣ်​အဃိ ယ​ဆၢဂ့ၤ​ဆၢဝါ​အီၤ​လၢ အၤဖြံၤကၤ​အကျိာ်​န့ၣ်​လီၤ. အဝဲ​ကမၢ​ကမၣ်​ဒိၣ်မး ဒီး​တဲဝဲ​လၢ ‘န​ဟဲ​ဖဲ​အံၤန့ၣ်​ တၢ်ဂ့ၢ်​အိၣ်​တမံၤမံၤ​ဧါ.’ လၢ​တၢ်​ယူးယီၣ်​ပာ်ကဲ​အ​ပူၤ ယ​တဲ​အီၤ​လၢ ယ​အဲၣ်ဒိး​ထံၣ်​ဒီး​ပဒိၣ်​တဂၤ​အံၤ​လီၤ. အဝဲ​ဆဲးလီၤ​လီတဲစိ​လၢ ပဒိၣ်​တဂၤ​အံၤ​အ​အိၣ်​ ဒီး​ဖဲ​ပဒိၣ်​အံၤ​ထံၣ်​ယၤ​အခါ အဝဲ​ဆၢဂ့ၤ​ဆၢဝါ​ယၤ လၢ​အၤဖြံၤကၤ​အကျိာ်​လီၤ. ဖဲ​န့ၣ်​ယ​တဲပၠး​အီၤ ယဟိဝၤ​ပှၤအုၣ်​အသး​တဖၣ်​ အ​တၢ်ဖံး​တၢ်မၤ​အဂ့ၢ် ဒီး​အဝဲ​ဒိကနၣ်​ဝဲ​ဂ့ၤဂ့ၤ​လီၤ.”

ဖဲ​ပဒိၣ်​တဂၤ​အံၤ သ့ၣ်ညါ​ဘၣ်​ဝဲ ယဟိဝၤ​ပှၤအုၣ်​အသး​တဖၣ်​အဂ့ၢ်​အခါ အ​တၢ်ထံၣ်​ဆီတလဲ​ဝဲ​လီၤ. လၢခံ​ပဒိၣ်​တဖၣ်​ ဟ့ၣ်​အခွဲး​လၢ ပ​က​သူၣ်ထီၣ်​ ဘီမုၢ်ဘျီၣ်ဒိၣ်​တဖၣ်​န့ၣ်​လီၤ. လၢတၢ်န့ၣ်​အဃိ ပ​ဒီပုၢ်ဝဲၢ်​ဖဲ​န့ၣ်​တဖၣ်​ သးခုဝဲ​ဒိၣ်မး​လီၤ. ဖဲ​အံၤ​ပ​ထံၣ်ဘၣ်​လၢ ပ​မ့ၢ်​ရ့​ဒီး​ပှၤဂၤ​လၢ တၢ်​ယူးယီၣ်​ပာ်ကဲ​န့ၣ်​ မ့ၢ်ဒၣ်​ပ​ဒုးအိၣ်​ထီၣ်​တၢ်ဃူ​တၢ်ဖိး​လီၤ.

မုၢ်မဆါ​တနံၤ​အံၤ ယဟိဝၤ​ယွၤ​အ​ပှၤ​ဂီၢ်မုၢ်​တဖၣ်​ ဘူၣ်ထီၣ်​ဘါထီၣ်​ ယဟိဝၤ​ယွၤ​လၢ တၢ်ဃူ​တၢ်ဖိး​အ​ပူၤ​အဃိ အဝဲသ့ၣ်​အိၣ်ဘၣ်​လၢ နီၢ်သး​ပၤရဒံစူး​အ​ပူၤ​လီၤ. ပဝဲ​တဂၤ​စုာ်စုာ် ပ​မ့ၢ်​မၤ​အါထီၣ်​တၢ်ဃူ​တၢ်ဖိး​န့ၣ်​ ပ​တၢ်အိၣ်မူ​က​ပှဲၤ​ဒီး တၢ်ဃူ​တၢ်ဖိး ဒီး​တၢ်​သူၣ်မံ​သးမုာ်​လီၤ. ပ​မ့ၢ်​မၤ​ဒ်အံၤ​န့ၣ်​ ပ​က​ဒိးန့ၢ်​ဘၣ်​ ယဟိဝၤ​ယွၤ​အ​တၢ်​ဘၣ်သး ဒီး​ပ​က​အိၣ်မူ​ဘၣ်​လၢ ဟီၣ်ခိၣ်​သီ​အ​ပူၤ​လီၤ. ဒီး​အဝဲ​က​ဟ့ၣ်​ပှၤ တၢ်ဃူ​တၢ်ဖိး​လီၤထူ​လီၤယိာ်​လီၤ.—၂ ပ့းတရူး ၃:၁၃, ၁၄.